Luk 20
20
Kuri kwafumuna lutumu lwa Yesu?
(Mat 21.23-27; Mal 11.27-33)
1Kiluumbu kimosi, Yesu bu kaba yikisaa baatu mu Nzo-Nzaambi, na kuyaabisa Musamu Wamubwete, bangaanga-nzaambi, na batini ba mangisi na bakulu ba babakala bayisa. 2Bo bamufuula, baleele kuri nde ti: «Leele beetu, mu nkya lutumu ye wuri mu kweyirikila mamo? Bunu pe, na wakuha lutumu lumalu?» 3Yesu wabvutula, waleele kuri bo ti: «Kifuuri kimosi me nyiluha. Mpeenee mvutu: 4Mbotokulu ya Yowane, yaba ya ku yulu hoti ya baatu?» 5Bo balelesene bo na bo ti: «Mbuti tuleeriri ti ya ku yulu", lo nde bee leeriri ti: "Hango buri lwaheriri kusiila kanyi mu nde?" 6Mbuti tuleeriri ti "ya baatu", baatu bobanso sa batudzusila mu matari; bukuri bo bamwaabakula ti Yowane mubikiri kari.» 7Bo babvutula ti: «Beetu tuyaari ko kari ya kuri.» 8Na Yesu waleele kuri bo ti: «Me se nyiluleele ko, mu nkya lutumu me nyiri mu kweyirikila mamama.»
Nkuma ya bisari bya bviinya byabibi
(Mat 21.33-46; Mal 12.1-12)
9Yesu wabaandika kuleele kuri baatu nkuma yimayi: «Muutu [mosi] wakuna nseke bviinya, na wayukusina na bakamuni ba bviinya, na wayende ku budyeengi mu mantaangu mamala. 10Ntaangu bu yayelemene, nde waheeke nkutu mosi kuri bakamuni ba bviinya, mpisi baha kikuuku kya bviinya kya nde. Bakamuni ba bviinya bamulata nkuba, na bamubvutula myooko myamukangala. 11Nde wabweese kuheeke nkutu yikimi; ngo bo balata wunde se nkuba, bamusaana na bamubvutula myooko myamukangala. 12Nde watsiitsa kubweese kuheeke wabatatu; ngo wunde se bamulata maboko na bamutuba ku mbasi. 13Ngaa-bviinya waleele: "Buri me nyisa? Me nyelemini kuheeke mwaana waami wa mutima, kampe sa bamubvumina." 14Bakamuni ba bviinya, bu bamono mwaana wunde, basa nkalikisi bo na bo, baleele ti: "Wumawu ngo mukondiri saala. Tumudzuseenu, mpisi heki saala diba dya beetu-meene." 15Bo bamutuba ku mbisa nseke bviinya, na bamudzusa. Heki ngaa-bviinya lo buri kabasa? 16Nde sa kiisa, na sa kadzusa bakamuni ba bviinya babo, na sa kaha bviinya kuri bakimi.» Bamanaa kuyuka, bo baleele: «Mya bubwo miri mbeele ko.» 17Yesu wabasungumina kisoosi na wabaleele ti: «Matinu mamama mambangukulu ti kwe:
"Tari dyaloosiri batuungi,
didyo ngo dyeki dyanguri ha kuumbu?"
18Mpisi wubwa ha yulu dyo sa kakosoko; na mpisi wuri dimubwirikiri, sa dyamunyifuna.»
Mpaku Mbyaasi
(Mat 22.15-22; Mal 12.13-17)
19Batini ba mangisi, na bakuutu ba bangaanga-nzaambi, basaka bwa kumukaangila mu kilookolo kikyo, bukuri bo babakuri ti nkuma yiyo, mu bo nde kateeriri yo, ngo baba na boomo bwa baatu. 20Bo babeke mu kwekete Yesu. Baheeke baatu bafuta kumonokono bunu ti baatu basuunguma, mpisi bamubakila kibila mu ma kadzoonso, mpisi bamuyekele mu myooko mya mutumi, wuri na mpinu na lutumu. 21Bo bamufuula, baleele ti: «Muyikisi, beetu tuyaari ti ye wuri mu kwedzoonso, na kweyikisa misamu mya nsungumunu, ye wataambulaa kinzeri kya baatu ko, ngo ye wukweyikisa nzila Nzaambi mu ngwanwa. 22Buri beetu turi na miswa, mu kufuta mpaku kuri Kayisari hoti pele?» 23Yesu bu kabakula bumpitu-bumpyoongo bwa bo, waleele kuri bo ti: 24«Nsoongeenu kidenali kimosi. Kidzisi ki na bisoni bi bya na?» Bo babvutula ti: «Bya Kayisari.» 25Yesu waleele kuri bo ti: «Hango-nkuumbu, bvutuleenu bya Kayisari kuri Kayisari, na bya Nzaambi kuri Nzaambi.» 26Bo basii bweese kubangisina kumubakila kibila mu nzoonsulu ko, ha busu bwa baatu. Bo bakimuka mu mvutu yi kaheeri na bakaanga minwa.
