Zan 8

Ŋodimatɩŋlɔa

1Zozii ya 'plɩ ɔ ya ‑Olivʋsikikea 'wlu mʋ. 2Daa ‑zelia ze 'lɛ na, ‑zʋkpasa 'pɩɩ, ɔ ya Laagɔpaakadiea* ‑zɔn cɔlɔ 'nyɩ ncɛlɩa ‑ɔ ‑kʋa 'lɛ dɩpɩa na yɔɔ cɩ mɛ. Ɔ ya sakʋ 'nyɩ ɔ ya maa calɩɛ bhɔ. 3Na, ‑jlɩmaazienyaa* ɩya Falizɩɛnnyaa*, ya 'ŋlɔa ma bhlili 'lɛ ŋodimatɩgbiti 'kʋ 'kʋ na, ‑lamʋ 'nyɩ ma yɔɔ ‑jleea sidiin zʋ. 4Ma ya Zozii 'cla lebhe: «Canyɔ, ŋlɔ ‑naa ‑a ya ɔya ŋodi ‑gbiti 'kʋ 'kʋbhlili. 5Na, ‑jlɩmaa nɩkplaan Moyizi ya ‑anyɩ 'cla lebhe ‑a bhutili ‑sa 'la ŋwlɛ ‑naa cɔkʋʋn ‑aan ɩya ma 'ku. 'Nyɩ ‑mɔɔ, ‑n nabhe 'lɩsaa bha?» 6Ka ma nyɩtɛa 'lɛ sɛɛ ɩya ma 'kaa 'mɔɔ 'gbuzu ‑zɔn 'pa ɩya ma 'kɔɔ wɔlɩkʋgɩ. ‑Ma Zozii ya sakwlili, 'nyɩ ɔ ‑ka ɔla ‑wliciea, ɔ zie ‑dʋdʋa 'kʋ. 7Na, Saa ma ‑kʋa 'lɛ 'dɛ 'nyɩ ma clɔɔ 'lɛ neen na, Zozii ya 'kʋnylugolu 'nyɩ ɔ ya maa 'cla lebhe: «'Naa ɔmɔa ‑ɔ 'ta ka ‑azla 'lɛ ‑nyinyi nʋ na, 'pɔɔ ‑bɛka ‑cokwiea.» 8'Nyɩ ɔ ya ‑awlɛ sakwlili 'nyɩ ɔ ya ‑dʋdʋa 'kʋ zie. 9Ma 'nu 'lɛ wɔlɩ ‑naa na, ‑ɩ ‑bhɔlʋɔ 'lɛ ncaakpasɩa 'kʋ, maa 'fɩan ya 'kubho bhloonbhloon, ma ya 'plɩ ma ya mʋ 'nyɩ Zozii bhlogbɩɩ ya dɩpɩa ‑to, ɔya 'ŋlɔa. 10Zozii ya 'kʋnylugolu 'nyɩ ɔ yɔɔ neencla lebhe: «'Ŋlɔ, 'nda ma ‑kʋa 'lɛ bha? Nclɔɔ bhlogbɩɩ 'tɔɔ gbaylɩsa bha?» 11Ɔ nabhe: «‑A to, nclɔɔ ‑ylɛylɛ.» Na, Zozii yɔɔ 'cla lebhe: «‑Amʋ ‑ma, n cɩ 'tɔɔ gbaylɩsa: Mʋ, ‑ma ‑naa nʋanɩ nyinyi.»

