Luk 9
9
Jésu gi anjama gai ga moac ca sua
(Matié 10:5–15; Mark 6:7–13)
1Jésu yau anjama ga moac ca sua lé, ddi bigé dono do taié habé ga isini cong, dang dono do bogé kalang ga hoamya labia. 2Kardené ddi gigé ca kandia dura nô do Leu do Kumu toi toa bua, kandia bo kalang ga hoamya labia bu’. 3Ddi yégé wa: Ddo keng aié henga pena kobegeng ca orang ’eno, kau cilang, kau magela, kau wo, kau laré, kau badigé sua. 4Kiddin mam ga ka yalgeng na, ga jima duro gulong lé bera oré gogeng. 5Kiddin gani gani mam ga kalanga kain yalegeng na, ga dda gulong gogé, ga ddagada ususu do gondugeng cong, kua da jia henga ga hendé caigé. 6Ga anjama lé ’yé, ké dal gulong mam, ké dor Nô do Ddari, ké bigé kalang ga hoamya labia a kiddin mam.
’Eremé go Hérod koi
(Matié 14:1–12; Mark 6:14–29)
7A kiddin lé na, kelma Hérod jé kual ca henga ga ké ba légé lé mam, ama ddi sol toi ’eno, cawa ga pena yei wa: Jâ go disé kalang to kanga belang cindi a duro ga maré. 8Ga ddang yé wa: Na Eli jogang ddi, kané yé wa: Na go cogelé kebu go Kumu koi go tumua bela ddiang cindi a duro ga maré. 9Ama Hérod yé wa: ’Enung wal Jâ cai, ama kema go wa lo henga ga ’enung wa jo kual gogé lé kua mam na, na wang ga? Ddi dar ca ddia solé Jésu.
Jésu bigé kalang dubu bai do
(Matié 14:13–21; Mark 6:30–44; Jâ 6:1–14)
10Ga gié jiga gusu Jésu, ké yei henga mam ga ké ba légé. Ddi golgé ’yang nagé to gulong go gumu go ké ba tei Bétsaida. 11Kiddin ga kalang ga yaué combu ba jé main kain na, ké kobi. Jésu yalgé, ddi yégé kual go Leu do Kumu toi, ddi bigé ga hoamya labia.
12Kiddin ga teba ba ji ’yoab ca karé na, anjama ga moac ca sua lé ’yé gusu Jésu, ké yei wa: Dda kalang ga yaué combu ’era duro gulong go karang, dang go duro yagé go lurana ca ké wa do, dang kiddin ga woié kené, cawa kua, na wa duro gada. 13Ama Jésu yégé wa: Keng gang gusugeng ga bigé henga ga do. Ké jogu yei wa: Nianga wo bai dang gusa sua mera, amalaiga ji dara ca nia ’era kelu wo ca kalang lé kua mam ga? 14(Bainyong wo kené bbal main dubu bai kain.) Jésu yégé anjama gai kandia sigé jima dugo beram beram to bai to bai kain. 15Ga anjama jé kual lé, ké sigé jom dugo mam. 16Jésu nyim wo go bai dang gusa go sua lé, ddi ai cindi dang, ddi lei Kumu désé ca do lé. Ddi gosindé dugo, ddi bigé anjama gai ca kandia bigé kalang ga yaué combu lé. 17Ké mam di, ké aidong. Anjama gai nyim to do jo wondé borong moac ca sua.
Piér yé waldong wang Jésu na Krist
(Matié 16:13–19; Mark 8:27–29)
18Wolé go pena kiddin ga Jésu wa olé kaindi pena na, anjama gai ’yé gusi, ddi ’engergé wa: Kalang ga yaué combu wa yo wa: ’Enunga wang ga? 19Ké jogu yei wa: Ga pena yé wa: Jia Jâ go disé kalang to kang, kané yé wa: Jia Eli, kané ga ddang yé wa: Jia kema go cogelé kebu go Kumu koi go tumua bela ddianga cindi a duro ga maré. 20Ama Jésu ’ergergé wa: Keng gang yé ’enunga wang ga? Piér jogu yei wa: Jia Krist go Kumu koi.
