Mat 22
22
'Cɩcɩɛnʋtlɔnblɩ 'kʋ 'la lalanya 'la ‑nyandlaa
(Luk 14.15-24)
1Zozii ya ‑awlɛ maa ‑nyandla nɩkplaan solululɩɛ bhɔ. Ɔ ya maa 'cla lebhe: 2«Ka ‑laagɔɔn 'la Nyɩbhɛlɩdua* 'la gbɩa palalɩ 'lɛ le saa nyɩbhɛlʋ bhlo palɩ 'lɛ ɔ ‑yowli 'cɩcɩɛnʋtlɔnblɩ sa na. 3Ɔ ya ɔla lobhocuoa lobhu le ma la ncɛlɩa ɔ la 'lɛ 'tlɔnblɩa 'kʋ na. ‑Ma ma 'ta ŋonu ma 'ka ci. 4Ɔ ya ‑awlɛ ‑buun lobhocuo lobhu le ma 'cla lalanyaa lebhe: 'Lɩka, n ya 'na 'tlɔnblɩa bhɔsʋa, 'na bhlia ɩya 'na nʋanʋamlaa ya ‑bhlɔɔ, ‑tɛtɛa 'fɩan ya ‑gɩglɔɔ, a cinɩ 'tlɔnblɩa 'kʋ! 5‑Ma, ma 'tɔɔ bu 'nyɩ ma ya 'plɩ ma ya mʋ, ‑anɔ, ɔla 'kwlaan, ‑anɔ, ɔla 'kɔsɛ 'kʋ. 6‑Da ‑naanʋaa ya lobhocuoa 'kʋbhli, ma ya maa gbaylɩsa 'nyɩ ma ya maa 'bhla. 7Nyɩbhɛlʋa ya dɔgbɛ 'ma, ɔ ya ɔla 'sojaa lobhu, ma ya ncaabhlanya ‑naa 'bhla 'nyɩ ma ya mala 'dua ‑sie. 8Na, ɔ ya ɔla lobhocuoa 'cla lebhe: 'Cɩcɩɛnʋtlɔnblɩa ‑bhɔsʋɔ, ‑ma lalanyaa ‑yɛɛsɛ 'taa ‑fata. 9A mʋ ‑gugoglagbʋa nɩkplaan ɩya ncɛlɩa 'fɩan a cɩ 'ka 'lɛ 'lɩ na, a la maa 'tlɔnblɩa 'kʋ. 10Lobhocuoa ya ‑gugoa 'kʋ mʋ 'nyɩ ma ya maa 'fɩan ma 'lɩ 'lɛ na 'wluwlalɩ, ncaanyinyi ɩya ncaananɩ. 'Nyɩ ‑palʋa ‑zɔan ma palɩlɩ 'lɛ 'cɩcɩɛnʋtlɔnblɩa sa na, ya ncɛlɩ 'kʋ ye.
11Nyɩbhɛlʋa ya ble le ɔ 'ka lalanyaa kope. Ɔ ya nclɔɔ bhlo 'lɩ, ɔ 'taa 'cɩcɩɛnʋtlɔnblɩkʋmʋlokwi nɩkplaan ‑pla. 12Ɔ yɔɔ 'cla lebhe: N 'nagɔ, 'nsasa ‑n nʋnʋnʋ 'lɛ 'nyɩ ‑n 'ta 'lɛ 'cɩcɩɛnʋtlɔnblɩkʋmʋlokwi ‑ka 'nyɩ ‑n ya 'lɛ ‑da ble bha? ‑Ma 'ɔ ‑sa 'taa ne. 13Na, nyɩbhɛlʋa ya lobhocuoa 'cla lebhe: A gʋa ɔla sɩa ɩya ɔla bhɩa ɩya a pɔɔ ‑jlukuun, 'tutua nɩkplaan, gbazɩa 'nʋgbʋtuliea ɩya ‑glaasloliliea cɩ 'ka 'lɛ kʋ na. 14Sa ma ya ‑bhutukpa la, ‑ma 'pɛpɛ ma sla 'lɛ de.»
