Gyenesis 36
36
Esau Asefo
(1 Mbermunsɛm 1.34-37)
1Afei iyinom nye Esau (ɔnoara nye Edom) n’ebusuasantsen. 2#Gye 26.34 Esau waar ne yernom wɔ Keenan mbabaa mu; Hetnyi Elon ne babaa Ada, nye Hivinyi Zibeon ne babaa Ana ne babaa Oholibama; 3#Gye 28.9 na Ismael ne babaa Basemat, Nebaiot n’akyerɛbaa no. 4Na Ada woo Elifaz maa Esau; na Basemat woo Reuel; 5na Oholibama woo Jeus, Jalam, nye Kora: woyinom nye Esau ne mba a wɔwoo hɔn wɔ Keenan asaase do no. 6Na Esau faa ne yernom, ne mbabanyin, ne mbabaa, ne fie nyimpa nyinara, nye fiembowa, nye no mbowa nyinara, nye n’enyadze a onyaa no wɔ Keenan asaase do nyinara; na ɔtwee noho wɔ no nua Jakob ho kɔr asaase bi do. 7Osiandɛ hɔn ahodze so dodow ma hɔn dɛ wɔbɛtsena fakor. Na asaase a wɔtse do no wɔnnsen do wɔ hɔn mbowa no ntsi. 8Na Esau a noara so nye Edom no tsenaa Seir bepɔw do. 9Na iyinom nye Esau, Edomfo a wɔtse Seir bepɔw do hɔn egya no, n’ebusuasantsen: 10Esau ne mbabanyin hɔn edzin nye yi; Elifaz, Esau ne yer Ada ne ba no, Reuel, Esau ne yer Basemat ne ba no. 11Na Elifaz ne mba nye Teman, Omar, Zefo, Gatam, nye Kenaz. 12Na Esau ne ba Elifaz no nwewe nye Timna; na ɔwoo Amalek maa Elifaz. Woyinom nye Esau ne yer Ada n’asefo. 13Na Reuel ne mba nye woyinom; Nahat, Zera, Samma, nye Miza. Woyinom nye Esau ne yer Basemat ne mba. 14Na woyinom nye Esau ne yer Oholibama, Zibeon ne babaa Ana ne babaa no ne mba; na ɔwoo Jeus, Jalam, nye Kora maa Esau. 15Woyinom nye Esau ne mba mu ekunyin: Esau n’abakan Elifaz ne mba; ekunyin Teman, Omar, Zefo, Kenaz, 16Kora, Gatam, na Amalek. Woyinom nye ekunyin a wofi Elifaz no mu puei wɔ Edom asaase do; na woyinom nye Ada n’asefo. 17Na Esau ne ba Reuel ne mba nye woyinom; ekunyin Nahat, Zera, Samma, nye Miza: woyinom nye ekunyin a wofi Reuel mu puei wɔ Edom asaase do; woyinom nye Esau ne yer Basemat ne mba. 18Na woyinom nye Esau ne yer Oholibama ne mba; ekunyin Jeus, Jalam, na okunyin Kora. Woyinom nye ekunyin a wofi Esau ne yer Oholibama, Ana ne babaa no no mu puei. 19Woyinom nye Esau a ɔnoara nye Edom no n’asefo, na woyinom nye hɔn ekunyin.
Seir Asefo
(1 Mbermunsɛm 1.38-42)
20Woyinom nye Hornyi Seir ne mba a nna wɔyɛ asaase no do mba no. Lotan, Sobal, Zibeon, Ana, 21Dison, Ezer nye Disan. Woyinom nye ekunyin a wofi Horfo, Seir ne mba no hɔn mu puei, wɔ Edom asaase do. 22Na Lotan ne mba nye Hori na Heman. Nna Lotan n’akyerɛbaa nye Timna. 23Na Sobal ne mba nye woyinom; Alvan, Manahat, Ebal, Sefo nye Onam. 24Na woyinom nye Zibeon ne mba; Aia nye Ana: oyi nye Ana a, mber a ɔhwɛ n’egya Zibeon no nsoasopɔnkɔ no okohun nsuhyew mpumpunadze wɔ sar do no. 25Na woyinom nye Ana ne mba; Dison na Oholibama, Ana ne babaa no. 26Na woyinom nye Dison ne mba; Hemdan, Esban, Itran nye Keran. 27Ezer ne mba nye woyinom; Bilhan, Zaavan nye Akan. 28Dison ne mba nye woyinom: Uz nye Aran. 29Ekunyin a wofi Horfo mu puei nye woyinom; ekunyin Lotan, Sobal, Zibeon, na Ana, 30Dison, Ezer, na Disan. Ekunyin a wofi Horfo mu puei nye woyinom dɛ mbrɛ hɔn ekunyinyɛ tsetsee wɔ Seir asaase do.
Edom Ahemfo
(1 Mbermunsɛm 1.43-54)
31Na ahemfo a wodzi hen wɔ Edom asaase do, ansaana obiara ridzi Israelmba do hen no nye woyinom. 32Na Beor ne ba Bela dzii hen wɔ Edom; na no kurow dzin dze Din-haba. 33Na Bela wui, na Zera a ofi Bozra ne ba Jobab bedzii n’adze. 34Na Jobab wui, na Husam a ofi Temanfo hɔn asaase do bedzii n’adze. 35Na Husam wui no Hadad, Bedad a okum Midian wɔ Moab haban mu no, ne ba no bedzii n’adze: na no kurow ne dzin dze Avit. 36Na Hadad wui, na Samla a ofi Masreka bedzii n’adze. 37Na Samla wui no Saul a ofi Rehobot a ɔwɔ Esutsen no ho no bedzii n’adze. 38Na Saul wui, na Akbor ba Baal-hanan bedzii n’adze. 39Na Akbor ne ba Baal-hanan wui no, Hadar bedzii n’adze: na no kurow ne dzin dze Pau; na ne yer ne dzin dze Mehetabel, Me-zahab ne babaa Matred ne babaa a. 40Na ekunyin a wofi Esau mu puei hɔn edzin nye yi; dɛ mbrɛ hɔn ebusua ebusua, hɔn tsenabew, nye hɔn edzin tsetsee, ekunyin Timna, Alva, Jetet; 41Oholibama, Ela na okunyin Pinon; 42Kenaz, Teman, Mibzar; 43Magdiel, Iram. Woyinom nye Edom ekunyin, dɛ mbrɛ hɔn tsenabew tsetsee wɔ asaase a ɔyɛ hɔn enyadze no do. Oyi nye Esau, Edomfo hɔn egya no.
Mfantse Bible © Bible Society of Ghana, 2011.