Mat 13
13
Golonyɔ 'la ‑nyandla
(Mak 4.1-9; Luk 8.4-8)
1'Dɛ 'la clɩɩa bhlogbɩɩ 'kʋ, Zozii ya ‑zɔnwlʋ, ɔ ya 'nyia cɩ mʋ 'nyɩ ɔ ya sakʋ. 2Ncaabhutukpa yɔɔ cɩ 'wluwlalɩ, ɩ ya gba na, ɔ ya gɔlʋ bhlo nɩkplaan 'tɔ 'nyɩ ɔ ya sakʋ. ‑Alawleea ‑kʋa 'nyia cɩ. 3Na, ‑nyandla nɩkplaan, ɔ ya maa wɔɔbhutukpa solu. Ɔ ya maa 'cla lebhe: «Golonyɔ bhlo ya ‑zɔnwlʋ le ɔ 'ka ɔla gologololɩɩa 'moni. 4'Nyɩ ɔ ‑kʋa 'lɛ gologololɩɩa 'monida na, ‑anɩ ya ‑gugwiea cɩ bhlili. Libhli ya ci 'nyɩ ɩ ya 'ɩ 'fɩan li. 5‑Anɩ ya cokwie 'kʋ, daa ‑blaa 'ta 'lɛ ‑zu na bhlili. Ɩ ya 'faanfan 'wlʋ, sa 'dɛ 'la ‑dʋdʋa 'taa ku ‑ka na. 6Daa 'ylʋa na ʋ ‑glɛɛn 'lɛ na, ɩ ya 'kʋ si 'nyɩ ɩ ya yɛ, sa ɩ 'ta ‑sikplii ‑ka na. 7‑Anɩ ya 'ŋupiti nɩkplaan bhlili. 'Ŋua yɩɩ 'kʋzilo 'nyɩ ɩ yɩɩ 'wlugʋagʋalɩ. 8‑Anɩ bhlo ya ‑dʋdʋ 'nanʋ 'kʋ bhlili 'nyɩ ɩ ya 'ca tlʋ, ‑anɩ ‑gwlɩɩ ‑ngbi, ‑anɩ bhlo ‑gwlɩɩ ‑mɔta, ‑anɩ ‑ma ‑gwlʋʋ ɩya 'kʋgba. 9Na, ɔmɔa ‑ɔ ‑ka 'lɛ 'nyukwli na, 'naa ɔ 'nu.»
Wɔlɩa 'la gbʋa Zozii nyɩtɛlɩ 'lɛ ‑nyandlaan na
(Mak 4.10-12; Luk 8.9-10)
10Gɩlɩnyaa* ya Zozii cɩmɛ 'nyɩ ma yɔɔ neencla lebhe: «'Lɩsaa 'la gbʋ ‑n solulua 'lɛ maa ‑nyandla nɩkplaan bha?» 11Ɔ ya maa 'cla lebhe: «‑Laagɔɔn 'la Nyɩbhɛlɩdua* 'la wɔlɩa ‑ɩ ‑zizieo 'lɛ na, anyɩ ɩ ‑nyɩɔ 'lɛ le a cibhlilii, ‑ma maa ɩ 'ta maa ‑nyɩɔ. 12Sa ɔmɔa ‑ɔ ‑ka 'lɛ na, ma cɩ 'kɔɔ 'nyɩ ɩya ɔla daa 'ka zubholi. ‑Ma ɔmɔa ‑ɔ 'ta 'lɛ ‑ka na, 'pɛpɛ 'titi ɔ -ka ‑kao na, ma cɩɔ mɔ ‑salɩ. 13'Lɩka wɔlɩa 'wlukua n solulu 'lɛ maa ‑nyandla nɩkplaan na. Ma ‑ka 'ci, ma kope, ‑ma maa 'lɩ 'ta sa 'nyɩ ma ‑ka 'nyukwli, ‑ma ma 'ta ‑ŋlɛ, 'nyɩ maa 'nu 'ta. 14Na, mala gbazɔ Laagɔnekʋnyɩtɛnyɔ* Izayii 'la niwɔlɩa ya 'kʋglalɩ. Ɔ nabhe:
A cɩ 'ka 'nyukwliinpo ‑aan, 'a cɩ 'ta 'nu.
A cɩ 'ka kope ‑aan, 'a cɩ 'ta salɩ.
