Luk 8

'Ŋwlɛa ‑ɔ gɩlɩa 'lɛ Zozii na

1Na, wɔlɩ ‑naa 'la leen, Zozii 'plɩlɩanɩa dikadɩa ɩya dicʋa 'kʋ 'nyɩ ɔ saa Laagɔ 'la Nyɩbhɛlɩdua* 'la Dɩnanɩa*. 'Kʋgba ‑mɔsɔa ‑kʋa 'mɔɔ cɩ, 2ɩya 'ŋwlɛ ‑zlʋsaasa, 'wugwi ‑nyinyi ɩya gu bhlaa 'lɛ 'nyɩ Zozii jabha 'lɛ na: Maa ‑ɔ ‑glɩa 'lɛ Malii, ‑Madalaadua 'kʋ 'la ŋlɔa, 'wugwi ‑nyinyia ‑ngbɔɔsɔa 'wlʋ 'lɛ nɩkplaan na, 3Zanɩa, ɔ ‑ŋuto Suza ‑glɩa 'lɛ Ewlɔdʋ 'la lobholinʋnyɔ na, Suzanɩ ɩya ‑buun ŋwlɛ ‑bhutukpa, ‑ɔ maa 'lɛ mala 'nanɩa 'nyɩ ‑ɔ klalɩa 'lɛ maa ma na.

Golonyɔa 'la ‑nyandla

(Mat 13.1-9; Mak 4.1-9)

4Sa ‑alawleea 'wlalɩa 'lɛ 'wlu 'nyɩ 'dia ‑tɛtɛa 'kʋ 'la ncɛlɩa cia 'mɔɔ 'lɛ 'bhlɩ na, Zozii ya ‑nyandlaa bhlo bu 'nyɩ ɔ ya 'cla lebhe: 5«'Lɩka golonyɔ bhlo ya ‑zɔnwlʋ le ɔ ka ɔla gologololɩɩa 'moni. Na, daa ɔ ‑kʋa 'mɩɩ 'lɛ 'monida na, 'ca ya ‑gugwie cɩ bhlili, ma yɩɩ 'kʋ ‑namʋnʋnʋ 'nyɩ ‑laagɔɔn 'la libhlia yɩɩ li. 6'Ca ‑anɩ ya cokwie 'kʋ bhlili, ɩ ya 'wlʋ 'nyɩ ɩ ya yɛ, sa ɩ 'ta 'nyu 'lɩ na. 7'Ca ‑anɩ bhlo ɩ ya 'ŋupiti sidiin bhlili. Na, ɩya 'ŋua ya nebhlo 'wlʋlʋ, 'ŋua yɩɩ 'wlugʋa 'nyɩ ɩ ya 'ku. 8‑Danaanɩ bhlo ya ‑dʋdʋ 'nanʋ 'kʋ bhlili. Ɩ ya 'wlʋ 'nyɩ ɩ ya 'ca ‑bhutukpa tlʋ.» Na, Zozii ya 'cla lebhe: «Ɔmɔa ‑ɔ ‑ka 'lɛ 'nyukwli le ɔ 'ka 'nu na, 'naa ɔ 'nu.»

Wɔlɩa 'la gbʋa Zozii nyɩtɛlɩ 'lɛ ‑nyandlaan na

(Mat 13.10-17; Mak 4.10-12)

9Na, Zozii 'la gɩlɩnyaa* yɔɔ ‑nyandlaa ‑naa 'la ‑zɔnsalɩɛ neencla. 10Ɔ ya maa 'cla lebhe: «Anyɩ, ɩ ‑nyɩɔ 'lɛ le a cibhlili Laagɔ 'la Nyɩbhɛlɩdua* 'la wɔlɩa ‑ɩ ‑zizieo 'lɛ na. ‑Ma ‑danaanʋaa ‑nyandla nɩkplaan ma 'nunui 'lɛ, ɩya ma 'ka kope ɩya ma 'la ka 'lɩ, ma 'ka 'nyukwliinpo ɩya ma 'la ka 'nu.

