Luk 9

Zozii ya 'kʋgba ‑mɔsɔa lobhu

(Mat 10.1-14; Mak 6.7-13)

1Zozii ya ɔla gɩlɩnyaa* 'kʋgba ‑mɔsɔa 'wluwlalɩ. Ɔ ya maa 'tɛtɩ ɩya ‑jioli 'nyɩ le ma 'tli 'wugwi ‑nyinyia ‑tɛtɛa ɩya ma jabhaa gua ‑tɛtɛa. 2Ɔ ya maa lobhu le ma plici Laagɔ 'la Nyɩbhɛlɩdua* 'la cilie ɩya ma jabha guzenya. 3Ɔ ya maa 'cla lebhe: «‑Gugwiea a cɩ 'ka 'lɛ bhli na, a 'la famʋa lʋʋ bhlogbɩɩ, ‑kpama, ‑keteku, 'flawo, 'dala. A 'la kalɩa nclɔɔ nclɔɔ nɩkplaanplalɩɩ ‑mɔsɔ. 4'Slitʋtʋʋntʋa nɩkplaan acɩ 'ka 'lɛ ble na, a kʋa nɩkplaan. Dɩpɩa a cɩ 'ka 'lɛ 'wlʋlʋ ɩya a 'ka mʋ. 5Ma 'ta anyɩ kla na, a 'wlʋ 'dɛ 'la 'dua 'kʋ ɩya a gbɔtɔ ala kplia cɩ 'la pipia, ɩ 'ka ‑danʋfʋɛliliea ‑ɩ mʋnʋ 'lɛ maa gbatlɩ na 'plɩ.» 6Ma ya 'plɩ 'nyɩ ma ya mʋ. Ma 'plɩlɩa 'di 'di 'kʋ, ma saa Dɩnanɩa* 'nyɩ daa ‑tɛtɛa, ma jabhaa guzenya.

Pɔɔvʋ ya Ewlɔdʋ kla

(Mat 14.1-2; Mak 6.14-16)

7Na, 'dɛ 'la 'bhlɛsʋa nɩkplaan, Ewlɔdʋ, Galilieebhlɩa 'la ‑kwletoa, ya wɔlɩa ‑tɛtɛa ‑ɩ plɩa 'lɛ na 'nu 'nyɩ 'ɔ 'lɩ 'taa saa 'titia ɔ 'kaa 'lɛ nʋnʋnʋ na. Sa ncɛlɩ ‑anʋa claa le 'Nyuwluzʋnyɔ Zaan ‑ɔ ‑bho 'lɛ 'kwɩɩn 'kʋ. 8‑Anʋa nabhe Elii ‑ɔ cɔlɔ 'lɛ 'nyɩ ‑anʋa claa 'lɛ le ‑godogodo ‑bhlɛsʋan 'la Laagɔnekʋnyɩtɛnyɔ* ‑ɔ galɔ 'lɛ 'kwɩɩn. 9Ewlɔdʋ nabhe: «Zaan ‑amʋ 'titi n ya gba, ma yɔɔ 'wlu 'kʋ 'dɩ. Na, 'ndanaanɔ ‑ɔ ‑glɩa 'lɛ ‑anɔnaa 'la cɩa wɔɔbhutukpa n nua 'lɛ na bha?» 'Nyɩ ɔ 'matɩa le ɔ 'ka 'mɔɔ 'ciinlɩ.

Zozii ya ncaatabhli wli ‑ngbi nyɩ 'nyɩ

(Mat 14.13-21; Mak 6.30-44; Zan 6.1-15)

10Daa Zozii lobhulobhunyaa* cɔlɔ 'lɛ na, ma ya ɩmɩa ‑tɛtɛa ma nʋa 'lɛ na, 'dɩ 'kʋ ‑salɩ. Ɔ ya maa 'ma 'nyɩ ma ya gbɛga, 'dua ma la 'lɛ Bɛsayida na cɩ. 11Daa ‑alawleea cibhlili 'lɛ sɛɛ na, a yɔɔ gɩlɩ. Zozii ya maa sakʋda 'nyɩ. Ɔ solua maa Laagɔ 'la Nyɩbhɛlɩdua* 'la cɩa wɔlɩ 'nyɩ ɔ jabhaa maa ‑ɔ 'matɩa 'lɛ jabhʋ na.

