Luk 11
11
Zozii ca ɔla gɩlɩnyaa bhibhie
(Mat 6.9-13)
1Clɩɩ bhlo, Zozii ‑kʋa dabhlo 'nyɩ ɔ bhibhiea. Daa ɔ bhɩalɩ 'lɛ na, ɔla gɩlɩnyaa* nɩkplaan bhlo yɔɔ 'cla lebhe: «‑Kwlenyɔ, 'Nyuwluzʋnyɔ Zaan ya ɔla gɩlɩnyaa bhibhie caa. Na, ‑mɔɔ ‑ma 'maa ca anyɩ bhibhie.» 2Ɔ ya maa 'cla lebhe: «A ‑ka bhibhieda ‑kʋ na, a 'cla lebhe:
To,
'naa ‑naa 'ŋlɩa ɩ ‑kplɔ,
'naa ‑naa ‑kwleliea ci,
3'nyɩ ‑anyɩ clɩɩa 'fɩan ala zezezelia 'la 'flawoa,
4va ‑anyɩ ‑ala nyinyia,
saa ‑anyɩ ‑ma, ‑a va 'lɛ maa ‑ɔ tʋ 'lɛ ‑ala ‑ngasi na,
ɩya ‑naa 'lɩa ‑anyɩ ‑a 'la bhlilia gbɩɩnclalɩɛ nɩkplaan.»
A 'clalɩ ‑ma ma cɩ anyɩ 'nyɩ
5Zozii ya ‑awlɛ maa 'cla lebhe: «Gbazɩ anyɩ sidiin, bhlo ‑ka 'nagɔ ‑ka, ɔ ‑ka mʋ, ɔ ‑kɔɔ dobhesa ŋeni 'nyɩ ɔ ‑kɔɔ 'cla lebhe: N 'nagɔ, ‑gblaan 'flawu ‑mɔta, 6‑ma n 'nagɔ bhlo ya lowluun 'wlʋ ɔ ya ci 'nyɩ n 'ta lʋʋ bhlogbɩɩ ‑ka n kɔɔ 'nyɩ na, 7'nyɩ ‑danaanɔa ‑ka ‑palʋa ‑zɔn ‑kʋ 'nyɩ ɔ kɔɔ neenŋonu lebhe: ‑Naa lʋlʋalɩɩn neen! Gbinea ‑tʋɔ, 'nyɩ n ‑ya 'na 'cuoa ya pʋ. 'N cɩ 'tanɩ 'kʋbholɩɛ mino ɩya n 'kɔɔ 'flawo 'nyɩ na, 8n solu anyɩ lebhe: Ka ɩ ‑ka ‑kʋ le ɔ cɩ 'taa 'kʋbho 'titio ɩya ɔ 'kaa 'mɔɔ 'flawo 'nyɩ, ‑ofi le ‑danaanɔa ‑glɩ ɔ 'nagɔ na, ɔ cɩ 'ka 'kʋbho ɩya ɔ 'kɔɔ ‑tɛtɛa 'fɩan ɔ 'clalɩ 'lɛ na 'nyɩ, ‑ofi lebhe ɔ 'nagɔ 'tɔɔ 'ci ‑zo 'ku, ɔ yɔɔ 'lɛ 'kʋkpɛɛ na.
9Na, ‑Amʋ n cla anyɩ lebhe: A 'clalɩ, ‑ma ma cɩ anyɩ 'nyɩ. A 'matɩ, ‑ma a cɩ 'lɩ. A bhuti gbinea, ‑ma ma cɩa anyɩ kalɩ. 10‑Masa, ncaatʋtʋʋntʋa ‑ɔ 'clalɩ 'lɛ na, ma nyɩɔ, ɔmɔa ‑ɔ 'matɩ 'lɛ na, ɔ lɩ 'nyɩ ɔmɔa ‑ɔ bhuti 'lɛ gbine na, ma cɩɔ ma kalɩ.
