Mat 25
25
Ŋlʋgbɩaa 'kʋgbaa 'la ‑nyandla
1«Ka ‑laagɔɔn 'la Nyɩbhɛlɩdua* cɩ ka 'lɛ palalɩ le ŋlʋgbɩaa 'kʋgbaa ‑ɔ 'ma 'lɛ mala ‑kaniecɩa 'nyɩ ‑ɔ 'wlʋ 'lɛ ‑zɔn le ma 'ka 'cɩcɩɛnʋnyɔa ‑gugwie 'kʋ mʋnʋ na. 2Maa sidiin, ‑ngbi 'taa 'fiko 'nyɩ ‑ngbi ‑glɩa 'lɛ dɩgalɩ -naanʋa. 3Na, maa ‑ɔ 'taa 'lɛ 'fiko na, ma 'kaa 'lɛ mala ‑kaniecɩa 'ma na, ma 'ta 'kpʋ famʋ. 4‑Ma dɩgalɩ -naanʋa, ma ya mala ‑kaniecɩa 'ma 'nyɩ ma ya 'kpʋ 'kpalɩwʋ nɩkplaan zʋ 'nyɩ ma ya famʋ. 5Sa 'cɩcɩɛnʋnyɔa 'la cilie bʋalɩa 'lɛ na, 'claa ya maa 'fɩan ‑sɩa 'nyɩ ma ya ŋɔmʋ. 6Na, daa dɩdɩnandɩ ŋeni 'lɛ na, ‑blɩɩzɔn bhlo ya nɩkplaan ‑gaa 'nyɩ ʋ ya 'cla lebhe: 'Lɩka 'cɩcɩɛnʋnyɔa! A mʋnʋɔ ‑gugwie 'kʋ. 7Na, ŋlʋgbɩa 'fɩan ya galɔ 'nyɩ ma ya mala ‑kaniecɩa bhɔsʋa. 8Maa ‑ɔ 'ta 'lɛ 'fiko na, ya dɩgalɩŋlʋgbɩa 'cla lebhe: A 'nyɩmʋ ‑anyɩ ala 'kpʋa, ‑ma ka ‑ala ‑kaniecɩa ŋomu 'lɛ. 9Dɩgalɩ -naanʋa ya maa 'cla lebhe: ‑Wɔɔ, ʋ cɩ 'ta ‑anyɩ ncaacia ‑mɔsɔa 'kʋ ŋeni! ‑Afalɩma, a mʋ maa ‑ɔ zʋʋ 'lɛ 'pɛlʋ na 'bhlɩ ɩya a 'ka a 'nʋ ‑pɩa. 10Daa, ma ‑kʋa 'lɛ 'kpʋa ‑pɩakan mʋda na, 'cɩcɩɛnʋnyɔa ya futo. Maa ‑ɔ bhɔsʋa 'lɛ na, ma ‑yɔɔsɔ ya 'cɩcɩɛnʋpalʋa ‑zɔn ble 'nyɩ ma ya gbinea kpaslɩlɩ. 11Bhɩalɩdaa, -daa ŋlʋgbɩa ‑ma ya ci 'nyɩ ma nabhe: ‑Kwlenyɔ, ‑Kwlenyɔ, kalɩ ‑anyɩ gbine! 12‑Ma 'cɩcɩɛnʋnyɔa ya ne ‑sa 'nyɩ ɔ ya maa 'cla lebhe: N solu anyɩ, ɩ ‑glɩ ‑nʋawlɛ, n 'ta anyɩ ‑ci. 13Na, a gblɩbhalɩ, sa a 'ta clɩɩa ɩya 'ŋwacɩa ‑ci.
