Luk 12
12
A nyɩtɛ 'kpataa
(Mat 10.26-33)
1'Dɛ 'la daa, sa ‑alawleea 'wlalɩa 'lɛ 'wlu ‑bhutukpa na 'nyɩ ncɛlɩ cleclelia 'lɛ macɩ 'kʋ na, Zozii ya ‑bɛɛ ɔla gɩlɩnyaa* solulɩɛ bhɔ: «A zʋlʋ Falizɩɛnnyaa* 'la 'zɩa* ‑ɩ ‑glɩ 'lɛ mala yooyogbanʋlɩɛa na pɔlɛ 'kʋ. 2Lʋʋ bhlogbɩɩ cɩ 'ta ‑gblio, ɩya ʋ 'la 'ka ‑zɔnwlʋ, lʋʋa bhlogbɩɩ cɩ 'ta ‑zizieo ɩya ʋ 'la 'ka ‑cibhlilio. 3‑Ofi lebhe ɩmɩa ‑tɛtɛa a nyɩtɛlɩ 'lɛ 'tutuun na, ɩ cɩ 'ka zezezeliin ‑nuo 'nyɩ ɩmɩa a nyɩtɛlɩ 'lɛ anyɩ 'nyukwli cɩ, ‑paakotɩa nɩkplaan na, ma cɩ 'kɩɩ ‑daa ‑tɛtɛa bhubhu 'kʋ 'palɩ. 4Na, n solui anyɩ, anyɩ n 'nagwɩɛcɩ: A 'la 'gulua maa ‑ɔ bhla 'lɛ 'nyɛkɛa 'nyɩ ɩla leen, ‑ɔ mino 'tanɩ 'lɛ ‑buun lʋʋ bhlogbɩɩ nʋnɩɛ na. 5N 'ka anyɩ ɔmɔa a cɩ 'ka 'lɛ 'gulu na pala: A 'gulu ɔmɔa, 'kwɩ 'la leen, ‑ɔ ‑ka 'lɛ ‑jioli ɩya ‑ɔ ka ‑kosua ‑ʋ ŋomu 'ta 'lɛ na nɩkplaan 'pa na. ‑Ghɛɛ, n solu anyɩ le ɔmɔ ‑naa a cɩ 'ka 'lɛ 'gulu. 6Nclɔɔ zʋ 'ta libhli ‑ngbi 'dala ‑mɔsɔ bha? 'Bhlɩmɔɔn, Laagɔ bolu 'ta ɩla sidiian bhlogbɩɩ 'kʋ. 7'Nyɩ ala 'nyɩa 'titio, 'ɩ ‑tɛtɛa ‑zɛlɩɔ. Na, ŋanɔ 'la 'bhlaa anyɩ, ‑ma anyɩ, a kalɩ Laagɔ gbʋ ‑gbɔɔn 'nyɩ a zi 'kpoongbilibhlia ‑tɛtɛ 'kʋ.
8N solu anyɩ le: Ncaatʋtʋʋntʋa ‑ɔ cɩ ka 'lɛ ncɛlɩ 'ci 'kʋ, 'cla lebhe ɔ ‑glɩ 'naanɔ na, Nclɔɔa 'Cʋ ‑ma, ɔ cɩ 'kɔɔ ɔnɔ la Laagɔ 'la 'bhlaandleecɩa* 'ci 'kʋ. 9‑Ma ɔmɔa cɩ 'kaan 'lɛ ncɛlɩ 'ci 'kʋ ‑blɔ na, N cɩ 'kɔɔ Laagɔ 'la 'bhlaandleecɩa 'ci 'kʋ ‑blɔɔ. 10'Nyɩ ncaatʋtʋʋntʋa cɩ ‑ka 'lɛ Nclɔɔa 'Cʋa* wɔlɩ cɩ nyɩtɛlɩ na, 'ɩ cɩ 'kɔɔ ‑vɔɔ. ‑Ma ɔmɔa ‑ɔ ‑cɩ ‑ka 'lɛ ‑Kplɔkplɔ ‑Wugoa* vla na, 'ɩ cɩ 'tɔɔ ‑vɔɔ. 11Daa ma cɩ 'ka 'lɛ anyɩ bhibhiepalɩa* ‑zɔn, 'tɩtɩplanya ɩya ‑kwletocɩa ‑deliin fa na, ɩmɩa a cɩ 'ka 'lɛ nyɩtɛ ɩya ka saa a cɩ 'ka 'lɛ nyɩtɛnyɩtɛlɩ na 'la pɔɔvʋ 'la bhlaa anyɩ. 12Sa 'dɛ 'la 'ŋwacɩa 'kʋ 'titi, ‑Kplɔkplɔ ‑Wugoa cɩ 'ka anyɩ ɩmɩa a cɩ 'ka 'lɛ nyɩtɛ na pala na.»