15 Sa ncɛlɩ ‑naa 'la pɔlɩa ya titlili.
Ma ya 'nyukwliintlibhalɩ, 'Nyɩ ma ya mala 'cia kpaslɩlɩ,
le ma 'la kɩɩ nɩkplaan salɩlɩ,
ma 'la ka mala 'nyukwlia nɩkplaan 'nunu,
ma 'la ka wɔlɩ pɔlɛ cɩ falɩ
ɩya ma 'la ka Laagɔ 'klʋtla, 'Nyɩ n cɩa maa jabha ‑ma!
16‑Ma anyɩ, a ‑kʋ 'nanɩ: Ala 'cia lɩ sa 'nyɩ ala 'nyukwlia nu. 17'Nyɩ n solu anyɩ, ɩ ‑glɩ ‑nʋawlɛ: Laagɔnekʋnyɩtɛnya ɩya 'kʋnylugolunya ‑bhutukpa yaa wabha le ɩmɩa a lɩ 'lɛ na, ma ‑kaa 'mɩɩ 'lɩ, ‑ma ma 'tɩɩ 'lɩ, ɩya ma 'kaa ɩmɩa a nu 'lɛ na 'nu, ‑ma ma 'tɩɩ 'nu.
Golonyɔa 'la ‑nyandlaa 'la ‑zɔnsalɩɛ
(Mak 4.13-20; Luk 8.11-15)
18Na, anyɩ, a 'nunɩ golonyɔa la ‑nyandlaa 'la ‑zɔn. 19Nclɔɔ ‑ka Nyɩbhɛlɩdua 'la wɔlɩa 'nyukwliinpo 'nyɩ ɔ 'tɩɩ 'nu na, 'dɛndlana ‑Abhɔlɛnyɔa ci 'nyɩ ɔ salɩɔ ɩmɩa ma ya 'lɛ ɔla pɔlɛa nɩkplaan golo na. 'Dɛ la nclɔɔa 'la gbɩa palalɩ ‑gugwiea cɩ 'la ‑dʋdʋa. 20Ɔmɔa ‑ɔla gbɩa ‑kʋ 'lɛ le ɩmɩa ‑ɩ bhlili 'lɛ cokwiedʋdʋa 'kʋ na, daa ɔ ya 'lɛ wɔɔnyɩtʋa 'nu na, ɔ 'manɩʋ pɔlɛkʋmɛnɔɔn 'kplookʋ. 21‑Ma 'ʋ 'palɩ 'ta ɔla pɔlɛa nɩkplaan ‑sikplii. Ɔ 'ta pɔɔklasa ‑ci. Gbazɩ 'kwlɩbhɩɛ ‑aana gbaylɩsalɩɛ yɔɔ 'lɛ ŋeni, Laagɔ 'la wɔlɩa 'la gbʋ na, ka ɔla pɔɔtɛtɛa mlɔ 'lɛ 'kplookʋ. 22Ɔmɔa ‑ɔla gbɩa ‑kʋ 'lɛ le ɩmɩa ‑ɩ bhlili 'lɛ 'ŋupitia sidiin na, ɔ ‑glɩ ɔmɔ ‑ɔ nu 'lɛ wɔɔnyɩtʋa, 'nyɩ ‑laagɔzɔan 'la lɩɩa 'la pɔɔplelie ɩya 'bhɛlɩlilie 'la 'cikʋmɛnɔa lua wɔɔnyɩtʋa nyɔmʋ 'kʋ 'nyɩ 'ʋ tlʋ 'ta 'lɛ 'ca na. 23‑Ma ɔmɔa ‑ɔla gbɩa ‑kʋ 'lɛ le ɩmɩa ‑ɩ bhlili 'lɛ ‑dʋdʋ 'nanʋa 'kʋ na, ɔmɔ ‑ɔ ‑glɩ 'lɛ ‑anɔa ‑ɔ po 'lɛ wɔɔnyɩtʋa 'nyukwliin 'nyɩ ‑ɔ nuu 'lɛ na. Ɔmɔ ‑ɔ tlʋ 'lɛ 'ca. ‑Anɩ ‑gwlɩɩ ‑ngbi, ‑anɩ ‑gwlɩɩ ‑mɔta ɩya 'kʋgba, ‑anɩ ‑gwlʋʋ ɩya 'kʋgba.»
