Gyenesis 35
35
Nyankopɔn Hyira Jakob Wɔ Bɛtɛl
1 #
Gye 28.11-17
Na Nyankopɔn see Jakob dɛ, Soɛr, kɔ Bɛtɛl, na kɛtsena hɔ: na yɛ afɔrmbukyia wɔ hɔ ma Nyankopɔn a oyii noho kyerɛɛ wo wɔ aber a ifii wo nua Esau n’enyim guanee no. 2Nna Jakob see ne fifo nye hɔn a wɔnye no wɔ hɔ nyinara dɛ, Hom ntow enyame ananaben a ɔwɔ hom mu no ngu, na hom ntsew homho, na hom nsesa hom ntar: 3na hom mma yɛnsoɛr, na yɛnkɔ Bɛtɛl; na mebɛyɛ afɔrmbukyia wɔ hɔ ama Nyankopɔn a m’ahohia da no ɔgyee me do, na odzii m’ekyir wɔ kwan a mutui no mu no. 4Na wɔdze hɔn enyame ananaben a ɔwɔ hɔn nsamu nyinara, nye nkaba a ɔhyehyɛ hɔn asomu no maa Jakob; na Jakob dze hyɛɛ esudur no a ɔwɔ Sekem ho no ase. 5Na wɔkɔree: na ihu kɛsenara tɔɔ nkurow a wɔabɔ hɔn ho aprɔw no do, ma woenntsiw Jakob ne mbabanyin no. 6Na Jakob baa Luz a ɔwɔ Keenan asaase do no, (ɔnoara nye Bɛtɛl), ɔno nye nkorɔfo a wɔka no ho nyinara. 7Na osii afɔrmbukyia wɔ hɔ, na ɔfrɛɛ bea no El-Bɛtɛl: osiandɛ hɔ na Nyankopɔn yii noho kyerɛɛ no wɔ aber a ofii no nua enyim guanee no. 8Na Debora, Rebeka no hwɛfo no wui, na wosiee no Bɛtɛl anaafo, wɔ esudur no ase: na wɔtoo ne dzin Allon-bakut a asekyerɛ nye Nyinsuwakyi bea.
9Na aber a Jakob fi Paddan-aram bae no, Nyankopɔn yii noho kyerɛɛ no bio, na ohyiraa no. 10#Gye 32.28 Na Nyankopɔn see no dɛ, Wo dzin dze Jakob: wɔnnkɛfrɛ wo dzin Jakob bio, na Israel bɛyɛ wo dzin: na ɔtoo ne dzin Israel. 11#Gye 17.4-8 Na Nyankopɔn see no dɛ, Emi nye Nyankopɔn Otumfo: wo mba na dɔr; ɔman nye amanaman asafo befi wo mu aba, na ahemfo befi w’asen mu epue. 12Asaase a medze memaa Abraham nye Isaak no, ɔwo na medze mebɛma wo, na w’asefo a wodzi w’ekyir no na medze asaase no bɛma hɔn. 13Na Nyankopɔn fii ne nkyɛn wɔ mbrɛ ɔnye no kasae no kɔr sor. 14#Gye 28.18, 19 Na Jakob sii idum wɔ mbrɛ ɔnye no kasae no; ɔbo dum a: na ohuee ɔnom afɔr guu do, na ohuee ngo guu do. 15Na Jakob frɛɛ bea no a Nyankopɔn nye no kasae wɔ hɔ no ne dzin Bɛtɛl.
Rahel No Wu
16Na wofii Bɛtɛl sii mu; na aka ɔkwan kakra bi ma woedu Efrat no: awoo kaa Rahel, na n’awoo no mu yɛɛ dzen. 17Na ɔbaa dɛ aber a n’awoo no mu yɛɛ dzen no, nna awogyefo no see no dɛ, Mma nnsuro; ibenya babanyin kor so afei. 18Na ɔbaa dɛ, ne kra rifi no mu no (osiandɛ owui), ɔtoo no dzin Ben-oni; na n’egya dze ɔfrɛɛ no Benjamin. 19Na Rahel wui, na wosiee no wɔ Efrat kwan mu, a ɔnoara nye Bɛtlɛhɛm. 20Na Jakob sii ne nda do idum: ɔnoara nye Rahel ne nda do idum dze bodu ndɛ da yi. 21Na Israel tui, na ɔkɔbɔɔ n’asesee wɔ Eder abantsentsen ekyir noho. 22#Gye 49.4 Na ɔbaa dɛ, Israel tse asaase no do no, nna Reuben kɔree na ɔnye n’egya n’abaawayer Bilha kɛdae: na Israel tsee.
Jakob Ne Mbabanyin
(1 Mbermunsɛm 2.1-2)
Afei Jakob ne mbabanyin yɛ duebien: 23Leah ne mba; Jakob n’abakan Reuben, Simeon, Levi, Juda Isakar, nye Zebulun: 24Rahel ne mba; Josef nye Benjamin: 25na Rahel n’abaawa Bilha ne mba; Dan nye Naftali: 26na Leah n’abaawa Zilpa ne mba; Gad nye Aser. Woyinom nye Jakob ne mbabanyin a wɔwoo hɔn maa no wɔ Paddan-aram. 27#Gye 13.18 Na Jakob baa n’egya Isaak nkyɛn wɔ Mamre, wɔ Kiriat-arba (ɔnoara nye Hebron), mbrɛ Abraham nye Isaak bɛtsenae no. 28Na Isaak ne nda yɛɛ mfe ɔha eduowɔtwe. 29Na Isaak gyaa no sunsum mu, na owui, na otsiiw ne nananom wɔ samanadze, a nna ɔayɛ akɔdaa a oedzi mfe pii: na ne mba Esau nye Jakob siee no.
Mfantse Bible © Bible Society of Ghana, 2011.