12Daa 'ylʋa ‑kʋ 'lɛ mʋda na, 'kʋgba ‑mɔsɔa ya Zozii cɩ mɛ 'nyɩ ma yɔɔ 'cla lebbhe: «'Talɩ ncɛlɩa 'cin ɩya ma 'ka 'dia ɩya ‑bhlidia ‑ɩ ‑mɛɛ 'lɛ ‑da cɩ na, 'kʋplakan mʋ ɩya ma 'ka 'yɛpɩ nyɩ 'lɩlɩ, sa ‑a ‑kʋ ‑da ‑koteen na.»

13‑Ma Zozii ya maa 'cla lebhe: «Anyɩ 'titi, a 'nyɩ maa nyɩ.» Na, ma ya 'cla lebhe: «‑A 'ta ‑da lʋʋ bhlogbɩɩ ‑ka, ‑n 'ta le 'flawu ‑ngbi ɩya ‑zlii ‑mɔsɔ ‑tɛɛ na. Na, ‑n ka ‑wa le ‑anyɩ 'titi ‑a mʋ ɩya ‑a ‑pɩa ncaabhutukpa ‑naa 'la nyɩ na, 'maa solu sɛɛ anyɩ.» 14Ncɛlɩa ‑ma ‑kʋa 'lɛ 'dɛ na, ma cɩa ‑sa ncaatabhli wli ‑ngbi 'wlʋ. Na, Zozii ya ɔla gɩlɩnyaa* 'cla lebhe: «A gba ɩya ma kʋ ncaagwlɩɩ ‑mɔsɔ ɩya 'kʋgba 'la ‑kandi ‑kandi sa.» 15Ma ya sɛɛ nʋ 'nyɩ ma ya ma ya maa 'fɩan sakʋda zʋ. 16Na, Zozii ya 'flawua ‑ngbia ɩya ‑zliia ‑mɔsɔa 'ma, ɔ ya ɔ ya ‑laagɔɔn kope, ɔ ya Laagɔ bhɔlʋ, ɔ yɩɩ 'kliin 'dɩdɩlɩ 'nyɩ ɔ yɩɩ gɩlɩnyaa 'nyɩnɩ le ma polii ‑alawleea. 17Ma ya li 'nyɩ ma 'fɩan ya lo 'nyɩ gɩlɩnyaa ya ɩmɩa ‑ɩ ‑toa 'lɛ na 'kʋbhli, ɩ yea ‑toku 'kʋgba ‑mɔsɔ 'kʋ.

Pɩɛlɩ nabhe Zozii ‑glɩ 'lɛ Laagɔ 'la ‑Sasanyɔa

(Mat 16.13-20; Mak 8.27-30; Zan 6.67-71)

18Na clɩɩɩ bhlo, Zozii ‑kʋa ɔcɩɩn 'nyɩ ɔ bhibhiea. Gɩlɩnyaa* ‑kʋa 'mɔɔ cɩ 'nyɩ ɔ ya maa neencla lebhe: «‑Alawleea 'la da, ncaasaa n ‑glɩa 'lɛ bha?» 19Ma yɔɔ neeŋonu lebhe: «Ncɛlɩ ‑anʋa nabhe ‑n ‑glɩ 'Nyuwluzʋnyɔ Zaan, ‑anʋa cla le ‑n ‑glɩ Elii 'nyɩ ‑anʋa cla 'lɛ ‑awlɛ le ‑n ‑glɩ ‑godogodo Laagɔnekʋnyɩtɛnyɔ* bhlo, ‑ɔ galɔ 'lɛ 'kwɩɩn na.» 20Na, Zozii ya maa 'cla lebhe: «'Nyɩ anyɩ, ncaasaa a cla 'lɛ le n ‑glɩa bha?» Pɩɛlɩ ya nesa 'nyɩ ɔ yɔɔ 'claa lebhe: «‑Mɔ ‑glɩ 'lɛ Laagɔ 'la ‑Sasanyɔa*.» 21Na, ɔ ya maa 'cizalalalɩ 'nyɩ ɔ ya maa 'cla le ma 'la solua sɛɛ nclɔɔ bhlogbɩɩ. 22'Nyɩ ɔ ya 'cla lebhe: «Ɩ ‑fata le Nclɔɔa 'Cʋa*, 'kwlɩ ‑bhutukpa bhɩɔ, ɩya ncaakpasɩa, ‑teyiyinyaa tocɩa ɩya ‑jlɩmaazienyaa* ‑blɔɔ, ma bhlɔɔ, ɩya ‑mɔta ‑zelia, ɔ ‑bho kwɩɩn 'kʋ.»

