Luk 7
7
'Soja ‑gwlɩɩ ‑ngbi to bhlo 'la pɔɔtɛtɛ
(Mat 8.5-13; Zan 4.46-54)
1Daa Zozii bhɩalɩ 'lɛ wɔlɩ ‑naa ‑tɛtɛa ncɛlɩa 'ci 'kʋ nyɩtɛlɩɛ na, ɔ ya Kapɛnayumʋdua nɩkplaan ble. 2'Soja ‑gwlɩɩ ‑ngbi to bhlo ‑kaa lobhoco bhlo, ɔ ‑waa 'lɛ ‑gbɔɔn na, ɔ 'taa ‑ja 'nyɩ ɔ ‑kʋa 'kubhuku ne 'kʋ. 3Daa ɔ 'nu 'lɛ Zozii 'la wɔlɩ na, ɔ yɔɔ Zifʋnyaa* 'la ncaakpasɩ ‑zlʋsaasa 'kʋ lobhu le ma slɔɔ 'wlu le ɔ ci ɩya ɔ 'ka ɔla lobhocoa jabha. 4Ma ŋeni 'lɛ Zozii cɩ na, ma yɔɔ ‑gbɔɔn bhibhie 'nyɩ ma claa lebhe: «Ɩ ‑fata lebhe ‑n nʋ ɩmɩ ‑naa ɩya ‑n 'nyɩɔ, 5sa ɔ ‑wa ‑a 'bhlɩnyaa 'nyɩ ɔmɔ 'sla 'lɛ ‑ala bhibhiepalʋa*.» 6Zozii ‑yamaasɔ mʋanɩa, ma 'tanɩa 'slea cɩ datlʋ 'nyɩ 'soja ‑gwlɩɩ ‑ngbi toa ya 'lɛ ɔ 'nagwɩɛcɩ lobhu le 'ma 'clɔɔ lebhe: «‑Kwlenyɔ, ‑naa ‑bhɩa ncɩ 'kwlɩ, sa n 'ta 'kʋŋwa lebhe ‑n ble n 'bhisleen. 7Ɩmɩ ‑naa 'la gbʋ, dɛ ‑amʋ 'titi n 'cla 'lɛ ncɩ lebhe n 'ta ‑jioli ‑ka ɩya n 'kɔɔ 'ciinlɩkan mʋ. ‑Ma nyɩtɛ wɔɔkle bhlogbɩɩ ɩya 'na lobhocoa 'ka jabha. 8'Lɩka, ‑amʋ 'titi, n ‑kʋ ncɛlɩ 'la ‑kwlelie ‑zɔn 'nyɩ n ‑ka 'lɛ 'soja 'na ‑kwleliea ‑zɔn. N cla bhlo lebhe: Mʋ, 'nyɩ ɔ mʋ, ‑anɔ bhlo, ci, 'nyɩ ɔ ci. 'Nyɩ n cla 'na lobhoco lebhe: Nʋ ‑sa, 'nyɩ ɔ nʋ sɛɛ.» 9Daa Zozii 'nu 'lɛ wɔɔnyɩtʋ ‑naa na, nikpoo yɔɔ sla 'nyɩ ɔ ya kwlacala, ɔ ya ‑alawleea ‑a gɩlɩa 'mɔɔ 'lɛ na, 'ciinkope 'nyɩ ɔ ya 'cla lebhe: «N solu anyɩ lebhe: Izlayɛlɩbhlɩa* 'kʋ 'titi n 'ta 'yɛpɩ ‑sa 'la pɔɔtɛtɛ 'lɩ.» 10'Nyɩ daa ncɛlɩa 'sojatoa lobhua 'lɛ na, ma cɔlɔ 'lɛ 'sleen na, ma ya lobhocoa ‑jajʋʋn ŋeni.
