مَرقُس 4
4
متل کشاورز
1یِگِلی‌تِر عیسی اِلو دریاچَه بِنیا نا اَر تیَلیم دائِن. جیَمیَت فِرِه‌ی دورو گِرت هُنَ گه اژ ناحِلاجی، چی نیشت اَر نوم قائِقی گه اِ دریاچَه بی، ئو کُل جیَمیَت اِلو دریاچَه اِنوم حشگی بین. 2اَسَه وَه متلَل، چیئَل فِرِه‌ی تیَلیمو داتی. او اِ تیَلیم ووژ وِتیَ بینو: 3«گوش بِگِرِن! روژی کشاورزی اَرِه تُئم آوشدِن چیَ دِریر. 4وخدی تُئمَ ماوشدی، قِری اژ تُئمِهَه کَتِن اِنوم رئی ئو مَلَل هاتِن هُاردِنو. 5قِری‌تِر اژ تُئمَل کَتِن اِنوم زَمی گُلور گه فِرَه خاک ناآشدی. اَسَه زوی سُزو کِرد، اَرِیَگه خاک کم بیتی. 6مِنتائای وخدی هویَر داتی، کُل سُتِن ئو حُشگا بین، اَرِیَگه ریشیو ناآشد. 7قِریشی کَتِن اِنوم دِرِکو. دِرِکَل کَلِنگ بین، اونَلو خفَه کِرد ئو ثمرونی اَژی ناهاتِ دس. 8تُئمَلی گه مَنوئین کَتِن اَررُی زَمی خو ئو چِخِرو دا، سُزو کِرد، ئو ثمرو دا، فِرَه بین، قِری سی، قِری شص ئو قِری صد بِرُوَرا بین.» 9اَسَه عیسی وِتی: «هر کی گوش اَرِه شِنَفتِن دیری، گوش بِگِری.»
10وخدی گه عیسی تَنیا بی، اَ دوازَه نفرَ ئو کسَلی گه اَ دورا بینی، اِبارَه متلَل اَژینو پِرسی. 11وِتیَ بینو: «فیَم سِرِّ پاتِشائی خدائو داسَ بینتو، مِنتائای اَرِه مردِمی گه هانِ در، کُل چی، اِجور متلَ؛ 12تاگَه:
«سِیل کَن، مِنتائای حالیو نو،
بشتوئِن، مِنتائای نفیَمِن،
تاناخواد گِلابیرِن ئو گنائَلو بَشخیا بو!“»
13اَسَه عیسی وِتیَ بینو: «یانی ایی متلَ نفیَمینو؟ اَسَه چطورَ مَتونینو متلَلی‌تِر بِفیَمینو؟ 14کشاورز کلوم کشتَ مِهِه. 15بِری اژ مردِم هَر گانَ تُئمَل اِ لو رئی، اَر اورَه گه کلوم کشتَ ماو؛ هَریَگه کلومَ مَشتوئِن، شِطو هِرازِه مای ئو کلومی گه اِنومو کِشت بیَ، مُئزی. 16کسَلی‌تِر، گانَ تُئمَلی گه اَررُی گُلور کِشت بینَ؛ اونَل کلومَ مَشتوئِن ئو هِرازِه وَه خَوشیَ مَچِنِ گِرد اَوَه، 17مِنتائای اَرِیَگه اِنوم ووژو ریشی نِرِن، فَخَد گِری طاخَتَ مارِن. اَسَه وخدی گه وَه‌سونگَ کلوم، بِکُوئِن اِنوم سخدی ئو عذاو، هِرازِه اژ ایمونونَ مَکُوئِن. 18بِری‌تِر، گانَ تُئمَلی گه اِنوم دِرِکَل کِشت بینَ؛ کلومَ مَشتوئِن، 19مِنتائای هول ایی دنیاءَ ئو فنی گه مالِ‌منال وَه اِنسونَ مِ ئو هوس چیئَلی‌تِرَ ماءَ دَرینو ئو کلوم اِ دَرینو خفَه مِهِه ئو بی‌ثمرَ مِهِیتی. 20مِنتائای تُئمَلی گه اِ زَمی خو کِشت بینَ گانَ کسَلی گه کلوم خداءَ مَشتوئِن ئو مَچِنیِ گِرد ئو سی ئو شص ئو صد بِرُوَر ثمرَ مارِن.»
