San Marcos 15
15
1Upegui pyjarevé coêmba yave umi pai ruvicha oñomonguetá pype jicuai umi caraí ituyáva ja umi escriva iñarandu reíva ja opa umi caraí mburuvicha cuérava, oguerajá Jesúspe oyepocuajápe ja omeê Ichupe Pilato pópe. 2Ja Pilato oporandú Ichupe: ¿Ndépa Judio cuera ruvicha guasu? Ja Jesús jei ichupe: Che jae, nde eré jaichante voí. 3Upeyave umi pai ruvicha jetambae omboyá yoa Jese. 4Upeareje Pilato oporandu yeby Ichupe jeivo: ¿Ne reneêipa mbaeve Ndeyeje? Peina jeta omboyáva jicuai Ndereje. 5Opaichavévo Jesús ndeiri mbaeveté. Ja upeagui tuvichaité ojecharâmô Pilato.
6Ja pe areté guasu yavé jae opoí vaecue yepi ichupecuera peteîva umi ybyracuá rógape oivagui oyerurejaichaguá jaecuera. 7Ja uperamo voí oime peteî cuimbae jérava Barabbás oiva ybyracuá rógape, upeva peteîva umi opuá vaecue mburuvicha reje ja umi oporoyucá vaecue pe aybú guasú yave. 8Upeicha oñembyatŷ yoa pe tetaŷgua ja oñypyrú oyerure rure toyapo tapiá oyapo jagueicha ichupecuera. 9Ja Pilato oporandú ichupecuera jeivo: ¿Peipotapa apoí peême co Judio ruvicha guasugui? 10Jae oicuaa voí ipyavaí gui umi pai ruvicha omeê jague Ichupe ipope. 11Ja umi pai ruvicha oñatôi atôi umi tecové atŷrape oyerure ruré jaguâ topoí ichupecuera pe Barabbás gui. 12Upei catu Pilato oporandú yeby ichupecuera: ¿Mbaépa upeicharamo peipota ayapo co pembojérava Judio ruvicha guasu? 13Ja jaecuera osapucai yeby: Peyucánte ichupe curusu reje. 14Ja Pilato jei ichupecuera: ¿Mbae ivaívapa oyapo raé Jae? Ja jaecuera osapucai jâtâ jâtâve: Peyucá catu ichupe curusú reje! 15Upei catu Pilato ombuayésegui umi tecové atŷrape opoí ichupecuera Barabbás gui ja oinûpâucá rire Jesúspe omeê Ichupe ipope cuera oyeyucá jaguâ curusú reje.
16Upemaramo umi tembiyocuai omoingué Ichupe pe mburuvichá roga guasu cora pŷpé, ja ombyatypá rire iñîrûnguera atŷrape, 17omondé Ichupe ao jobŷvape, ja oñopê ñuatî ja omoî Ichupe iñâcâ reje, 18ja oñypyru oñesû Ichupe jeivo: Eicové catu nde Judio ruvicha guasu! 19Ja oinûpâ Ichupe iñâcâ reje tacuarí pypé ja oindybú Jesé, ja ombuete guaú Ichupe oñesûjápe. 20Ja oñembojorŷpa rire Jesé omboí pe ao jobŷ ja omondé yeby Jesé iyaóteé. Ja upei oguerajá Ichupe ocápe oyuca jaguâ Ichupe curusú reje. 21Uperamo sapya oime ojasava jina peteî carai Simon Cireneŷgua, pe Alejandro ja Rufo ru, ou ramôva jina ocáragui. Ja omoî iyatiŷ ári pe curusu oguerajá jaguâ. 22Ja omboguata Ichupe upe Jendápe jérava Golgotape (pe “âcâ cangue cué rendá” yae mo avá ñeême). 23Ja omboŷú Ichupe vino oyoparáva pôjâ rejeve, ja Jae ndoŷúsei. 24Upei catu omoî Ichupe pe curusú reje. Uperire oñomboyaó iyaocue gui oñembojaraí pypé jesecuera yajecha mávapa oipyjy vaerâ. 25Ja pyjarevé asayémi ramo las nueve rupi omoî jague Ichupe pe curusú reje. 26Ja oime peteî cuatia ojaí jagué pe imboyapyré Jesé, omoî vaecue iñâcâ ári coicha: Judio ruvicha guasu. 