Zozii ya nyɩgbɩɔ bhlo 'kwɩɩnkʋbho
11Na, Zozii ya 'dɛ 'wlʋ 'nyɩ ɔ ya 'dua ma la 'lɛ Nayini na 'kʋ mʋ. Ɔya ɔla gɩlɩnyaa* ɩya ncaabhutukpa namʋa. 12Daa ɔ ŋeni 'lɛ 'dua 'la gbinea 'kʋ na, 'lɩka ma faa 'kuo lesu 'kʋ, a ‑glɩa 'kuzluŋlɔ bhlo 'la 'ciŋodicoa bhlogbɩɩa ɔ kaa 'lɛ na. 'Nyɩ 'dua nɩkplaan 'la ncaabhutukpa gɩlɩa ŋlɔɔ ‑naa. 13Daa ‑Kwlenyɔa 'lɩɔ 'lɛ na, ɔla gbɩa yɔɔ ŋaazɩ ‑pla 'nyɩ ɔ yɔɔ 'cla lebhe: «‑Naa 'tua.» 14Ɔ ya 'lakaa cɩ mɛ 'nyɩ ɔ yaa cɩ kla. Maa ‑ɔ bhɛɛa 'maa 'lɛ na, ma ya 'nylugo. 'Nyɩ Zozii ya 'cla lebhe: «Nyɩgbɩɔ, n clɔɔ lebhe ‑n galɔ.» 15'Kuoa ya sakʋ 'nyɩ a ya nyɩtɛlɩɛ bhɔ. 'Nyɩ Zozii yɔɔ ɔ 'nɔ 'nyɩnɩ. 16Ŋanɔ ya ncɛlɩa 'fɩan pla, ma woa Laagɔ ‑evli 'nyɩ ma claa lebhe: «Laagɔnekʋnyɩtɛnyɔ* 'kadie ya ‑anyɩ sidiin ci. Laagɔ ya ɔla ncɛlɩa 'kʋci.» 17'Nyɩ wɔlɩ ‑naa Zozii nʋ 'lɛ na, ɩ ya Zudeebhlɩa ɩya ɩla cɩa 'dia ‑tɛtɛa 'kʋ dlolu.
'Nyuwluzʋnyɔ Zaan ya ncɛlɩ Zozii 'bhlɩ lobhu
(Mat 11.2-19)
18Zaan 'la gɩlɩnyaa* ya mala canyɔa wɔlɩ ‑naa ‑tɛtɛa 'dɩ 'kʋ ‑salɩ. Ɔ ya ɔla gɩlɩnya ‑mɔsɔ la 19'nyɩ ɔ ya maa ‑Kwlenyɔa 'bhlɩ lobhu le ma 'clɔɔ neen lebhe: «‑Mɔ ‑glɩ 'lɛ ɔmɔa ‑ɔ ‑cɩ ka 'lɛ ci, ‑aana ‑buun ‑naanɔ ‑a cɩ ka ‑awlɛ 'lɛ ‑bɛ bha?»
20Daa ma ŋeni 'lɛ Zozii cɩ na, ma yɔɔ 'cla lebhe: «'Nyuwluzʋnyɔ Zaan lobhu 'lɛ ‑anyɩ ‑mɔ 'bhlɩ le ‑a 'clɔɔ neen ɩ ‑ka ‑kʋ lebhe ‑mɔ ‑glɩ 'lɛ ɔmɔa ‑ɔ ‑cɩ ka 'lɛ ci na, ‑aana ‑buun ‑naanɔ ‑a cɩ ka 'lɛ ‑bɛ na.»
21'Dɛ 'la daa, Zozii jabhaa ncaabhutukpa, maa gu bhlaa 'lɛ, 'kwlɩ bhɩa 'lɛ 'nyɩ 'wugwi ‑nyinyi bhɩa 'lɛ 'kwlɩ na, ɩya 'citutunya ‑bhutukpa. 22Na, ɔ ya maa Zaan lobhu 'lɛ na neenŋonu lebhe: «A mʋ ɩya ɩmɩa ala 'ci 'lɩ 'lɛ 'nyɩ ala 'nyukwlɩ 'nu 'lɛ na, a ‑salɩɩ Zaan 'dɩ 'kʋ. 'Citutunya lɩnɩ sa, bhɩbhlinya nanʋnɩ 'nanɩ, kokobhebhlanya ya jabha 'nyɩ 'nyukwlitelinya nunɩ. 'Ku bho 'kwɩɩn 'kʋ, 'nyɩ ma sanɩ ŋaazɩnya Dɩnanɩa*. 23Ɔ ‑kʋ 'nanɩ, ɔmɔa ‑ɔ bhli 'ta 'lɛ ‑amʋ 'wluku na.»
