MAREKO 16
16
I mêri aporo o Jesu
(Mt 28.1-8; Lk 24.12; Jn 20.1-10)
1Matena ki hato na Tangiana ni Mamaroha, ka Maria Matalena, ma ka Maria kenana o Jakobo, ma ka Salome ka vurigi na rauga, i sigini koro, ma na marâ manga na suru, hanana vi ga arâ ma ka monea na gahuana o Jesu renigi. 2Igê na mahogotana na Sate, matena i raboa me na arito, ngaira ka râ tanga na vaba, ga bagia igê o Jesu. 3Matena ga arâ, ngaira ka hetamatamasi, ka vi: “O ti kani page purisia râ na hê tenia na maana na vaba tangagia?” 4(Ngaia ki na apena bagahê raha.) Ma ngaira ka ahaukê ma ka rigia na hê, ga bani purisia râ. 5Ngekana ngaira ka banu igê na vaba, ma i rarona ngaira ka bâsia igê ta na mane haoru, i oga i na apanena i otota, i tuguni renia na tuguni siki. Ma ngaira ka gasuga renia.
6Ma ngaia ki vi: “Siana kamu gasuga. Igamu kamu râ me, hanana vi gamu bâsia o Jesu i Nasarete, ga bani rapusia igê na kuruse. Ma ngaia ki mareha ikê. Ngaia ki bani mêri aporo! Bâ, na agua, ga bani naka igê kani ikê. 7Hoita, mu râ ma kamu torea na taroha ngekê tangara o Petero ma na tamana, kamu vivi, ‘Ngaia ki nanago tarami i Galilea. I ngekana igamu kamu page bâsia igê, manga i bani vi tangagamu.’” 8Vikana ngaira ka hura vê ma ka gava pania na vaba, renia ga magu ma ki tata na apeta. Ma ngaira ka pe hagarongoa rârâ ta na enoni, suria ngaira ka magu.
TANI NA HATONGINA NA TAROHA KORO SURIA O MAREKO
O Jesu ki vora me tanga ka Maria Matalena
(Mt 28.9-10; Jn 20.11-18)
9[I murina i mêri aporo o Jesu, igê na mahogotana na Sate, ngaia ki vora me hagenago tanga ka Maria Matalena. Ngaia ki bani paira na ataro era gi pi tenia na gete ngekê. 10Ka Maria Matalena ki râ ma ki hagarongora na kariana o Jesu renia. Ngaira ka angisia ma ki rugu na obata. 11Ma na matena ga rongoa, vi ngaia ki bâsia o Jesu i mêri, ngaira ka pe tongesuria.
O Jesu ki vora me tangarerua na kariana gi rua
(Lk 24.13-35)
12Me muri o Jesu ki vora riariaga tangarerua na kariana gi rua, matena garu râ i bemu. 13Ngairerua karu aporo ma karu hagarongora na tamaterua, ma ngaira ka pe tongesuria.
O Jesu ki vora me tangara na kariana tangahuru matara gi tage
(Mt 28.16-20; Lk 24.36-49; Jn 20.19-23; Tag 1.6-8)
14Ma hemuri tatare o Jesu ki vora me tangara na kariana tangahuru matara gi tage, matena ga ngêngê. Ngaia ki ramonira, suria ngaira ka pe tongesuri, ma suria ngaira ka usi, vi ge tongesurira na enoni, ga bâsia, vi ngaia ki mêri aporo. 15Ngaia ki vi tangara, ki vi: “Mu arâ i maveta hagenani, ma kamu ateate renia na Taroha Koro tangara na ara ni enoni hato. 16I page tahi na enoni, i tongesuri ma ki batesimo; ma ka page suria hagaitangia na enoni, i pe tongesuri. 17Na enoni, ga tongesuri, ka page girara ga katogi na mena ngegê: ngaira ka page paira na ataro era igê na raramohaku; ngaira ka page tamasi renigi na tamasinga, ga râ hehegitigi; 18manga ga taua na ma, se ga tonomia ta na marâ, i girara i meme renia na enoni, ki asa iata, vi ge page ape era renia; ngaira ka page têtêbuhira na enoni, ga maeha, ka komaga.”
O Jesu ki aporo i pasina God Vaemana
(Lk 24.5053; Tag 1.911)
19Matena na Araha o Jesu i meratamasi hato, ngaia ki aporo i pasina God, ma ki oga so henia igê na atohana. 20Na kariana ka râ ma ka ateate igê na ara ni agua, ma na Araha ki tamanira, ma ki hagatanga monari renia na ateateha iata, suria i vatera na ramoha, hanana ga katogi na mena.]
TANI NIKÃ, NA HAGAHATONGINA NA TAROHA KORO SURIA O MAREKO
9[Na gete ka râ tangara o Petero ma na tamana, ma ka ata barobaro renia na taroha, i bani visia tangara na mane haoru. 10Ma hemuri ngaia marena o Jesu ki hagatorangenira na kariana, ka ateate i na ara ni agua hato renia na Taroha Koro, i monari tare; ngaia ki na taroha na vuripusiata na enoni, i vatera na mauriha mora ma tarema.]
Àwon tá yàn lọ́wọ́lọ́wọ́ báyìí:
MAREKO 16: KCB
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2011 Bible Society of the South Pacific