Sezalɩ 'la ‑lapooa
(Mak 12.13-17; Luk 20.20-26)
15Falizɩɛnnyaa* ya mʋ 'nyɩ ma ya 'wluwlalɩ le ma 'kaa Zozii 'gbuzu ‑zɔn 'pa. 16Ma yɔɔ mala gɩlɩnya* ɩya Ewlɔdʋ 'la ‑kandinya nekʋlobhu le ma 'clɔɔ lebhe: «Canyɔ, ‑a ‑ci lebhe ‑n ‑glɩ ‑nʋawlɛɛnyɩtɛnyɔ 'nyɩ ‑nʋawlɛ nɩkplaan ‑n calɩ 'lɛ ɩmɩa Laagɔ 'matɩlɩ 'lɛ ncɛlɩ wlɩɩn na. ‑N 'gulu 'ta ɩmɩa ncɛlɩ cɩ 'ka 'lɛ gugu na, sa ‑n 'manɩ 'ta ncɛlɩ 'la kʋkʋkʋlɩɛ 'kʋ na. 17Solu ‑anyɩ saa ‑n 'lɩlɩlɩ 'lɛ wɔlɩ ‑naa na. ‑Jioli ‑nyɩɔ le ‑a ‑plʋ Sezalɩ 'la ‑lapooa bha? ‑Ma ‑a 'la ‑plʋʋ bha?» 18‑Masa Zozii cia 'lɛ mala wɔɔgugwie ‑nyinyea na, ɔ ya maa 'cla lebhe: «Yooyo ncɛlɩnyɩ! 'Lɩsaa 'la gbʋ a paan 'lɛ 'gbuzu ‑zɔn bha? 19A pala kaan 'dalaa a ma 'lɛ 'nyɩ a plʋ 'lɛ ‑lapooa na!» Ma yɔɔ ma pala. 20Ɔ ya maa neencla lebhe: «'Wlukle ‑naa ɩya ŋlɩɩ ‑naa, ncaasaa nɩɩ ɩ ‑glɩa 'lɛ bha?» 21Ma nabhe: «Sezalɩ 'nɩ.» Na, ɔ ya maa 'cla lebhe: «Lʋʋa ‑ʋ ‑glɩ 'lɛ Sezalɩ 'nʋ na, a 'nyɩnɩʋ Sezalɩ ɩya lʋʋa ‑ʋ ‑glɩ 'lɛ Laagɔ 'nʋ na, a 'nyɩnɩʋ Laagɔ.» 22Ma 'nu 'lɛ ɩmɩ ‑naa na, nikpoo ya maa 'fɩan sla 'nyɩ ma yɔɔ cɩɩnwlʋlʋ 'nyɩ ma ya mʋ.
'Kwɩɩnkʋbhue 'la cɩa wɔlɩ
(Mak 12.18-27; Luk 20.27-38)
23'Dɛ 'la clɩɩa bhlogbɩɩ 'kʋ, Saduseyɛɛnnya* ya Zozii cɩmɛ. Saduseyɛɛnnyaa nabhe 'kwɩɩnkʋbhue 'ta ‑kʋ. Na, ma yɔɔ neencla lebhe: 24«Canyɔ, Moyizi nabhe: Gbazɩ nclɔɔ ‑ka 'ku 'nyɩ ɔ 'ta 'cilee te na, ɔ bholi 'cɩ 'kuzluŋlɔa ɩya ɔ 'ka ɔ bholia ‑ɔ 'ku 'lɛ na valɩnɩkpla 'nyɩ. 25Na bholiecɩ ‑ngbɔɔsɔ ‑kʋa ‑a 'bhlɩ. ‑Bɛka ‑naanɔa cɩa 'ŋlɔ 'nyɩ ɔ ya 'lɛ 'ku, ‑masa ɔ 'ta 'lɛ valɩ na, ɔ bholi ya 'ŋlɔa 'cɩ. 26‑Mɔsɔ ‑naanɔa ‑ma ya 'ŋlɔa 'cɩ 'nyɩ ɔ ya 'ku, ‑mɔta ‑naanɔa ‑ma, sɛɛ bhlogbɩɩ ‑aan 'nyɩ maa ‑ngbɔɔsɔa yɔɔ 'lɛ 'kʋ 'cɩlɩ. 27Bhɩalɩdaa, 'ŋlɔa ‑ma ya 'ku. 28Na, 'kwɩɩnkʋbhoclɩɩa 'kʋ, sa maa 'fɩan yaa 'mɔɔ 'lɛ 'cɩ na, bholɩecɩa ‑ngbɔɔsɔa, ‑anɔsaa 'titi 'la ŋlɔɔ ɔ ci 'kanɩ 'lɛ 'plɩ bha?» 29Zozii ya maa 'cla lebhe: «A ya mlɔ, ‑ofi lebhe a 'ta Zieziewɔlɩa ‑ci naa, a 'ta Laagɔ 'la 'tɛtɩa ‑ma ‑ci. 30'Kwɩɩnkʋbhoclɩɩa 'kʋ, ŋodie ɩya 'ŋwlɛ cɩ 'tanɩ 'cɩcɩlɩ. ‑Ma ka ma cɩ 'ka 'lɛ kʋ le 'bhlaandleecɩa* ‑ɔ ‑kʋ 'lɛ ‑laagɔɔn na 'bhisa. 31'Nyɩ ‑ɩ ‑glɩ 'lɛ 'kwɩɩnkʋbhue cɩ 'la wɔlɩa na, a 'ta wɔɔnyɩtʋa ‑ʋ 'wlʋlʋ 'lɛ Laagɔ neen 'nyɩ ɔ solu 'lɛ anyɩ na, zɛlɩ bha? Laagɔ nabhe: 32N ‑glɩ Ablaamʋ, Izakɩ ɩya Zakɔpʋ 'la Laagɔ. Ɔ 'ta 'ku 'la Laagɔ ‑glɩ, ‑ma ɔ ‑glɩ ‑jajanya 'la Laagɔ.» 33Ncɛlɩa 'nu 'lɛ ɩmɩ ‑naa na, nikpoo ya maa sla, ɔla cacawɔlɩa 'wluku.
