مَرقُس 2
2
شِفا پیا فِلج
1دُما چَن روژ، وخدی عیسی یِگِلی‌تِر گِلاهُاردی اَرِه شیَر کَفَرناحوم، مردِم خَوَردارا بین گه عیسی هاتیَس اَرِه مال. 2بِری جیَم بین اَر اورَه، جُ‌جُ هُنَ گه نوا دِراخِل مال‌یش جا نوئی، ئو عیسی کلوم خدا اَرِنو موعظَه مَهَردی. 3اِ ایی وخدَ، بِری اژ رئی رَسین ئو پیا فِلجی گه چوار نفر گِرتوئیون اَررُی دس، آوِردون‌ِ نوا. 4وخدی اِ زور جیَمیَت نتونستو بارنی اَرِه تک عیسی، بِنیائو نا طاق بِلِنگ سر عیسی‌ئو هیزدا. دُما هیزدائِن طاق، رَختاوی گه فِلَجِهَه اَر رُی حیوَتوئی رِئو کِردَ هُار. 5وخدی عیسی ایمو اونَ دیتی، وِتیَ فِلَجِهَه: «رولَه، گنائَلِت بَشخیان.» 6بِری اژ مَلِمَل تورات گه نیشتوئین اَر اورَه، اِ دل ووژونَ موئِتو: 7«اَرِه‌چَه ایی پیا هُنَ وِتی؟ یَه کِفِرَ! کی بِخِر اژ خدا مَتونی گنائَل بوئَشخی؟» 8عیسی هِرازِه اِنوم روحِ ووژی فیَمی گه چه فگِری ها نوم دِلو ئو وِتیَ بینو: «یَه چه فگِری کَ ها نوم دلتو؟ 9وِتِن کُمینو وَه ایی فِلجَ آسُتِرَ، یَگه ”گنائَلِت بَشخیان“ یا یَگه ”هیزگِر ئو رَختاوِت هیزدَ ئو بِچوءَ رئیا“؟ 10مِنتائای تاگَه بِذانینو گه کُر اِنسو اَررُی زَمی ایی قدِرت‌واختیارَ دیری گه گنائَل بوئَشخی» -عیسی وِتیَ پیا فِلَجِهَه: 11«وَه تونَ موشِم، هیزگِر بوس اَرسر پا، رَختاوِت هیزدَ ئو بِچُ اَرِه مال!» 12اَ پیا فِلجَ هیزگِرتی ئو هِرازِه رَختاوی هیزداتی ئو اِوَر چیَم کُلو اژ اورَه چیَ دِریر. کُل بِلُجوئیو هات ئو هَرهُنَ گه خدائو جِلالَ ما، موئِتو: «هرگِس هُنَ چیمونی نِئیَ.»
دَوَت اژ لاوی
13عیسی یِگِلی‌تِر چیِ لو دریاچَه. مردِم کُل ماهاتِنی اَرِه تک ئو عیسی تیَلیمونَ ماتی. 14وخدی گه مَچیاءَ رئیا، لاوی کُر حَلْفای دیتی گه نیشتوئی اِنوم دَکه‌ی گه خِراجونَ مَگِرت. وِتَ بی: «وَه تُرّ مِنا بوری.» او هیزگِرتی ئو وَه تُرّ عیسی‌آ کَتِ رئی.
15وخدی عیسی اِنوم مال لاوی نیشتوئی اَرسر سِفِرَه، بِری اژ خِراجگیرَل ئو گناکارَل وَه‌گَرد او، ئو شاگردَلی اَر سر یِه سِفِرَه بین، اَرِیَگه بِری اَژینو مِرید بینی. 16وخدی مَلِمَل تورات گه اژ شیخَل فرقَه فَریسی بین، عیسی‌ئو دی گه وَه‌گَرد گناکارَل ئو خِراجگیرَل اَرسر یِه سِفِرَه نیشتیَ، وِتونَ شاگردَل عیسی: «اَرّا عیسی وَه‌گَرد خِراجگیرَل ئو گناکارَل خوراکَ میری؟» 17عیسی وخدی یَه شنَفتی وِتیَ بینو: «مریضَلِن گه حکیمونَ مِ، نه آمَل آزا. مِه اَرِه دَنگ کِردِن آمَل صالح نِهاتِمَ بلکِم هاتِمَ تاگَه گناکارَل دَوَت کَم.»
پِرسِ‌جو کِردِن اِبارَه روژی گِرتِن
18اِسگَه شاگردَل یحیی ئو فَریسیَل وَه روژی بین، بِری هاتِن اَرِه تک عیسی ئو وِتو: «اَرِه‌چَه شاگردَل یحیی ئو شاگردَل فَریسیَل روژیَ مَگِرِن، مِنتائای شاگردَل تو روژی نِمَگِرِن؟» 19عیسی جوواو داتی: «مَر ماو مِمونَل داوات تا زمونی گه ذُما ها گَردو، روژی بِگِرِن؟ تا زمونی گه ذُما ها گَردو نِمَتونِن روژی بِگِرِن. 20زمونی مای گه ذُما اَژینونَ مَگِرِن. اَسَه اِ اَ روژِلَ روژیَ مَگِرِن.
21«هُیچ کس پارچَه نووئی گه آو نَچیَ پَرو نِمِهِه اَر قِ جِنِک کُینَه. اَرّ هُنَ بِهِه، اَ پَروءَ اَژی جیا ماوتی، نوو اژ کُینَه جیا ماو ئو بَتِرَ میَری. 22ئو هَمیش هُیچ کس شِراو نوو نِمَرِشِنی اِنوم مَشگَل کُینَه. اَرّ هُنَ بِهِه، اَ شِراوَ مَشگِلَ مَتوقِنی، ئو هَرهُنَ، هم شِراو ئو هم مَشگَل هَردِک اژ بِنَ مَچِن. بلکِم شِراو نوو باس بِرِشِنین اِنوم مَشگَل نوو.»
صائای روژِ شَمَه مقدّس
23اِ یَکی اژ روژَل شَمَه مقدّس، عیسی اِنومجا زمینَل گَنِم ردَ موئیا ئو شاگردَلی هَرهُنَ گه مَچیان، بِنیائو نا اَر چِنین گُلَل گَنِم. 24فَریسیَل وِتونَ بی: «اَرِه‌چَه شاگردَلِت کاری مَهَن گه اِنوم روژ شَمَه صِلا نِرِنی؟» 25عیسی جوواو داتی: «مَر تا اِسگَه اِنوم نُسَخ مقدّس نَحیوَنِتونَ گه داوودِ پاتِشا چَه کِردی وخدی ووژ ئو کسَلی گه وَه‌گَرد بینی، میتاج ئو وِرسِنی بین؟ 26گه چطور او اِنوم زَمو اَبیّاتار، کاهن اعظم، چی اِنوم مال خدا ئو نونی گه پیشکَشی بوئی اَر خدا هُاردی ئو داتیَ کسَلی گه وَه‌گَرد بینی، وَه‌یاآگه هُاردِن اَ نونَ فَخَد اَرِه کاهنَل صِلا بی.» 27اَسَه وِتیَ بینو: «شَمَه مقدّسو اَرِه اِنسو ناءَ، نه اِنسو اَرِه شَمَه. 28اَسَه کُر اِنسو جُ‌جُ صائای روژ شَمِه‌یش هَس.»
@ 2024 Korpu Company