Mat 24
24
Zozii nabhe Laagɔpaakadiea cɩ 'ka ‑gbɔlʋɔ
(Mak 13.1-4; Luk 21.5-7)
1Zozii ya Laagɔpaakadiea* nɩkplaan 'wlʋ 'nyɩ ɔ mʋa. Ɔla gɩlɩnyaa* yɔɔ cɩmɛ le ma 'kaa 'mɔɔ Laagɔpaakadiea 'la 'slalɩɛa pɔlɛcɩfalɩ. 2Zozii ya nesa 'nyɩ ɔ ya maa 'cla lebhe: «A ‑jlɛ ɩmɩ ‑naa ‑tɛtɛa bha? N solu anyɩ ɩ ‑glɩ ‑nʋawlɛ, cokwie cɩ 'ta ‑da ɛli ‑cokwie 'kʋ ‑to. ‑Tɛtɛa 'fɩan cɩ 'ka ‑gbɔlʋɔ.»
'Kwlɩbhɩɛ ɩya gbaylɩsalɩɛ 'la cɩa wɔlɩ
(Mak 13.5-13; Luk 21.8-19)
3Daa Zozii ‑kʋa 'lɛ ‑Olivʋsikikea 'wlu sa na, ɔla gɩlɩnyaa* yɔɔ cɩmɛ, ma ‑yɔɔsɔ ya gbɛga 'nyɩ ma yɔɔ neencla lebhe: «Solu anyɩ clɩɩa 'kʋa ɩmɩ ‑naa cɩ 'ka 'lɛ ŋeni na, ɩya ‑n pala ‑anyɩ ‑naa ciclɩɩa ɩya ‑laagɔzɔan 'la bhɩada 'la ghledaa.» 4Zozii ya maa 'cla lebhe: «A zʋlʋ pɔlɛ 'kʋ ɩya nclɔɔ bhlogbɩɩ 'la 'nyiglilia anyɩ. 5Sa ‑bhutukpa cɩ 'ka 'na 'ŋlɩa 'ma ɩya ma 'ka ci. Ma cɩ 'ka 'cla lebhe: ‑Amʋ ‑glɩ 'lɛ Laagɔ 'la ‑Sasanyɔa*, ɩya ma 'ka ncaaabhutukpa 'nyiglili.
6A cɩ 'ka tʋ ɩya tavʋkasɛ 'la wɔlɩ 'nu. A zʋlʋ pɔlɛ 'kʋ! Pɔlɛɛn 'la 'wlʋa anyɩ. Ɩ ‑fata lebhe ɩmɩ ‑naa ŋeni, ‑ma ‑n 'ta ɩmɩ ‑ɩ 'ta 'ka 'lɛ bhɩalɩdaa ‑glɩ. 7'Bhlɩ cɩ 'ka 'bhlɩ tʋ ŋeni ɩya nyɩbhɛlʋdu 'ka nyɩbhɛlʋdu tʋ ŋeni. 'Bhlɩ ‑bhutukpa 'kʋ, ŋɔmʋ cɩ 'ka pla ɩya ‑dʋdʋa 'ka tɩtɛlɩ. 8Ɩmɩ ‑naa ‑tɛtɛa cɩ 'ka kʋ le valʋbhlalɩɛ 'la bhɔda 'bhisa.
9Na, ma cɩ 'ka anyɩ gbaylɩsa, ma 'ka anyɩ 'bhla, 'lɔlɩa ‑tɛtɛa 'ka anyɩ zɔbhɛlɩ 'na 'ŋlɩa 'la gbʋ 10ɩya ‑bhutukpa 'la pɔɔtɛtɛa 'ka bhli. Maa bhlobhlo cɩ 'ka 'pɛlʋzʋzʋlʋ ɩya ma 'ka zɔbhɛlɩ ‑zɔbhɛlɩlɩ. 11Yooyo Laagɔnekʋnyɩtɛnya* ‑bhutukpa cɩ 'ka ‑zɔn 'wlʋ ɩya ma 'ka ncaabhutukpa 'nyiglili. 12Gbanyinyinʋlɩɛ cɩ 'ka zubholi, ɩ cɩ 'ka gba ɩya ncaabhutukpa 'la 'kanɩ ‑walʋ kalɩ. 13‑Ma ɔmɔa ‑ɔ ‑cɩ ka 'lɛ pɔlɛ kla ‑aan ɩya bhɩalɩdaa 'ka 'lɛ ŋeni na, 'dɛ ‑naanɔa cɩ 'ka gbʋʋnsalɩɛ 'lɩ. 14Ma cɩ 'ka ‑laagɔzɔnbhuoa, Nyɩbhɛlʋdua 'la Dɩnanɩa* ‑sa ɩya ncɛlɩa 'fɩan ‑ɔ 'ta 'lɛ Laagɔ ‑ci na, 'ka ɩla ‑danʋfʋɛliliea 'nu 'fɩɔn ɩya bhɩalɩdaa 'ka ŋeni.