Zozii nyɩtɛ Zaan 'la wɔlɩ
24Daa ncɛlɩa Zaan lobhu 'lɛ na, 'plɩ 'lɛ 'nyɩ ma mʋ 'lɛ na, Zozii ya ‑alawleea ɔla wɔlɩ solulɩɛ bhɔ. Ɔ claa maa lebhe: «'Lɩsaa a mʋanɩa 'lɛ 'pʋpʋa nɩkplaan 'lɩmʋkan bha? 'Dʋkɔlʋa ‑pupolu 'dɩdɔa 'lɛ na bha? 25Na, 'lɩsaa a mʋanɩa 'lɛ 'lɩmʋkan bha? Nclɔɔa ‑ɔ ‑pla 'lɛ loku 'nanɩ nɩkplaan na bha? ‑Ma maa ‑ɔ pla 'lɛ loku 'nanɩa nɩkplaan 'nyɩ ‑ɔ ‑lio 'lɛ 'bhɛlɩa na, nyɩbhɛlɩslia nɩkplaan ma ‑kʋ 'lɛ. 26Na, 'lɩsaa a mʋanɩa 'lɛ 'lɩmʋkan bha? Laagɔnekʋnyɩtɛnyɔ* bha? ‑Ghɛɛ, n solu anyɩ le ɔ zi Laagɔnekʋnyɩtɛnyɔ 'kʋ. 27Ɔla 'sasʋʋn ɩ ‑zieo 'lɛ lebhe: 'Lɩka, n lobhu 'na dɩfanyɔa le ɔ pʋɔ 'kʋklʋʋn ɩya ɔ 'ka ‑naa ‑gugwiea bhɔsʋa. 28N solu anyɩ, maa 'fɩan ‑ɔ 'wlʋlʋ 'lɛ 'ŋlɔ nɩkplaan na, bhlogbɩɩ 'ta Zaan 'kʋzi, ‑ma 'bhlɩmɔɔn, ɔmɔa ‑ɔ 'ta 'lɛ Laagɔ 'la Nyɩbhɛlɩdua* nɩkplaan 'la leen ‑naanɔa zio 'kʋ. 29Ncɛlɩa ‑tɛtɛa ‑ɔ poa 'mɔɔ 'lɛ 'nyukwliin, ‑lapooclanyaa 'titio, ma ya cibhlili le Laagɔ 'nylugolu 'kʋ 'nyɩ ma ya ŋonu le Zaan zʋ maa 'nyu 'wlu. 30‑Ma Falizɩɛnnyaa* ɩya ‑jlɩmaacanyaa, ma 'ta 'lɛ ŋonu le Zaan zʋ maa 'nyu 'wlu na, ya ɩmɩa Laagɔ wabhaa 'lɛ le ɔ 'kaa mala gbʋ nʋ na, 'bɩ ‑sa.
31Na, ncaasaa n cɩ 'kaa 'lɛ ‑pɔtɔnʋ 'la ncɛlɩa palalɩ bha? Maya ncaasaa ‑ɔ 'wlʋlʋa 'lɛ bha? 32Ka maya 'cuoa ‑ɔ ‑kʋ 'lɛ 'clikpo nɩkplaan sa na, 'wlʋlʋ 'lɛ. Ma 'papalɩ wɔlɩ 'nyɩ ma cla 'lɛ lebhe: ‑A ya anyɩ ‑kete bholi 'nyɩ a 'ta ce. ‑A ya ‑takpa bhlɩ 'nyɩ a 'ta 'tu.
33‑Masa 'Nyuwluzʋnyɔ Zaan ya ci, 'ɔ li 'ta 'flawo, 'ɔ 'mla 'ta ‑diinvɛɛn 'nyɩ a nabhe: Ɔ ‑ka 'wugo ‑nyunyu 34'Nyɩ Nclɔɔa 'Cʋa* ya ci, ɔ li, ɔ mla 'nyɩ a cla lebhe: 'Lɩka nyaagbulinyɔ ɩya nʋgbumlanyɔ, ‑lapooclanya ɩya nyinyinʋnya 'nagɔ. 35‑Ma maa 'fɩan ‑ɔ ŋonu 'lɛ le ‑ɔ cɩ Laagɔ 'la pɔɔsa nʋ na, ma ya pala le ɔla dɩgalɩa 'nylugolu 'kʋ.»
Nyinyinʋŋlɔ bhlo ya Zozii cɩ mɛ
(Mat 26.6-13; Mak 14.3-9; Zan 12.1-8)
36Na, Falizɩɛnnyɔ* bhlo ya Zozii la le ɔyɔɔsɔ 'ka li. Ɔ ya Falizɩɛnnyɔa 'bhisleen ble 'nyɩ ɔ ya 'tlɔnblɩ 'kʋ 'plɩ le ɔ 'ka li. 37'Dua 'kʋ 'la 'ŋlɔ bhlo, ‑ɔ ‑glɩa 'lɛ nyinyinʋŋlɔ na, ya 'nu le Zozii ‑kʋa Falizɩɛnnyɔa 'bhisleen, 'tlɔnblɩ 'kʋ. 'Lɩka ɔ ya ci, ɔ ya ‑asʋnbanyɩkpalɩwa ‑lamʋ. 38Ɔ ya Zozii leen 'plɩlɩ 'nyɩ ɔ ya ɔla bhɩa cɩ sakwlili. Ɔ tua 'nyɩ ɔla 'mɩɔa wɔtlɔbhalɩa Zozii 'la kplia. Ɔ ya ɔla 'wlua 'nyɩa 'ma, ɔ yɩɩ cɩ sɩsɩɛ, ɔ yɩɩ ŋʋŋɔnʋ 'nyɩ ɔ yɩɩ ‑asʋnbanyɩa 'kʋ 'kɔsɔ. 39Daa Falizɩɛnnyɔa, ‑ɔ la 'lɛ Zozii na, 'lɩ 'lɛ ɩmɩ ‑naa na, ɔ ya ɔcɩ 'cla lebhe: «Nclɔɔ ‑naa ‑kaa Laagɔnekʋnyɩtɛnyɔ* ‑glɩ na, ɔ cɩ 'ka nclɔɔa, ŋlɔ ‑naa ‑ɔ koo 'la na ‑glɩ 'lɛ ɩya saa ɔ ‑kʋkʋlʋ 'lɛ na, cibhlili. Sa nyinyinʋŋlɔ ɔ ‑glɩ 'lɛ na.»
