Luk 6
6
Nclɔɔa 'Cʋa ‑kwle nyɔkwɛclɩɩa
(Mat 12.1-8; Mak 2.23-28)
1Zifʋnyaa* 'la nyɔkwɛclɩɩ* bhlo 'kʋ, Zozii 'ŋatɩa 'bleekwlɩ.* Ɔla gɩlɩnyaa* kplaa 'bleea 'ciin, ma 'nyɔtɔa 'mɛɛ 'nyɩ ma lia. 2Falizɩɛnnya* ‑zlʋsaasa ya maa 'cla lebhe: «'Lɩsaa 'la gbʋ a nʋa 'lɛ ɩmɩa ‑ɩ ‑tio 'lɛ nyɔkwɛclɩɩa 'kʋ na bha?» 3Zozii ya maa neenŋonu lebhe: «Ɩmɩa Daviti nʋa 'lɛ, daa ŋɔmʋa bhlaa 'lɛ ɔya ɔ 'yea na, 4saa ɔ ble 'lɛ Laagɔ 'la ‑palʋa ‑zɔn, ɔ 'ma 'lɛ ‑teyiyiflawia ɔ li 'lɛ 'nyɩ ɔ 'nyɩmʋ 'lɛ ɔla 'namʋnyaa 'flawu ‑naa nclɔɔ bhlogbɩɩ 'ta 'lɛ ɩla lijioli ‑ka, ‑n 'ta ‑teyiyinyaa ‑tɛɛ na, a 'ta ka ‑azla 'dɛ 'la wɔlɩa zɛlɩ bha?» 5Na, ɔ ya maa 'cla lebhe: «Nclɔɔa 'Cʋa* ‑glɩ nyɔkwɛclɩɩa 'la ‑kwlɛto.»
Zozii ya nclɔɔ nyɔkwɛclɩɩa 'kʋ jabha
(Mat 12.9-14; Mak 3.1-6)
6‑Buunnyɔkwɛclɩɩ* bhlo 'kʋ, Zozii ya bhibhiepalʋa* ‑zɔn ble 'nyɩ ɔ caa. Nclɔɔ bhlo ‑kʋa 'dɛ, ɔla 'lipasɔsɔa ‑kuoa. 7Na, ‑jlɩmaazienyaa* ɩya Falizɩɛnnyaa kopea Zozii 'ciin le ma 'ka 'lɩ, ɩ ‑ka ‑kʋ le ɔ cɩ 'kaa nyɔkwɛclɩɩa 'kʋ nclɔɔ jabha na ɩya ma 'kaa 'mɔɔ wɔlɩ 'kʋ gɩ. 8‑Ma ɔmɔ ɔ ‑cia mala wɔɔgugwiea. Na, ɔ ya nclɔɔa ‑ɔ ‑ka 'lɛ 'kukusɔa na 'cla lebhe: «‑Bho 'kʋ ɩya ‑n 'nylugo ‑da sidiian.» Nclɔɔa ya 'kʋbho 'nyɩ ɔ ya 'nylugo. 9Zozii ya maa 'cla lebhe: «Ka n cla 'lɛ anyɩ neen ɩ ‑ka ‑kʋ le nyɔkwɛclɩɩa 'kʋ ‑jioli ‑kʋ le ma nʋ 'nanɩ ‑aana ma nʋ ‑abhɔlɛ na, ma jabha nclɔɔ ‑aana ma teo ne ɩya ɔ 'ku na.» 10Ɩla leen, ɔ ya 'ci ‑bie, ɔ ya maa 'fɩan 'ciinkope, 'nyɩ ɔ ya nclɔɔa 'cla lebhe: «‑Glɔ ‑naa sɔa nɩkplaan.» Nclɔɔa ya ɔla sɔa nɩkplaan ‑glɔ 'nyɩ ʋ ya jabha. 11Na, dɔgbɛ ya ‑jlɩmaazienyaa ɩya Falizɩɛnnyaa* pla 'nyɩ maa bhlobhlo nyɩtɛa wɔlɩa ma cɩ 'kaa 'lɛ Zozii cɩ nʋ na.
