Mat 21

Zozii ble Zolizalɛmʋ nyɩbhɛlɩsa

(Mak 11.1-10; Luk 19.28-40; Zan 12.12-16)

1Daa ma mɛ 'lɛ Zolizalɛmʋ cɩ 'nyɩ ma ŋeni 'lɛ Bɛtɩfazeedua cɩ, ‑Olivʋsikikea 'kʋ na, Zozii ya gɩlɩnyaa* ‑mɔsɔ lobhu 'nyɩ 2ɔ ya maa 'cla lebhe: «A mʋ 'dua ‑ʋ ‑kʋ 'lɛ anyɩ 'klʋklʋʋn na 'kʋ, a ka ŋeni ‑jaa na, a cɩ 'ka 'flumuŋlɔ 'lɩ, ʋ ‑gʋɔ ʋya ʋla 'cilee. A ‑bluluu ɩya a ‑laan mɩ. 3'Nyɩ ka nclɔɔ ‑ka anyɩ neencla na, a 'cla lebhe: ‑Kwlenyɔa 'matɩɩ ɩya ɔ kɩɩ ‑pɔtɔnʋ 'cintalɩ a ‑yɩɩsɩ 'ka ci.» 4‑Sa Laagɔnekʋnyɩtɛnyɔa* 'la niwɔlɩa ‑glalɩ 'lɛ 'kʋ: 5«A solu Siyɔɔnŋlʋgbɩɔa lebhe:

'Lɩka ‑naa nyɩbhɛlʋa, ɔ cio 'yɛpɩ 'bhlɩ,

ɔ ‑glɩ pɔɔwɔtɩnyɔ,

ɔ ‑gbɛ 'flumuŋlɔ ɩya 'flumuco 'kʋ, ‑gbaakwɩbhɛmlɛ 'la 'cilee.»

6Gɩlɩnyaa ya mʋ 'nyɩ saa Zozii solua 'lɛ maa na, 7ma ya 'flumuŋlɔa ɩya 'flumucoa ‑lamʋ. Ma yɩɩ mala lokua 'kʋ 'pa 'nyɩ Zozii yɩɩ 'kʋ sakʋ. 8Ncaabhutukpa ya mala lokua ‑gugwiea 'kʋ ylʋ, ‑anʋa 'kɔtɔa silabhɩ 'nyɩ ma paa 'mɩɩ ‑gugwiea 'kʋ. 9Maa ‑ɔ ‑kʋa 'mɔɔ 'lɛ 'kʋklʋʋn ɩya maa ‑ɔ ‑kʋa 'mɔɔ 'lɛ leen na, ma ‑gaa nɩkplaan 'nyɩ ma claa lebhe: «'Klʋagba ŋeni Daviti 'la 'Cʋa! 'Naa 'nyupalɩɛ ŋeni ɔmɔa ɔ cili 'lɛ ‑Kwlenyɔ 'la 'ŋlɩa nɩkplaan na! 'Klʋagba ŋeni 'kʋzilo Laagɔ 'yɛpɩ ‑laagɔɔn!»

10Daa Zozii ble 'lɛ Zolizalɛmʋ na, 'dua ‑tɛtɛa ya neengba. Ma claa neen lebhe: «Ncaasaa bha?» 11'Nyɩ ‑alawleea ŋonua 'lɛ lebhe: «Laagɔnekʋnyɩtɛnyɔ Zozii, ‑ɔ 'wlʋlʋ 'lɛ Nazalɛtɩ, Galileebhlɩa 'kʋ na.»

Zozii ya Laagɔpaakadiea ‑zɔn ble

(Mak 11.15-17; Luk 19.45-46; Zan 2.13-17)