Saa ɩ ‑fata 'lɛ le ma gɩlɩgɩlɩlɩ Zozii na

(Mat 16.24-28; Mak 8.34—9.1)

23Na, Zozii ya ‑awlɛ maa 'fɩan 'cla lebhe: «Nclɔɔ ‑ka ‑wa le ɔ 'kaan gɩlɩ na, 'naa ɔ ‑blɔ ɔmɔ 'titi ɔcɩ ɩya clɩɩa 'fɩan, ɔ 'ma ɔla dabhlalɩsua ɩya ɔ gɩlɩɩn. 24‑Masa ɔmɔa ‑ɔ ‑wa 'lɛ le ‑ɔ ka ɔla jabhʋa 'kʋtɩtɔlʋ na, ʋ cɩ ‑gbɩɔ. ‑Ma ɔmɔa ‑ɔ ŋonu 'lɛ le 'na gbʋ, ɔla jabhʋa ‑gbɩɔ na, ɔ cɩ 'kʋʋ gbʋʋnsa. 25'Nyɩ ‑nvʋsʋɛ saa nclɔɔ ‑ka 'lɛ ɩya ɔ 'ka ‑laagɔzɔan 'la 'bhɛlɩa ‑tɛtɛa 'lɩ, ɩ ‑ka ‑kʋ le ɔmɔ 'titi ‑kɩɩ nɩkplaan ‑gbɩɔlʋ na bha? 26Na, gbazɩ ‑amʋ ɩya 'na wɔɔnyɩtʋa 'la ‑zo ‑ka nclɔɔ 'bhla na, Nclɔɔa 'Cʋa* ‑ma, ɔla ‑zo cɩkɩnɩɔ 'bhlamʋ, daa ɔ cɩ 'ka 'lɛ ɔmɔ 'titi ɔla 'klʋagbaa ɩya Toa ɩya ‑kplɔkplɔ ‑bhlaandleecɩa* 'naa nɩkplaan cili na. 27Na, n solu anyɩ, ɩ ‑glɩ ‑nʋawlɛ lebhe: Maa ‑ɔ ‑kʋ 'lɛ ‑da na, maa sidiin, ‑anʋa cɩ 'ta 'ku, 'nyɩ ma cɩ Laagɔ 'la Nyɩbhɛlɩdua* 'ciinlɩ.»

Zozii 'la ‑lɩɩbhuoa ya kaci

(Mat 17.1-9; Mak 9.2-10)

28Daa Zozii nyɩtɛa 'lɛ wɔlɩ ‑naa, 'nyɩ clɩɩ ‑ngbaata 'plɩ 'lɛ na, ɔ ya Pɩɛlɩ, Zaan ɩya Zakɩ 'ma 'nyɩ ɔya maasɔ ya 'kike bhlo 'wlu ‑gblaa le ɔ 'kaa bhibhie. 29Daa ɔ ‑kʋa 'lɛ bhibhieda na, ɔla 'klʋa ya kaci 'nyɩ ɔla lokua ɩ ya pubha plɛtɛtɛtɛ 'nyɩ ɩ paa 'jɩ. 30'Nyɩ 'lɩka ncɛlɩ ‑mɔsɔ ‑yɔɔsɔ zʋa 'dɩ. Moyizi ɩya Elii ‑kʋa 'lɛ 'dɛ. 31Laagɔ 'la 'klʋagbaa ‑didioa maa 'nyɩ maya Zozii nyɩtɛa ɔla 'kwɩa 'la wɔlɩ ‑ɩ cɩ kaa 'lɛ Zolizalɛmʋdua nɩkplaan 'kʋglalɩlɩ na. 32Pɩɛlɩ ɩya ɔ 'yea 'claa ya maa ‑dada 'pa. ‑Ma daa ma galɔ 'lɛ na, ma ya Zozii 'la 'klʋagbaa ɩya ncɛlɩa ‑mɔsɔa ‑ɔ ‑kʋa 'mɔɔ 'lɛ cɩ na 'lɩ.

