Zan 7

Zozii bholiecɩa 'ta ɔla pɔɔtɛtɛ ‑ka

1Ɩmɩ ‑naa 'la leen, Zozii 'plɩlɩa Galileebhlɩa 'la 'dia 'kʋ. Ɔ 'taa ‑wa lebhe ɔ 'kaa Zudeebhlɩa 'la 'dia 'kʋ 'plɩlɩ, sa Zifʋnyaa* tocɩa 'matɩa ɔla 'bhlada na. 2Zifʋnyaa 'la 'fɛtlɩa ma la 'lɛ ‑paapli 'la 'fɛtlɩa na, yaa cɩ mɛ. 3Na, Zozii bholiecɩa yɔɔ 'cla lebhe: «'Plɩ ɩya ‑n mʋ Zudeebhlɩa 'kʋ ɩya ‑naa gɩlɩnyaa* ‑ma, ma 'ka lobholia ‑n nʋ 'lɛ na 'lɩ. 4‑Masa nclɔɔa ‑ɔ ‑wa 'lɛ lebhe ma cibhlilio na, ɔ zizieli 'ta ncɛlɩ ɔla nʋnʋgbɩ. Na, lobholi ‑naa n nʋ 'lɛ na, 'maa gba ɩya ncɛlɩa 'fɩan 'kɔɔ cibhlili.» 5Ɔ bholiecɩa 'titi ‑ma, 'taa ɔla pɔɔtɛtɛ ‑ka. 6‑Ma Zozii ya maa 'cla lebhe: «'Na 'ŋwacɩa 'ta ka ka ŋeni, ‑ma anyɩ clɩɩa 'fɩan ‑glɩ ala 'ŋwacɩ. 7‑Laagɔzɔan cɩ 'ta anyɩ zɔbhɛlɩ, ‑ma ‑amʋ, ɩ ‑zɔɔn, ‑ofi lebhe n li ‑danʋfʋɛ lebhe ɩla nʋnʋgbɩa ‑nyu. 8Na anyɩ, a mʋ 'fɛtlɩa 'kʋ. ‑Ma ‑amʋ, n cɩ 'tɩɩ 'kʋ mʋ, sa 'na 'ŋwacɩa 'ta ka ka ŋeni na.» 9Na, daa ɔ nyɩtɛ 'lɛ ‑sa na, ɔ ya Galileebhlɩa 'kʋ ‑to.

Zozii ya paapliifɛtlɩa 'kʋ mʋ

10‑Ma daa ɔ bholiecɩa 'plɩ 'lɛ 'nyɩ ma mʋ 'lɛ 'fɛtlɩa 'kʋ na, Zozii ‑ma ya 'yɛpɩ 'la ‑gugwie 'ma, ɔ 'ta gba ɩya ma 'kɔɔ cibhlili, ‑ma ɔ ya ziziekoteen mʋnʋ. 11Na, 'fɛtlɩa 'kʋ, Zifʋnyaa* tocɩa 'matɩa 'mɔɔ 'nyɩ ma claa neen lebhe: «'Nda ɔ ‑kʋa 'lɛ bha?» 12‑Alawleea sidiin ma 'ŋuŋuoa ‑gbɔɔn ɔla gbʋ. ‑Anʋa bhlo claa lebhe: «Ɔ ‑glɩ ncaananɔ» 'nyɩ ‑da -naanʋaa claa 'lɛ lebhe: «‑Wɔɔ, ka ɔ 'nyiglili 'lɛ ncɛlɩa.» 13'Bhlɩmɔɔn, nclɔɔ bhlogbɩɩ nyɩtɛ 'taa ɔla wɔlɩ ‑owe ‑owe, sa Zifʋnyaa tocɩa 'la ŋanɔ bhlaa maa na.