‑Jlɩmaa 'kadiea
(Mak 12.28-34; Luk 10.25-37)
34Falizɩɛnnyaa* 'nu 'lɛ lebhe Zozii ya Saduseyɛɛnyaa 'la nia kpaslɩlɩ na, ma ya 'wluwlalɩ. 35'Nyɩ maa sidiin 'la jlimaacanyɔ bhlo, ɔ 'ka 'lɛ Zozii 'gbuzu ‑zɔn 'pa na, ɔ yɔɔ neencla lebhe: 36«Canyɔ, ‑jlɩmaa 'fɩan nɩkplaan, ‑anasaa ‑a 'ghlia 'lɛ bha?» 37Zozii yɔɔ 'cla lebhe: «Wabha ‑Kwlenyɔ ‑naa Laagɔ, ‑naa pɔlɛ 'ciin, ‑naa 'wugoon ɩya ‑naa wɔɔgugwiea ‑tɛtɛa nɩkplaan. 38'Lɩka ‑Jlɩmaa 'kadiea, ‑a ‑glɩ 'lɛ ‑bɛka ‑jlɩmaa na. 39‑Mɔsɔ ‑naanaa ‑ayaasa 'wlʋlʋ 'lɛ na, ‑glɩ lebhe: Wabha ‑n 'yʋ lebhe ‑ncɩ 'bhisa. 40‑Jlɩmaaci ‑naa ‑mɔsɔa 'kʋ Moyizi 'la ‑jlɩmaa ‑tɛtɛa ɩya Laagɔnekʋnyɩtɛnyaa 'la cacawɔlɩa 'slalɩ 'lɛ.»
Laagɔ 'la ‑Sasanyɔa ɩya Daviti
(Mak 12.35-37; Luk 20.41-44)
41Falizɩɛnnyaa* 'wlalɩa 'wlu 'nyɩ Zozii ya maa wɔɔkle ‑naa neencla: 42«'Nsasa a 'lɩlɩlɩa 'lɛ Laagɔ 'la ‑Sasanyɔa* 'la wɔlɩa bha? Ncaasaa 'la cʋʋ ɔ ‑glɩa 'lɛ bha?» Ma yɔɔ 'cla lebhe: «Daviti 'la 'cʋ.» 43Zozii ya maa 'cla lebhe: «Na Daviti, daa ‑Kplɔkplɔ ‑Wugoa* ‑yelia 'mɔɔ 'lɛ na, 'lɩsaa 'la gbʋ ɔ laanɩa 'mɔɔ 'lɛ ‑Kwlenyɔ bha? Sa ɔ claa lebhe:
44 ‑Kwlenyɔ ya 'na ‑Kwlenyɔa 'cla lebhe:
Kʋʋn 'lipasɔ 'kʋ sa
ɩya n 'ka ‑naa ‑zɔbhɛlɩgbanyaa 'fɩan
‑naa 'kʋnamʋnʋlʋʋ ple.
45Na, Daviti lanɩɔ 'lɛ ‑Kwlenyɔ na, 'nsasa ɔ ‑glɩglɩlɩnɩ ‑awlɛ 'lɛ ɔla 'cʋ bha?» 46Bhlogbɩɩ 'taanɩa wɔlɩ 'lɩ ɩya ɔ 'ka nyɩtɛ. 'Nyɩ ‑ɩ bhɔlʋ 'lɛ 'dɛ na, nclɔɔ 'nyiglili 'tanɩa ɔcɩ ‑ylɛylɛ ɩya ɔ 'kanɩa 'mɔɔ neencla.
Àwon tá yàn lọ́wọ́lọ́wọ́ báyìí:
Mat 22: NTLD13
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Dida New Testament © Bible Society of Côte d'Ivoire, 2013.
