Mat 12

Zozii ‑kwle nyɔkwɛclɩɩa

(Mat 12.1; Mak 2.23-28; Luk 6.1-5)

1'Dɛ 'la daa, Zifʋnyaa 'la nyɔkwɛclɩɩ bhlo 'kʋ, Zozii 'plɩlɩa 'bleekwlɩ nɩkplaan. Ŋɔmʋ ya ɔla gɩlɩnyaa kla 'nyɩ ma kplaa 'bleea 'ciin 'nyɩ ma lia. 2Na, daa Falizɩɛnnyaa* 'lɩ 'lɛ ɩmɩ ‑naa na, ma ya Zozii 'cla lebhe: «Kopeka ‑naa gɩlɩnyaa, ma nʋ ɩmɩa ‑ɩ 'ta 'lɛ ‑fata le ma nʋ nyɔkwɛclɩɩa 'kʋ na.» 3Ɔ ya maa neenŋonu lebhe: «Ɩmɩa Daviti nʋa 'lɛ, daa ŋɔmʋa bhlaa 'lɛ ɔya ɔla 'namʋnyaa na, a 'ta ka ‑azlɩɩ zɛlɩ bha? 4Ɔ ya Laagɔ 'la ‑palʋa ‑zɔn ble 'nyɩ ma ya ‑teyiyiflawia, ɔmɔ ‑aana ɔla 'namʋnyaa 'taa 'lɛ ɩla li ‑jioli ‑ka, ‑n 'ta le ‑teyiyinyaa ‑tɛɛ na, li. 5‑Aana a 'ta ka ‑azla ‑jlɩmaa nɩkplaan zɛlɩ lebhe nyɔkwɛclɩɩa 'kʋ, Laagɔpaakadie* nɩkplaan, ‑teyiyinyaa 'plɩlɩ 'ta nyɔkwɛclɩɩa 'la ‑jlɩmaa 'kʋ bha? ‑Sakɛ 'bhlɩmɔɔn ɩ 'ta ‑jlɩmaa 'la tʋlɩɛ ‑glɩ. 6‑Ma n solu anyɩ, lʋʋ ‑kʋ ‑da ʋ zi Laagɔpaakadiea 'kʋ! 7Zieziewɔlɩa nabhe: Ŋaazɩɩnlɩlɩɛ n ‑wa 'lɛ ‑ma ‑n 'ta ‑teyiyimlaa. A ‑kaa wɔɔkle ‑naa 'la ‑zɔn 'nua na, 'a cɩ 'taa maa ‑ɔ 'ta 'lɛ gbʋwluci na, 'tɩtɩpla. 8Na, Nclɔɔa 'Cʋa* ‑glɩ nyɔkwɛclɩɩa 'la ‑kwleto.»

Zozii ya nclɔɔ bhlo nyɔkwɛclɩɩa 'kʋ jabha

(Mak 3.1-6; Luk 6.6-11)

9Zozii ya 'dɛ 'wlʋ 'nyɩ ɔ ya mala bhibhiepalʋa* ‑zɔn ble. 10Nclɔɔ bhlo ‑kʋa 'dɛ, ɔ ‑kaa 'kukusɔ. Ma 'ka 'lɛ Zozii wɔlɩkʋgɩ na, ma yɔɔ 'gbuzuzɔnpa 'nyɩ ma yɔɔ 'cla lebhe: «‑Jioli ‑nyɩɔ le ma jabha nclɔɔ nyɔkwɛclɩɩa 'kʋ bha?» 11‑Ma Zozii ya maa 'cla lebhe: «Anyɩ sidiin, ‑anɔsaa ‑ɔ ‑ka 'lɛ 'bhlabhlɛ bhlogbɩɩ ‑ka, 'nyɩ ɛ ‑ka 'lɛ nyɔkwɛclɩɩa 'kʋ 'bhukuun bhlili na, 'ɔ cɩ tɛɛ 'lɛ 'yɛpɩ ‑sakan mʋ bha? 12'Nyɩ nclɔɔ kalɩ gbʋ ‑gbɔɔn ɔ zi 'bhlabhlɛ 'kʋ! 'Sɛ 'la gbʋ na, ‑jioli ‑kʋ le nyɔkwɛclɩɩa 'kʋ ma nʋ 'nanɩ.» 13Na, Zozii ya 'bhlɛnyɔa 'cla lebhe: «‑Glɔ ‑naa sɔa nɩkplaan!» Ɔ yʋʋ nɩkplaan ‑glɔ 'nyɩ ʋ ya 'plɩ le ʋ 'yʋa 'bhisa. 14‑Ma Falizɩɛnnyaa* ya ‑zɔnwlʋ, ma ya mʋ 'nyɩ ma ya 'wluwlalɩ le ma 'ka ɔla 'bhlawɔlɩ gʋa.