14Daa ma ‑kʋanɩa 'lɛ 'fɛtlɩa sidiin na, Zozii ya Laagɔpaakadiea* ‑zɔn ble 'nyɩ ɔ ya calɩɛ bhɔ. 15Ɩ sla Zifʋnyaa nikpoo 'nyɩ ma claa lebhe: «'Nsasa ɔ nʋnʋnʋa 'lɛ 'nyɩ ɔ ‑cia 'lɛ ‑sa wɔlɩ bha? Ɔmɔa ‑ɔ 'ta 'lɛ ‑afluwaa ca na!» 16Zozii ya maa neenŋonu lebhe: «'Na cacawɔlɩa 'wlʋlʋ 'taan wlɩɩn, ‑ma ɩ 'wlʋlʋ ɔmɔa ‑ɔ lobhuun 'lɛ na wlɩɩn. 17Nclɔɔa ‑ɔ ‑wa 'lɛ lebhe ‑ɔ ka Laagɔ 'la pɔɔsa nʋ na, ɔ cɩ cibhlili ɩ ‑ka ‑kʋ lebhe 'na cacawɔlɩɛa 'wlʋlʋ Laagɔ wlɩɩn ‑aana ɩ ‑ka ‑kʋ lebhe ‑amʋ 'titi 'na 'wluun 'la wɔlɩ n nyɩtɛ 'lɛ na. 18Ɔmɔa ‑ɔ nyɩtɛ ɔla 'wluun 'la wɔlɩ na, ɔmɔ 'titi ɔla 'klʋagba ɔ 'matɩ 'lɛ. ‑Ma ɔmɔa ‑ɔ 'matɩ 'lɛ ɔmɔa ‑ɔ lobhuo 'lɛ na 'la 'klʋagba na, ɔ ‑glɩ ‑nʋawlɛɛnyɩtɛnyɔ 'nyɩ yodi ‑ylɛylɛ 'tɔɔ nɩkplaan ‑kʋ. 19‑N 'ta Moyizi 'ta 'lɛ anyɩ ‑jlɩmaa 'nyɩ bha? ‑Ma anyɩa nɩkplaan bhlogbɩɩ 'plɩlɩ 'ta ‑jlɩmaa 'kʋ! Na, 'lɩsaa 'la gbʋ a 'matɩa 'lɛ lebhe a 'kaan 'bhla bha?» 20‑Alawleea yɔɔ neenŋonu lebhe: «'Wugo ‑nyunyu ‑kʋɔ nɩkplaan! Ncaasaa ‑ɔ 'matɩa 'lɛ le ‑ɔ kɔɔ 'bhla bha?»

21Zozii ya ‑awlɛ wɔɔnyɩtʋ 'ma 'nyɩ ɔ ya maa 'cla lebhe: «Wɔlɩ bhlogbɩɩ ‑tɛɛ n ya 'lɛ nʋ 'nyɩ ɩ ya 'lɛ anyɩa 'fɩan nikpoo ‑sla. 22Moyizi ya anyɩ ‑slikʋdɩjlɩmaa 'nyɩ, 'nyɩ ‑n 'ta ɔmɔ ‑ɔ 'ta ‑awlɛa 'lɛ anyɩ 'nyɩ, ‑ma tokadɔcɩa, 'nyɩ a dɩ ncɛlɩ 'kʋ nyɔkwɛclɩɩa* 'kʋ. 23Na, gbazɩ ma ‑ka nclɔɔ nyɔkwɛclɩɩ 'kʋ 'dɩ, 'nyɩ ɩ 'ta Moyizi 'la ‑jlɩmaa 'la tʋlɩɛ ‑glɩ na, 'lɩsaa 'la gbʋ pɔlɛ 'kʋ siea 'lɛ anyɩ, ‑ofi lebhe n ya nclɔɔ 'la ‑lɩɩbhuoa nyɔkwɛclɩɩ 'kʋ jabha bha? 24Na, a 'la ‑plaa ‑kplakplatɩtɩ, ‑ma a ‑pla 'tɩtɩa ‑ɩ 'nylugolu 'lɛ 'kʋ na.»

Zozii ‑glɩ 'lɛ Laagɔ 'la ‑Sasanyɔa bha?

25Zolizalɛmʋnya ‑anʋa claa lebhe: «‑N 'ta nclɔɔ ‑naa maa 'matɩ 'taa 'lɛ le ma 'ka 'bhla bha? 26A 'lɩkɔɔ ɔmɔ ‑ɔ nyɩtɛlɩ 'lɛ ncɛlɩa 'fɩan 'ci 'kʋ 'nyɩ maa ‑salɩ 'ta 'lɛ ne! Na, ka ala ‑kwletocɩa cibhlili 'lɛ sɛɛ lebhe ɔmɔ ‑ɔ ‑glɩ 'lɛ ‑zaagbʋsa Laagɔ 'la ‑Sasanyɔa* bha? 27'Bhlɩmɔɔn, ‑anɔ ‑naa, ‑a ‑ci daa ɔ 'wlʋlʋ 'lɛ na, ‑ma Laagɔ 'la ‑Sasanyɔa, daa ɔ cɩ 'ka 'lɛ ci na, nclɔɔ bhlogbɩɩ cɩ 'ta daa ɔ 'wlʋlʋ 'lɛ na cibhlili.» 28Na, daa Zozii ‑kʋa 'lɛ Laagɔpaakadiea* ‑zɔn cada na, ɔ ya 'cla lebhe: «A ‑ciin 'nyɩ a ‑ci daa n 'wlʋlʋ 'lɛ na! 'Bhlɩmɔɔn, ‑n 'ta 'na 'wluun n 'ta 'lɛ cili. Ɔmɔa ‑ɔ lobhuun 'lɛ na, ɔ ‑glɩ ‑nʋawlɛɛnyɔ 'nyɩ ɔmɔ, a 'tɔɔ ‑ci. 29‑Ma ‑amʋ, n ‑cio, sa ɔmɔ cɩ n wlʋ 'lɛ 'nyɩ ɔmɔ ‑ɔ lobhuun 'lɛ.»