11Anyɩ sidiin, toa ‑anɔsaa ɔla 'cʋ ‑kaa 'lɛ ‑zlii 'clalɩ 'nyɩ ‑ɔ cɩ ‑kɔɔ 'lɛ tlɛ 'nyɩ bha? 12‑Aana ɔ ‑kaa 'lɛ ‑gʋgɔɔngie 'clalɩ, ɔ cɩ 'kɔɔ 'lɛ ‑laagangbite 'nyɩ bha? 13Na, anyɩa ‑ɔ ‑nyu 'lɛ na, a ka ala 'cuo ‑lɩɩ 'nanɩ 'nyɩsa ‑ci na, 'nsasa Toa ‑ɔ ‑kʋ 'lɛ ‑laagɔɔn na, 'ɔ cɩ 'taa 'lɛ ‑Kplɔkplɔ ‑Wugoa* maa ‑ɔ 'clalɩɔ 'lɛ mʋ na, 'nyɩ bha?»
Zozii ɩya Bɛzebulu
(Mat 12.22-30; Mak 3.22-27)
14Clɩɩ bhlo, Zozii ‑kʋa ‑amunaawugo ‑nyunyu bhlo 'tlida. Na, daa 'wugo ‑nyunyua 'wlʋ 'lɛ ‑zɔn na, ‑amunaanyɔa ya nyɩtɛlɩɛ bhɔ 'nyɩ nikpoo ya ‑alawleea sla. 15‑Ma maa nɩkplaan ‑anʋa claa lebhe: «Bɛzebulu, 'wugwi ‑nyinyia toa 'la 'tɛtɩa nɩkplaan, ɔ 'tlili 'lɛ 'wugwi ‑nyinyia.» 16‑Anʋa, ma 'kɔɔ 'lɛ 'gbuzu ‑zɔn 'pa na, ma 'clalɩa 'mɔɔ ghledaa ‑ɩ 'wlʋlʋ 'lɛ ‑laagɔɔn na. 17‑Masa ɔ ‑cia 'lɛ mala wɔɔgugwie na, ɔ ya maa 'cla lebhe: «Nyɩbhɛlɩdua ‑tɛtɛa ‑ʋ ‑doon 'lɛ na, ka ʋ nyumo 'nyɩ ‑palɩa gbɔlʋ 'lɛ. 18Na, Sataan* ‑ma, ‑ka ɔmɔ 'titi ɔcɩ gbatlɩ mʋnʋ na, 'nsasa ɔla nyɩbhɛlɩdua cɩ 'ka 'lɛ klakalɩ bha? Sa a cla 'lɛ lebhe Bɛzebulu 'la 'tɛtɩa nɩkplaan n 'tlili 'lɛ 'wugwi ‑nyinyia na. 19'Nyɩ ‑amʋ, Bɛzebulu 'la 'tɛtɩ nɩkplaan, n ‑ka 'wugwi ‑nyinyi 'tlili na, ala gɩlɩnyaa*, ncaasaa 'la 'tɛtɩ nɩkplaan, ma 'tlilii 'lɛ bha? Maa 'titii ‑cɩ ka 'lɛ anyɩ 'gesalɩ. 20‑Ma Laagɔ 'la 'tɛtɩa nɩkplaan n ‑ka 'wugwi ‑nyinyia 'tlili na, 'dɛndlana, Laagɔ 'la Nyɩbhɛlɩdua* ya anyɩ 'kʋ ŋeni.
21Gbazɩ 'tɛtɩkalɩnyɔ ‑ya ɔla 'papalɩɩa ‑ka ɔla 'sle ‑bɛ na, ɔla kalɩkalɩɩa 'la pɔɔvʋ 'bhla 'tɔɔ. 22‑Ma nclɔɔa ‑ɔ ‑ka 'lɛ 'tɛtɩ 'nyɩ ‑ɔ zio 'lɛ 'kʋ na, ‑ka futo 'nyɩ ɔ ‑kɔɔ ‑sɩa na, ka ɔ ma 'lɛ ɔla 'papalɩɩa 'fɩan ɔla pɔɔtɛtɛa ‑kʋa 'lɛ 'kʋ na, 'nyɩ ɔ poli 'lɛ ɔla lɩa ‑tɛtɛa ɔ ‑salɩɔ 'lɛ na. 23Na, ɔmɔa ‑ɔ 'ta 'lɛ 'na ‑plɔnyɔ ‑glɩ na, ɔ ‑glɩ 'na ‑zɔbhɛlɩgbanyɔ. 'Nyɩ ɔmɔa ‑ɔ klalɩ 'taan 'lɛ ɩya ‑a ka 'wluwlalɩ na, ka ɔ dlolu 'lɛ.
