Mat 20
20
Lobholinʋnyaa 'la ‑nyandla
1«‑Laagɔɔn 'la Nyɩbhelɩdua*, ma cɩʋ 'kwlatoa ‑ɔ wlʋ 'lɛ ‑zɔn ‑zʋkpasa 'pɩɩ le ɔ 'ka ɔla ‑ghlɛzɛɛnkwlaa nɩkplaan 'la lobholinʋnya 'matɩ na palalɩ. 2Ɔ ‑ya maasɔ ya neennununu lebhe ɔ cɩ maa zezezeliin 'la dlua ‑plʋ 'nyɩ ɔ ya 'lɛ maa ɔla 'kwlaa nɩkplaan fa. 3Ɔ ya 'ŋwacɩ ‑nvɔɔna ‑zɔnwlʋ, ɔ ya ‑anʋa 'lɩ, ma ‑kʋa 'clikpoa nɩkplaan, maa nʋ 'ta lʋʋ 4'nyɩ ɔ ya maa 'cla lebhe: Anyɩ ‑ma, a mʋ 'na ‑ghlɛzɛɛnkwlaa nɩkplaan, ‑ma n cɩ 'ka anyɩ saa ɩ ‑fata 'lɛ na ‑plʋ. 5Ma ya 'plɩ, ma ya 'yɛpɩ mʋ. Ɔ ya ‑awlɛ dɩdɩ ɩya 'plɩplɩylʋʋn 'la 'ŋwacɩ ‑mɔta ‑zɔnwlʋ 'nyɩ ɔ ya ‑awlɛ sɛɛ bhlogbɩɩ nʋ. 6'Ylʋva 'la 'ŋwacɩ ‑ngbi, ɔ ya ‑awlɛ ‑zɔn 'wlʋ, ɔ ya ‑anʋa dɩpɩa 'nylugoda ŋeni 'nyɩ ɔ ya maa neencla lebhe: 'Lɩsaa 'la gbʋ, daa tooto ‑zelia ‑kaa 'lɛ ze na, a ‑kʋa 'lɛ ‑da 'nyɩ 'a nʋ 'taa 'lɛ lobhloli bha? 7Ma yɔɔ 'cla lebhe: Nclɔɔ 'ta ‑anyɩ lobholiin 'ma. Ɔ ya maa 'cla lebhe: Anyɩ ‑ma, a mʋ 'na ‑ghlɛzɛɛnkwlaa nɩkplaan.
8Daa 'ylʋ mʋ 'lɛ na, 'kwlatoa ya ɔla lobhocoa 'cla lebhe: La lobholinʋnyaa ɩya ‑n ‑plʋ maa dlu. Bhɔlʋ leenbhlɩalɩ ‑naanʋa 'kʋ ɩya ‑n ka ‑bɛka ‑naanʋa 'kʋ bhlolu. 9Maa ɔ 'ma 'lɛ 'ylʋva 'la 'ŋwacɩ ‑ngbia na, ya ci 'nyɩ nclɔɔ nclɔɔ ya zezezeliin 'la dluuplʋdalaa 'lɩ. 10Daa ‑bɛka ‑naanʋa ci 'lɛ na, ma ya gugu lebhe, ma cɩ 'kaa 'lɩ ɩya ma 'kaa ma 'yea 'kʋzi, ‑ma maa ‑masɛɛ, nclɔɔ nclɔɔ ya zezezeliin 'la dluuplʋdalaa 'lɩ. 11Daa ma 'lɩa 'lɛ na, ma ya 'kwlatoa wɔlɩ cɩ ‑gbalɩɛ bhɔ, 12ma claa lebhe: Leenbhɩalɩ ‑naanʋa ‑naa, 'ŋwacɩwlu bhlogbɩɩ ‑tɛɛ ma nʋnʋ 'lɛ lobholi 'nyɩ ‑n plʋ maa le ‑anyɩa ‑ɔ ya 'lɛ zezezeli bhuoa nɩkplaan slokpla 'nyɩ 'ylʋa ya 'lɛ 'bhla ‑aan na 'bhisa