Golonyɔa 'la ‑nyandlaa 'la ‑zɔnsalɩɛ

(Mat 13.18-23; Mak 4.13-20)

11Na, 'lɩka ‑nyandlaa ‑naa 'la ‑zɔnsalɩɛa: Gologololɩɩa Laagɔ 'la wɔɔnyɩtʋa ɩ ‑glɩ 'lɛ. 12‑Gugwiea cɩ ‑glɩ 'lɛ maa ‑ɔ nu 'lɛ 'nyɩ gɔzɛ ci 'lɛ 'nyɩ ɛ sa mala pɔlɩa nɩkplaan wɔɔnyɩtʋa ma 'la sɛɛ ‑nʋawlɛ la ɩya ma 'la ka gbʋʋnsalɩɛ 'lɩ. 13Cokwiea 'kʋ ‑glɩ 'lɛ maa ‑ɔ ka 'lɛ wɔɔnyɩtʋa 'nu 'nyɩ ‑ɔ 'manɩʋ 'lɛ pɔlɛkʋmɛnɔɔn na. ‑Ma ma 'ta ‑sikplii ‑ka: Ma la ‑nʋawlɛ clɩɩ ‑zlʋsaasa, ‑ma gbɩɩnclalɩɛ 'la da 'ka ŋeni na, ka ma bhli. 14'Ŋua nɩkplaan ɩ ‑glɩ maa ‑ɔ 'nu 'lɛ 'nyɩ pɔɔplelie, 'bhɛlɩ ɩya ‑laagɔzɔn 'la 'cikʋmɛnɔa 'la gbʋ, ŋɔmʋ gleli 'lɛ mala pɔɔtɛtɛa 'nyɩ ɛ ‑glɛɛ 'ta 'lɛ. 15‑Dʋdʋ 'nanʋa ‑glɩ maa ‑ɔ 'nunu 'lɛ wɔɔnyɩtʋa pɔlɛa ‑ɛ ‑wa 'lɛ ‑nʋawlɛ 'nyɩ ‑ɛ nanɩ 'lɛ na nɩkplaan, 'ma zʋʋ 'lɛ sa, 'nyɩ pɔɔklalɩɛ nɩkplaan, ‑ma tlʋ 'lɛ 'ca na.

‑Kanie 'la ‑nyandla

(Mak 4.21-25)

16Nclɔɔ bhlogbɩɩ ŋama 'ta ‑kanie ɩya ɔ 'kɛɛ lʋʋ 'wlu ‑gblii ‑aana ma 'kɛɛ 'kusi ‑zɔn zʋ. ‑Ma ka ma gbeziee 'lɛ ɩya maa ‑ɔ ble 'lɛ na, ma 'ka leliea 'lɩ. 17‑Masa, wɔlɩ bhlogbɩɩ cɩ 'ta ‑asule 'kʋ ɩya ɩ 'la 'ka ‑zɔnwlʋ, wɔlɩ bhlogbɩɩ cɩ 'ta ‑zizieo ɩya ma 'la kɩɩ cibhlili. 18Na, a zʋlʋ pɔlɛ 'kʋ ala 'nyukwliinpolɩɛa nɩkplaan. ‑Masa ɔmɔa ‑ɔ ‑ka 'lɛ na, ma cɩ 'kɔɔ 'nyɩ, ‑ma ɔmɔa ‑ɔ 'ta 'lɛ ‑ka na, lʋʋ ɔ ‑ka gugu le ɔ ‑ka na, ma cɩ 'kɔɔ mʋ ‑salɩ.»

Zozii 'la 'lɔlʋa 'titi

(Mat 12.46-50; Mak 3.31-35)

19Zozii 'nɔ ɩya ɔ bholiecɩ yɔɔ 'ciin 'lɩkaan ci, ‑ma ‑alawleea 'wluku na, ma 'tɔɔ cɩ ŋenilɩɛ mino. 20Ma yɔɔ 'dɩ fa 'nyɩ ma yɔɔ 'cla lebhe: «‑N 'nɔ ɩya ‑n bholiecɩ ‑kʋ ‑jlukuun, ma ‑wa le ma 'kɔɔ 'ciinlɩ.» 21Zozii ya maa 'cla lebhe: «N 'nɔ ɩya n bholiecɩ, maa ‑glɩ 'lɛ maa ‑ɔ po 'lɛ Laagɔ 'la wɔɔnyɩtʋa 'nyukwliin 'nyɩ ‑ɔ 'plɩlɩʋ 'lɛ 'kʋ na.»