Jésu yé kual go temaidi kua dang belé goi goang cindi a duro ga maré
(Matié 16:20–28; Mark 8:30—9:1)
21Jésu yégang dono kandia yoi kema pena kual lé ’eno. 22Ddi yégé com: Na gad Kema Kurondi gel cin combu, kalang ga gemdong dang ga tibé Kumu gemdong gagé dang kalang ga gelé so go Kumu koi, ka kainyi, ka deddi, kardené wolé subu ddia belang cindi a duro ga maré. 23Kardené ké mam, ddi yégé wa: Kema go nia dar orang nang na, ddi kainya gusi cong, ddi aia adegelé goi, ddi kubang. 24Cawa kema goni goni goa dar ca minyé gusi na, ddia basi cong, ama kema goni goni goa basu gusi cong cang na, ddi da minyei. 25Kema nia wai henga ga delinya ka mam ma, ddi basu keudi cong na, ddi waia jégené wa ga? 26Kema goni goni goa lé dasi cang dang kual gang na, Kema Kurondi da lé dasi cai kiddin ga ddia ’erga dang hormo doi bua, dang do Bai toi bua, kang kangiyong gai ga carara bu’. 27’Enung wa yogenga cindi waldong wang: Ga pena wo kené a duroigeng go maré ’eno, bera ka sola Leu do Kumu toi tumu jua.
Jésu gusi belé kaindi
(Matié 17:1–8; Mark 9:2–8)
28Kiddin ga Jésu ba yégé kual lé na, bbal main wolé margum kain, kardené ddi gol Piér dang Jâ dang Jak, ddi naiang nagé ca kubung dang ca olé. 29Kiddin ga ddi wa olé dé na, cindi belé kaindi, badigé gai piyong biddid biddid béré hér bbani ’eno. 30Kobipadda kalang sua yo kualang nai, na Mois kang Eli. 31Ké ’erganga hormo do dang, ké wa yo kualang Jésu ca ddain da ser to kual go ca maré goi go a Jorsalem. 32Piér kang ké ga orang nai na, ké woi kung nain, ama kiddin ga ké ba lebu to kung na, ké sol hormo do Jésu toi dang kalang sua ga ba ’eré dang nai. 33Kiddin ga kalang lé ba ’yé ddé Jésu na, Piér yei wa: Bagulong, na ddar na jomegeng ba, dda ni nyané béla subu, pena cain. Pena ca Mois, pena ca Eli. (Piér sela kual go ddi wa yoi ’eno.) 34Kiddin ga ddi wa yo kual dé na, meddalin do pena ’erga debegé marem, kiddin ga anjama ba sol meddalin debegé marem na, ké lé muro bbani ’eno. 35Ké jé nô yaga a duro meddalin wa: Kua na Kurandang go ’enung ba pari, ga jageng kual goi. 36Kiddin ga ké ba jé nô lé na, kardené ké sela kema pena ’eno, na Jésu mera. Ga anjama magu kual lé jang. A kiddin lé na, ké yai kema pena henga ga ké ba solgé lé ’eno.
Jésu bi kurong goang habé ga isini labia
(Matié 17:14–18; Mark 9:14–27)
37Waindo, kiddin ga ké ba gesingu dugo a ca kubung lé na, kalang ga yaué combu jiminyang Jésu. 38A duro kalang ga yaué combu lé na, kema pena soi noi dang togé wa: Bagulong, ’enung olin, ji ’era sela kurandang, na ddi bang pena kiddi kiddi kuabang. 39Habé ga isini wa loi, kobipadda ddi soi ’elé, ké surei aseriang dono, kebi sai sebinya, ké geli cindi bbani ’eno, ké ddai kala ’eno. 40’Enung ol anjama gain kandia dura habé lé cong, ama ké bbala ’eno. 41Jésu jogu yégé wa: Ai keng kalang ga basé bo cindi ga isindong, na mini com ma, ’enung da jom daiang nageng ga? Na mini com ma, ’enung da ’yom gusung dang nageng ga? Gulang kurondin lé wo ké. 42Kiddin ga kurong lé ba ’yé gusi na, habé ga isini lé dolmi noad, ké aseri dugo, ké geli cindi bbani ’eno. Ama Jésu yégé habé ga isini lé kualang dono, ddi bi kurong lé labia, ddi jogi bi bai. 43Kalang mam sol kagelokemo ca dono do gemyai do Kumu toi toa.