bha? 13Na, 'kwlatoa ya nesa 'nyɩ ɔ ya maa sidiin 'la bhlo 'cla lebhe: N 'nagɔ, n 'ta kɔɔ ‑dufle ‑ylɛylɛ li. Zezezeliin 'la dluuplʋdalaa 'kʋ n ‑nyɔɔsɔ 'ta 'lɛ neennununu bha? 14'Ma ‑naa daa ɩya ‑n mʋ. ‑Ma ka n ‑wa 'lɛ lebhe, leenbhɩalɩ ‑naanɔ ‑naa, saa n 'nyɩɔ 'lɛ na, n kɔɔ sɛɛ 'nyɩ. 15N 'ta ‑jioli ‑ka ɩya saa n ‑wa 'lɛ na, n ka sɛɛ 'na 'dalaa nʋ bha? ‑Aana 'na gbɩ nanɩ 'lɛ na, dɛ ‑n pla 'lɛ woze bha? 16'Lɩka ‑sa leen ‑naanʋa cɩ 'ka 'lɛ 'kʋklʋʋn 'plɩ ɩya 'kʋklʋʋn ‑naanʋa 'ka 'lɛ leen 'plɩlɩ.»
Zozii nyɩtɛ ‑mɔtada ɔla 'kwɩa ɩya ɔla 'kwɩɩnkʋbhue 'la wɔlɩ
(Mak 10.32-34; Luk 18.31-34)
17Zozii mʋa Zolizalɛmʋ. ‑Gugwiea 'kʋ, ɔya 'kʋgba ‑mɔsɔa ya gbɛga 'nyɩ ɔ ya maa 'cla lebhe: 18«'Lɩka, ka ‑a mʋ 'lɛ Zolizalɛmʋ ɩya ma 'ka Nclɔɔa 'Cʋa* ‑teyiyinyaa tocɩa ɩya ‑jlɩmaazienyaa* wlɩɩn 'pɛlʋzʋlʋ. Ma cɩ 'kɔɔ 'tɩtɩpla ɩya ma 'kɔɔ 'kwɩ neen fa. 19Ma cɩ 'kɔɔ lowie wlɩɩn zʋ le ma nyanɩɔ, ma bhutio ɩya ma bhoo dabhlalɩsu 'ciin. ‑Ma ‑mɔta ‑zelia, ɔ cɩ 'ka 'kwɩɩnkʋbho.»
Zakɩ ɩya Zaan 'nɔ 'la 'clalɩlɩɛ
(Mak 10.35-41)
20Zebedee ‑yowliecɩa, ma 'nɔ ya Zozii cɩmɛ 'nyɩ ɔ yɔɔ ‑deliin ‑kukoonkplii sasla le ɔ 'kɔɔ lʋʋ 'clalɩ. 21Zozii yɔɔ 'cla lebhe: «'Lɩsaa ‑n 'matɩa 'lɛ bha?» Ɔ yɔɔ 'cla lebhe: «'Nyɩ ‑jioli ɩya ‑naa Nyɩbhɛlɩdua nɩkplaan, n ‑yowliecɩ ‑naa ‑mɔsɔa, bhlo 'kɔɔ 'lipasɔ 'kʋ sakʋ ɩya bhlo 'kɔɔ 'daba 'kʋ sakʋ» 22Zozii ya 'cla lebhe: «Ɩmɩa a 'clalɩ 'lɛ na, a 'tɩɩ ‑ci. ‑Kɔbhɛa n cɩ 'ka 'lɛ 'mla na, a cɩɛ 'mlalɩɛ mino bha?» Ma yɔɔ neenŋonu lebhe: «‑Ghɛɛ, ‑a cɩ mino.» 23Ɔ ya maa 'cla lebhe: «'Na ‑kɔbhɛa, a cɩɛ 'mla, ‑ma ‑ɩ ‑glɩ 'lɛ 'na 'lipasɔ 'kʋ ‑aana 'na 'daba 'kʋ 'la sakʋlɩɛa na, ‑n 'ta ‑amʋ ‑ɔ 'ta 'lɛ 