33Na, daa ncɛlɩ ‑naa ‑kʋanɩa 'lɛ Zozii cɩɩnwlʋlʋda na, Pɩɛlɩ ɔ yɔɔ 'cla lebhe: «Canyɔ ɩ nanɩ le ‑a kʋ ‑da, ‑a 'sla ‑paapli ‑mɔta: ‑Nanʋ bhlo, Moyizi 'nʋ bhlo ɩya Elii 'nʋ bhlo.» ‑Ma ɔ 'ta ɩmɩa ɔ nyɩtɛanɩa 'lɛ na ‑ci. 34Daa Pɩɛlɩ ‑kʋa 'lɛ sɛɛ nyɩtɛda na, 'nyukplu ya ci 'nyɩ ʋla ‑zuzua ya maa 'kʋwɔlɩ. Na daa 'nyukplua wɔlɩ maa 'kʋ na, ŋanɔ ya gɩlɩnyaa* pla. 35'Nyɩ ‑blɩɩzɔn bhlo ya 'nyukplua nɩkplaan 'wlʋlʋ nyɩ ʋ claa lebhe: «‑Anɔ ‑naa, ɔmɔ ‑ɔ ‑glɩ 'lɛ 'na 'Cʋa, ɔmɔ n sla 'lɛ de na. A poo 'nyukwliin!» 36Daa ‑blɩɩzɔan ‑bhle 'lɛ na, Zozii bhlogbɩɩ ‑tɛɛ ‑ɔ ‑kʋanɩa 'lɛ 'dɛ. ‑Ma ‑ɔ ‑glɩ 'lɛ Gɩlɩnyaa na, ma ya wɔlɩ ‑naa saazʋ 'nyɩ 'dɛ 'la clɩɩa nɩkplaan, ma 'ta ɩmɩa mala 'cia 'lɩa 'lɛ, nclɔɔ bhlogbɩɩ 'dɩ 'kʋ ‑salɩ.

Zozii ya 'wugo ‑nyunyu 'tli

(Mat 17.14-21; Mak 9.14-29)

37Daa ‑zeli ze 'lɛ 'nyɩ Zozii ɩya gɩlɩnyaa* ‑mɔtaa 'wlʋ 'lɛ 'kikea 'wlu 'nyɩ ma kwli 'lɛ na, ‑alawlee 'kadie ya Zozii ‑gugwie 'kʋcili. 38Na, 'lɩka ‑alawleea sidiin nclɔɔ bhlo ya nɩkplaan ‑gaa, ɔ claa lebhe: «Canyɔ, n slɔɔ 'wlu, kope 'na 'cileea 'la wɔlɩa, sa ɔmɔ bhlo n ‑ka 'lɛ na. 39'Wugo bhlo bhɩɔ 'kwlɩ. Na, 'wugo ‑naa, ʋ 'kɔɔ 'kʋ ‑gblaa na, 'kplookʋ 'ka ɔ 'pa 'lɛ 'kasɛ, ʋ 'dɩdɔɔ 'lɛ gbasa, 'nyɩ ‑daadʋflifli wlʋɔ 'lɛ neen. Ʋ 'ta ‑wa le ʋ 'kɔɔ 'cintalɩ, 'nyɩ 'fɩɔn ʋ 'kɔɔ 'lɛ 'cintalɩ na, ʋ sɔɔ gbaylɩ ‑bhutukpa. 40Na, n ya ‑naa gɩlɩnyaa clalɩ le ma 'tli 'wugo ‑naa, ‑ma ma 'ta mino.» 41Zozii ya wɔɔnyɩtʋ 'ma, 'nyɩ ɔ ya 'cla lebhe: «Anyɩ ‑pɔtɔnʋ 'la ncɛlɩa ‑ɔ 'ta 'lɛ pɔɔtɛtɛ ‑ka, 'nyɩ ‑ɔ nʋ 'lɛ yooyogbɩ na! Bhlaasaan n cɩ 'ka ka 'lɛ anyɩ sidiin 'kʋ ɩya n 'ka anyɩ kla bha? A ‑lamʋ ‑da 'cileea.» 42Na, daa 'cileea ‑kʋa 'lɛ Zozii cɩmɛda na, 'wugo ‑nyunyua yɔɔ ‑dʋdʋ 'kʋ sapalɩ 'nyɩ ʋ yɔɔ 'dɩdɔ gbasa. ‑Ma Zozii ya 'wugo ‑nyunyua 'wlugaalɩ, ɔ ya 'cileea jabha 'nyɩ ɔ yɔɔ ɔ to 'nyɩnɩ. 43'Nyɩ nikpoo ya maa 'fɩan sla, Laagɔ 'la 'tɛtɩa 'la 'ghlilo 'la gbʋ.