'Kwlɩbhɩɛ 'kadie 'la cɩa wɔlɩ
(Mak 13.14-23; Luk 21.20-24)
15Daa a cɩ 'ka 'lɛ Danyumo ‑Munzuea 'la wɔlɩa Laagɔnekʋnyɩtɛnyɔ* Danɩɛlɩ nyɩtɛa 'lɛ na, ‑kplɔkplɔdaa 'lɩlɩ na, ɔmɔa ‑ɔ zɛlɩ 'lɛ na, 'naa ɔ zʋlʋ pɔlɛ 'kʋ! 16Daa a cɩ 'kɛɛ 'lɛ 'lɩ na, maa ‑ɔ ‑cɩ ka 'lɛ Zudeebhlɩa 'kʋ kʋ na, 'naa ma 'gu ɩya ma mʋ 'kikia nɩkplaan. 17Ɔmɔa ‑ɔ cɩ ka 'lɛ ‑palʋ 'wlu kʋ na, ɔ 'la kwlia le ɔ 'ka lɩɩa ‑ɩ ‑kʋ 'lɛ ɔla ‑palʋa ‑zɔn na 'ma. 18Ɔmɔa ‑ɔ -cɩ ka 'lɛ 'kwlaan kʋ na, ɔ 'la cɔlɔa duku le ɔ 'ka ɔla bibielʋʋ 'ma. 19'Dɛ 'la clɩɩa nɩkplaan, nɩkpaankaŋwlɛ ɩya maa ‑ɔ nyɩa 'lɛ 'cuo na, ‑munzue ya maa bho! 20A bhibhie ɩya ɩ 'la ka sɛ 'nyugozoon ‑aana nyɔkwɛclɩɩa* 'kʋ ŋeni. 21‑Masa 'dɛ 'la clɩɩa nɩkplaan 'la 'kwlɩbhɩɛa cɩ 'ka 'ghlibholi 'kadie, 'nyɩ bhɔdaa tooto ‑aan ‑yaka, 'sɛ 'la 'kwlɩbhɩɛ 'ta 'ka ‑azla ŋeni 'nyɩ ɛ cɩ 'ta kɩnɩ ŋeni. 22'Nyɩ Laagɔ 'taa clɩɩ ‑naa 'kleen 'dɩ na, nclɔɔ ‑ylɛylɛ cɩ 'ta ‑to, ‑ma ɔla deslaslanyaa 'la gbʋ na, ɔ cɩ 'kɩɩ 'kleendɩ. 23Na, gbazɩ nclɔɔ ‑ka anyɩ 'cla lebhe: Laagɔ 'la ‑Sasanyɔa* ‑kʋ ‑da, ‑aana ɔ ‑kʋ 'yɛpɩɛ ‑wɔlʋ na, a 'la ‑salɩɔ ne. 24‑Masa yooyo ncɛlɩa ‑ɔ la 'lɛ macɩ Laagɔ 'la ‑Sasanyaa ɩya yooyo Laagɔnekʋnyɩtɛnya cɩ 'ka 'kʋbho ɩya ma 'ka 'ciinzizielɩlobholi 'kadɩ ɩya nikpooslaslawɔlɩ nʋ, ɩya ‑jioli kaa ‑kʋ na, ma 'kaa Laagɔ 'la deslaslanyaa 'titio 'nyiglili. 25'Lɩka, n ya 'kʋklʋʋn pʋ, n ya anyɩ solu.