Kifuuri mu ntoono mfulukulu ya bafwa
(Mat 22.23-33; Mal 12.18-27)
27Babamosi mu Basaduki, bo bakooleelaa ti mfulukulu ya bafwa yiri ko. Bakokosolo, bafuula Yesu, 28baleele ti: «Muyikisi, Moose watinina beetu ti: "Mbuti mpaangi muutu yifwiiri, ngo kabeeri na mukasi, na kasii buta baala ko; lo mpaangi yaandi kakondolo mukasi, na kubutila wu mwaafwa wunde baala." 29Ngo kwaba bampaangi nsaamu. Watete kweeriri mukasi, na fwiiri kwahele kusiisa mwaana. 30Waboolo, 31na wabatatu se bunubwo bakondiri mufwiiri wunde; natee bo nsaamu se bunubwo bahele kusiisa baala, na bafwiiri. 32Kumanunu mukyeetu se fwiiri. 33Heki mbasi-tsuku haba mfulukulu, mukyeetu wunde, mukasi na kaba mu bo? Bukuri bo nsaamu bamubakiri bunu mukasi.» 34Yesu waleele kuri bo ti: «Babakala na bakyeetu ba nsi yimayi bakwekwelesene. 35Ngo babakala na bakyeetu mbasi-tsuku bakoto mu nsi yikwiisa, na kufuluka mu bafwa, bo babweese kukwelesene ko. 36Mukwongo, ka babweese kufwa ko, bukuri beki kuba bunu bambasi, na bunu baala ba Nzaambi, bu bari baala ba mfulukulu. 37Moose wasoongo kuri ti mfulukulu ya bafwa yiri, ha kari mu kudzoonsolo mu bvuunda dya miti na bu kari mu kuteele Mfumu ti: "Nzaambi ya Abalaami, Nzaambi ya Isaki na Nzaambi ya Yakobe." 38Nzaambi kari Nzaambi ya bafwa ko, ngo ya bamwooyo, bukuri bobanso bari mwooyo mu nde.» 39Bu kabvutula bubwo, babamosi mu batini ba mangisi baleele ti: «Muyikisi, ye dzoonsiri kwakubwete.» 40Bo basii bweese kutsiitsa kumuha kifuuri mu ntoono ti mosi ko.
Kiristo bo na Davidi
(Mat 22.41-46; Mal 12.35-37)
41Yesu wabweese kuleele kuri bo ti: «Dyaburi bakooleelaa ti, Kiristo mwaana Davidi? 42Mukwongo, Davidi nde-meene wuleele mu mukaanda Mikuunga ti:
"Mfumu waleele kuri Mfumu yaami ti:
Dzakala ha lubakala lwa me,
43natee ku nyisuusa me, bataatu ba ye baba nkata-miilu mya ye." 44Habaanaa Davidi wumuteele "Mfumu", lo dyaburi nde kabweese kuba mwaana Davidi?»
Kusa madyeele mu batina ba mangisi
(Mat 23.1-36; Mal 12.38-40)
45Baatu bobanso bu baba muywiilaana, Yesu waleele kuri bayiki [baandi ti:] 46«Seenee madyeele mu batini ba mangisi, bo batiiri kweyunga mu madzweele mamala, bebaha mamboto mu bibeendu bya bobanso, bidzakukulu byatete mu manzo ma nkutukunu, na bibeendu byatete mu ntaangu ya kudya. 47Bo bakweholo bitotolo mu manzo ma bafwiila balumi, na bafuta kwesa nsaambulu dzadzila. Bo sa bataambula maseembu mabvuriri bunene.»
Àwon tá yàn lọ́wọ́lọ́wọ́ báyìí:
Luk 20: MW2013
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Nouveau Testament Beembe © Bible Society of the Republic of Congo, 2013.