30Na, ma 'matɩa le ma 'kaa 'mɔɔ 'kʋbhli, ‑ma nclɔɔ bhlogbɩɩ 'tɔɔ cɩkla, sa ɔla 'ŋwacɩa 'ta ka kaa ŋeni na. 31‑Alawleea sidiin, ncaabhutukpa yɔɔ mala pɔɔtɛtɛa 'kʋ zʋ 'nyɩ ma claa lebhe: «Daa Laagɔ 'la ‑Sasanyɔa cɩ 'ka 'lɛ ci na, ɔ cɩ ‑awlɛ 'ciinzizielɩlobholi nʋ 'nyɩ ɔ cɩ ɩmɩa ‑anɔ ‑naa ya 'lɛ nʋ na, 'kʋ zi bha?»

Ma ya ncɛlɩ Zozii 'kʋbhlikan lobhu

32Zozii 'la wɔlɩa ma 'ŋuŋuoa 'lɛ ‑alawleea nɩkplaan na, ya Falizɩɛnnyaa* 'nyukwliin bhlili. 'Nyɩ ‑teyiyinyaa tocɩa ɩya Falizɩɛnnyaa ya mala ‑bɛnyaa lobhu le maa bhlio 'kʋ. 33Zozii ya 'cla lebhe: «N ‑kʋ ka ka anyɩ sidiin clɩɩ ‑zlʋsaasa ɩya n 'ka ɔmɔ ‑ɔ lobhuun 'lɛ na 'bhlɩ cɔlɔ. 34A cɩ 'kaan 'matɩ ɩya a 'la kaan 'lɩ, sa gbazɩa n cɩ 'ka 'lɛ kʋ na, a cɩ 'ta 'yɛpɩ mʋlɩɛ mino.» 35Na, Zifʋnyaa* 'claclalɩa neen lebhe: «'Nda ɔ cɩ 'kaa 'lɛ mʋ ɩya ‑anyɩ ‑a 'la kanɩɔ 'lɛ 'lɩ bha? Maa ‑ɔ ‑dloluo 'lɛ Glɛkɩnyaa sidiin na, maa ŋenikan ɔ cɩ 'ka 'lɛ mʋ bha? Glɛkɩnyaa ɔ cɩ 'kanɩ 'lɛ ca bha? 36Ɔ cla 'lɛ lebhe: A cɩ 'kaan 'matɩ ɩya a 'la kaan 'lɩ, ɩya n gbazɩa n cɩ 'ka 'lɛ kʋ na, anyɩ, a cɩ 'ta 'yɛpɩ mʋlɩɛ mino na, wɔɔnyɩtʋ ‑naa, 'nsasa ʋ sasalɩa 'lɛ ‑zɔn bha?»

Zozii nyɩtɛ ‑kplɔkplɔ ‑Wugoa 'la wɔlɩ

37'Fɛtlɩa 'la bhɩalɩclɩɩa 'kʋ, -ɩ ‑glɩ 'lɛ clɩɩ 'kadie na, Zozii 'nylugoa, ɔ plicia 'nyɩ ɔ claa lebhe: «Nclɔɔ 'nyutʋ ‑ka 'bhla na, 'naa ɔ ciin 'bhlɩ. 'Naa ɔ 'mla, 38ɔmɔa ‑ɔ ‑ka 'lɛ 'na pɔɔtɛtɛ na, ɩya saa Zieziewɔlɩa* bhli 'lɛ 'kʋ na, 'nyɩdɔlɩa ɩla 'nyua nyɩ 'lɛ jabhʋa na, 'kɔɔ nɩkplaan 'wlʋlʋ ɩya ɩ ‑ka kɔlɔ.» 39'Wugoa maa ‑ɔ zʋɔ 'lɛ mala pɔɔtɛtɛa 'kʋ na, cɩ 'kaa 'lɛ 'lɩ na, ʋla wɔlɩ ɔ nyɩtɛa 'lɛ ‑sa. ‑Masa Laagɔ 'ta ka kaa 'wugoa 'nyɩ ‑ofi lebhe Zozii 'ta ka kaa Laagɔ 'la 'klʋagba nɩkplaan ble na.