Zozii ya 'Kʋgba ‑mɔsɔa desla
(Mat 10.1-4; Mak 3.13-19; Lobh 1.13)
12'Dɛ 'la clɩɩa nɩkplaan, Zozii ya 'kike bhlo 'wlu mʋ le ɔ 'ka bhibhie. Ɔ ‑kʋ Laagɔ bhibhieda ‑aan 'nyɩ ‑zeli ya ze. 13Na, daa ‑zelia ze 'lɛ na, ɔ ya ɔla gɩlɩnyaa ɔcɩ cɩ lalɩ, ɔ ya maa sidiin, 'kʋgba ‑mɔsɔ desla, 'nyɩ ɔ ya maa ɔla lobhulobhunya* la. 14Maa ‑ɔ ‑glɩ 'lɛ Simɔɔn, ɔ la 'lɛ Pɩɛlɩ na, ɔ bholi Andlee, Zakɩ, Zaan, Filipʋ, Batelemii, 15Matie, Tomaa, Alɩfee ‑yowli Zakɩ, Simɔɔn, ma laa 'lɛ 'bhlɩkʋtɩtɔlʋnyɔa na, 16Zakɩ ‑yowli Zuda ɩya Zuda Iskalɩɔtʋ, ɔmɔa ‑ɔ 'plɩ 'lɛ ncɛlɩpɛlʋzʋnyɔa na.
Zozii ɔ caa 'nyɩ ɔ jabha ncɛlɩ
(Mat 4.24-25; Mak 3.7-13)
17Daa Zozii ‑ya ɔla lobhulobhunyaa* 'wlʋ 'lɛ 'kikea 'wlu 'nyɩ ma kwli 'lɛ na, ma ya da bhlo, ‑dʋdʋ paapaa 'kʋ ŋeni 'nyɩ ma ya 'nylugo. Ɔla gɩlɩnyaa* 'la ‑alawlee 'kadie ɩya ncaabhutukpa, ‑ɔ 'wlʋlʋ Zudeebhlɩa ‑tɛtɛa 'kʋ, Zolizalɛmʋ ɩya Tili ɩya Sidɔɔnbhlɩa 'kʋ 'la 'dia ‑ɩ ‑titoluo 'lɛ gea na 'kʋ na, ‑kʋa 'dɛ. 18Ma ya ci le ma 'kɔɔ 'nyukwliinpo ɩya ɔ 'ka maa jabha. ‑Anʋa 'wugwi ‑nyinyi bhɩa 'lɛ 'kwlɩ na, ya jabha. 19Na, ncɛlɩa ‑tɛtɛa 'matɩa le a 'kaa 'mɔɔ cɩkla, sa 'tɛtɩ bhlo 'wlʋlʋa 'mɔɔ nɩkplaan 'nyɩ ɩ jabhaa maa 'fɩan na.
'Nanɩkʋlɩɛ ɩya ‑munzue
(Mat 5.2-12)
20Na, Zozii ya ɔla gɩlɩnyaa* 'ciinkope 'nyɩ ɔ ya 'cla lebhe:
«A ‑kʋ 'nanɩ, anyɩ ŋaazɩnyaa, sa Laagɔ 'la Nyɩbhɛlɩdua* ‑kʋ ʋ ‑nyɩɔ anyɩ.
21A ‑kʋ 'nanɩ, anyɩa ŋɔmʋ bhla 'lɛ ‑pɔtɔnʋ na,
sa a cɩ 'ka lo.
A ‑kʋ 'nanɩ, anyɩa ‑ɔ tu 'lɛ ‑pɔtɔnʋ na, sa a cɩ 'ka nya.
22A ‑kʋ 'nanɩ, daa ncɛlɩ zɔbhɛlɩ 'lɛ anyɩ,
ma blɔ 'lɛ anyɩ, ma vla 'lɛ anyɩ 'nyɩ na nyumo 'lɛ anyɩ 'ŋlɩ,
Nclɔɔa 'Cʋa* 'la gbʋ na.
23A nʋ ‑pɔpʋɛ 'dɛ 'la clɩɩa 'kʋ ɩya a nʋ ‑jaka, sa 'lɩka ala dluuplʋlɩɛ 'ghli 'yɛpɩ ‑laagɔɔn. ‑Masa, 'sɛtɛɛ bhlogbɩɩ ma tocɩa nʋa 'lɛ Laagɔnekʋnyɩtɛnyaa na.
24‑Ma, ‑munzue ‑bho anyɩa ‑ɔ ‑lio 'lɛ 'bhɛlɩ na,
sa a ya tooto ala 'nanɩkʋlɩɛa 'lɩ.
25‑Munzue ‑bho anyɩa ‑ɔ ‑loo 'lɛ ‑pɔtɔnʋ na,
sa ŋɔmʋ cɩ 'ka anyɩ 'bhla.
‑Munzue ‑bho anyɩa ‑ɔ nya 'lɛ ‑pɔtɔnʋ na,
sa a cɩ 'ka cɩɩnkaɔɔn kʋ ɩya a 'ka 'tu.
26‑Munzue ‑bho anyɩ,
daa ncɛlɩa ‑tɛtɛa falɩ 'lɛ anyɩ 'ŋwleen na,
sa 'sɛtɛɛ bhlogbɩɩ ma tocɩa
falɩa 'lɛ yooyo Laagɔnekʋnyɩtɛnyaa 'ŋwleen.»