'Wugo ‑nyunyu 'la cɔlɔlɩɛ
(Mat 12.43-45)
24Gbazɩ 'wugo ‑nyunyu ‑ka nclɔɔ nɩkplaan 'wlʋ na, ka ʋ mʋ 'lɛ 'pʋpʋa nɩkplaan, ʋ bi 'lɛ 'nyɩ ʋ 'matɩ 'lɛ nyɔkwɛda. Ʋ 'lɩ 'tɩɩ 'lɛ na, ʋ cla ʋcɩ lebhe: N 'ka 'na sakʋdaa, n 'wlʋ 'lɛ na cɔlɔ. 25Ʋ ‑ka ci na, ʋ lɩɩ ɩ ‑nylupuo 'nyɩ ɩ ‑gɩglɔɔ. 26Na, ʋ mʋ 'nyɩ ʋ ma ‑daa 'wugwi ‑ngbɔɔsɔ ‑ɩ ‑nyu 'lɛ da 'nyɩ ‑ɩ ziu 'lɛ 'kʋ na, ɩ ci, ɩ ble sakʋdaa 'nyɩ ɩ kʋsa. 'Nyɩ nclɔɔ ‑naa, ɔla saa ɔ ‑kʋnɩ 'lɛ bhɩalɩdaa na, ɩ nyumo 'nyɩ ɩ zi ɔla tooto saa 'kʋ.»
'Nanɩkʋlɩɛ 'titi
27Daa Zozii nyɩtɛa 'lɛ ɩmɩ ‑naa na, 'ŋlɔ bhlo ya ‑alawleea sidiin ‑blɩɩzɔn 'kʋbho 'nyɩ ɔ ya 'cla lebhe: «Ɔ ‑kʋ 'nanɩ, ɔmɔa ‑ɔ bhɛ 'lɛ ‑naa nɩkpla 'nyɩ ‑ɔ ‑nyɩɔ 'lɛ na!» 28‑Ma ɔmɔ, ɔ yɔɔ neenŋonu lebhe: «'Maa 'cla lebhe: Ma ‑kʋ 'nanɩ, maa ‑ɔ po 'lɛ Laagɔ 'la wɔɔnyɩtʋa 'nyukwliin 'nyɩ ‑ɔ 'plɩlɩʋ 'lɛ 'kʋ na.»
Ma ya Zozii ghleda 'clalɩ
(Mat 12.38-42)
29Saa ‑alawleea 'ghlibholinɩa 'lɛ Zozii cɩ na, ɔ ya maa 'cla lebhe: «'Bhlɛsʋ ‑naa nɩkplaan 'la ncɛlɩa ma ‑glɩ ncaanyinyi. Ma 'clalɩ ghledaa! Maa cɩ 'ta ‑buun ghledaa bhlogbɩɩ 'ciinlɩ, n 'ta le Laagɔnekʋnyɩtɛnyɔ* Zonasɩ 'nɩa ‑tɛɛ na. 30Sa, saa Zonasɩ 'plɩ 'lɛ Ninivʋnya 'la ghleda na, 'sɛtɛɛ bhlogbɩɩ Nclɔɔa 'Cʋa* ‑ma, ɔ cɩ 'ka 'lɛ ‑pɔtɔnʋa ncɛlɩ ‑naa 'la ghleda 'plɩ. 31'Tɩtɩplaclɩɩa 'kʋ, gozɔnbhlɩa 'kʋ 'la ŋlʋbhɛlʋa cɩ 'ka ‑yaka 'la ncɛlɩa 'kʋklʋʋn 'nylugo ɩya ɔ 'ka maa wɔlɩ 'kʋgɩ, sa ɔ ya 'koonkobhlɩ ‑kʋ 'wlʋ nyɩ ɔ ya ci le ɔ 'ka Salomɔɔn 'la dɩgalɩwɔlɩa 'nyukwliin po na. 'Nyɩ nclɔɔ ‑kʋ ‑da, ɔ zi Salomɔɔn 'kʋ! 32'Tɩtɩplaclɩɩa 'kʋ, Ninivʋnyaa cɩ 'ka ‑yaka 'la ncɛlɩa 'kʋklʋʋn 'nylugo ɩya ma 'ka maa wɔlɩ 'kʋgɩ, sa daa Zonasɩ plici 'lɛ maa na, ma ya kwlacala. 'Nyɩ nclɔɔ ‑kʋ ‑da, ʋ zi Zonasɩ 'kʋ!»