Zozii nyɩtɛ ‑awlɛ ɔla 'kwɩa wɔlɩ

(Mat 17.22-23; Mak 9.30-32)

Sa ɩmɩa ‑tɛtɛa ɔ nʋa 'lɛ na, ɩ mɛnɩa 'lɛ ncɛlɩa 'fɩan pɔlɛ 'kʋ na, Zozii ya ɔla gɩlɩnyaa* 'cla lebhe: 44«A po 'nanɩ 'nyukwli ɩmɩa n cɩ 'ka 'lɛ anyɩ solu na: Nclɔɔa 'Cʋa* cɩ 'ka ncɛlɩ wlɩɩn 'pɛlʋ ‑zʋlʋɔ.» 45‑Ma, maa 'nu 'taa wɔɔnyɩtʋ ‑naa. Ʋ bia maa 'wlu le ma 'la ka ʋla ‑zɔn 'nu. 'Nyɩ ma 'gulua 'mɔɔ wɔlɩ ‑naa 'la neenclalɩɛ.

‑Anɔsaa ‑ɔ zia 'lɛ ɔ 'yea 'fɩan 'kʋ bha?

(Mat 18.1-5; Mak 9.33-37)

46Gɩlɩnyaa* ya wɔɔtʋtʋɛ bhɔ le maa 'ka ɔmɔa ɔ zia 'lɛ ɔyea 'fɩan 'kʋ na cibhlili. 47‑Masa Zozii cia 'lɛ wɔlɩa ma claa 'lɛ macɩ neen na, ɔ ya 'cileeco 'ma, ɔ yɔɔ ɔcɩ cɩ zʋ 48'nyɩ ɔ ya maa 'cla lebhe: «Ɔmɔa ‑naa ŋlɩa nɩkplaan ‑ɔ kla 'lɛ 'cilee ‑naa 'nanɩ na, ‑amʋ 'titi ɔ kla 'lɛ 'nanɩ. 'Nyɩ ɔmɔ ‑kaan 'nanɩ kla na, ɔmɔa ‑ɔ lobhuun 'lɛ na ɔmɔ ‑ɔ kla 'lɛ 'nanɩ. Sa ɔmɔa ‑ɔ 'ta 'lɛ lʋʋ ‑ylɛylɛ ‑glɩ anyɩ sidiin na, 'lɩka ɔmɔa ‑ɔ zi 'lɛ anyɩa 'fɩan 'kʋ na.»

Ɔmɔa ‑ɔ 'ta 'lɛ anyɩ ‑zɔ na, ɔ ‑glɩ ala ‑plɔnyɔ

(Mak 9.38-41)

49Zaan ya nesa 'nyɩ ɔ ya Zozii 'cla lebhe: «Canyɔ, ‑a ya nclɔɔ bhlo 'lɩ ɔ 'tlilia 'wugwi ‑nyinyi ‑naa 'ŋlɩa nɩkplaan 'nyɩ ‑a ya wabha le ‑a kɔɔ mɩ tie ‑masa ‑n 'ta ‑ayɔɔsɔɔ gɩlɩ 'tɔɔ 'lɛ na.» 50‑Ma Zozii ya 'cla lebhe: «A 'la tieo mɩ, sa ɔmɔa ‑ɔ 'ta 'lɛ anyɩ ‑zɔ na, ɔ ‑glɩ ala ‑plɔnyɔ.»