A 'la kalɩa ‑aŋaŋla
13‑Alawleea sidiin, nclɔɔ bhlo ya Zozii 'cla lebhe: «Canyɔ, solu n bholi le n ‑yɔɔsɔ poli ‑ala ‑ajaa.» 14Zozii yɔɔ 'cla lebhe: «Nclɔɔ, ncaasaa ‑ɔ 'nyɩ 'lɛ ‑jioli le n 'ka ala 'tɩtɩplanyɔ 'plɩ bha ‑aana n 'ka a 'la ‑aja poli?» 15Na, ɔ ya maa 'cla lebhe: «A zʋlʋ pɔlɛ 'kʋ! A 'la kalɩa ‑aŋaŋla! ‑Masa, nclɔɔ 'la jabhʋa 'ta ɔla 'bhɛlɩ nɩkplaan ‑kʋ.»
16Na, Zozii ya ‑nyandlaa bhlo bu 'nyɩ ɔ ya maa 'cla lebhe: «Ncaanyɩbhɛlʋ bhlo ‑kʋa, ɔla 'kwlɩa yaa ‑gbɔɔn tlʋ. 17'Nyɩ ɔ claa ɔcɩ neen lebhe: N 'ta ‑gbogbu ‑ka ɩya n 'ka 'yɛpɩ 'na 'kwlaa 'la 'dɩdɩlɩɩa zʋ. Na, 'lɩsaa n cɩ 'kaa 'lɛ nʋ bha?
18Na ɔ ya ɔcɩ 'cla lebhe: 'Lɩka ɩmɩa n cɩ 'ka 'lɛ nʋ na. Ka n cɩ 'ka 'lɛ 'na ‑gbogbia gbɔlʋ, n 'ka lɩɩ 'kadɩ 'sla ɩya n 'ka 'na 'bleea ɩya ‑naa 'nanɩa ‑tɛtɛa 'yɛpɩ zʋ. 19Ɩya n 'kanɩ amʋ 'titi ncɩ 'cla lebhe: 'Lɩkanɩɔ ‑n ‑zʋɔ 'nanɩ ‑bhutukpa sa, ɩ cɩ 'lɛ ‑gwlɛlɩ ‑aan lio ‑bhutukpa na. Nyɔkwɛnɩ, li, 'mla, 'wɔzɔ. 20‑Ma Laagɔ yɔɔ 'cla lebhe: 'Tututunyɔ, dobheni ‑naa bhlogbɩɩ, ‑naa 'wugoa cɩ 'kɔɔ ‑cɩɩn 'wlʋlʋ, na ɩmɩa ‑n bhɔsʋa 'lɛ ncaasaa ‑ɔ cɩ 'kanɩɩ 'lɛ 'ma bha? 21Na, 'lɩka ɩmɩa ‑ɩ ŋeni 'lɛ ɔmɔa ‑ɔ 'wlalɩ 'lɛ 'bhɛlɩ 'wlu ɔmɔ 'titi 'la gbʋ 'nyɩ ɔ 'matɩ 'ta 'lɛ le ‑ɔcɩ Laagɔ cɩ 'bhɛlɩ lili na.»