12Zozii ya Laagɔpaakadiea* ‑zɔn ble 'nyɩ ɔ ya lɩɩpɛlʋzʋnyaa ɩya ‑lɩɩpɩanyaa 'tli. Ɔ ya 'dalakacinyaa 'la 'tlɔnblɩcɩa ɩya libhlia ma la 'lɛ 'kpakpɩa na, ɩla 'pɛlʋzʋnyaa 'la kpua sagblii. 13Ɔ ya maa 'cla lebhe: «Ɩ ‑zieo lebhe: Ma cɩ 'ka 'na ‑palʋa bhibhiepalʋ* la. ‑Ma anyɩ, a yʋʋ 'winya 'la zizieda ple!» 14Daa ɔ ‑kʋa 'lɛ Laagɔpaakadiea ‑zɔn na, 'citutunya ɩya bhɩbhlinya yɔɔ cɩmɛ 'nyɩ ɔ ya maa jabha. 15‑Teyiyinya ‑kpasɩa ɩya ‑jlɩmaazienyaa* 'lɩ 'lɛ nikpooslaslalobholia ɔ wlʋa 'lɛ nʋda, ɩya 'cuoa ‑ɔ ‑gaa 'lɛ nɩkplaan Laagɔpaakadiea ‑zɔn 'nyɩ ‑ɔ cla 'lɛ lebhe: «'Klʋagba ŋeni Daviti 'la 'Cʋa» na, dɔgbɛ ya maa pla 16'nyɩ ma yɔɔ 'cla lebhe: «‑N nu ɩmɩa ma nyɩtɛ 'lɛ na bha?» Zozii ya maa 'cla lebhe: «‑Ghɛɛ! ‑Ma Zieziewɔlɩa ‑ɩ cla 'lɛ lebhe: 'Cicʋ ɩya 'cisanpɔlɩa, ‑n ya mala nia nɩkplaan ‑naa ‑evliwolɩɛ zʋ, a 'ta ka ‑azlɩɩ zɛlɩ bha?» 17Ɔ ya maa 'dɛ cɩɩnwlʋlʋ, 'nyɩ ɔ ya Betaniidua 'kʋ pʋkan mʋ.

Zozii ya 'figisu 'pa

(Mak 11.12-14,20-25)

18‑Zeli ze 'lɛ na, daa ɔ ‑kʋa 'lɛ Zolizalɛmʋ cɔlɔda na, ŋɔmʋ yɔɔ kla. 19Ɔ ya ‑gugwiea cɩ 'figisu 'lɩ, ɔ yʋʋ cɩmɛ, ‑ma 'taakpɩ ‑tɛɛ ɔ ŋeniu 'lɛ 'wlu. Ɔ ya nesa 'nyɩ ɔ yʋʋ 'cla lebhe: «‑N cɩ 'ta kɩnɩ 'pʋpʋ 'kʋ 'cie tlʋ!» Dɩpɩa bhlogbɩɩ, sua ya yɛ. 20Gɩlɩnyaa* 'lɩ 'lɛ ɩmɩ ‑naa 'ciin na, nikpoo ya maa sla 'nyɩ ma ya 'cla lebhe: «'Nsasa 'nyɩ 'figisua ya 'lɛ ‑sa ‑pɔtɔnʋ ‑naa yɛ bha?» 21Zozii ya maa cla lebhe: «N solu anyɩ ɩ ‑glɩ ‑nʋawlɛ, ɩ ‑ka ‑kʋ lebhe a ‑ka pɔɔtɛtɛ ‑ka 'nyɩ ala pɔlɩa 'ta tɩtɛlɩ na, ɩmɩa n nʋ 'lɛ 'figisu ‑naa cɩ na, a cɩɩ nʋ 'nyɩ ka a ‑ka 'kikee ‑naa 'titi 'cla lebhe: 'Wlʋ ‑da ɩya ‑n bhlili 'nyiin na, ɩ cɩ sɛɛ 'plɩ. 22Ɩmɩa ‑tɛtɛa 'fɩan a cɩ 'ka 'lɛ bhibhie nɩkplaan 'clalɩ na, a ‑ka pɔɔtɛtɛ ‑ka na, a cɩ 'kɩɩ 'lɩ.»

'Nda Zozii 'la ‑kwleliea 'wlʋlʋa 'lɛ bha?

(Mak 11.27-33; Luk 20.1-8)