Nclɔɔa 'Cʋa 'la cilie
(Luk 17.23-24,37)
26Gbazɩ ma ‑ka anyɩ 'cla lebhe: A 'lɩ kɔɔ 'pʋpʋa nɩkplaan, a 'la mʋa 'yɛpɩ. ‑Aana ma ka anyɩ 'cla lebhe: A 'lɩkɔɔ, ɔ ‑zizie ‑da na, a 'la ‑salɩa maa ne. 27Saa ‑laagɔa nɩkplaan ‑ka 'lɛ 'wɛtɩa 'nyɩ ɩla leliea bhɔlʋ 'lɛ 'lipasɔ 'kʋ ‑aan 'daba 'kʋ na, 'sɛtɛɛ Nclɔɔa 'Cʋa* 'la ciliea cɩ 'ka 'lɛ kʋ. 28Sa daa ‑tɛtɛa mlazʋ ‑kʋ 'lɛ na, ‑daabɔlɩa cɩ 'ka 'dɛ 'wluwlalɩ.
29'Kwlɩbhɩɛ 'la clɩɩ ‑naa ‑ka 'plɩ ‑jaa na, 'ylʋbhuoa cɩ 'ka 'tutu pla, 'cʋa cɩ 'tanɩ le, ‑laagɔɔn 'la ‑zɔlʋa cɩ 'ka bhli ɩya ‑laagɔɔn 'la 'tɛtɩa 'ka gbɔlʋ. 30Na, Nclɔɔa 'Cʋa 'la ghledaa cɩ 'ka ‑laagɔa nɩkplaan ‑zɔn 'wlʋ. ‑Dʋdʋa 'kʋ 'la 'lɔlɩa 'fɩan cɩ 'ka bhubhuun 'dɩ ɩya ɩ 'ka Nclɔɔa 'Cʋa 'lɩ, ɔ 'ka ‑laagɔɔn 'la 'nyukpli 'kʋ cili, 'tɛtɩ ɩya 'klʋagbaa ‑tɛtɛa nɩkplaan. 31Ɔ cɩ 'ka ɔla 'bhlaandleecɩa* ‑laagɔzɔan 'la ‑kotia ‑tɛtɛa nɩkplaan lobhu, ma 'ka lɛglɩ 'kadɩ bholi ɩya ma 'ka ɔla deslaslanyaa 'wluwlalɩ. 32A 'nu 'figisua 'la palalɩlɩɛ: Daa ʋ zʋ 'lɛ 'labhɩ 'nyɩ ʋ la 'lɛ 'taakpɩ ‑leli na, a cibhlili lebhe gɔylʋ ya cɩmɛ. 33'Sɛtɛɛ bhlogbɩɩ, anyɩ ‑ma, daa a cɩ 'ka 'lɛ ɩmɩ ‑naa ‑tɛtɛa 'lɩ na, a cibhlili lebhe Nclɔɔa 'Cʋa ya cɩmɛ, ɔ ‑kʋnɩ ala gbinia ne 'kʋ. 34N solu anyɩ ɩ ‑glɩ ‑nʋawlɛ, 'bhlɛsʋ ‑naa nɩkplaan 'la ncɛlɩa ‑tɛtɛa cɩ 'ta ka 'ku 'nyɩ ɩmɩ ‑naa 'fɩan cɩ 'ka 'lɛ ŋeni. 35‑Laagɔɔn ɩya ‑dʋdʋa cɩ kpa ɩ cɩ 'plɩ, ‑ma 'na niwɔlɩa cɩ 'ta kpa.