A wabha ala ‑zɔbhɛlɩgbanya
(Mat 5.38-48)
27Zozii ya ‑awlɛ 'cla lebhe: «N solu anyɩ, anyɩa ‑ɔ ‑poon 'lɛ 'nyukwliin na. A wabha ala ‑zɔbhɛlɩgbanya, a nʋ maa ‑ɔ ‑zɔɔ 'lɛ anyɩ na 'nanɩ, 28a palɩ maa ‑ɔ pa 'lɛ anyɩ na 'nyu ɩya a bhibhie maa ‑ɔ sa 'lɛ anyɩ gbaylɩ na 'la da. 29Gbazɩ nclɔɔ ‑kɔɔ ‑kpacɔ 'sɛpɛ na, ‑tlɔɔ ‑da ‑naanʋa. Nclɔɔ ‑ka ‑naa bibielʋʋa 'ma na, teo ne ɩya ɔ 'mamʋ ‑naa 'janpaa. 30Ncaatʋtʋʋntʋa ‑ɔ 'clalɩɔ 'lɛ na, 'maa 'nyɩɔ. 'Nyɩ nclɔɔ ‑ka ‑naa 'nanɩ 'ma na, ‑naa 'clalɩɔ mɩ. 31'Nyɩ ɩmɩa a ‑wa 'lɛ le ncɛlɩ nʋ anyɩ cɩ na, anyɩ ‑ma a nʋmʋɩ maa cɩ. 32A ‑ka maa ‑ɔ ‑wa 'lɛ anyɩ na ‑tɛɛ ‑wa na, 'nyupalɩɛ saa a 'lɩlɩɩ 'lɛ nɩkplaan bha? Sa nyinyinʋnyaa ‑ma, ma ‑wamʋ maa ‑ɔ ‑wa 'lɛ maa na. 33'Nyɩ a ‑ka maa ‑tɛɛa ‑ɔ nʋ 'lɛ anyɩ 'nanɩ na, 'nanɩ nʋ na, 'nyupalɩɛ saa a 'lɩlɩɩ 'lɛ nɩkplaan bha? Sa nyinyinʋnyaa 'titi ‑ma, ma nʋmʋ sɛɛ na. 34'Nyɩ a ‑ka maa ‑tɛɛa, a gugu 'lɛ le ma cɩ 'ka anyɩ cala na, ‑gbla na, 'nyupalɩɛ saa a 'lɩlɩɩ 'lɛ nɩkplaan bha? Nyinyinʋnyaa ‑ma, ma gbla nyinyinʋnya le ma 'ka maa cala. 35‑Ma anyɩ, a wabha ala ‑zɔbhɛlɩgbanya, a nʋ 'nanɩ, a ‑gbla, ɩya a 'la 'matɩa le ma 'ka anyɩ cala. 'Dɛ ala dluuplʋlɩɛ cɩ 'ka 'lɛ 'yɛpɩ ‑laagɔɔn 'ghlibholi, ɩya a 'ka 'lɛ 'Kʋzilo Laagɔa 'la 'cuo 'plɩ. Sa ɔla dananɔa ŋeni ‑dufleenya ɩya ‑abhɔlɛnya 'kʋ. 36Na, 'naa ala gbɩ nama le saa a To 'la gbɩ nanɩ 'lɛ na.
A 'la ‑plaa a 'ye 'tɩtɩ
(Mat 7.1-5)
37A 'la ‑plaa a 'ye 'tɩtɩ ɩya ma 'la ka anyɩ 'tɩtɩpla. A 'la ‑salɩa a 'ye 'ge ɩya ma 'la ka anyɩ 'ge ‑salɩ. A va ɩya ma 'ka anyɩ va. 38A 'nyɩ ɩya ma 'ka anyɩ 'nyɩ. Sa ma 'ka ‑bɩɔlʋʋa 'nanɩ yeli, ʋ 'ka 'kʋmɩanɩ, ma 'kʋʋ 'kʋko, ma 'kʋ 'dɩdɔ ɩya ma 'ka ala loku nɩkplaan 'kɔsɔ. ‑Masa ‑bɩɔlʋʋa a cɩ 'ka 'lɛ 'ma na, ʋmʋ cɩ 'ka 'lɛ anyɩ ‑ma ala ‑bɩɔlʋʋ 'plɩ.»
39Zozii ya ‑awlɛ maa ‑nyandla bhlo nɩkplaan solulu lebhe: «'Citutunyɔ cɩ ɔ licitutunyɔ sɔkla bha? Maa ‑mɔsɔa cɩ 'ta 'bhukuun bhlili bha? 40Gɩlɩnyɔ* 'ta ɔla canyɔ 'kʋzi, ‑ma gɩlɩnyɔ 'tʋtʋʋntʋa ɔla canyɔa ya 'lɛ 'nanɩ caa na, ɔ cɩ ɔmɔ 'bhisa 'kʋ 'plɩ.