A 'la plea pɔlɛ
(Mat 6.25-34)
22Na, Zozii ya ɔla gɩlɩnyaa* 'cla lebhe: «'Lɩka wɔlɩa 'wlukua n cla 'lɛ anyɩ lebhe: A 'la plea ala jabhʋa 'la pɔlɛ, lʋʋa ‑a cɩ 'ka 'lɛ li na 'la gbʋ, ‑aana a 'la plea ala 'nyɛkɛa 'la pɔlɛ, lʋʋa ‑a cɩ 'ka 'lɛ nɩkplaan ‑pla na 'la gbʋ. 23Sa jabhʋ zi lilinyɩ 'kʋ 'nyɩ 'nyɛkɛ zi 'lɛ loku 'kʋ na. 24A kopeka ‑daabɔlɩa: 'Ɩ golo 'ta naa 'ɩ ‑sa 'ta, ɩ 'ta sazʋda ‑ka naa 'ɩ 'ta gbogbu ‑ka. ‑Ma Laagɔ nyɩɩ nyɩ. 'Nyɩ anyɩa ‑ɔ kalɩ 'lɛ gbʋ 'nyɩ ‑ɔ zi 'lɛ libhli 'kʋ naa! 25'Nyɩ anyɩ sidiin ‑anɔsaa, ɔla pɔɔplelɩɛa nɩkplaan, ‑ɔ ‑cɩ ka 'lɛ ɔla clɩɩa 'ŋwacɩwlu bhlo 'bhebhe 'kʋgbɛlɩɛ mino bha? 26Na, a 'ta 'lɛ 'tɛtɩ ‑ka ɩya a 'ka 'lɛ ɩmɩa ‑ɩ 'ta 'lɛ ‑ylɛylɛ 'tɛ na, 'bhebhe nʋlɩɛ mino na, 'lɩsaa 'la gbʋ a plea 'lɛ ‑danaanɩa ‑tɛtɛa 'la pɔlɛ bha? 27A kopeka 'kwlɩa nɩkplaan 'la ‑pitia 'la nanɔa. 'Ɩ bhla 'ta ‑ngese naa 'ɩ bhla 'ta loku, ‑ma n cla anyɩ lebhe Salomɔɔn 'titi, ɔla 'klʋagba nɩkplaan, ɔ 'ta ka ‑azla bhlogbɩɩ 'bhisa 'kʋ bibie. 28Na, Laagɔ ‑ka ‑sa 'kwlaan 'la ‑pitia ‑ɩ ‑kʋ 'lɛ 'dɛ ‑yaka, 'nyɩ ma cɩ 'ka 'lɛ ‑cɩpa ‑kosuun 'pa na bibie na, 'lɩsaa 'la gbʋ, 'ɔ cɩ 'taa 'lɛ anyɩ bibie ɩya ɔ 'kɩɩ 'kʋ zi bha? Anyɩ ‑ma sɛɛnɩ, 'nda ala pɔɔtɛtɛa ‑kʋa 'lɛ bha? 29Na anyɩ, a 'la 'matɩa ɩmɩa a cɩ 'ka 'lɛ li ‑aana ɩmɩa a cɩ 'ka 'lɛ 'mla na, ɩya a 'la plea pɔlɛ. 30Ɩmɩ ‑naa ‑tɛtɛa 'pʋpʋ ‑naa 'kʋ 'la ncɛlɩa ‑ɔ 'ta 'lɛ Laagɔ ‑ci na, maa ‑ɔ 'ta 'lɛ ɩla 'matɩɛ 'la gbʋ nyɔkwɛ ‑ka, ‑ma anyɩ, a To ‑ci lebhe ɩ nanɩ le a kalɩɩ. 31‑Ma ɔla Nyɩbhɛlɩdua 'nyɩ a 'matɩ ɩya ɩmɩ ‑naa ‑tɛtɛa 'ka 'dɛ ‑gbɛ ɩ 'ka anyɩ ‑nyɩɔ. 32'Bhlabhlɩkpaco, pɔɔvʋ 'la 'bhlɔɔ, sa a To ya 'lɩ lebhe ɩ nanɩ le ɔ 'nyɩ anyɩ Nyɩbhɛlɩdua.
33A zʋ ala kalɩkalɩlɩɩa 'pɛlʋ ɩya a 'nyɩ 'dalaa ŋaazɩnya. A 'kpla acɩ ‑ketekwia ‑ɩ zɛ 'ta 'lɛ na, a kalɩ acɩ ‑laagɔɔn, 'bhaklɔa ‑ʋ nyumo 'ta 'lɛ na. 'Winyɔ mɛ 'ta 'yɛpɩ cɩ naa ŋlɔɔ ‑nyumo 'ta 'yɛpɩ lɩɩ. 34Sa, daa ala 'bhaklɔa ‑kʋ 'lɛ na, dɩpɩa ala pɔlɛa cɩ 'ka 'lɛ kʋ.
A gblɩbhalɩ ɩya a bɛ
35A gblɩbhalɩ, a 'pɩa acɩ kɔɔ ɩya 'naa ala ‑kaniecɩa ɩ ‑ŋama. 36Ɩya a kʋ le ncɛlɩa ‑ɔ ‑bɛ 'lɛ ma to le ɔ 'ka 'cɩcɩɛnʋtlɔnblɩ 'kʋ 'wlʋ, ɔ 'ka ci ɩya daa ɔ cɩ 'ka 'lɛ gbinea bhla ‑jaa na, ma kaa kalɩ. 37Ma ‑kʋ 'nanɩ lobhocuo ‑naa toa ‑ka 'lɛ ci 'nyɩ ɔ cɩ 'ka 'lɛ ‑bɛda ŋeni na. N solu anyɩ, ɩ ‑glɩ ‑nʋawlɛ le ɔ cɩ 'ka ɔla lobholinʋlokwia 'ma, ɔ cɩ gba ma cɩ maa 'tlɔnblɩ 'ku zʋ 'nyɩ ɔ cɩ 'plɩ, ɔ cɩ maa nyɩ zʋ. 38'Nyɩ dɩdɩnandɩ ‑aana ziplisa 'la 'klia nɩkplaan ɔ ‑ka cilio 'nyɩ ɔ ‑ka maa ‑bɛda ŋeni na, ma ‑kʋ 'nanɩ!