23Zozii ya ‑awlɛ Laagɔpaakadiea* ‑zɔn ble 'nyɩ ɔ ‑kʋa 'lɛ cada na, ‑teyiyinyaa tocɩa ɩya ncaakpasɩa yɔɔ cɩmɛ 'nyɩ ma yɔɔ 'cla lebhe: «‑Jioli saa -n ‑kaa 'lɛ 'nyɩ ‑n nʋa 'lɛ ɩmɩ ‑naa bha? 'Nyɩ ncaasaa ‑ɔ 'nyɩɔ 'lɛ 'dɛ 'la ‑jiolia bha?» 24Zozii ya maa neenŋonu lebhe: «‑Amʋ ‑ma, n 'ka anyɩ wɔɔkle bhlogbɩɩ ‑tɛɛ neencla. A ‑kaan neenŋonu na, ‑amʋ ‑ma n cɩ anyɩ ‑jiolia nɩkplaan n nʋnʋ 'lɛ ɩmɩ ‑naa na pala. 25Zaan 'la ncɛlɩ 'nyuwluzʋlɩɛ, 'nda ɩ 'wlʋlʋanɩa 'lɛ bha? ‑Laagɔɔn bha, ‑ma ncɛlɩ wlɩɩn bha?» Na, ma guguanɩa macɩ bhlobhlo nɩkplaan lebhe: «Gbazɩ ‑a ‑ka 'cla lebhe ‑laagɔɔn na, ɔ cɩ 'ka ‑anyɩ 'cla lebhe: 'Nyɩ 'lɩsaa 'la gbʋ a 'ta 'lɛ ɔla wɔlɩa ‑nʋawlɛ la bha? 26'Nyɩ gbazɩ ‑a ‑ka 'cla lebhe: Ncɛlɩ wlɩɩn na, ɩ nanɩ lebhe ‑alawleea 'la ŋanɔ 'bhla ‑anyɩ, sa maa 'fɩan ‑lio ‑danʋfʋɛ lebhe Zaan ‑glɩ Laagɔnekʋnyɩtɛnyɔ* na.» 27'Nyɩ, ma ya Zozii neenŋonu lebhe: «‑A 'ta ‑ci.» Na, ɔmɔ ‑ma ɔ ya maa 'cla lebhe: «‑Amʋ ‑ma 'n pala 'ta anyɩ ‑jiolia nɩkplaan n nʋnʋ 'lɛ ɩmɩ ‑naa na.»

'Cuo ‑mɔsɔ 'la ‑nyandla

28Zozii ya ‑awlɛ maa 'cla lebhe: «'Nsasa a 'lɩlɩlɩa 'lɛ wɔlɩ ‑naa bha? Nclɔɔ bhlo ‑kaa 'cuo ‑mɔsɔ. Ɔ ya ‑bɛka ‑naanɔa 'bɩɩnmʋnʋ 'nyɩ ɔ yɔɔ 'cla lebhe: 'Na 'cʋ, mʋ ‑yaka 'na ‑ghlɛzɛɛnkwlaa nɩkplaan ɩya ‑n ka lobholi nʋ. 29Ɔmɔ ‑naa yɔɔ 'cla lebhe: 'N mʋ 'ta. ‑Ma ɩla da bɔɔn 'lɛ 'pɛpɛ na, ɔ ya kwlacala 'nyɩ ɔ ya 'plɩ, ɔ ya 'kwlaa nɩkplaan mʋ. 30Ɔ ya ‑mɔsɔ ‑nanɔa 'bɩɩnmʋnʋ 'nyɩ ɔ yɔɔ wɔlɩa bhlogbɩɩ solu. Ɔmɔ ‑naa yɔɔ 'cla lebhe: N to, ka n mʋ 'lɛ 'yɛpɩ. ‑Ma ɔ 'ta 'yɛpɩ 'plɩ. 31Ma ‑naa ‑mɔsɔa, ‑anɔsaa ‑ɔ ya 'lɛ ɔ toa 'la pɔɔsa nʋ bha?» Ma nabhe: «‑Bɛka ‑naanɔa.» Na, Zozii ya maa 'cla lebhe: «N solu anyɩ, ɩ ‑glɩ ‑nʋawlɛ: ‑Lapooclanyaa ɩya ‑badaagluliŋwlɛa cɩ ka Laagɔ 'la Nyɩbhɛlɩdua* nɩkplaan bleli ‑bɛɛ 'fɩɔn ɩya anyɩ ‑ma a 'ka 'lɛ ble. 32Sa 'Nyuwluzʋnyɔ Zaan ya anyɩ 'bhlɩ ci, ɔ ya anyɩ 'kʋnylugolulɩɛ 'la ‑gugwiea pala 'nyɩ a 'ta ɔla wɔlɩa ‑nʋawlɛ la. ‑Ma ‑lapooclanyaa ɩya ‑badaagluliŋwlɛa ya ɔla wɔlɩa ‑nʋawlɛ la. 'Nyɩ anyɩ, a ya ɩmɩ ‑naa ‑tɛtɛa 'ciinlɩ, 'bhlɩmɔɔn a 'ta ŋonu le a 'ka kaci ɩya a 'ka ɔla wɔlɩa ‑nʋawlɛ la.