Zozii ‑glɩ 'lɛ ‑laagɔzɔan 'la zezezeli

12Wɔlɩ ‑naa 'la leen, Zozii ya ‑awlɛ ncɛlɩa ‑ɔ ‑kʋa 'lɛ dɩpɩa na 'cla lebhe: «‑Amʋ ‑glɩ 'lɛ ‑laagɔzɔan 'la zezezeli. Ɔmɔa -ɔ gɩlɩɩn 'lɛ na, 'ɔ cɩ 'ta 'tutuun namʋnʋ. Ɔ cɩ 'ka jabhʋa 'la zezezelia 'lɩ.» 13Na, Falizɩɛnnyaa* yɔɔ 'cla lebhe: «‑Mɔɔ 'titi ‑n li ‑ncɩ 'la ‑danʋfʋɛ! ‑Naa ‑danʋfʋɛliliea 'ta ‑nʋawlɛ ‑glɩ!» 14Zozii ya maa 'cla lebhe: «Ɩ ‑glɩ ‑nʋawlɛ lebhe n li ncɩ 'la ‑danʋfʋɛ, ‑ma 'bhlɩmɔɔn ‑naa ‑danʋfʋɛliliea ‑glɩ ‑nʋawlɛ, sa n ‑ci daa n 'wlʋlʋ 'lɛ ɩya gbazɩa mʋ 'lɛ na, -ma anyɩ a 'ta daa n 'wlʋlʋ 'lɛ ‑aana gbazɩa n mʋ 'lɛ na ‑ci. 15Anyɩ, ncaasa a pla 'lɛ ala 'tɩtɩ, ‑ma ‑amʋ, n ‑pla 'ta nclɔɔ bhlogbɩɩ 'tɩtɩ. 16‑Ma ɩ ‑ka ‑kʋ le n 'ka 'tɩtɩ ‑pla na, 'naa 'tɩtɩplalɩɛ ‑glɩ ‑nʋawlɛ, sa n 'ta bhlo ‑glɩ na. Ɔmɔa ‑ɔ lobhuun 'lɛ na, ‑kʋmʋ 'dɛ. 17Anyɩ 'titi ala ‑jlɩmaa nɩkplaan, ɩ ‑zieo lebhe ncɛlɩ ‑mɔsɔ 'la ‑danʋfʋɛlilie ‑glɩ ‑nʋawlɛ. 18‑Amʋ 'titi, n li ncɩ 'la ‑danʋfʋɛ 'nyɩ Toa ‑ɔ lobhuun 'lɛ na, ɔmɔ ‑ma ɔ li 'lɛ 'na ‑danʋfʋɛ.» 19Na, ma yɔɔ neencla lebhe: «‑N to, 'nda ɔ ‑kʋa 'lɛ bha?» Zozii ya maa neenŋonu lebhe: «A 'taan ‑ci 'nyɩ a 'ta n To ‑ci. Ɩ ‑ka ‑kʋ lebhe a ‑kaa ‑amʋa ‑ci na, a cɩ 'kaa n To cibhlilimʋ.»

20Wɔlɩ ‑naa, daa 'bhaklɔa ‑kʋa 'lɛ na, dɩpɩa ɔ nyɩtɛlɩ 'lɛ, daa ɔ ‑kʋa 'lɛ Laagɔpaakadiea* ‑zɔn cada na. ‑Ma nclɔɔ bhlogbɩɩ 'tɔɔ 'kubhli, sa ɔla 'kubhliclɩɩa 'ta kaa ŋeni na.