Zozii ya ‑bubo ‑dʋdʋ 'kʋ ‑la

(Mat 8.18,23-27; Mak 4.35-41)

22Clɩɩ bhlo, Zozii ɔya ɔla gɩlɩnyaa* ya gɔlʋʋn 'tɔ. Ɔ ya maa 'cla lebhe: «‑A 'tɔ 'nyi.» Ma ya 'plɩ 'nyɩ ma ya mʋ. 23Na, daa ma ‑kʋa 'lɛ 'nyia 'tɔda na, 'claa ya Zozii famʋ. ‑Bubo 'kadie ya 'nyia 'kʋtaan 'ma, gɔlʋa ya 'nyu 'kʋ yeliɛ bhɔ 'nyɩ ma ‑kʋanɩa 'kwɩ neen. 24Ma ya Zozii cɩ mɛ, ma galɔa 'mɔɔ 'nyɩ ma claa lebhe: «Canyɔ, canyɔ, ka ‑a ku 'lɛo!» Ɔ ya galɔ. Ɔ ya ‑buboa ɩya 'nyɩgagbɩa 'wlugaalɩ, ɩ ya ‑dʋdʋ 'kʋ ci 'nyɩ daa ‑tɛtɛa ya 'cɩɩ 'plɩ. 25Na, Zozii ya maa 'cla lebhe: «'Nda ala pɔɔtɛtɛ ‑kʋa 'lɛ bha?» Ŋanɔ ya maa pla, nikpoo ya maa sla 'nyɩ maa bhlobhlo 'claclalɩa macɩ neen lebhe: «'Ndaa nclɔɔ ‑ɔ ‑kʋa 'lɛ ‑da 'nyɩ ɔ solua 'lɛ ‑bubo ɩya 'nyi 'titio 'nyɩ ɩ nyɩɔ 'lɛ ‑sa 'klʋ bha?»

Zozii ya 'wugwinyinyinyɔ bhlo jabha

(Mat 8.28-34; Mak 5.1-20)

26Na, Zozii ɩya ɔla gɩlɩnyaa* ya mʋ ‑aan 'nyɩ ma ya Zelasaabhlɩa ‑ɩya Galileebhlɩa ‑tlatlalɩɔ 'lɛ 'klʋ na 'kʋ ŋeni. 27Na, daa Zozii ‑kʋa 'lɛ gɔlʋa nɩkplaan 'wlʋda na, dunyɔ bhlo, 'wugwi ‑nyinyi ‑kʋa 'lɛ nɩkplaan na, yɔɔ 'bɩɩncili. Ɩ yaa ‑gwlɛlɩ 'ɔ bibie 'taanɩa, 'nyɩ 'ɔ pʋlʋ 'taanɩa ‑palʋ ‑zɔn, ‑ma lesia nɩkplaan. 28Daa ɔ 'lɩ 'lɛ Zozii na, ɔ ya 'kasɛ 'pa 'nyɩ ɔ yɔɔ ‑deliin bhlili. Ɔ ya nɩkplaan ‑gaa 'nyɩ ɔ ya 'cla lebhe: «Zozii, 'Kʋzilo Laagɔ 'la 'Cʋ, wɔɔsaa ‑ɔ ‑kʋa 'lɛ n ‑yɔɔsɔ ‑gbaaglɩɩn bha? Bhooje, ‑naa ‑bhɩankwlɩ.» 29‑Masa Zozii yaa 'wugo ‑nyunyua 'cla le ʋ 'wlʋa nclɔɔa nɩkplaan na. Ʋ ‑ka ‑azlɔɔ 'kʋ ‑gblaa na, ma gʋa 'mɔɔ, ma ‑zʋa 'mɔɔ ‑abhluakɩ ɩya 'kpomu nɩkplaan le ma ‑kaa 'mɔɔ da bhlogbɩɩ saazʋ. ‑Ma ɔ dɩa 'mɩɩ 'nyɩ 'wugo ‑nyunyua faa 'mɔɔ dɩa ɩ ‑kʋ 'lɛ ɩcɩɩn na.

30Zozii yaa 'mɔɔ neen 'cla lebhe: «‑Naa 'ŋlɩ?» Ɔ nabhe: «Amʋ ma la 'lɛ Zulobuo.» Sa 'wugwi ‑nyinyi ‑bhutukpa yaa 'mɔɔ nɩkplaan ble na. 31'Nyɩ 'wugwi ‑naa slaa Zozii 'wlu le ɔ 'la faa 'mɩɩ 'bhukua ‑ʋ 'ta 'lɛ 'wlukoda ‑ka na nɩkplaansadaa. 32Na, 'kɔkʋʋnkɔkʋʋnsa 'la bhuzikpa 'kadie ‑kʋa 'dɛ 'kikea 'kʋ, a lia. 'Wugwi ‑nyinyia ya Zozii 'wlusla le ɔ 'nyɩɩ ‑jiolɩe ɩya ɩ 'kaa bhuzia nɩkplaan mʋ. 'Nyɩ Zozii yɩɩ ‑jioli 'nyɩ. 33Na, 'wugwi ‑nyinyia ya nclɔɔa nɩkplaan 'wlʋ ɩ ya bhuzia nɩkplaan ble 'nyɩ bhuzikpaa ya 'kikea 'wlu 'wlʋ, a ya 'nyiin 'kɔsɔ, 'nyɩ a ya 'kʋmla.