'Kwlaklʋlɩnyaa 'la ‑nyandla

(Mak 12.1-12; Luk 20.9-19)

33A po ‑buun -nyandla bhlo 'nyukwliin. ‑Dʋdʋto bhlo ya ‑ghlɛzɛɛnkwla golo, ɔ yaa glɔ cɩ kpa, ɔ yaa nɩkplaan ‑ghlɛzɛɛncaa 'la 'nyɔgbɔbhuku 'bhli 'nyɩ ɔ ya 'yɛpɩ ‑dɩgba zʋ. Ɩla leen, ɔ yaa lobholinʋnya wlɩɩn zʋ le ma 'ka poli 'nyɩ ɔ ya lowluun mʋ. 34Daa sicaa 'la ‑sada ŋeni 'lɛ na, ɔ ya ɔla lobhocuoa lobholinʋnyaa 'bhlɩ lobhu le ma 'kaa ɔla da 'nyɩ. 35‑Ma 'kwlaklʋlɩnyaa ya ɔla lobhocuoa 'kʋbhli, ma ya bhlo bhuti, ma ya bhlo 'bhla 'nyɩ ma ya bhlo cɔkʋʋn bhutili. 36Ɔ ya ‑awlɛ ‑buun ‑lobhocuo lobhu, ma ‑zua ma zi ‑bɛka ‑naanʋa 'kʋ. Ma ya maa sɛɛ bhlogbɩɩ nʋ. 37Bhɩalɩdaa, ɔ ya ɔla 'cileea maa 'bhlɩ lobhu, ɔ claa ɔcɩ lebhe: Ma cɩ 'ka 'na 'cʋa zʋ. 38‑Ma 'kwlaklʋlɩnyaa 'lɩ 'lɛ 'cileea na, ma ya macɩ 'cla lebhe: 'Lɩka ‑ajaalinyɔa. A ci! ‑A 'bhlɔɔ ɩya 'kwlaa 'ka ‑a 'na 'plɩ. 39Ma yɔɔ 'kʋbhli, ma yɔɔ 'kwlaa 'la glɔa leen 'pa 'nyɩ ma yɔɔ 'bhla. 40Na, daa 'kwlaa toa cɩ 'ka 'lɛ ci na, 'nsasa ɔ cɩ 'kaa 'lɛ 'kwlaklʋlɩnya ‑naa nʋnʋnʋ bha?» 41Ma yɔɔ neenŋonu lebhe: «'Ɔ cɩ 'ta maa ŋaazɩɩn 'lɩ ‑ylɛylɛ, ‑ma ka ɔ cɩ 'ka 'lɛ gba ma 'ka ncaanyinyi ‑naa nyinyisa 'bhla ɩya ɔ 'ka 'kwlaa ‑buun ncɛlɩ wlɩɩn zʋ, maa ‑ɔ cɩ kɔɔ 'lɛ 'kwlaa 'la tlʋtlʋlɩɩa daa ɔ ‑walɩ 'lɛ na, 'nyɩnɩ na.»

42Zozii ya maa 'cla lebhe: «A 'ta ka ‑azla Zieziewɔlɩa* nɩkplaan zɛlɩ lebhe: Cokwiea ‑paaslanyaa 'pa 'lɛ 'kwlaan na, ɛmɛ ‑ɛ 'plɩ 'lɛ ‑palʋa 'la lopolugbuducokwie bha? ‑Kwlenyɔ, ɔmɔ ‑ɔ wabha 'lɛ sɛɛ. Ɩ ‑glɩ ‑ala da ‑jakajakagbɩ.» 43Dɛ n solu 'lɛ anyɩ lebhe: «Ma cɩ 'ka anyɩ Laagɔ 'la Nyɩbhɛlɩdua* ‑salɩ ɩya ma kʋʋ 'lɔlʋa ‑anʋa ‑ʋ -cɩ ka 'lɛ ʋla 'caa tlʋ na 'nyɩ. 44Ɔmɔa ‑ɔ cɩ ka 'lɛ cokwie ‑naa 'kʋ bhlili na, ɔ cɩ 'kɔtɔkɔtɔlʋ 'nyɩ ɔmɔa ɛ cɩ 'ka 'lɛ 'kʋ bhlili na, ɛ cɩɔ su.» 45Daa ‑teyiyinyaa tocɩa ɩya Falizɩɛnnyaa* 'nu 'lɛ ɔla ‑nyandlaa na, ma ya cibhlili lebhe maa ɔ saa 'lɛ. 46Ma 'matɩanɩa 'mɔɔ 'kʋbhlida, ‑ma ncɛlɩa 'la ŋanɔ ya maa pla, sa ma maa 'mɔɔ le Laagɔnekʋnyɩtɛnyɔ* na.

Àwon tá yàn lọ́wọ́lọ́wọ́ báyìí:

Mat 21: NTLD13

Ìsàmì-sí

Pín

Daako