Jésu jogu yé kual go temaidi kua dang belé goi goang cindi a duro ga maré
(Matié 17:22–23; Mark 9:30–32)
Kiddin ga kema goni goni wa solé kagelokemo ca henga ga Jésu wa logé dé na, ddi yégé anjama gai wa: 44Ga magageng kual go ’enung wa yogengang nai cakcak kua dang duro. Ké bu Kema Kurondi kuaba kalang. 45Ama ké sela kual lé toi ’eno cawa na kual go saddé, ké ’enger Jésu kual lé toi ’eno, ké la muro.
Na wanga gumu ga?
(Matié 18:1–5; Mark 9:33–37)
46Ga anjama main gusugé ca wanga go gumu duroigé. 47Jésu sol ’eremé gogé, ddi gulga kié go wusin si durdi. 48Ddi yégé wa: Kema goni goni goa ’yé kié go wusin lé kua ca kondang na, ddi ’yenga ’enung bang, kema goni goni goa ’yeng na, ddi ’ya ddi go ba gigeng bu’. Cawa kema goni goni goa go wusin a duroigeng na, ddia go gumu.
Kema goni goni goa tebenang nageng ’eno na, na kogeng
(Mark 9:38–40)
49Jâ yei wa: Bagulong, ni sol kema pena wa taié habé ga isini congang gusondin, ni dar ca narei cawa ddiang nana ’eno. 50Jésu jogu yei wa: Ga narei ’eno, cawa kema go tebenang nageng ’eno na, na kogeng.
Gulong go Samari kain ’yo Jésu
51Kiddin ga kiddin ba ji ’yoab ca ké aié Jésu na, ddi belé cindi ca oré Jorsalem. 52Ddi gi kai ga gié tumoi. Ké ’yé, kardené ké andong duro gulong go Samari ca nyané kiddin cai. 53Ama kalang ga gulong lé dar ca ’yoi ’eno, cawa ddi wa ora Jorsalem. 54Kiddin ga anjama gai Jak kang Jâ ba sol main kain na, ké ’engeri wa: Bagulong, ji dar ca ni tega tua a dang ca to gesin caigé ulgé cong ga? 55Jésu jogu bberajégé. 56Ké ’yé duro gulong go ddang.
Ké ga daré kobé Jésu
(Matié 8:19–22)
57Kiddin ga ké wa oré a giyong dé na, kema go pena yei Jésu wa: ’Enung da kobin a kiddin mam ga jia ’yé kené. 58Jésu yei wa: Tela danga umburong ga, ceddong kau danga gulondigé, ama Kema Kurondi dang kiddin ga woié ca bogé gelalé ’eno. 59Ddi yei kema go ddang wa: Kubang, ama kema lé yei wa: Bagulong, ddang ’enung oré ’embé bang jua dé. 60Jésu jogu yei wa: Dda ga maré ké ’embu gusugé ga maré, ama ji na, ji ’era dura Nô do Leu do Kumu toi toa. 61Kema go ddang com yei wa: Bagulong, ’enung da kobin, ama ddang ’enung oré logé kalang ga tang gulong labia jua dé. 62Jésu yei wa: Kema goa ’yom bandang ca yagé ma, ddi nia polin kardi na, ddi bbala ca Leu do Kumu toi ’eno.
© Alliance biblique universelle (United Bible Societies) 1978.