Lobhocuoa ‑mɔtaa 'la ‑nyandla
(Luk 19.12-27)
14Ka ‑laagɔɔn 'la Nyɩbhɛlɩdua* cɩ ka ‑awlɛ 'lɛ kʋ le saa nclɔɔ bhlo 'ka 'lɛ lowluun mʋ, ɔ ya 'lɛ ɔla lobhocuoa la 'nyɩ ɔ ya 'lɛ maa ɔla 'nanɩa 'klʋlɩda 'nyɩ na. 15Ɔ ya nclɔɔ nclɔɔ 'la saa ɔ cɩa 'lɛ mɩno na 'nyɩ, ‑bɛka -naanɔa, 'dala 'la ‑baagɩcʋ ‑ngbi, mɔsɔnaanɔa, ‑baagɩcʋ ‑mɔsɔ ɩya ‑mɔta -naanɔ, ‑baagɩco bhlo 'nyɩ ɔ ya 'lɛ mʋ. 'Kplookʋ, 16ɔmɔa ɔ 'lɩ 'lɛ 'dala ‑baagɩcʋa ‑ngbɩa na, ɔ yɩɩ 'ma, ɔ ya 'wlɩɩnzizieli 'nyɩ ɔ ya ‑awlɛ ‑baagɩcʋ ‑ngbi 'lɩ. 17'Sɛtɛɛ bhlogbɩɩ ɔmɔa -ɔ 'lɩ 'lɛ ‑baagɩcʋa ‑mɔsɔa na, ɔmɔ ‑ma, ɔ yɩɩ 'ma, ɔ ya 'wlɩɩnzizieli 'nyɩ ɔ ya ‑anɩ ‑mɔsɔ 'lɩ. 18‑Ma ɔmɔa -ɔ 'lɩ 'lɛ ‑baagɩcoa bhloa na, ɔ ya mʋ, ɔ ya ‑gluu 'bhli 'nyɩ ɔ ya ɔ 'toa 'la 'dalaa zizie.
19Ɩ ya gwlɛlɩ 'fɩɔn 'nyɩ 'ma 'toa ya 'lɛ 'ci le ɔ 'ka nclɔɔ nclɔɔ 'la lobholia ɔ nʋnʋnʋa 'lɛ 'dalaa na cibhlili. 20Ɔmɔa ‑ɔ 'lɩ 'lɛ 'dala 'la ‑baagɩcʋa ‑ngbia na, ɔ ya ma 'toa ‑deliin ci, ɔ yɔɔ ‑baagɩcʋ 'kʋgba pala 'nyɩ ɔ yɔɔ 'cla lebhe: To ‑n ya ‑amʋa 'dala 'la ‑baagɩcʋ ‑ngbi te, n ya ‑awlɛ ‑baagɩcʋ ‑ngbi 'lɩ. 'Lɩkɩɩ. 21Ɔ toa yɔɔ 'cla lebhe: Ɩ nanɩ. ‑N ‑glɩ lobhoco 'nanɔa, ma cɩ 'lɛ ‑delikʋtɛbhalɩ na. ‑N ya ‑lɩɩ pɛ 'la 'klʋlɩlɩɛ nɩkplaan pala lebhe ma cɩɔ ‑delikʋtɛbhalɩ. N cɩ 'kanɩɔ ‑bhutukpa 'klʋlɩda 'nyɩ. Ci ‑n ‑ya ‑n to 'ka ‑pɔpʋɛ nebhlo nʋnʋ. 22‑Mɔsɔ ‑nanɔa ‑ma ya ɔ toa ‑deliin ci 'nyɩ ɔ yɔɔ 'cla lebhe: To, ‑n ya ‑amʋa 'dala 'la ‑baagɩcʋ ‑mɔsɔ te. N ya awlɛ ‑baagɩcʋ ‑mɔsɔ 'lɩ. 'Lɩkɩɩ. 23Ɔ toa yɔɔ 'cla lebhe: Ɩ nanɩ, ‑n ‑glɩ lobhoco 'nanɔa ma cɩ 'lɛ ‑delikʋtɛbhalɩ na. ‑N ya ‑lɩɩ pɛ 'la 'klʋlɩlɩɛ nɩkplaan pala lebhe ma cɩɔ ‑delikʋtɛbhalɩ. N cɩ 'kanɩɔ ‑bhutukpa 'klʋlɩda 'nyɩ. Ci ‑n ‑ya ‑n to 'ka ‑pɔpʋɛ nebhlo nʋnʋ. 24Ɔmɔa ‑ɔ 'lɩa 'lɛ 'dala 'la ‑baagɩcoa