Gbazɩa n mʋ 'lɛ na, a cɩ 'ta 'yɛpɩ mʋlɩɛ mino

21Zozii ya ‑awlɛ maa 'cla lebhe: «Ka n mʋ 'lɛ. A cɩ 'kaan 'matɩ, ‑ma a cɩ 'ka ala nyinyia nɩkplaan 'kulu. ‑Amʋ, gbazɩa ‑n mʋ 'lɛ na, anyɩ a cɩ 'ta 'yɛpɩ mʋlɩɛ mino.» 22Na, Zifʋnyaa* claa lebhe: «Ɔ cla 'lɛ lebhe: Gbazɩa n mʋ 'lɛ na, a cɩ 'ta 'yɛpɩ mʋlɩɛ mino na, ka ɔ ‑wa 'lɛ lebhe ɔ 'ka ɔcɩ 'bhla bha?» 23‑Ma, Zozii ya maa 'cla lebhe: «Anyɩ, ‑dʋdʋa 'kʋ 'la ncɛlɩ a ‑glɩ 'lɛ, ‑ma ‑amʋ, ‑laagɔɔn 'la nclɔɔ n ‑glɩ 'lɛ. ‑Laagɔzɔan 'la ncɛlɩ a ‑glɩ 'lɛ, ‑ma ‑amʋ, n 'ta ‑laagɔzɔan 'la nclɔɔ ‑glɩ. 24Ɩla gbʋ, dɛ n 'cla 'lɛ anyɩ lebhe a cɩ 'ka ala nyinyia nɩkplaan 'kulu. Ɩ ‑ka ‑kʋ lebhe a 'ta pɔɔtɛtɛ ‑ka lebhe n -glɩ ‑zaagbʋsa ɔmɔa n 'cla 'lɛ lebhe n ‑glɩ na, a cɩ 'ka ala nyinyia nɩkplaan 'kulu.» 25Na, ma yɔɔ neencla lebhe: «‑Mɔɔ, ncaasaa ‑n ‑glɩa 'lɛ bha?» Zozii ya maa neenŋonu lebhe: «Ɔmɔa n 'cla 'lɛ anyɩ bhɔdaa tooto, lebhe n ‑glɩ na. 26‑Ɩ ‑glɩ 'lɛ anyɩa cɩa wɔlɩa na, n ‑ka wɔɔbhutukpa n 'ka 'kubhli ɩya n 'ka anyɩ 'gesalɩ. ‑Ma ɔmɔa ‑ɔ lobhuun 'lɛ na, ‑glɩ ‑nʋawlɛ 'nyɩ ɩmɩa n 'nunuo 'lɛ neen na, ɩmɩ ‑tɛɛ n solu 'lɛ ‑laagɔzɔan.» 27Toa 'la wɔlɩ ɔ solua 'lɛ maa, ‑ma ma 'ta 'nu. 28Na, Zozii ya maa 'cla lebhe: «Daa ma cɩ 'ka 'lɛ Nclɔɔa 'Cʋa* 'kʋbho na, dɛ a cɩ 'ka 'lɛ cibhlili lebhe n ‑glɩ ɔmɔa n cla 'lɛ lebhe n ‑glɩ na. A cɩ 'ka cibhlili lebhe n nʋnʋ 'ta wɔlɩ bhlogbɩɩ 'na 'wluun. Ɩmɩa Toa caan 'lɛ na, ɩmɩ ‑tɛɛ n bhli 'lɛ 'kʋ. 29N 'ta bhlo ‑glɩ, ‑ma Toa ‑ɔ lobhuun 'lɛ na, ɔ ‑kʋʋn cɩ, sa n nʋ clɩɩa 'fɩan ɩmɩa ‑ɩ ‑kɔɔ 'lɛ 'tʋ na.» 30Na, daa ɔ ‑kʋa 'lɛ -sa nyɩtɛda, ‑bhutukpa yɔɔ mala pɔɔtɛtɛa 'kʋ zʋ.

