Huan 9
9
Hesus ta kura un hòmber ku a nase siegu
1Ora Hesus a sigui su kaminda, El a mira un hòmber ku a nase siegu. 2Su disipelnan a puntr'É: ‘Rabi, piká di ken a kousa ku e hòmber ei a nase siegu; di dje mes òf di su mayornan?’ 3Hesus a kontestá: ‘No ta su mes piká ni piká di su mayornan a pon'é nase siegu, ma e ta siegu pa hende por mira poder di Dios traha den dje. 4Miéntras ta di dia ainda, nos mester sigui hasi trabou di Esun ku a manda Mi. Nochi ta bai sera i e ora ei niun hende no por traha. 5Miéntras Mi ta den mundu, Mi ta lus pa mundu.’#Mateo 5:14; Huan 8:12
6Despues ku Hesus a kaba di papia, El a skupi abou den tera, traha poko lodo i hunt'é riba wowo di e siegu. 7El a bisa e hòmber: ‘Bai laba bo kara den pisina di Siloam.’ E nòmber ‘Siloam’ ta nifiká ‘Mandá’. E siegu a bai laba su kara i ora el a sali fo'i djei e por a mira. 8P'esei tantu su bisiñanan komo e hendenan ku a yega di mir'é ántes ta pidi limosna, a bisa: ‘Ma n' ta e hòmber ku tabata sinta pidi limosna esei ta?’ 9Algun hende a rospondé: ‘Sí, t'e mes!’ Ma otronan a komentá: ‘Nò, ta un hòmber ku pars'é!’ Ma e hòmber mes a bisa: ‘T'ami mes!’ 10Nan a puntr'é: ‘Kon bini bo por mira?’ 11El a kontestá nan: ‘E hòmber ku yama Hesus, a traha lodo, hunt'é riba mi wowo i bisa mi: “Bai Siloam, bai laba bo kara”. Mi a bai i miéntras mi tabata laba mi kara mi a haña mi bista.’ 12E ora ei nan a informá serka dje: ‘Unda e hòmber ei ta?’ I el a rospondé nan ku e no tabata sa.
Fariseonan ta investigá kura di e hòmber ku a nase siegu
13Nan a hiba e hòmber ku ántes tabata siegu, serka e fariseonan. 14Tabata riba un sabat ku Hesus a traha lodo duna e hòmber su bista. 15E fariseonan tambe a puntra e hòmber kon bini e por mira. El a kontestá: ‘El a pone lodo riba mi wowo i miéntras mi tabata laba mi kara, mi a haña mi bista.’ 16Algun fariseo a bisa: ‘Ta imposibel ku e hòmber ku a hasi e kos ei por ta bini di Dios, pasobra e no ta tene su mes na sabat.’ Ma otro a bisa: ‘Kon un pekadó por hasi tipo di señal milagroso asina?’ Nan tabata den desakuerdo ku otro. 17Nan a bolbe papia ku e hòmber ku tabata siegu i bis'é: ‘Anto abo ei, kiko bo por bisa di esun ku a duna bo bista?’ El a kontestá: ‘E ta un profeta!’ 18Ma e outoridatnan hudiu no ker a kere ku e tabata siegu i ku el a kura, te ora nan a yama su mayornan pa interogá nan. 19Nan a puntra e mayornan: ‘Ta boso yu esaki? Boso ta bisa ku el a nase siegu; ta kon e por mira awor?’ 20Su mayornan a kontestá: ‘Nos sa ku ta nos yu e ta i ku el a nase siegu, 21ma nos no sa sí ta kon bini e ta mira awor, ni tampoko ta ken a dun'é su bista. Puntra e mes; e ta mayor di edat i por papia pa su mes!’ 22Nan a bisa asina, pasobra nan tabatin miedu di e outoridatnan hudiu, ku ya tabata di akuerdo ku otro pa ekspulsá tur hende, ku afirmá ku Hesus ta e Mesias, for di snoa. 23P'esei mes nan a bisa: ‘Puntra e mes, e ta mayor di edat!’
24P'esei pa di dos bia nan a yama e hòmber ku a nase siegu i bis'é: ‘Mihó bo duna Dios honor i papia bèrdat! Nos sa ku e hòmber ku bo a papia di dje ta un pekadó.’ 25El a kontestá nan: ‘Mi no sa si E ta pekadó òf nò; un kos so mi sa: mi tabata siegu i awor mi ta mira!’ 26Nan a puntr'é: ‘Kiko el a hasi ku bo? Kon el a hasi duna bo bo bista?’ 27E ora ei e hòmber a bisa: ‘Mi a konta boso esei kaba i boso no ke tende. Pakiko boso ke tende e mesun kos atrobe? Basta n' ta su disipel boso tambe ke bira!’
28Nan a zundr'é i bisa: ‘T'abo lo ta su disipel; nos aki ta disipel di Moises! 29Nos sa ku Dios a papia ku Moises; e hòmber akí sí nos no sa di unda el a bini.’ 30E hòmber ku tabata siegu a rospondé nan: ‘Esaki sí ta grandi! Boso no sa di unda El a bini, anto El a duna mi mi bista! 31Tur hende sa ku Dios no ta skucha orashon di un pekadó, ma E ta skucha hende ku ta tem'É i ta kumpli ku su boluntat.#Proverbionan 15:29 32Nunka ántes den historia no a yega di tende ku un hende a duna un otro ku a nase siegu su bista. 33Si e hòmber akí no a bini di Dios, lo E no por a hasi nada.’ 34Nan a kontest'é: ‘Bo sieguedat ta mustra ku bo a nase kurtí den piká, anto awor abo ke bin duna nos lès?’ I nan a kore kuné.
Spiritualmente siegu
35Ora Hesus a tende ku nan a kore ku e hòmber ku tabata siegu, El a busk'é i bis'é: ‘Bo ta kere den Yu di hende?’ 36E hòmber a bis'é: ‘Shon, bisa mi ta ken, ya mi tambe por kere den djE.’ 37Hesus a bis'é: ‘Bo a mir'É kaba; ta esun ku ta papiando ku bo.’ 38E ora ei e hòmber a bisa: ‘Mi ta kere, Señor.’ I el a benta su kurpa abou na suela dilanti di Hesus i a ador'É. 39Hesus a bis'é: ‘Mi a bini den e mundu akí pa husga: pa esnan ku no ta mira, haña nan bista i esnan ku ta mira bira siegu.’ 40Algun fariseo ku tabat'ei huntu kunÉ, a puntra: ‘Bo no por ke men ku nos tambe ta siegu, no?’ 41Hesus a bisa nan: ‘Si boso tabata siegu, boso lo no tabata kulpabel, ma pasobra boso ta insistí ku boso ta mira, boso ta keda kulpabel.’
Àwon tá yàn lọ́wọ́lọ́wọ́ báyìí:
Huan 9: PBDC13
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Papiamentu Bible with DC © Bible Society in Netherlands Antilles and Aruba, 2012, 2013