34Daa bhuzia 'la 'klʋlɩnyaa 'lɩ 'lɛ ɩmɩa ‑ɩ 'plɩ 'lɛ na, ma ya 'gu, ma ya mʋ 'nyɩ ma yɩɩ 'dua ɩya ‑bhlidia ‑tɛtɛa 'kʋ 'dɩkʋsalɩ. 35Na, ncɛlɩa 'fɩan ya ci le ma 'ka ɩmɩa ‑ɩ plɩa 'lɛ na 'lɩ. Ma ya Zozii cɩ ŋeni 'nyɩ ma ya nclɔɔa 'wugwi ‑nyinyia 'wlʋa 'lɛ nɩkplaan na 'lɩ. 'Cin yɔɔ gbe, ɔ ‑plaa nɩkplaan 'nyɩ ɔ ‑kʋa Zozii cɩ sa. Na, ŋanɔ ya ncɛlɩa pla. 36Maa ‑ɔla 'ci 'lɩa 'lɛ ɩmɩ ‑naa na, maa ‑ma, ma saa ma 'yea saa 'wugonyunyunyɔa jabhajabhalɩ 'lɛ na ɩla 'dɩa.

37Zelazaabhlɩa 'kʋ 'la ncɛlɩa 'fɩan ya Zozii 'cla lebhe ɔ 'wlʋ mala 'bhlɩa 'kʋ sa ŋanɔ bhlaa maa ‑gbɔɔn na. Na, Zozii ya gɔlʋʋn 'tɔ 'nyɩ ɔ ya cɔlɔ. 38Nclɔɔa 'wugwi ‑nyinyia 'wlʋa 'lɛ nɩkplaan na ya Zozii 'clalɩ le ɔ kaa 'mɔɔ cɩ kʋ. ‑Ma Zozii 'ta ŋonu 'nyɩ ɔ yɔɔ 'cla lebhe: 39«Cɔlɔ ‑n 'bhisleen ɩya ‑n ‑salɩ ɩmɩa ‑tɛtɛa Laagɔ nʋ 'lɛ 'nyɩ ɔ 'nyɩɔ 'lɛ na, 'dɩ 'kʋ.» Nclɔɔa ya mʋ 'nyɩ ɩmɩa ‑tɛtɛa Zozii nʋa 'lɛ 'nyɩ ɔ 'nyɩɔ 'lɛ na, ɔ salɩa 'mɩɩ 'dɩ 'kʋ 'dua ‑tɛtɛa nɩkplaan.

Zozii ya 'ŋlɔ bhlo jabha 'nyɩ ɔ ya 'lɛ ŋlʋcʋkwla bhlo 'kwɩɩnkʋbho

(Mat 9.18-26; Mak 5.21-43)

40Daa Zozii cɔlɔ 'lɛ na, ncɛlɩa ‑tɛtɛa ‑bɛlɩa 'mɔɔ ‑daa 'nyɩgboa 'kʋ, 'nyɩ daa ɔ ŋeni 'lɛ na, ma yɔɔ 'bɩɩn mʋnʋ. 41Na, 'lɩka nclɔɔ bhlo ya ci, ma lɔɔ Zayiwlusu. Ɔ ‑glɩa Zifʋnyaa* 'la bhibhiepalʋto*. Ɔ ya Zozii ‑deliin ‑kukoonkplii sa sla 'nyɩ ɔ yɔɔ bho kla le ɔ ci ɔ 'bhisleen. 42Sa ɔ ‑kaa ɔla ŋlʋcʋkwla bhlogbɩɩ, ɔ cɩa ‑sa liowli 'kʋgba ‑mɔsɔ kalɩ 'nyɩ ɔ 'taa ‑gbɔɔn ‑ja. Daa Zozii ‑kʋa 'lɛ 'yɛpɩ mʋda na, ncɛlɩa mɛmɛnɩa 'mɔɔ nyɔmʋkʋlolosa.