40Na, Zozii ya nesa 'nyɩ ɔ ya Falizɩɛnnyɔa 'cla lebhe: «Simɔɔn, n ‑ka wɔlɩ bhlo n 'kɔɔ solu.» Ɔ nabhe: «Canyɔ, 'maa nyɩtɛ.» 41Na, ɔ nabhe: «Ncɛlɩ ‑mɔsɔ ‑kaa nclɔɔ bhlo 'la dlu. Bhlo ‑kaa clɩɩ ‑gwlɩɩ ‑ngbi 'la dipici ‑ngbi 'la dluuplʋdala 'nyɩ bhlo kaa 'lɛ clɩɩ ‑gwlɩɩ ‑mɔsɔ ɩya 'kʋgba 'la dluuplʋdala. 42Sa ma 'taa 'lɛ lʋʋ ‑ka ɩya ma 'kaa 'dalaa cala na, ɔ ya maa ‑mɔsɔa dlua va. Na, maa ‑mɔsɔa nɩkplaan, ‑anɔsaa ɔ cɩ kɔɔ 'lɛ ‑gbɔɔn wabha bha?» 43Simɔɔn yɔɔ neenŋonu lebhe: «N gugu le ɔmɔa ɔ va 'lɛ dlu 'kadiea na.» Zozii yɔɔ 'cla lebhe: «‑N ya 'nanɩ nyɩtɛ.»
44Na, Zozii ya 'ŋlɔa 'klʋtla 'nyɩ ɔ ya Simɔɔn 'cla lebhe: «‑N ‑jlɛ ŋlɔɔ ‑naa bha? N ya ‑n 'bhisleen ble, ‑n 'taan 'nyu kpli tɔlʋ. ‑Ma ɔmɔ, ɔ ya ɔla 'mɩɔa 'ma, ɔ ya 'na kplia cɩ wɔlʋ 'nyɩ ɔ ya ɔla 'nyɩa 'ma ɔ yɩɩ cɩ sɩsɩɛ. 45‑N 'taan ‑kpacɩ cɩ ŋʋŋɔnʋ, ‑ma ɔmɔ, daa tootoa ɔ ‑kaa 'lɛ ble na, ɔ 'ta 'na kplia ŋʋŋɔnʋlɩɛ 'kʋ sɛ. 46‑N 'taan 'kpʋ 'wlu tɔlʋ, ‑ma ɔmɔ, ɔ ya ‑asʋnbanyɩ 'na kplia 'kʋ 'kɔsɔ. 47Na, n ‑kɔɔ 'cla le ‑walʋ 'kadie ɔ pala 'lɛ na ʋ pala lebhe ɔla nyinyia ‑ɩ ‑zu 'lɛ na, ɩ ya ‑vɔɔ. ‑Ma ɔmɔa ma va 'lɛ nyinyi pɛ na, ‑walʋ ‑pɛ ɔ pala 'lɛ.» 48Na, Zozii ya 'ŋlɔa 'cla lebhe: «‑Naa nyinyia ya ‑vɔɔ.»
49Daa Zozii 'bhli 'lɛ ‑sa 'kʋ na, lalanyaa ya macɩ nɩkplaan nyɩtɛlɩɛ bhɔ 'nyɩ ma claa lebhe: «Ncaasaa ‑kʋa 'lɛ ‑da 'nyɩ ‑ɔ mʋa 'lɛ ‑aan ɔ vaa 'lɛ nyinyi bha?» 50‑Ma Zozii ya 'ŋlɔa 'cla lebhe: «‑Naa pɔɔtɛtɛa ɛ yɔɔ jabha. 'Maa mʋnʋ pupueen.»
Àwon tá yàn lọ́wọ́lọ́wọ́ báyìí:
Luk 7: NTLD13
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Dida New Testament © Bible Society of Côte d'Ivoire, 2013.