‑Ncɩkalɩnya ɩya geye 'la wɔlɩ

31Na, Zozii ya Zifʋnyaa* ‑ɔ zʋa 'mɔɔ 'lɛ mala pɔɔtɛtɛa 'kʋ na 'cla lebhe: «A ‑ka ‑naa niwɔlia 'kʋ 'plɩlɩ na, a ‑glɩ ‑zaagbʋsa 'na gɩlɩnya*. 32A cɩ 'ka ‑nʋawlɛa cibhlili ɩya ‑nʋawlɛa 'ka anyɩ ‑ncɩkalɩnya ple.» 33Ma yɔɔ neenŋonu lebhe: «Ablaamʋ 'la valɩnɩkplaa 'la ncɛlɩ ‑a ‑glɩ 'lɛ 'nyɩ ‑a 'ta ka ‑azla nclɔɔ bhlogbɩɩ 'la geye 'plɩ. Na, ‑ɔ 'kaa 'lɛ 'ŋlɩ 'nyɩ n claa 'lɛ lebhe ‑a cɩ ‑ncɩkalɩnya 'plɩ bha?» 34Zozii ya maa neenŋonu lebhe: «N solu anyɩ, ɩ ‑glɩ ‑nʋawlɛ, lebhe ncaatʋtʋʋntʋa ‑ɔ nʋ 'lɛ nyinyi na, ɔ ‑glɩ nyinyi 'la geyu. 35'Nyɩ geyuu kʋ 'ta 'slea nɩkplaan 'lʋkʋlʋkʋ, ‑ma 'cʋa, ɔ kʋ 'slea nɩkplaan 'lʋkʋlʋkʋ. 36Na, ɩ ‑ka ‑kʋ lebhe 'Cʋa ɔmɔ ‑ɔ ‑ka anyɩ nɩkplaan 'kplɩ na, a cɩ ‑zaagbʋsa ‑ncɩkalɩnya 'plɩ. 37N ‑ci sɛɛ lebhe a ‑glɩ Ablaamʋ 'la valɩnɩkplaa 'la ncɛlɩ 'bhlɩɩ, ‑ma a 'ta 'lɛ ‑wa lebhe a 'ka 'na niwɔlɩa 'kʋ 'plɩlɩ na, dɛ a 'matɩ 'lɛ 'na 'bhlada. 38Amʋ ɩmɩa n 'lɩlɩ 'lɛ n To cɩ na, ɩmɩ n bhli 'lɛ 'kʋ, 'nyɩ anyɩ a nʋ 'lɛ ɩmɩa a 'nunu 'lɛ a to cɩ na.» 39Ma yɔɔ 'cla lebhe: «Ablaamʋ ‑glɩ 'lɛ ‑a to.» Zozii ya maa 'cla lebhe: «Ɩ ‑ka ‑kʋ lebhe a ‑ka Ablaamʋ 'la 'cuo ‑glɩ na, a nʋ Ablaamʋ 'la nʋnʋgbɩa. 40‑Ma a 'matɩnɩ ‑pɔtɔnʋ 'na 'bhlada, ‑amʋa ‑ɔ solu 'lɛ anyɩ ‑nʋawlɛa n 'nunu 'lɛ Laagɔ cɩ na. Ɩmɩ ‑naa, Ablaamʋ 'tɩɩ nʋ. 41Ma anyɩ a to 'la nʋnʋgbɩa a ‑ka 'lɛ. Ma yɔɔ 'cla lebhe ‑a 'ta ‑bozocuo ‑glɩ, to bhlogbɩɩ ‑a ‑ka 'lɛ, ɔmɔ ‑glɩ 'lɛ Laagɔ.» 42Zozii ya maa 'cla lebhe: «Laagɔ ‑kaa a To ‑glɩa na, a cɩ 'kaa ‑amʋa wabha, sa Laagɔ nɩkplaan n 'wlʋlʋ 'lɛ 'nyɩ n ‑ya 'lɛ ‑ci. N 'ta 'na 'wluun cili, ‑ma ɔmɔ ‑ɔ lobhuun 'lɛ. 43'Nyɩ 'lɩsaa 'la gbʋ a 'nu 'ta 'lɛ 'na wɔlɩa n nyɩtɛ 'lɛ na bha? ‑Ofi lebhe a mino 'ta ɩya a 'ka 'na wɔɔnyɩtʋa 'nyukwliinpo. 44Gɔzɛ ‑glɩ 'lɛ a to 'nyɩ a to 'la pɔɔsa a ‑wa 'lɛ lebhe a 'ka nʋ. Ɔmɔ ‑naa, bhɔdaa tooto, ɔ ya ncaabhlalɩɛ wabha. Ɔya ‑nʋawlɛ 'ta ka ‑azla ‑plɔ, sa ‑nʋawlɛ 'tɔɔ nɩkplaan ‑kʋ na. Ɔ ‑ka yodi zʋda ‑kʋ na, ɔla pɔlɛ 'ciin 'la wɔlɩ ɔ nyɩtɛ 'lɛ, sa ɔ ‑glɩ yodizʋnyɔ ɩya yodi to na. 45‑Ma ‑amʋ, n nyɩtɛ 'lɛ ‑nʋawlɛ na, dɛ a 'ta 'lɛ 'na pɔɔtɛtɛ ‑ka. 46Anyɩ sidiin, ncaasaa ‑ɔ -cɩ kaa 'lɛ mino ɩya ‑ɔ 'kaa 'lɛ pala lebhe n ya nyinyi nʋ bha? 'Nyɩ ɩ ‑ka ‑kʋ lebhe ‑nʋawlɛ n nyɩtɛ 'lɛ na, 'lɩsaa 'la gbʋ a 'ta 'lɛ 'na pɔɔtɛtɛ ‑ka bha? 47Ɔmɔa ‑ɔ ‑glɩ 'lɛ Laagɔ 'nɔ na, ka ɔ po 'lɛ Laagɔ 'la wɔɔnyɩtʋa 'nyukwliin. ‑Ma a 'ta 'lɛ Laagɔ 'nʋa ‑glɩ na, dɛ a 'ta 'lɛ ‑wa lebhe a 'kaan 'nyukwiinpo.»