39A ci sɛɛ lebhe: 'Sletoa ‑kaa 'ŋwacia 'kʋa 'winyɔa cɩ 'ka 'lɛ cili na ‑ci na, ɔ cɩ 'tɔɔ ne te ɩya ɔ 'ka ɔla ‑palʋa ‑zɔn ble. 40Na, anyɩ ‑ma sɛɛ a gblɩbhalɩ, sa 'ŋwacia a 'ta 'lɛ ‑guguo le ɔ cɩ 'kʋ cili na, dɛ Nclɔɔa 'Cʋa* cɩ 'ka 'lɛ ci.»
41Na, Pɩɛlɩ ya Zozii neencla lebhe: «‑Kwlenyɔ, ala gbʋ ‑n bu 'lɛ ‑nyandlaaa ‑naa bha? ‑Ma ncɛlɩa 'fɩan 'la gbʋ bha?» 42‑Kwlenyɔa yɔɔ 'cla lebhe: «Lobhoco saa ‑ɔ cia 'lɛ dɩgalɩ 'nyɩ ma cɩa 'lɛ ‑delikʋtɛbhalɩ bha? Ɔ ‑glɩ ‑anɔa 'sletoa ya 'lɛ ɔla 'slea nɩkplaan 'la lobhocuoa 'kʋklʋʋn zʋ le 'ŋwacɩa ‑ɛ ‑zʋɔ 'lɛ na ŋeni na, ɔ 'ka maa nyɩ 'nyɩ na. 43Ɔ ‑kʋ 'nanɩ, lobhoco ‑naa, ɔ toa ‑ka 'lɛ ci 'nyɩ ɔ cɩ 'ka 'lɛ ɔla lobholia nʋda ŋeni na. 44N solu anyɩ, ɩ ‑glɩ ‑nawlɛ, le ɔ toa cɩ 'kɔɔ ɔla 'nanɩa ‑tɛtɛa 'kʋklʋʋn zʋ.
45‑Ma gbazɩ lobhoco ‑naa ‑ka ɔcɩ 'cla le: N toa 'la cilɩɛ bʋalɩ 'nyɩ ɔ ‑ka lobhocuoa ɩya lobhoŋwlɛa bhutilɩɛ bhɔ, ɔ ‑ka li, ɔ ‑ka 'mla 'nyɩ nʋa ‑kɔɔ 'bhla, 46lobhoco ‑naa toa cɩ 'ka clɩɩa ɔ 'ta 'lɛ ‑gblɩ ɩya 'ŋwacɩa ɔ 'ta 'lɛ ‑ci na 'kʋ cili: Ɔ 'kɔɔ 'tli ɩya ɔ 'kɔɔ maa ‑ɔ 'nyiyi 'ta 'lɛ Laagɔ na, 'la gbaylɩa ‑sa. 47Lobhoco ‑naa ‑ɔ ‑cia 'lɛ ɔ toa 'la pɔɔsa 'nyɩ ‑ɔ 'ta 'lɛ lʋʋ bhlogbɩɩ bhɔsʋa naa ɔ 'ta 'lɛ lʋʋ bhlogbɩɩ nʋ pɔɔsa ‑naa 'la 'sasʋʋn na, ɔ cɩ 'ka ‑gbɔɔn ‑bhutio. 48‑Ma ɔmɔa ɔ 'taa mɩɩ 'lɛ ‑ci na 'nyɩ ɔ ya 'lɛ bhutibhutigbɩ nʋ na, 'ma cɩ 'tɔɔ ‑gbɔɔn bhuti. Ɔmɔa ma ya 'lɛ ‑gbɔɔn 'nyɩ na, ma cɩ 'kɔɔ ‑gbɔɔn 'clalɩ. Ɔmɔa ma ya 'lɛ ‑bhutukpa 'klʋlɩda 'nyɩ na, ma cɩ 'kɔɔ ‑bhutukpa 'clalɩ.