Nclɔɔ 'la 'nyɛkɛa 'la ‑kanie
(Mat 6.22-23)
33Zozii ya ‑awlɛ maa 'cla lebhe: «Nclɔɔ ŋama 'ta ‑kanie ɩya ɔ 'kɛɛ zizie, ‑aana ɔ 'kɛɛ lʋʋ 'wlu ‑gblii, ‑ma ka ɔ gbeziee 'lɛ ɩya ncɛlɩa ‑ɔ ble 'lɛ na, ma 'ka salɩ. 34‑Naa 'nyɛkɛa 'la ‑kanie ‑glɩ 'lɛ 'ci. ‑Naa 'cia ‑ka ‑ja na, ‑naa 'nyɛkɛ bhuoa ‑kʋmʋ zezezeliin. ‑Ma gbazɩ ‑naa 'cia 'ta ‑ja na, ‑naa 'nyɛkɛa ‑ma ɛ ‑kʋ 'tutuun. 35Na, 'maa kope 'nanɩ ɩ ka ‑kʋ le ‑naa zezezelia ‑ɩ ‑kʋɔ 'lɛ nɩkplaan na, ɩ 'ta 'tutu ‑glɩ na. 36Na, gbazɩ ‑naa 'nyɛkɛ bhuoa ‑ka zezezeliin ‑kʋ na, 'nyɩ ɛla dabhlogbɩɩ 'ta 'tutuun ‑kʋ na, ɛla ‑lɩɩbhuoa cɩ 'ka zezezeliin kʋ le saa ‑kanie 'la 'jɩ klɔɔ 'lɛ na.»
Zozii ya Falizɩɛnnyaa ɩya ‑jlɩmaacanyaa 'ge ‑salɩ
(Mat 23.4-36)
37Daa Zozii bhɩalɩ 'lɛ nyɩtɛlɩɛ na, Falizɩɛnnyɔ* bhlo yɔɔ ɔ 'bhisleen la le ma 'ka li. 38Falizɩɛnnyɔa ya 'lɩ le 'fɩɔn ɩya Zozii 'ka 'lɛ li na, ɔ 'ta wlɩ wɔlʋ. Na, nikpoo yɔɔ slaa. 39Na, ‑Kwlenyɔa yɔɔ 'cla lebhe: «Anyɩ Falizɩɛnnyaa, ‑kɔbhɛa ɩya ‑dakɔa ɩla cɩa a wɔlʋ 'lɛ ‑ma ala nɩkplaan yee ‑dufle ɩya ‑abhɔlɛ. 40‑Badaaglunyanyɩ! Ɔmɔa ‑ɔ nʋ 'lɛ cɩa na, ɔ 'ta nɩkplaan ‑ma nʋmʋ bha? 41A va nɩkplaan 'la lɩɩa ŋaazɩnyaa ɩya ‑tɛtɛa 'fɩan 'ka ala gbazɔ ‑kplɔ.
42‑Munzue bho anyɩ, Falizɩɛnnyanyɩ, anyɩa ‑ɔ plʋ 'lɛ 'ŋɔnɔpapitia ɩya ɩmɩa ‑tɛtɛa ‑ɩ wlʋ 'lɛ 'kwlaan, 'la dlua 'nyɩ ‑ɔ te 'lɛ 'kʋnylugolulɩɛ ɩya Laagɔ 'la ‑wawʋa na. Ɩmɩ ‑naa ɩ ‑fataa 'lɛ le a nʋ ɩya a 'la bolua ‑anɩ ‑naa ‑ma 'kʋ.