Zozii ɩya Ablaamʋ

48Daa Zozii nyɩtɛ 'lɛ ‑sa na, Zifʋnyaa* yɔɔ 'cla lebhe: «-A cla 'lɛ lebhe ‑n ‑glɩ Samaliinyɔ ɩya 'wugonyunyunyɔ na, ‑n 'lɩ 'ta lebhe ‑a ‑ka 'ge bha?» 49Zozii ya maa neeŋonu lebhe: «‑Wɔɔ, n 'ta 'wugonyunyunyɔ ‑glɩ. ‑Ma n To n 'nyɩ 'lɛ 'klʋ, 'nyɩ anyɩ, a 'ta 'lɛ ‑wa lebhe a 'kaan 'klʋ 'nyɩ. 50N 'matɩ 'ta ncɩ 'la 'klʋagba. ‑Ma bhlo ‑kʋ, ɔmɔ ‑ɔ 'matɩ 'lɛ 'na 'klʋagba 'nyɩ ɔ pla 'lɛ 'na 'tɩtɩa. 51N solu anyɩ, ɩ ‑glɩ ‑nʋawlɛ: Nclɔɔ ‑ka 'na niwɔlɩa 'kʋ 'plɩlɩ na, 'ɔ cɩ 'ta 'ku 'pʋpʋkʋ.» 52Na, Zifʋnyaa yɔɔ 'cla lebhe: «A ‑cinɩ lebhe ‑n ‑ka 'wugo ‑nyunyu! Ablaamʋ ya 'ku 'nyɩ Laagɔnekʋnyɩtɛnyaa* ‑ma ya 'ku. 'Nyɩ ‑mɔɔ, ‑n cla lebhe: Nclɔɔ ‑ka 'na niwɔlɩa 'kʋ 'plɩlɩ na, ɔ cɩ 'ta 'pʋpʋkʋ 'ku. 53‑A to Ablaamʋ ‑ɔ 'ku 'lɛ na, ka ‑n zio 'lɛ 'kʋ bha? Laagɔnekʋnyɩtɛnyaa ‑masɛɛ ya 'ku! Na, ncaasaa ‑n la 'lɛ ‑ncɩ bha?» 54Zozii ya maa neeŋonu lebhe: «Gbazɩ ‑amʋ 'titi n ‑kaa ncɩ 'klʋgba na, 'na 'klʋagba 'ta lʋʋ ‑ylɛylɛ ‑glɩ. N Too ‑ɔ gbaan 'lɛ 'klʋ, ɔmɔa a cla 'lɛ lebhe ɔ ‑glɩ ala Laagɔ na. 55A 'tɔɔ ‑ci, ‑ma ‑amʋ, n ‑cio. 'Nyɩ gbazɩ n ‑ka 'cla lebhe n 'tɔɔ ‑ci na, 'dɛndlana n ‑glɩ yodizʋnyɔ, anyɩ 'bhisa. ‑Ma n ‑cio 'nyɩ n 'plɩlɩ ɔla niwɔlɩa 'kʋ. 56A to Ablaamʋ ya wabha lebhe ɔ 'kaa 'na ciclɩɩa 'lɩ. Ɔ yɩɩ 'lɩ 'nyɩ ɔ ya ‑pɔpʋɛ nʋ.» 57Na, Zifʋnyaa yɔɔ neencla lebhe: «‑N 'ta ka liowli ‑gwlɩɩ ‑mɔsɔ ɩya 'kʋgba 'lɩ 'nyɩ n cla lebhe n ya Ablaamʋ 'lɩ bha?» 58Zozii ya maa neenŋonu lebhe: «N solu anyɩ, ɩ ‑glɩ ‑nʋawlɛ, lebhe n ‑kʋ 'fɩɔn 'nyɩ Ablaamʋ ya 'lɛ ‑valɩɔ.» 59Na, ma ya cɔkʋ 'kʋbhli le ma kaa 'mɔɔ mɩ nɩkplaan 'bhla. ‑Ma Zozii ya ‑alawleea sidiin mlɔnʋ 'nyɩ ɔ ya Laagɔpaaakadiea ‑zɔnwlʋ.

Àwon tá yàn lọ́wọ́lọ́wọ́ báyìí:

Zan 8: NTLD13

Ìsàmì-sí

Pín

Daako