Samaliinyaa 'ta ŋonu 'lɛ ma 'ka Zozii kla

51Daa Zozii 'la ‑laagɔzɔnwlʋclɩɩa mɛanɩa 'lɛ cɩ na, ɔ yɔɔ ɔcɩɩn mʋ 'nyɩ ɔ ya 'cla le ɩ ‑fata le ɔ mʋ Zolizalɛmʋ. 52Ɔ ya dɩfanya ɔcɩ 'kʋklʋʋn lobhu. Maa ‑naa 'ma 'lɛ ‑gugwie na, ma ya Samaliibhlɩa 'kʋ 'la 'du bhlo 'kʋ plalɩ le ma 'kaa ɔla ciliea bhɔsʋa. 53‑Ma dunyaa 'ta ŋonu ma 'tɔɔ kla ‑masa Zolizalɛmʋ ɔ mʋnʋa 'lɛ na. 54Daa gɩlɩnyaa* ‑ɔ ‑glɩ 'lɛ Zakɩ ɩya Zaan 'lɩ 'lɛ ɩmɩ ‑naa na, ma ya 'cla lebhe: «‑Kwlenyɔ, ‑n ‑wa le ‑a gba ɩya ‑kosu 'wlʋ ‑laagɔɔn ʋ ‑sie maa bha?» 55‑Ma Zozii ya kwlacala 'nyɩ ɔ ya maa 'cizalalɩ. 56'Nyɩ ma ya ‑buun du bhlo 'kʋ 'la ‑gugwie 'ma.

Maa ‑ɔ ‑wa 'lɛ le ‑ɔ cɩ Zozii gɩlɩ na

(Mat 8.19-22)

57'Nyɩ daa ma ‑kʋ 'lɛ mʋda na, ‑gugwiea 'kʋ nclɔɔ bhlo ya Zozii 'cla lebhe: «Daa ‑tɛtɛa ‑n ‑cɩ ka 'lɛ mʋ na, n cɩɔ gɩlɩ.» 58Zozii yɔɔ 'cla lebhe: «‑Daazlii ‑ka 'bhukwi 'nyɩ ‑laagɔɔn 'la libhlia ‑ka 'lɛ ‑palɩ. ‑Ma Nclɔɔa 'Cʋa* 'ta ɔla 'wlua 'la zʋlʋda ‑ka.»

59Ɔ ya ‑buun nclɔɔ bhlo 'cla lebhe: «Gɩlɩɩn.» Ɔmɔ ‑naa ya 'cla lebhe: «'Nyɩɩn ‑jioli, n 'ka mʋ ɩya n 'ka n to zizie 'fɩɔn.» 60‑Ma Zozii yɔɔ 'cla lebhe: «'Talɩ 'kua 'cin ɩya ɩ zizie ɩla 'kua! ‑Ma ‑mɔɔ, mʋ ɩya ‑n ‑sa Laagɔ 'la Nyɩbhɛlɩdua* 'la 'dɩa.»

61‑Buunnaanɔ bhlo ‑ma yɔɔ 'cla lebhe: «‑Kwlenyɔ, n cɩɔ gɩlɩ, ‑ma 'nyɩɩn ‑jioli ɩya n 'ka 'na 'slinya 'kaze 'pa.» 62‑Ma Zozii yɔɔ 'cla lebhe: «Ncaatʋtʋʋntʋa ‑ɔ kʋ 'lɛ goloda 'nyɩ ‑ɔ kope 'lɛ leen na, ɔya Laagɔ 'la Nyɩbhɛlɩdua 'ta ‑fata.»

Àwon tá yàn lọ́wọ́lọ́wọ́ báyìí:

Luk 9: NTLD13

Ìsàmì-sí

Pín

Daako