41'Lɩsaa 'la gbʋ ‑n kopea 'lɛ fʋfʋa ‑ʋ ‑kʋ 'lɛ ‑n bholi 'la 'cia nɩkplaan na 'ciin, 'nyɩ ‑bhlɔlʋa ‑ʋ ‑kʋ 'lɛ 'cia nɩkplaan na, ‑n falɩ 'tʋʋ 'lɛ pɔlɛ cɩ bha? 42'Nsasa ‑n ‑cɩ kaa 'lɛ mino ɩya ‑n ka 'lɛ ‑n bholi 'cla lebhe n bholi, 'talɩɩn 'cin n 'ka fʋfʋa ‑ʋ ‑kʋɔ 'lɛ 'ciin na 'yɛpɩ ‑sa, ‑mɔɔa, ‑ɔ 'ta 'lɛ ‑bhlɔlʋa ‑ʋ ‑kʋ 'lɛ ‑nanɛa nɩkplaan ‑jlɛ na. Gbɩgbɩnyɔ, 'maa ‑sa ‑bhlɔlʋa ‑naa 'cia nɩkplaan 'fɩɔn, ɩya ‑n ka salɩ ɩya ‑n kanɩ fʋfʋa ‑ʋ ‑kʋ 'lɛ ‑n bholi 'la 'cia nɩkplaan na, 'yɛpɩ ‑sa.
Su ɩya ʋla 'caa
(Mat 7.16-20, 12.33-35)
43Su 'nanʋʋ tlʋ 'ta 'canyinyi. 'Sɛtɛɛ bhlogbɩɩ su ‑nyunyu tlʋ 'ta 'lɛ 'ca 'nana. 44‑Masa su 'la 'ca nɩkplaan ma cibhlililiu 'lɛ. Na, maa cɩ 'ta 'figica 'ŋusu 'ciin ‑salɩ 'nyɩ maa cɩ 'ta ‑ghlɛzɛɛnca 'ŋubhlukpo 'ciin ‑salɩ. 45Na, ncaananɔ, wɔɔnanɩ ‑ɩ 'wlʋlʋɔ 'lɛ pɔlɛ 'ciin. 'Nyɩ ncaanyunyo, wɔɔnyinyi 'wlʋlʋɔ 'lɛ pɔlɛ 'ciin. Na, ɩmɩa ‑ɩ yee 'lɛ nclɔɔ 'la pɔlɛa nɩkplaan na, ɩmɩ ‑ɩ 'wlʋlʋɔ 'lɛ neen.
‑Paaslanya ‑mɔsɔ
(Mat 7.24-27)
46'Nyɩ 'lɩsaa 'la gbʋ a laan 'lɛ ‑Kwlenyɔ, ‑Kwlenyɔ 'nyɩ 'a nʋ 'ta 'lɛ ɩmɩa n solu 'lɛ anyɩ na bha? 47Na, ncaatʋtʋʋntʋa ‑ɔ ciin 'lɛ 'bhlɩ, ‑ɔ po 'lɛ 'na wɔɔnyɩtʋa 'nyukwliin 'nyɩ ‑ɔ 'plɩlɩʋ 'lɛ 'kʋ na, n 'ka anyɩ nclɔɔa ma cɩ 'kɔɔ 'lɛ palalɩ na pala. 48Ka ɔ palalɩ 'lɛ le nclɔɔa ‑ɔ sla 'lɛ ‑palʋ na. Ɔ ya 'bhli, ɔ ya ‑gluu mʋ 'nyɩ ɔ ya 'lɛ ‑palʋa cokwie 'kʋ ‑gluuzʋlʋ. 'Nyi ya ye, ɛ yʋʋ guoon kɔlɔlʋ, ‑ma ʋ 'ta 'dɩdɔ, sa ʋ ‑slɔa 'nanɩ na. 49‑Ma ɔmɔa ‑ɔ nu 'lɛ 'nyɩ ‑ɔ 'plɩlɩ 'ta 'lɛ 'kʋ na, ka ‑ɔ ‑kʋ 'lɛ le nclɔɔa ‑ɔ 'ta 'lɛ bhli 'nyɩ ɔ ya 'lɛ 'sla na. Yeyenyɩa yʋʋ guoon kɔlɔlʋ. 'Kplookʋ, ʋ ya bhli 'nyɩ ʋ 'fɩan ya gbɔlʋ.»
Àwon tá yàn lọ́wọ́lọ́wọ́ báyìí:
Luk 6: NTLD13
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Dida New Testament © Bible Society of Côte d'Ivoire, 2013.