‑Piti ‑nyinyi 'la ‑nyandla
24Zozii ya ‑awlɛ maa ‑nyandla bhlo nɩkplaan solulu. Ɔ nabhe: «‑Laagɔɔn 'la Nyɩbhɛlɩdua* palalɩ le saa nclɔɔ bhlo ya 'lɛ sica 'nanɩ ɔla 'kwla nɩkplaan 'moni na. 25Dobhesa, daa ncɛlɩa 'fɩan ŋɔmʋa 'lɛ na, ɔla ‑zɔbhɛlɩgbanyɔ ya ci, ɔ ya ‑piti ‑nyinyi 'kwlaa nɩkplaan 'moni 'nyɩ ɔ ya 'plɩ, ɔ ya mʋ. 26Na, daa gologololɩɩa 'wlʋ 'lɛ 'nyɩ ɩ tlʋ 'lɛ na, ‑piti ‑nyinyia ‑ma ɩ ya 'wlʋ. 27'Nyɩ 'kwlaa toa 'la lobhocuoa ya ci 'nyɩ ma yɔɔ 'cla lebhe: A to, sica 'nanɩ ‑n 'taa 'lɛ ‑naa 'kwlaa nɩkplaan 'moni bha? Na, 'nsasa 'nyɩ ‑piti nyinyi ‑kʋa 'lɛ 'yɛpɩ bha? 28Ɔ ya maa 'cla lebhe: 'Na ‑zɔbhɛlɩgbanyɔ ‑ɔ nʋ 'lɛ sɛɛ. Lobhocuoa yɔɔ 'cla lebhe: Na, ‑n ‑wa lebhe ‑amʋ ɩya ‑a ‑sɩɩ 'yɛpɩ bha? 29Ɔ ya maa 'cla lebhe: ‑Wɔɔ, a 'la kasɛ 'bleea ‑ma ‑gluu ‑sa. 30A tii ne ɩya ɩ ‑glɛɛlɩ nebhlo ‑aan 'dɩdaa 'ka ŋeni, ɩya 'dɩdaa ‑ka ŋeni na, n 'ka lobholinʋnyaa 'cla lebhe: A ‑sa 'kwlaa nɩkplaan ‑piti ‑nyinyia ‑bɛɛ ɩya a gʋɩ 'pi ɩya a 'kɩɩ ‑sie. ‑Ma ‑ɔ glɩ 'lɛ 'bleea na, a zʋɛ 'na ‑gbogbua 'kʋ.»
‑Mutadɩsucie 'la ‑nyandla
(Mak 4.30-32; Luk 13.18-19)
31Zozii ya ‑awlɛ maa ‑buun ‑nyandla bhlo nɩkplaan solulu 'nyɩ ɔ ya maa 'cla lebhe: «‑Laagɔɔn 'la Nyɩbhɛlɩdua*, ma cɩʋ ‑mutadɩsuciea nclɔɔ ma 'lɛ 'nyɩ ɔ golo 'lɛ ɔla 'kwla nɩkplaan na palalɩ. 32Sucie ‑naa ‑glɩ sicaa 'fɩan nɩkplaan 'la sucie co. ‑Ma daa ɛ ya 'lɛ 'wlʋ na, ɛ 'ghlibholi 'nyɩ ɛ zi godikwlaan 'la gologolonyɩa 'fɩan 'kʋ. Ɛ plɩ su 'kadie 'nyɩ ‑laagɔɔn 'la libhlia ci 'nyɩ ɩ 'slalɩ ʋla 'labhɩa nɩkplaan.»
'Zɩ 'la ‑nyandla
(Luk 13.20-21)
33Zozii ya ‑awlɛ maa ‑nyandla bhlo nɩkplaan solulu 'nyɩ ɔ ya maa 'cla lebhe: «‑Laagɔɔn 'la Nyɩbhɛlɩdua*, ma cɩʋ 'zɩa* 'ŋlɔ ma 'lɛ 'nyɩ ɔ zʋ 'lɛ ‑faliikpoongbɩ ‑gwlʋʋ ɩya ‑ngbi nɩkplaan, ɔ 'cakalɩ 'lɛ ɩya ‑faliia 'nyɩ ɩ 'fɩan flu 'lɛ na, palalɩ.» 34Ɩmɩ ‑naa 'fɩan, ‑nyandla nɩkplaan Zozii solulua 'mɩɩ 'lɛ ‑alawleea 'nyɩ ‑n 'ta ‑nyandla nɩkplaan na, ɔ solu 'taa maa. 35‑Sa ɩmɩa Laagɔnekʋnyɩtɛnyɔa* 'bhlia 'lɛ 'kʋ na, ‑glalɩ 'lɛ 'kʋ:
N cɩ 'ka ne cɩ sasalɩ ɩya n 'ka ‑nyandla nɩkplaan nyɩtɛlɩ.