Zozii ‑glɩ 'lɛ lobhocoa Laagɔ sla 'lɛ de na

15Na, Zozii 'nu 'lɛ 'sɛɛ na, ɔ ya 'dɛ 'wlʋ. Ncaabhutukpa yɔɔ gɩlɩ 'nyɩ ɔ ya maa 'fɩan jabha. 16Ɔ ya maa wlɩɩnlo le ma 'la solua ncɛlɩ ɔla cɩa wɔlɩ. 17‑Sa ɩmɩa Laagɔnekʋnyɩtɛnyɔ* Izayii nyɩtɛa 'lɛ na, ɩ glalɩ 'kʋ:

18 «'Lɩka 'na lobhocoa n sla 'lɛ de na,

'na ‑wawacoa, ɩ mɛmaan 'lɛ pɔlɛ 'kʋ le n sla de na.

N cɩ 'kɔɔ 'na 'wugoa 'kʋ zʋ

ɩya ɔ 'ka 'kʋnylugolulɩɛ 'bhlɩ 'bhlɩ 'kʋ 'la ncɛlɩ ca.

19 'Ɔ cɩ 'ta gbɩ 'matɩ,

'ɔ cɩ 'ta 'kasɛ 'pa

'nyɩ clikpua nɩkplaan, ɔla nea cɩ 'ta 'kʋzilo.

20 'Dʋkɔlʋa ‑ʋ ‑kluo 'lɛ kɔɔn tooto na,

ɔ cɩ 'tʋʋ 'kɔtɔ,

‑kaniea ‑ɛ 'bhu 'tanɩ 'lɛ 'nanɩ na,

'ɔ cɩ 'tɛɛ ŋomu

‑aan ɩya ɔ 'ka gba 'kʋnylugolulɩɛ 'ka ‑sɩa.

21 Ɔmɔ nɩkplaan ‑laagɔzɔan 'la ncɛlɩa 'fɩan cɩ 'ka 'lɛ mala ‑delikʋtɛlɔa zʋ.»

Zozii ŋonu ɔla gbatlɩmʋnʋnyaa neen

(Mat 9.32-34; Mak 3.22-27; Luk 11.14-23)

22Ma ya 'wugonyunyunyɔ bhlo Zozii ‑la. 'Ɔ 'lɩ 'ta sa, 'ɔ 'nu 'ta 'nyɩ ɔ nyɩtɛ 'ta. Zozii yɔɔ jabha. Ɔ nyɩtɛanɩa 'nyɩ ɔ lɩanɩa sa. 23Na, nikpoo ya ‑alawleea sla 'nyɩ a claa lebhe: «‑Anɔ ‑naa ‑ɔ 'ta sɛ 'lɛ Daviti 'la 'Cʋa ‑glɩ bha?» 24‑Ma daa Falizɩɛnnyaa* 'nu 'lɛ wɔlɩ ‑naa na, ma ya 'cla lebhe: «Ɔmɔ ‑naa, 'wugwi ‑nyinyia toa ‑ɔ ‑glɩ 'lɛ Bɛzebulu na, ɔla 'tɛtɩa nɩkplaan ‑tɛɛ ɔ 'tlili 'lɛ 'wugwi ‑nyinyia.»

25Zozii, ‑cia 'lɛ mala wɔɔgugwiea na, ɔ ya maa 'cla lebhe: «Nyɩbhɛlɩdu 'tʋtʋʋntʋa ‑ʋ ‑do 'lɛ nɩkplaan na, 'plɩkan ʋ ci 'lɛ. 'Du ‑aana 'sle bhlogbɩɩ cɩ 'ta nɩkplaan do ɩya a 'ka kla. 26Ka ɩ ‑ka ‑kʋ le Sataan* ‑ka Sataan 'tli na, ɔ ya ɔmɔ 'titi ɔcɩ tʋ ŋeni. Na, 'nsasa ɔla nyɩbhɛlɩdua ʋ cɩ 'kanɩ 'lɛ klaklalɩ bha? 27'Nyɩ ‑amʋ, Bɛzebulu 'la 'tɛtɩ nɩkplaan n ‑ka 'wugwi ‑nyinyi 'tlili na, anyɩ ala gɩlɩnyaa*, ncaasaa 'la 'tɛtɩ nɩkplaan ma 'tlilii 'lɛ bha? Maa 'titii ‑cɩ ka 'lɛ anyɩ 'gesalɩ. 28‑Ma ‑amʋ, ɩ ka ‑kʋ le Laagɔ 'la 'Wugoa 'la 'tɛtɩa nɩkplaan n ‑ka 'wugwi ‑nyinyia 'tlili na, 'dɛndlana Laagɔ 'la Nyɩbhɛlɩdua* ya anyɩ 'kʋ ŋeni.