bhloa na, ɔmɔ ‑ma, ɔ ya ci 'nyɩ ɔ ya 'cla lebhe: To, n ‑ci sɛɛ lebhe: Ka ‑naa wɔlɩ 'tɛ: Daa ‑n 'ta 'lɛ 'monini na, dɩpɩa ‑n 'dɩlɩ, 'nyɩ daa ‑n 'ta 'lɛ saazʋlʋ na, dɩpɩa n 'manɩ. 25Na, n ya ŋanɔ 'gulu, n ya ‑gluu 'bhli 'nyɩ n ya 'lɛ 'yɛpɩ ‑naa 'dalaa zʋ. Kla, 'lɩka ‑naa 'nanɩa. 26‑Ma ɔ toa yɔɔ 'cla lebhe: ‑Abhɔlɛlobhoco, ‑babanyɔ! ‑N ‑cia 'lɛ sɛɛ lebhe: Daa n 'ta 'lɛ 'monini na, dɩpɩa n 'dɩlɩ 'nyɩ n 'manɩ 'lɛ daa n 'ta 'lɛ saazʋlʋ na, 27'bhaklɔ nɩkplaan n ‑cɩ kaa 'lɛ 'na 'dala fa ɩya ma 'kaa maa 'lɛ 'nyu budo, ma 'ka ‑amʋa 'nyɩ. 28A ‑salɩ ɔla 'dala ‑baagɩcoa bhloa ɩya a 'nyɩnɩɛ ‑anɔa -ɔ ‑ka 'lɛ ‑baagɩcʋa 'kʋgbaa na. 29Sa ɔmɔa ‑ɔ ‑ka 'lɛ na, ma cɩ 'kɔɔ 'nyɩ ɩya ɔla daa 'ka zubholi. ‑Ma ɔmɔa 'ta 'lɛ 'ka na, 'pɛpɛ 'titi ɔ kaa ‑kao na, ma cɩ 'kɔɔ mɔ ‑salɩ! 30Na, 'kpɔkpɔ ‑lobhoco -naa, a 'pɔɔ ‑jlukuun, 'tutua nɩkplaan: Gbazɩa 'nʋgbʋtulɩɛ ɩya ‑glaaslolilie cɩ 'ka 'lɛ kʋ na.
Bhɩalɩtɩtɩa 'la wɔlɩ
31Daa Nclɔɔa 'Cʋa* ɔya ɔla 'bhlaandleecɩa* 'fɩan cɩ 'ka 'lɛ ɔla 'klʋagbaa nɩkplaan cili na, ɔ cɩ 'ka ɔla 'klʋagba nyɩbhɛlɩkpoa 'kʋ sakʋ. 32‑Laagɔzɔn 'la 'lɔlɩa 'fɩan cɩ 'kɔɔ ‑deliin 'wluwlalɩ, ɔ cɩ 'ka ncɛlɩa cɩsasalɩ, le saa mlakpanyɔ sasalɩ 'lɛ 'bhlabhlɩ ɩya wli cɩ na. 33Ɔ cɩ 'ka 'bhlabhlɩa ɔla 'lipasɔa 'kʋ zʋ ɩya ɔ 'ka wlia 'daba 'kʋ zʋ. 34Na, nyɩbhɛlʋa cɩ 'ka maa ‑ɔ ‑kʋɔ 'lɛ 'lipasɔa 'kʋ na, 'cla lebhe: A ci, anyɩa n To ya 'lɛ 'nyupalɩ na, a ble nyɩbhɛlɩdua, ‑ʋ ‑bhɔsʋɔa 'lɛ ala gbʋ, bhɔdaa tooto na, nɩkplaan. 35Sa ŋɔmʋ yaan 'bhla 'nyɩ a yaan nyɩ 'nyɩ, n ya li, 'nyutʋ yaan 'bhla 'nyɩ a yaan 'nyu 'nyɩ, n ya 'mla, n ‑glɩa lowlunyɔ 'nyɩ a yaan 'kʋplada zʋ, 36n ‑kʋa ‑abaan 'nyɩ a yaan bibie, n 'taa 'lɛ ‑ja na, a yaan ‑ayopakan ci, n ‑kʋa 'lɛ ‑palʋʋn na, a yaan kopekan ci.