N cɩ 'ka ‑laagɔzɔan 'la bhɔdaa tooto 'la zizieziziewɔlɩa nyɩtɛ.
‑Piti ‑nyinyia 'la ‑nyandlaa 'la ‑zɔnsalɩɛ
36Na, Zozii ya ‑alawleea 'cɩɩnwlʋlʋ 'nyɩ ɔ ya 'sleen mʋ. Ɔla gɩlɩnyaa* yɔɔ cɩmɛ 'nyɩ ma yɔɔ 'cla lebhe: «‑Sa ‑anyɩ 'kwlaa nɩkplaan 'la ‑piti ‑nyinyia 'la ‑nyandlaa ‑zɔn.» 37Zozii ya maa 'cla lebhe: «Nclɔɔa ɔ golo 'lɛ 'cie 'nanɛa na, ɔmɔ ‑ɔ ‑glɩ 'lɛ Nclɔɔa 'Cʋa*. 38'Kwlaa ‑glɩ 'lɛ ‑laagɔzɔan. 'Cie 'nanɛa ‑glɩ 'lɛ Nyɩbhɛlɩdua 'la 'cuoa. ‑Piti ‑nyinyia ‑glɩ 'lɛ gɔzɛ 'la 'cuoa. 39‑Zɔbhɛlɩgbanyɔa ‑ɔ golo 'lɛ ‑piti ‑nyinyia na, ɔmɔ ‑ɔ ‑glɩ 'lɛ gɔzɛ. Gologololɩɩa 'la 'dɩlɩɛa ‑glɩ 'lɛ ‑laagɔzɔan 'la bhɩadaa 'nyɩ lobholinʋnyaa ‑glɩ 'lɛ 'bhlaandleecɩa.* 40Saa ma ‑sa 'lɛ ‑piti ‑nyinyia ‑gluu 'nyɩ ma -sii 'lɛ na, 'sɛtɛɛ bhlogbɩɩ ɩ cɩ 'ka 'lɛ bhɩalɩclɩɩa 'kʋ kʋ. 41Nclɔɔa 'Cʋa cɩ 'ka ɔla 'bhlaandleecɩa lobhu. Ma cɩ 'ka ‑tɛtɛa 'fɩan ‑ɩ fa 'lɛ nyinyiin na ɩya maa 'fɩan ‑ɔ nʋ 'lɛ wɔɔnyinyia na 'kplɩ, ma 'ka maa ɔla Nyɩbhɛlɩdua nɩkplaan ‑sa, 42ɩya ma ‑ka maa ‑kosu 'kadiea nɩkplaan 'pa. 'Yɛpɩ 'nʋgbʋtulie ɩya ‑glaasloliliea cɩ 'ka 'lɛ kʋ. 43‑Ma 'kʋnylugolunyaa, ma cɩ 'ka le le 'ylʋbhuoa 'bhisa ma To 'la Nyɩbhɛlɩdua nɩkplaan. Na, ɔmɔa ‑ɔ ‑ka 'lɛ 'nyukwli na, 'naa ɔ 'nu!
Gbakabhalʋʋ ɩya ‑lie 'la ‑nyandla
44‑Laagɔɔn 'la Nyɩbhɛlɩdua* palalɩ le gbakabhalʋʋa ‑ʋ ‑zizieoa 'lɛ 'kwla bhlo nɩkplaan 'nyɩ nclɔɔ bhlo ya 'lɛ 'kʋfutolu na. Ɔ zizie ‑awlɩʋ 'nyɩ ɔla pɔlɛkʋmɛnɔa nɩkplaan, ɔ mʋ, ɔ zʋ ɔla kalɩkalɩlɩɩa 'fɩan 'pɛlʋ 'nyɩ ɔ pɩa 'kwlaa.
45‑Laagɔɔn 'la Nyɩbhɛlɩdua palalɩ ‑awlɛ le 'kɔsɛylanyɔa ‑ɔ 'matɩa 'lɛ ‑lie na. 46Daa ɔ 'lɩ 'lɛ 'pɛlʋtɛtʋliea na, ɔ ya mʋ, ɔ ya lɩɩa 'fɩan ɔ ‑kaa 'lɛ na 'pɛlʋ zʋ 'nyɩ ɔ yɛɛ ‑pɩa.