A gblɩbhalɩ
(Luk 17.26-36)
36‑Ma clɩɩ ‑naa ɩya 'ŋwacɩ ‑naa, nclɔɔ ‑ylɛylɛ 'tɩɩ ‑ci, ‑laagɔɔn 'la 'bhlaandleecɩa*, ‑aana 'Cʋa 'titio, nclɔɔ ‑ylɛylɛ, 'tɩɩ ‑ci, ɩ ‑ka ‑kʋ lebhe ‑n 'ta Toa bhlogbɩɩ ‑tɛɛ na. 37Saa ɩ 'plɩ 'lɛ Nowee ‑bhlɛsʋan na, sɛɛ Nclɔɔa 'Cʋa* 'la ciliea cɩ 'ka 'lɛ 'plɩ. 38Saa ‑tɛɛa 'dɛ 'la clɩɩa nɩkplaan, 'fɩɔn ɩya 'nyukadiea 'kaa 'lɛ bhla, ncɛlɩ lia 'lɛ, ma mlaa 'lɛ, ma 'cɩcɩlɩa 'lɛ, ‑aana ma nyɩa 'lɛ mala 'cuoa ŋodie 'cɩda ‑aan 'nyɩ Nowee ya 'lɛ gɔlʋa nɩkplaan 'tɔ 39'nyɩ ma 'taa 'lɛ wɔlɩ ‑ylɛylɛ pɔlɛcɩfalɩ ‑aan 'nyɩ 'nyu 'kadiea ya 'lɛ bhla 'nyɩ ʋ ya 'lɛ maa 'fɩan famʋ na, 'sɛtɛɛ bhlogbɩɩ, Nclɔɔa 'Cʋa 'la ciliea cɩ 'ka 'lɛ kʋ. 40Ncɛlɩ ‑mɔsɔ cɩ 'ka 'kwlaan ‑kʋ, ma cɩ 'ka bhlo famʋ ɩya bhlo 'ka ‑to. 41Ŋwlɛ ‑mɔsɔ cɩ 'ka lɩɩ bhutida kʋ, ma cɩ 'ka bhlo famʋ ɩya bhlo 'ka ‑to. 42Na, a gblɩbhalɩ, sa a 'ta clɩɩa 'kʋa ala ‑Kwlenyɔa cɩ 'ka 'lɛ ci na ‑ci.
43A cibhlili sɛɛ lebhe: Ɩ ka ‑kʋ lebhe 'sleto ‑kaa dobhesa, 'ŋwacɩa 'kʋa 'winyɔ cɩ 'ka 'lɛ cili na ‑ci na, 'ɔ cɩ 'taa ŋɔmʋ ɩya ɔ 'la 'kaa 'mɔɔ ne te le ɔ ble ɔla 'slea nɩkplaan. 44'Sɛlagbʋkʋ na, anyɩ ‑masɛɛ a gblɩbhalɩ, sa 'ŋwacɩa a gugu 'ta 'lɛ lebhe Nclɔɔa 'Cʋa* cɩ 'kʋ cili na, ɛmɛ 'kʋ ɔ cɩ 'ka 'lɛ cili.
Dɩgalɩlobhoco 'la wɔlɩ
(Luk 12.42-46)
45Lobhoco saa ‑ɔ glalɩa 'lɛ ɔla niwɔlɩ 'kʋ 'nyɩ ma cɩ 'kaa 'lɛ ‑delikʋtɛbhalɩ bha? Ɔ ‑glɩ ɔmɔa 'sleto ya 'lɛ ɔla 'slea 'la lobhocua 'klʋlɩda 'nyɩ le 'ŋwacɩa ‑ka ŋeni na, ɔ 'ka maa nyɩ 'nyɩ na. 46Lobhoco ‑naa ‑kʋ 'nanɩ, ɩ ‑ka ‑kʋ lebhe ɔ toa ‑kɔɔ lobholi ‑naa nʋda ŋeni na. 47N solu anyɩ, ɩ ‑glɩ ‑nʋawlɛ, ɔ cɩ 'kɔɔ ɔla 'nanɩa ‑tɛtɛa 'klʋlɩda 'nyɩ. 48‑Ma gbazɩ ɔ ‑ka lobhocoa, ‑ɔla gbɩ 'ta 'lɛ nanɩ na ‑glɩ na, ɔ cɩ 'ka ɔcɩ 'cla lebhe: N toa, 'ɔ cɩ 'ta ka ‑pɔtɔnʋ ci 49ɩya ɔ 'ka ɔ 'yea bhutilɩɛ bhɔ, ɔya nʋmlanya 'ka sakʋ, ma 'ka li ɩya ma 'ka 'mla. 50Lobhoco ‑naa, clɩɩa ɔ 'ta 'lɛ ‑gblɩ ɩya 'ŋwacɩa ɔ 'ta 'lɛ ‑ci na, dɛɛ ɔ toa cɩ 'ka 'lɛ cili. 51Ɔ cɩ 'kɔɔ 'tli ɩya ɔ 'kɔɔ yooyo ncɛlɩa 'la gbaylɩsadaa 'pa, gbazɩa 'nʋgbʋtulɩɛ ɩya ‑glaasloliliea ‑kʋ 'lɛ na.»
Àwon tá yàn lọ́wọ́lọ́wọ́ báyìí:
Mat 24: NTLD13
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Dida New Testament © Bible Society of Côte d'Ivoire, 2013.