‑Alawleea ya nɩkplaan do

40‑Alawleea sidiin, ncɛlɩa ‑ɔ 'nua 'lɛ wɔlɩ ‑naa na, ‑anʋa claa lebhe: «Ɔmɔ ‑ɔ ‑glɩ 'lɛ ‑zaagbʋsa Laagɔnekʋnyɩtɛnyɔa* ‑a ‑bɛa 'lɛ na.» 41‑Anʋa bhlo claa lebhe: «Ɔmɔ ‑ɔ ‑glɩ 'lɛ Laagɔ 'la ‑Sasanyɔa*.» ‑Ma ‑da -naanʋa bhlo claa 'lɛ lebhe: «Laagɔ 'la ‑Sasanyɔa cɩ Galileebhlɩa 'kʋ 'wlʋlʋ bha? 42Ka Zieziewɔlɩa* 'cla 'ta 'lɛ lebhe Daviti 'la valɩnɩkpla 'la nclɔɔ ɔ cɩ 'ka 'lɛ 'plɩ, ɩya ɔ 'ka Bɛtɩlɛmʋ, Daviti 'la valɩdua 'kʋ 'wlʋlʋ bha?» 43'Nyɩ Ɔmɔ 'wluku, ‑alawleea yaan do. 44Maa nɩkplaan ‑anʋa yaa wabha lebhe maa 'kaa 'mɔɔ 'kʋbhli, ‑ma nclɔɔ bhlogbɩɩ 'tɔɔ cɩkla.

45‑Teyiyinyaa tocɩa ɩya Falizɩɛnnyaa* 'la ‑bɛnyaa ya cɔlɔ 'nyɩ maa ‑naa ya ma neencla lebhe: «'Lɩsaa 'la gbʋ a 'tɔɔ 'lɛ ‑lamʋ bha?» 46Ma ya maa neenŋonu lebhe: «'Pʋpʋ 'kʋ, nclɔɔ 'ta ka ‑azla ɔmɔ 'bhisa 'kʋ nyɩtɛ.» 47Falizɩɛnnyaa ya maa neencla lebhe: «Na, anyɩ ‑ma, ka ɔ 'nyiglilimʋ 'lɛ anyɩ bha? 48A ya 'nu lebhe Zifʋnyaa* tocɩa ‑aana Falizɩɛnnyaa nɩkplaan bhlo yɔɔ ɔla pɔɔtɛtɛ 'kʋ zʋ bha? 49‑Ma ncaakpa ‑naa ‑ɔ 'ta 'lɛ ‑ala ‑jlɩmaa ‑ci na, maa ‑tɛtɛ, ‑munzuenya ‑naa.» 50‑Ma Nikodɛmʋ, Falizɩɛnnyaa nɩkplaan bhlo, ɔ mʋwaa 'lɛ Zozii 'ciinlɩkan na, ya maa 'cla lebhe: 51«‑Ala ‑jlɩmaa nyɩ ‑anyɩ ‑jioli le ‑a 'bhla nclɔɔa ‑a 'ta ka 'lɛ neen 'nu ɩya ‑a ka wɔlɩa ɔ ya 'lɛ nʋ na cibhlili na bha?» 52Ma yɔɔ neenŋonu lebhe: «‑Mɔɔ ‑ma, Galileenyɔ ‑n ‑glɩnɩ 'lɛ bha? Kope ka Zieziewɔlɩa nɩkplaan 'nanɩ ɩya ‑n ‑ka 'lɩ lebhe Laagɔnekʋnyɩtɛnyɔ 'ta ka ‑azla Galileebhlɩa 'kʋ 'wlʋlʋ.» 53Ma ya 'kʋbho 'nyɩ nclɔɔ nclɔɔ ya ɔ 'bhisleen mʋ.

Àwon tá yàn lọ́wọ́lọ́wọ́ báyìí:

Zan 7: NTLD13

Ìsàmì-sí

Pín

Daako