29'Nyɩ ‑awlɛ, 'nsasa nclɔɔ cɩ 'ka 'lɛ mino, ɔ 'ka 'lɛ 'tɛtɩkalɩnyɔ 'bhisleen ble ɩya ɔ 'ka ɔla 'nanɩa famʋ, ɩ ka ‑kʋ le ɔ 'tɔɔ gʋa ‑bɛɛ na bha? Na, 'fɩɔn ɔ 'ka 'lɛ ɔla 'slea gbaja na, ɩ ‑fata lebhe ɔ 'pɛɔ bhliin. 30Ɔmɔa ‑ɔ 'ta 'lɛ 'na ‑plɔnyɔ ‑glɩ na, ɔ ‑glɩ 'na ‑zɔbhɛlɩgbanyɔ. 'Nyɩ ɔmɔa ‑ɔ klalɩ 'taan 'lɛ ɩya ‑a ka 'wluwlalɩ na, ka ɔ dlolu 'lɛ. 31Ɩla gbʋ na, n solu anyɩ lebhe: Ncɛlɩ 'la nyinyia ‑tɛtɛa ɩya vlalɩɛ ‑tɛtɛa ma cɩ ka 'lɛ Laagɔ vla na, ɩ cɩ maa ‑vɔɔ. ‑Ma ‑Kplɔkplɔ ‑Wugoa* 'la vlalɩɛ cɩ 'ta valɩɛ 'lɩ. 32Na, gbazɩ nclɔɔ ‑ka Nclɔɔa 'Cʋa* 'la wɔɔnyinyi nyɩtɛ na, ɔ cɩ valɩɛ 'lɩ. ‑Ma ɔ ‑ka ‑Kplɔkplɔ ‑Wugoa 'la wɔɔnyinyi nyɩtɛ na, 'ɔ cɩ 'ta valɩɛ 'lɩ ‑yaka naa ɔ cɩ 'ta valɩɛ 'lɩ ‑cɩpa.

Su ɩya ʋla 'ca

(Mat 7.16-20; Luk 6.43-45)

33Gbazɩ su ‑ka nanɩ na, ka ʋla 'ca nama. ‑Ma ʋ ‑ka gu ka na, ʋla 'ca nama 'ta. Sa su 'la 'ca nɩkplaan ma cibhlililiu 'lɛ. 34Tlaalɔlʋnyanyɩ, anyɩa ‑ɔ 'ta 'lɛ gbɩ 'kʋ nanɩ na, 'nsasa wɔɔnanɩ cɩ 'ka 'lɛ anyɩ neenwlʋlʋ bha? Sa wɔlɩa ‑ɩ ‑kʋ 'lɛ nclɔɔ pɔlɛ 'ciin na, ɩmɩ ‑ɩ 'wlʋlʋɔ 'lɛ neen. 35Ncaananɔ, wɔɔnanɩa ‑ɩ ‑kʋ 'lɛ ɔla pɔɔnanɛa nɩkplaan na, ɩmɩ ‑ɩ 'wlʋlʋɔ neen. Ncaanyinyo, wɔɔnyinyia ‑ɩ ‑kʋ 'lɛ ɔla pɔɔnyinyea nɩkplaan na, ɩmɩ ‑ɩ 'wlʋlʋɔ 'lɛ neen. 36N solu anyɩ, 'tɩtɩplaclɩɩa 'kʋ, yooyo -wɔlɩa 'fɩan -ɩ 'wlʋlʋa 'lɛ nclɔɔ nclɔɔ neen na, ɔ cɩ 'ka ɩla wɔlɩa 'kʋbhli. 37‑Naa wɔɔnyɩtʋ, ʋmʋ ‑ʋ ‑cɩ kɔɔ 'lɛ gbʋʋnsa ‑aana ‑naa wɔɔnyɩtʋ, ʋmʋ ‑ʋ -cɩ kɔɔ 'lɛ gʋa.»

Ncɛlɩ ya Zozii ghleda 'clalɩ

(Mat 16.1-4; Mak 8.11-12; Luk 11.16,29-32)