43'Ŋlɔ bhlo, ‑dolu wlʋa 'lɛ cɩ ‑aan liowli 'kʋgba ‑mɔsɔ 'wugo na, ‑kʋa 'dɛ. Ɔ ya ɔla 'dalaa 'fɩan ɔ ‑kaa 'lɛ na ‑dɔtɛcɩ wlɩɩn nyumonu, ‑ma bhlogbɩɩ 'ta mino ɩya ɔ 'kɔɔ jabha.

44Ɔ ya Zozii leen 'wlʋlʋ, ɔ yɔɔ cɩ mɛ 'nyɩ ɔ ya ɔla lokwia 'la numlua cɩkla. 'Nyɩ dɩpɩa bhlogbɩɩ ‑dolua yaan do. 45Na, Zozii ya neencla lebhe: «Ncaasaa ‑ɔ klaan 'lɛ cɩ bha?» Maa ‑tɛtɛa cɩcɛlɩɛa 'lɛ na, Pɩɛlɩ yɔɔ 'cla lebhe: «Canyɔ! ‑N 'lɩ 'ta ncɛlɩa ‑ɔ ‑didio 'lɛ 'nyɩ ‑ɔ mɛmɛnɩɔ 'lɛ na bha?» 46‑Ma Zozii yɔɔ 'cla lebhe: «Nclɔɔ bhlo yaan ko. Sa n ya 'lɩ le 'tɛtɩ bhlo yaan nɩkplaan 'wlʋ na.» 47'Ŋlɔa 'lɩ 'lɛ lebhe Zozii ya sɛɛ cibhlili na, ɔ ya tɩtɛlɩlɩɛ bhɔ, ɔ ya ci 'nyɩ ɔ ya Zozii ‑deliin bhlili. 'Nyɩ ncɛlɩa 'fɩan 'ci 'kʋ, ɔ ya wɔlɩa gbʋa ɔ klaa 'mɔɔ 'lɛ cɩ ɩya saa ɔ jabhajabhalɩ 'lɛ dɩpɩa bhlogbɩɩ na, 'kʋbhli. 48Na, Zozii yɔɔ 'cla lebhe: «N ‑nyɔŋlɔ, ‑naa pɔɔtɛtɛa yɔɔ jabha. Mʋnʋ pupueen.»

49Zozii ‑kʋ 'kaa nyɩtɛda 'nyɩ nclɔɔ bhlo ‑ɔ 'wlʋlʋa 'lɛ bhibhiepalʋtoa 'bhisleen na, ya 'lɛ ci 'nyɩ ɔ yɔɔ 'lɛ 'cla lebhe: «‑Naa ‑bhɩanɩ Canyɔa 'kwlɩ ‑ma ‑n ‑nyɔŋlɔ ya 'ku.» 50Zozii ya 'nu 'nyɩ ɔ ya Zayiwlusu 'cla lebhe: «Pɔlɛɛn 'la 'wlʋɔ, kalɩ pɔɔtɛtɛ ‑tɛɛ, ‑ma ɔ cɩ 'ka jabha.»

51Daa Zozii ŋeni 'lɛ 'slea nɩkplaan na, Pɩɛlɩ, Zaan ɩya Zakɩ ‑tɛɛ ɔ te 'lɛ ne le maya 'cileea to ɩya ɔ 'nɔa ‑yɔɔsɔ ble. 52Ncɛlɩa 'fɩan tua 'nyɩ ma bhʋtʋa 'mɔɔ. Zozii ya maa 'cla lebhe: «A 'la 'tua, ‑ma ɔ 'ta ka 'ku, ka ɔ ŋɔmʋ 'lɛ.» 53Maa 'fɩan nyanɩa 'mɔɔ, ‑masa ma cia sɛɛ le ɔ yaa 'ku na. 54‑Ma Zozii ya 'cileea 'la sɔa 'kʋbhli, ɔ yɔɔ la 'nyɩ ɔ ya 'cla lebhe: «'Na 'cʋ, galɔ.» 55'Cileea 'la 'wugoa yɔɔ nɩkplaan cɔlɔ 'nyɩ 'kplookʋ ɔ ya 'kʋbho. Zozii ya 'cla le ma 'nyɩɔ nyɩ. 56Nikpoo ya ɔla valɩnyaa sla. ‑Ma Zozii ya maa 'cla le ma 'la solua nclɔɔ bhlogbɩɩ ɩmɩa ‑ɩ 'plɩ 'lɛ na.

Àwon tá yàn lọ́wọ́lọ́wọ́ báyìí:

Luk 8: NTLD13

Ìsàmì-sí

Pín

Daako