43‑Munzue bho anyɩ, Falizɩɛnnyanyɩ, anyɩa ‑ɔ ‑wa 'lɛ 'kʋklʋʋn kpua bhibhiepalɩa* ‑zɔn ɩya 'cliikpʋa nɩkplaan 'la ‑ayopalɩɛa na.
44‑Munzue bho anyɩ, anyɩa ‑ɔla gbɩa ‑kʋ 'lɛ le lesia lʋʋ bhlogbɩɩ pala 'ta 'lɛ 'nyɩ ma cibhlili 'ta 'lɛ sɛɛ 'nyɩ ma namʋnʋ 'lɛ 'kʋ na.»
45‑Jlɩmacanyɔ bhlo ya Zozii 'cla lebhe: «Canyɔ ‑n nyɩtɛ 'lɛ ‑sa na, ‑anyɩ ‑n vlamʋ 'lɛ.» 46Ɔ yɔɔ neenŋonu lebhe: «Anyɩ ‑jlɩmaacanyaa ‑ma, ‑munzue ‑bho anyɩ, anyɩa ‑ɔ nyɩ 'lɛ ncɛlɩ 'kʋwɔlɔwɔlɔgbaakwɩ bhɛda 'nyɩ ‑ɔ 'ma 'ta 'lɛ ‑wlɩcie 'bhebhe ɩya a 'kɩɩ 'lɛ ko na.
47‑Munzue ‑bho anyɩ, anyɩa tocɩ ya 'lɛ Laagɔnekʋnyɩtɛnyaa 'bhla 'nyɩ anyɩ a sla 'lɛ mala lesi na. 48Ka a li 'lɛ ‑sa ‑danʋfʋɛ le a ‑wa a tocɩ 'la nʋnʋgbɩa. Sa maa, ma ya Laagɔnekʋnyɩtɛnya 'bhla 'nyɩ anyɩ, a sla 'lɛ mala lesia. 49Ɩmɩ ‑naa 'la gbʋ, dɛ Laagɔ 'la dɩgalɩa cla 'lɛ lebhe: N cɩ 'ka maa Laagɔnekʋnyɩtɛnya ɩya lobhulobhunya* fa. Ma cɩ 'ka ‑anʋa 'bhla ɩya ma 'ka ‑anʋa gbaylɩsa, 50ɩya ma 'ka ‑pɔtɔnʋa ncɛlɩ ‑naa, Laagɔnekʋnyɩtɛnyaa 'la ‑dolua ‑ʋ 'kɔsɔ 'lɛ sa ‑laagɔzɔan 'la bhɔdaa tooto na, ʋla wɔlɩa neencla, 51‑ɩ bhɔlʋ 'lɛ Abɛlɩ 'la ‑dolua 'kʋ ‑aan 'nyɩ ‑ɩ ŋeni Zakalii 'la ‑dolua 'kʋ na, ɔmɔ ‑naa ma 'bhlalɩ 'lɛ gʋgwlagbatɩa ɩya ‑kplɔkplɔdaa ‑gbaaglɩɩn na. ‑Ghɛɛ n solu anyɩ, ma cɩ 'ka anyɩ ʋla wɔlɩa neencla.
52‑Munzue ‑bho anyɩ, ‑jlɩmacanyanyɩ, anyɩa ‑ɔ 'ma 'lɛ Laagɔ 'la cibhlililie 'la 'safɛa na: Anyɩ 'titi a 'ta ble 'nyɩ maa ‑ɔ wabha 'lɛ le ‑ɔ ka ble na, a 'ta maa ne te.»
53Daa Zozii 'wlʋ 'lɛ ‑zɔn na, ‑jlɩmaacanya ɩya Falizɩɛnnyaa yɔɔ 'wlugblolu, ma claa 'mɔɔ wɔɔbhutukpa neen, 54'nyɩ ma paa 'mɔɔ 'gbuzu ‑zɔn le ma 'kɔɔ wɔlɩ neen 'matɩlɩ.
Àwon tá yàn lọ́wọ́lọ́wọ́ báyìí:
Luk 11: NTLD13
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Dida New Testament © Bible Society of Côte d'Ivoire, 2013.