38‑Jlɩmaazienya* ɩya Falizɩɛnnya* ‑zlʋsaasa ya Zozii 'cla lebhle: «Canyɔ, ‑a ‑waa lebhe ‑n palaa ‑anyɩ ghleda bhlo.» 39Zozii ya maa 'cla lebhe: «‑Yaka 'la ncaanyinyia ‑ɔ 'ta 'lɛ Laagɔ 'la 'nyiyilie ‑ka na, ma 'clalɩ ka ghleda. Maa cɩ 'tanɩ ‑buun ‑naanɩ 'lɩ, ɩ -ka ‑kʋ le ‑n 'ta Laagɔnekʋnyɩtɛnyɔ* Zonasɩ 'la ghledaa ‑tɛɛ na. 40Sa, saa ‑tɛɛa Laagɔnekʋnyɩtɛnyɔ Zonasɩ li 'lɛ dobhe ‑mɔta ɩya zezezeli ‑mɔta ‑zliia nɩkplaan na, 'sɛtɛɛ bhlogbɩɩ Nclɔɔa 'Cʋa* cɩ ka 'lɛ dobhe ‑mɔta ɩya zezezeli ‑mɔta ‑gluu li. 41'Tɩtɩplaclɩɩa 'kʋ, Ninivʋnyaa cɩ 'ka ‑yaka 'la ncɛlɩa 'kʋklʋʋn 'nylugo ɩya ma 'ka maa wɔlɩkʋgɩ, sa daa Zonasɩ plici 'lɛ maa na, ma ya kwlacala. 'Nyɩ nclɔɔ ‑kʋ ‑da, ʋ zi Zonasɩ 'kʋ! 42'Tɩtɩplaclɩɩa 'kʋ, gozɔnbhlɩa 'kʋ 'la ŋlʋbhɛlʋa cɩ 'ka ‑yaka 'la ncɛlɩa 'kʋklʋʋn 'nylugo ɩya ɔ 'ka maa wɔlɩkʋgɩ, sa ɔ ya 'koonkobhlɩ ‑kʋ 'wlʋ nyɩ ɔ ya ci le ɔ 'ka Salomɔɔn 'la dɩgalɩwɔlɩa 'nyukwliinpo na. 'Nyɩ nclɔɔ ‑kʋ ‑da, ɔ zi Salomɔɔn 'kʋ!

'Wugo ‑nyunyu 'la cɔlɔlɩɛ 'la wɔlɩ

(Luk 11.24-26)

43'Wugo ‑nyunyu ‑ka nclɔɔ nɩkplaan 'wlʋ na, ʋ bibili ‑dʋdʋklia 'kʋa ncɛlɩ 'ta 'lɛ 'kʋ na 'kʋ 'nyɩ ʋ 'matɩ sakʋda. ‑Ma ʋ 'lɩ 'ta sakʋda. 44Na, ʋ cla ʋcɩ lebhe: N 'ka ka 'na tooto slea nɩkplaan n 'wlʋ 'lɛ 'na cɔlɔ. Daa ʋ ya 'lɛ cɔlɔ, 'nyɩ ʋ lɩ 'lɛ lebhe 'slea ‑nylupuo, a ‑gɩglalɩɔ 'kʋ ‑ma a 'ta nclɔɔn ‑ka na, 45ʋ mʋ, ʋ ma ʋ 'ye ‑ngbɔɔsɔ, ‑ɩ kalɩ 'lɛ 'klʋ 'nyɩ ‑ɩ ziu 'lɛ 'kʋ na 'nyɩ ɩ ci 'slea nɩkplaan, ɩ kʋ sa. 'Nyɩ nclɔɔ ‑naa 'la saa ɔ ‑kʋkʋlʋnɩ 'lɛ na, ɩ nyumonɩ 'nyɩ ɩ zinɩ ‑bɛkadaa 'la saa 'kʋ. ‑Sa ‑pɔtɔnʋ 'la ncɛlɩa 'la wɔlɩa cɩ 'ka 'lɛ 'plɩ.»

Zozii 'la 'lɔlʋa 'titi

(Mak 3.31-35; Luk 8.19-21)

46Na, Zozii ‑kʋ kaa ‑alawleea soluda 'nyɩ ɔ 'nɔ ɩya ɔ bholiecɩ ya 'lɛ ci. Ma ‑kʋa ‑jlukuun 'nyɩ ma 'matɩa le ma 'ka 'mɔɔ solu. 47Nclɔɔ bhlo yɔɔ 'cla lebhe: «'Lɩka n 'nɔ ɩya ‑n bholiecɩ 'kʋ ‑jlukuun, ma 'matɩ le ma kɔɔ solu.» 48Zozii yɔɔ 'cla lebhe: «‑Ɔ ‑glɩa 'lɛ n 'nɔ 'nyɩ ‑ɔ ‑glɩa 'lɛ n bholiecɩ bha?» 49Ɔ ya ɔla gɩlɩnyaa* ‑wlicie ‑tla 'nyɩ ɔ ya 'cla lebhe: «'Lɩka n 'nɔ ɩya n bholiecɩ. 50Sa, ncaatʋtʋʋntʋa ‑ɔ nʋ 'lɛ n Toa ‑ɔ ‑kʋ 'lɛ ‑laagɔɔn na 'la pɔɔsa na, ɔmɔ ‑ɔ ‑glɩ 'lɛ n bholi, n mɛnɔ ‑aana n 'nɔ.»

Àwon tá yàn lọ́wọ́lọ́wọ́ báyìí:

Mat 12: NTLD13

Ìsàmì-sí

Pín

Daako