‑Dada 'la ‑nyandla
47‑Awlɛ ‑laagɔɔn 'la Nyɩbhɛlɩdua* palalɩ le ‑dadaa ma 'pa 'lɛ 'nyiin 'nyɩ ‑a bhli 'lɛ ‑zlii ‑mizimizia 'fɩan 'kʋ na. 48Gbazɩ a ‑ka ye na, ‑dadɩpanyaa jlia, ma la 'nyigboa 'kʋ 'nyɩ ma kʋ sa, ma zʋ ‑zliia ‑toku nɩkplaan 'nyɩ lɩɩa ‑ɩ 'ta 'lɛ nanɩ na, ma pɩɩ 'lɛ 'kwlaan. 49Na, 'sɛtɛɛ bhlogbɩɩ ɩ cɩ 'ka 'lɛ ‑laagɔzɔan 'la bhɩadaa kʋ. 'Bhlaandleecɩa* cɩ 'ka ci ɩya ma 'ka 'kʋnylugolunya ɩya nyinyinʋnyaa cɩsasalɩ, 50ɩya ma ka nyinyinʋnyaa ‑kosu 'kadiea nɩkplaan 'pa, 'yɛpɩa nʋgbʋtulie ɩya ‑glaaslolilie cɩ 'ka 'lɛ kʋ na.
Bhɩalɩwɔlɩ
51Na, a ya ɩmɩ ‑naa ‑tɛtɛa 'nu bha?» Ma nabhe: «‑Ghɛɛ.» 52Ɔ ya maa 'cla lebhe: «‑Jlɩmazienyɔ* 'tʋtʋʋntʋa ‑ɔ ‑ci 'lɛ ‑laagɔɔn 'la Nyɩbhɛlɩdua 'la cɩa wɔlɩa na, ɔla gbɩa palalɩ le saa 'sleto fa 'lɛ ɔla 'bhaklɔ nɩkplaan sɔ 'nyɩ ‑ɔ sa 'lɛ 'yɛpɩ ‑lɩɩ ‑leli ɩya ‑godogodo lɩɩ na.»
Nazalɛtɩnyaa 'ta Zozii 'la pɔɔtɛtɛ ‑ka
(Mak 6.1-6; Luk 4.16-24)
53Na, daa Zozii bhɩalɩa 'lɛ ‑nyandla ‑naa ‑tɛtɛa bulie na, ɔ ya 'dɛ 'wlʋ 'nyɩ 54ɔ ya ɔ 'bhlɩduku mʋ. Ɔ caa 'yɛpɩ 'la ncɛlɩa mala bhibhiepalʋa* ‑zɔn 'nyɩ saa 'titia ɩ sla 'lɛ maa nikpoo na, ma 'cla lebhe: «'Ndagbazɩ dɩgalɩ ‑naa ɩya 'ciinzizielɩlobholi ‑naa 'wlʋlʋɔ 'lɛ bha? 55‑N 'ta ‑paagblinyɔa 'la 'cʋa bha? 'Nyɩ ɔ nɔɔ maa la 'ta 'lɛ Malii bha? 'Nyɩ ɔ bholiecɩ 'ta 'lɛ Zakɩ, Zozɛfʋ, Simɔɔn ɩya Zudu ‑glɩ bha? 56'Nyɩ ɔ mɛɛncɩa ‑tɛtɛa, ‑a ‑ya maasɔ 'ta 'lɛ ‑da ‑kʋ bha? Na, 'ndagbazɩ 'titi ɩmɩ ‑naa 'fɩan 'wlʋlʋɔ 'lɛ bha?» 57'Nyɩ ɩmɩ ‑naa ‑tɛtɛa gbaa na, ma 'taa ɔla pɔɔtɛtɛ ‑ka. Na, Zozii ya maa 'cla lebhe: «Laagɔnekʋnyɩtɛnyɔ* 'ta ɔ 'bhlɩ ɩya ɔla 'sleen 'ŋlɩ ‑ka.» 58Ɔ 'ta 'dɛ 'ciinzizielɩlobholi ‑gbɔɔn nʋ, ‑ofi lebhe ma 'taa pɔɔtɛtɛ ‑ka na.
Àwon tá yàn lọ́wọ́lọ́wọ́ báyìí:
Mat 13: NTLD13
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Dida New Testament © Bible Society of Côte d'Ivoire, 2013.