'dɛ 'la ‑jiolia ‑ka, ‑ma maa ‑anʋa 'wlukua n To bhɔsʋɩ 'lɛ na, maa ɩ cɩ 'ka 'lɛ ‑nyɩɔ.» 24‑Daa gɩlɩnyaa* 'kʋgbaa 'nu 'lɛ wɔlɩ ‑naa na, ma ya bholiecɩa ‑mɔsɔa dɔgbɛ 'kʋ 'manɩ. 25‑Ma Zozii ya maa ɔcɩ cɩ lalɩ 'nyɩ ɔ ya maa 'cla lebhe: «A ‑ci sɛɛ lebhe ka 'bhlɩtocɩa ‑kʋlʋ 'lɛ mala 'bhlɩnyaa 'kʋ 'nyɩ ncaakadɩa kle 'lɛ maa 'yalɛ. 26Ɩ 'ta nanɩ lebhe ɩ kʋ sɛɛ anyɩ sidiin. ‑Ma anyɩ sidiin, ɔmɔ ‑ɔ ‑ka ‑wa lebhe ɔ 'ka 'kʋto na, 'naa ɔ 'plɩ ala lobhoco. 27'Nyɩ gbazɩ nclɔɔ ‑ka ‑wa lebhe ɔ 'ka 'kʋklʋʋn kʋ na, 'naa ɔ 'plɩ ala geyu. 28'Sɛtɛɛ bhlogbɩɩ Nclɔɔa 'Cʋa* 'ta ci le ma 'kɔɔ lobho, ‑ma ka ɔ ci 'lɛ le ɔ 'ka lobho ɩya ncaabhutukpa 'la nɩkplaankplɩlɩɛ 'la gbʋ, ɔ 'ka ɔla jabhʋa 'nyɩ.»
Zozii ya 'citutunya ‑mɔsɔ jabha
(Mat 9.27-31; Mak 10.46-52; Luk 18.35-43)
29Zozii ɩya ɔla gɩlɩnyaa* wlʋa Zelikoodua nɩkplaan. Ncaabhutukpa yɔɔ gɩlɩ. 30'Citutunya ‑mɔsɔ ‑kʋa ‑gugwiea cɩ sa, daa ma 'nu 'lɛ lebhe Zozii plɩa 'lɛ na, ma ya nɩkplaan ‑gaalɩɛ bhɔ 'nyɩ ma claa lebhe: «‑Kwlenyɔ, Daviti 'la 'Cʋ, 'maa 'lɩ ‑anyɩ ŋaazɩɩn!» 31‑Alawleea ‑gaalɩa maa 'wlʋ le ma kaa mala nia mɛ. ‑Ma ka ‑tɛɛ ma ‑gaanɩa 'lɛ nɩkplaan ‑gbɔɔn 'nyɩ ma claa 'lɛ lebhe: «‑Kwlenyɔ, Daviti 'la 'Cʋ, 'lɩ ‑anyɩ ŋaazɩɩn!» 32Zozii ya 'nylugo, ɔ ya maa la 'nyɩ ɔ ya maa neencla lebhe: «'Lɩsaa a ‑wa 'lɛ lebhe n nʋ ɩya n 'nyɩ anyɩ bha?» 33Ma yɔɔ 'cla lebhe: «‑Kwlenyɔ, 'naa ‑ala 'cia kalɩ 'gbo!» 34Ŋaazɩ ya Zozii 'kʋ 'kɔsɔ 'nyɩ ɔ ya mala 'cia cɩkla. Dɩpɩa bhlogbɩɩ, ma ya salɩ 'nyɩ ma yɔɔ bɩkʋslo.
Àwon tá yàn lọ́wọ́lọ́wọ́ báyìí:
Mat 20: NTLD13
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Dida New Testament © Bible Society of Côte d'Ivoire, 2013.