27Ja omoî icurusu cuera reje Jendive mocoî mondajárape iyŷkécoty oyovai peteî iyacatua cotŷ ja pe ambue iyasú coty. 28Upeicha oico jecópe pe Santa Escritúrape oyeé vaecue: Jae oyepapá umi iñañáva apytepe. 29Ja umi ojasava jina omomârâ Ichupe oñeâcâvováva Jese jeivo: Nde catu rembuai moa vaecue tûpâo ja remopuâ moa vaerâ mbojapy arajápe, 30egueyŷnte co curusu gui Ne mârâ ŷ jaguâ. 31Upeicha avei umi pai ruvicha ja umi escriva iñarandú reíva oñembo jorŷ Jese jeivo oyoupecuera: Umi ambue cue cuerape omojesâimbá vaecue, oyupe catu ndicatui oñemojesâi. 32Co Cristo Israel ruvicha guasu togueyŷnte angaite voí curusu gui ore rojecha jaguâ, ja roguerovia jaguâ. Upeicha avei umi Iyŷkécotŷ oyovai oiva curusú reje cuera oyaó Ichupe. 33Ja pe ára mbyte guive iñypytûmba opa pe tetâ rupi iyerecuévo asayé caarú peve. 34Ja upepé voí Jesús osapucai jâtâ jeivo: Eloi Eloi Lama Sabachthani! Che Tûpâ Ñandeyára, Che Tûpâ Ñandeyára, ¿maerâpa Che reya? 35Ja oime umi oñemboŷva jicuai ojendu ramo Ichupe jei: Peina ojenôi Eliaspe. 36Ja oime petei oñani ja ombojycué esponja ŷjái gui ja omoî tacuarí apŷrá reje ja ojupityucá Ichupe ja omboŷú Ichupe ipypé. Ja jei Pejeyante! Yajecha oúpa Elias omboí jaguâ Ichupe. 37Upei catu Jesús osapucai jâtâ ja oyejekyi. 38Ja upeyave pe ao yepysójá tûpâope osoró mbytepe oyejegui reínte yvate guive yby peve.
39Ja pe mburuvicha oñemboŷva jiconi Jenondepe voí ojecha ramo oyejekyi jague, jei: Añetejápe cóva Tûpâ Ñandeyára Raŷ raé. 40Ja oime avei cuña caraí omaêva jicuai mombyrŷ gui, umia paûme oime Maria Magdalena ja Maria pe Santiago Michi sŷ, ja José sŷ, ja pe Salome, 41umi omoîrû vaecue Ichupe oico ramo guare Jae Galileape ja oyeyocuaiuca vaecue Ichupe. Ja oime avei jeta ambue cuera omoîrû vaecue Ichupe ou ramo guare Jerusalempe.
42Ja caarúma ramo oija reje pe oñembosacoí jaguâ ára pe sabado areté ára guârâ, 43ou pe José pe Arimateaŷgua caraí guasú iñarandúeté iyojeipyré ojaarôva voí jiconi oñemoingo jaguâ pe teco marangatu Tûpâ Ñandeyára rejegua, upéva catu oike poŷjuŷjape pe Pilato rendape ja oyeruré ichupe Jesús retecue reje. 44Ja Pilato ojecharâmô jei ramo ichupe omanoma jague Jae. Upeareje ojenôiucá pe mburuvichape ja oporandú ichupe: ¿Añetépa omanóma raé? 45Ja oicuaa pôrâma ramo pe mburuvicha yuru rupi añetéjá, omeêucá pe jetecue Josépe. 46Upeva voí oyoguáma raé ao oñuâ jaguâ, ja omboíma ramo jetecue oñuâ pe ao pypé ja oñotŷ Ichupe itácuárape itá guasu oñembocuá jaguepe, ja upei ombuapayerei peteî itá iyapuáva pe itacuá yurú reje. 47Ja Maria Magdalena ja Maria José sŷ omaê jicuai pe oñeñotŷ jague.
Àwon tá yàn lọ́wọ́lọ́wọ́ báyìí:
San Marcos 15: GRN1913
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© British and Foreign Bible Society 1913, 2013
Mọ̀ Sí Nípa Tûpâ Ñandeyára 1913