37Na, 'kʋnylugolunyaa cɩ 'kɔɔ neencla lebhe: ‑Kwlenyɔ, clɩɩ saa 'kʋ ‑a yɔɔ 'lɛ 'lɩ, ŋɔmʋ bhlaa ‑mɔ 'lɛ 'nyɩ ‑a yawaa ‑mɔ 'lɛ nyɩ 'nyɩ, 'nyutʋ 'bhlaa ‑mɔ 'lɛ 'nyɩ ‑a yawaa ‑mɔ 'lɛ 'nyu 'nyɩ bha? 38Clɩɩ saa 'kʋ ‑a yɔɔ 'lɛ 'lɩ, ‑n ‑glɩa 'lɛ lowlunyɔ 'nyɩ ‑a yawa ‑mɔ 'lɛ pʋda zʋ, ‑n ‑kʋa 'lɛ ‑abaan 'nyɩ ‑a yawa ‑mɔ 'lɛ bibie bha? 39'Nyɩ clɩɩ saa 'kʋ gu bhlaa ‑mɔɔ 'lɛ, ‑aana ma yawaa ‑mɔ 'lɛ ‑palʋʋn 'pa 'nyɩ ‑a yaa ‑mɔ 'lɛ kopekan mʋ bha? 40Ɩya nyɩbhɛlʋa 'ka maa neenŋonu lebhe: N solu anyɩ, ɩ ‑glɩ ‑nʋawlɛ clɩɩa ‑tɛtɛa 'kʋ a yɩɩ 'lɛ nʋ 'nyɩ a ya 'lɛ leen -naanʋa ‑naa, ‑ɔ ‑glɩ 'lɛ n bholiecɩ, 'la sidiian bhlo 'nyɩ na, ‑amʋ a yɩɩ 'lɛ cɩ nʋ. 41Na, ɔ cɩ 'ka maa ‑ɔ cɩ ‑kɔɔ 'lɛ 'daba 'kʋ kʋ na, 'cla lebhe: ‑Munzuenyanyɩ, a 'wlʋlʋʋn 'cɩɩn, a 'plɩ a mʋ 'yɛpɩ ‑kosua, ‑ʋ ŋomu 'ta 'lɛ 'nyɩ ‑ʋ ‑bhɔsʋɔ 'lɛ gɔzɛ ɩya ɛla 'bhlaandleecɩa 'la gbʋ na, nɩkplaan. 42Sa ŋɔmʋ yaan 'bhla, a 'taan nyɩ 'nyɩ, 'nyutʋ yaan 'bhla, a 'taan 'nyu 'nyɩ, 43n ‑glɩa lowlunyɔ, a 'taan 'kʋplada zʋ, n ‑kʋa ‑abaan, a 'taan bibie, gu bhlaa ‑amʋa, n ‑kʋa ‑palʋʋn, a 'taan kopekan ci. 44Maa ‑ma, ma cɩ 'kɔɔ neencla lebhe: ‑Kwlenyɔ, clɩɩ saa 'kʋ ‑a 'lɩanɩa ‑mɔ 'lɛ 'nyɩ ŋɔmʋ ‑aana 'nyutʋ bhlaa ‑mɔ 'lɛ, ‑n ‑glɩanɩa 'lɛ lowlunyɔ, ‑aana ‑n ‑kʋanɩa 'lɛ ‑abaan, gu bhlaa ‑mɔ 'lɛ, ‑aana, ‑n ‑kʋanɩa 'lɛ ‑palʋʋn 'nyɩ ‑a 'taa ‑mɔ 'lɛ 'kʋci bha? 45Ɔ cɩ 'ka maa 'cla lebhe: N solu anyɩ ɩ ‑glɩ ‑nʋawlɛ, clɩɩa ‑tɛtɛa 'kʋ a 'tɩɩ 'lɛ nʋ ɩya a 'ka 'lɛ leen -naanʋa ‑naa 'la sidiian bhlo 'nyɩ na, ‑amʋ a 'tɩɩ 'lɛ cɩ nʋ. 46Maa ‑naa, ma cɩ 'ka 'plɩ, ma 'ka 'lʋkʋlʋkʋ 'la gbaylɩsalɩɛa nɩkplaan mʋ ɩya 'kʋnylugolunyaa 'ka 'lʋkʋlʋkʋ 'la jabhʋa nɩkplaan ble.»
Àwon tá yàn lọ́wọ́lọ́wọ́ báyìí:
Mat 25: NTLD13
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Dida New Testament © Bible Society of Côte d'Ivoire, 2013.