متل چراخ لمپا
21عیسی وِتیَ بینو: «مَر چراخ لمپا مارینو تاگَه اَوَه بِنینون‌ِ ژیر سَلَه یا تخت؟ مَر اَوَه نِمَنینون اَررُی چراخدونی؟ 22اَرِیَگه چیئی پنهو نیَ گه آشگار نو، ئو چیئی قام نیَ گه نَکُوءِ در. 23هر کی گوش اَرِه شِنَفتِن دیری، گوش بِگِری.» 24اَسَه اِدوارَه وِتیَ بینو: «حُواستو بو چَه مَشتوئینو. وَه اَ کیلَه گه مَپِیمُینو، اَرِه هُمِه‌یش وَه اَ کیلَه مَپِیمُنِن، ئو جُ‌جُ ویشتِریش. 25اَرِیَگه وَه اَوَه گه دیری، ویشتِرَ میَن ئو اژ اَوَه گه نِری، هَر اَویشَ گه دیری اَژینَ مَسینِنی.»
متل تُئمی گه سُزَ مِهِه
26عیسی وِتی: «پاتِشائی خدا اِجور پیای کَ، گه تُئمَ ماوژی اَر زَمی. 27شو ئو روژ، او چه اِ خاو بو چه اِخَوَر، اَ تُئمَ سُزَ مِهِه ئو کَلِنگَ ماو. چطور هُنَ ماو؟ نِمَذانی. 28زَمی ووژ اَرِه ووژ ثمرَ ماری: اول سُریت، دُما اَوَه حوشَه سُزَ مِهِه ئو اَسَه حوشَه پِر اژ دُنا ماو. 29وخدی دُ برَسی، کشاورز هِرازِه داس هیزَمِ، اَرِیَگه وخد درو رَسیَ.»
متل دُ خردل
30عیسی اِدوارَه وِتی: «پاتِشائی خدا بوشیم هرگا چَه، یاگَه وَه چه متلی مَتونیم تیَریف کِیمی؟ 31اَوَه اِجور دُ خردلی کَ. دُ خردل، گُجَرتِرین دُنی کَ گه ماوژِن اِنوم زَمی، 32مِنتائای وخدی آوشدو، سُزَ مِهِه ئو اژ کُل گیائَل باخ کَلِنگتِرَ ماو، پَلَل کَلِنگا ماوتی، هُنَ گه مَلَل آسمونَ مان ئو اِ سا پَلَلی لونَه دُریسَ مَهَن.»
33عیسی وَه متلَل فِرِه‌ی اِجور یَه، تا جای گه مَتونِستو بفیَمِن، کلوم خدا اَرِنونَ موئِتی. 34او چیئی بی‌مَتَل وَه بی نِموئتِنی؛ مِنتائای وخدی گه وَه‌گَرد شاگردَلی تَنیا بی، کُل چی اَرِنو میَنا مَهَردی.
آروم کِردِن رُحِیل دریاچَه
35اَ روژَ وخدی بیَ ایوارَه، عیسی وِتیَ شاگردَلی: «بورِن بِچیم اَرِه اَکو دریاچَه.» 36اونَل اَ جیَمیَتونَ هُیشت اَر جا، چِن، ئو عیسی‌ئو هَر وَه اَ قائِقا گه اِنوم بیتی، وَه‌گَرد ووژو بِرد. چَن قائِق‌تِریش وَه‌گَردو بی. 37وَه یِگِل بیَ رُحِیل سخدی. موجَل هُنَ ماوِنتِن اَر قائِق گه قائِقِهَه داشدی اژ آو پِرا موئیا. 38مِنتائای عیسی اِ تیَه قائِق، سر نائیتی اَررُی بالیشت ئو حیوَتوئی. شاگردَل کِردونَ خَوَر ئو وِتو: «استاد دَروَن نیئین گه دیریم اژ بِنَ مَچیم؟» 39عیسی هیزگِرتی ئو تُنا بی اَر وا ئو وِتیَ دریاچَه: «بِکُم! سِتارِت بِگِری!» اِسَه وا نیشت‌اِرا ئو کُل جا آروم بی. 40اَسَه وِتیَ شاگردَلی: «اَرِه‌چَه هُنَ زِلَ‌تِراقا بینونَ؟ مَر هَنی ایمو نِرینو؟» 41اونَل اَخَ زِلَ‌تِراقا بوئین، موئِتونَ یَکتِری: «یَه دیَر کیَ گه جُ‌جُ وا ئو دریاچه‌یش فِربون اَژینَ میَرِنی!»
@ 2024 Korpu Company