Wɔlɩa 'wlukua Zozii ci 'lɛ na
(Mat 10.34-36)
49‑Kosu n ci 'lɛ ‑dʋdʋa 'kʋ ‑lakan 'nyɩ ‑amʋ bhlobhlo ‑kaa ‑kʋ na, ʋ yaanɩa tooto ŋama! 50'Nyuwluzʋlɩɛ ‑n cɩ 'ka 'lɛ 'lɩ, 'nyɩ ‑n 'ta ‑kɩɩ 'lɛ 'lɩ na, pɔɔvʋ 'taan 'nanɩ ‑ka! 51Ka a gugu 'lɛ lebhe pupue n ci 'lɛ ‑dʋdʋa 'kʋ ‑lakan bha? N cla anyɩ lebhe ‑wɔɔ, ‑ma nɩkplaandolɩɛ. 52Na, ‑ɩ bhɔlʋ 'lɛ ‑da na, ncɛlɩ ‑ngbi ‑ka 'sleen ‑kʋ na, ma cɩ 'ka nɩkplaan do: ‑Mɔta cɩ 'ka ‑mɔsɔ gbatlɩ mʋnʋ ɩya ‑mɔsɔ 'ka ‑mɔta gbatlɩ cili. 53Ma cɩ 'ka nɩkplaan do, to cɩ 'ka 'cʋ gbatlɩ mʋnʋ ɩya 'cʋ 'ka to gbatlɩ mʋnʋ, 'nɔ cɩ 'ka 'ŋlʋcʋkwla gbatlɩ mʋnʋ, 'ŋlʋcʋkwla 'ka 'nɔ gbatlɩ mʋnʋ, 'wʋtlɔ ɩya ɔ ‑yowli nʋŋlɔ cɩ 'ka gbatlɩ mʋnʋmʋnʋnʋ.»
A cibhili 'bhlɛsʋʋn ‑naa 'la ghledɩa ‑zɔnsasa
54Zozii ya ‑awlɛ ‑alawlee 'cla lebhe: «Daa a lɩ 'lɛ ‑laagɔa nɩkplaan 'nyɩ #12.54 Zifʋnyaa 'la 'bhlɩa 'kʋ, gbazɩ 'nyu ‑ka gbazɩa 'ylʋbhuoa pʋlʋ 'lɛ na kpobholu na, 'dɛndlana, ʋ cɩ 'ka bhla. 'nyukplu 'wlʋlʋ 'lɛ 'ylʋbhuoa 'la pʋlʋdaa na, a cla 'kplookʋ lebhe: 'Nyu cɩ 'ka bhla 'nyɩ ɩ glalɩ 'kʋ. 55'Nyɩ daa a lɩ 'lɛ ‑pupolua ‑ʋ 'wlʋlʋ 'lɛ gozɔan 'nyɩ ʋ ci 'lɛ na, a cla lebhe: 'Ylʋ cɩ 'ka ‑gbɔɔn 'pʋ, 'nyɩ ɩ glalɩ 'kʋ. 56Yooyoncɛlɩnyɩ, a ‑ci ɩmɩa ‑ɩ plɩ 'lɛ ‑laagɔɔn ɩya ‑dʋdʋa 'kʋ na ‑zɔnsasa, 'nyɩ 'lɩsaa 'la gbʋ a 'nu 'ta 'lɛ ɩmɩa ‑ɩ plɩ 'lɛ 'bhlɛsʋ ‑naa nɩkplaan na bha?
A 'nununu neen
(Mat 5.25-26)
57'Lɩsaa 'la gbʋ anyɩ 'titi a mʋ 'ta 'lɛ acɩɩn ɩya a 'ka 'lɛ ɩmɩa ‑ɩ nanɩ 'lɛ na cibhlili bha? 58Na ‑n ‑ya ‑naa ‑zɔbhɛlɩgbanyɔ ‑ka 'tɩtɩplanyɔ ‑deliin mʋda ‑kʋ na, nʋ saa 'fɩan ɩya a 'nununu neen, ɔ 'la ka sɛɔ 'tɩtɩplanyɔa ‑deliin fa, 'tɩtɩplanyɔa 'la kɔɔ 'sojanyɔa wlɩɩn zʋ ɩya 'sojanyɔa 'la kɔɔ ‑palʋɩn pa. 59N soluo lebhe: ‑N 'ta ka dlua ‑plʋlɩɛ bhɩalɩ na, ‑n cɩ 'ta ‑palʋa ‑zɔn 'wlʋ.»
Àwon tá yàn lọ́wọ́lọ́wọ́ báyìí:
Luk 12: NTLD13
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Dida New Testament © Bible Society of Côte d'Ivoire, 2013.
