Lucas 23

Pon k'i'n Jesús twitz Pilat

Matey 27.1-2,11-14; Marcos 15.1-5; Juan 18.28-38

1E jawtzun we' cycyakil, xi cyi'n Jesús twitz Pilat.

2Ex e oc ten si'mil yol ti'j, ex cyma:

—Aju xjal lu ma cnet ku'ne in xitun cynabl kxjalile. In tma'n tu'n mi'n kchojone te gobierni, ax icx in tma'n ka ate ju Crist aju at toclen tu'n Dios, ex in tma'n ka axte rey.

3Xitzun tkanin Pilat te Jesús:

—¿Apetzuna rey cye xjal judiy?

Xi ttzak'we'n Jesús:

—Akine, ic tza'n ma tmaya.

4Xitzun tma'n Pilat cye nejenel cye pal cyxol judiy ex cye xjal:

—Ma tz'el nnic'e ti'j minti' jun til xjal lu.

5Atzun cye cycyuwsaxix cyib ex cyma:

—Ate jlu in baj ttxalpu'n cynabl xjal, ex in tk'o'n xnak'tzbil cye cycyakil xjal tuj tx'otx' Judey, tzaj xe't tu'n tuj tx'otx' Galiley ax icx ma tzul tzalu.

Pon k'i'n Jesús twitz Herodes

6Tejtzun tbinte Pilat jlu, xi tkanin cye ka aj Galiley te Jesús. 7Tejtzun tbinte Pilat ka aj Galiley te Jesús, xi t-sama'n tuc'il Herodes, porque ate Herodes toctok te gobernador tuj Galiley ex otok tzul tuj Jerusalén tuj k'ij lu. 8Tej tque'yinte Herodes twitz Jesús, nimxix o tzalaj; porque otok tz'el k'ij o tajbe tu'n tque'yinte; porque otok tbi nimcu tkanil ti'j Jesús, ex o tajbe tu'n tque'yinte jun señ in tbincha'n. 9Ex xi t-xjelin Herodes nimcu te, pero minti' jun xi ttzak'we'n Jesús. 10Ex e pon ke nejenel cye pal cyxol xjal judiy cyuc'ix ke xnak'tzal ti'j ley, in che si'min yol ti'j cyuwxix. 11Atzunte Herodes cyuc'ix ke t-soldad el cyic'un, ex e oc ten xmayil ti'j, oc cyk'o'n jun t-xbalun tbanilxix; ex ajtz t-sama'n Herodes juntl maj Jesús tuc'il Pilat. 12Ex oc cyamiwin cyib Pilat tuc'il Herodes tujx ju k'ij lu; atzun nej cyajk'ojtok cyib.

Cub t-sentens Jesús tu'n tcyim

Matey 27.15-26; Marcos 15.6-15; Juan 18.39—19.16

13E bajtzun tchmo'n Pilat ke nejenel cye pal cyxol xjal judiy cyuc'ix ke aj sanjelal cyuc'ix ke xjal, 14ex xi tma'n cye:

—Ma tzul cyi'ne aju xinak lu nwitze, in cyma'ne ka nok in xitun cynabl xjal; pero tej soc tuj xjel wu'ne cywitze, minti' ma cnet jun til xjal lu wu'ne ti'j tcyakilju in cyma'ne ti'j. 15Ax icx te Herodes minti' ma cnet jun til xjal lu tu'n, porque ma tz'ajtz t-sama'n juntl maj kuc'il. Matzun cyile minti' jun mya ba'n ma tbincha xinak lu tu'n tcyim. 16Cbajel asyalit ex te tibajxi cxel ntzokpi'ne, chi Pilat xi tma'n cye.

17[Ex tcubtok jun ley cyu'n tu'n tetz ttzokpi'n Pilat jun pres tuj teyle junjun Xjan K'ij.] 18Pero cycyakil xjal e jaw sch'in junx ex cyma:

—Aju xjal lu ba'n tu'n tcyim, atzun te Barrabás tzokpi'mexa, che chi.

19Ate Barrabás presintok cyu'n tu'n tlaj oc ten k'ojlel ti'j gobierni tuj tnam, ex tu'nju otok cub jun xjal tu'n. 20Ex o yolin Pilat juntl maj cyuc'il, porque o tajbe tu'n t-xi tzokpi'n Jesús tu'n. 21Atzun cye xjal mas e jaw sch'in juntl maj:

—E tjaw twitz crus. E tjaw twitz crus, che chi.

22Xitzun tma'n Pilat toxmaji'n cye:

—¿Tiku'n? ¿Alcyetzun mya ba'n ma tbincha xjal lu? Minti' jun til ma cnet wu'ne tu'n tcyim; cyja'tzun, cbajel asyalin, ex jurat cxel ntzokpi'ne, chi Pilat.

23Atzun cye cucx e jaw sch'in wen, xi cykanin tu'n tjaw k'o'n Jesús twitz crus. Cubtzun ti'j tnabl Pilat cyu'n xjal [ex cyu'n ke nejenel cye pal cyxol xjal judiy,] tu'nju in jaw tk'ajk'ajel cywi' nimxix. 24Xitzun tma'n Pilat tu'n tbant aju in cykanin; 25cyja'tzun tten etz tzokpi'n Barrabás tu'n Pilat, aju xi cykanin tu'n tetz tzokpi'n, porque tocx Barrabás tuj pres tu'n tlaj o k'ojin ti'j gobierni ex tu'n tlaj jun xjal cub tu'n; xitzun k'o'n Jesús tuj cyk'ab xjal tu'n Pilat tu'n cybinchante ti'j nok alcye cyajbil.

Jaw k'o'n Jesús twitz crus

Matey 27.32-44; Marcos 15.21-32; Juan 19.17-27

26Xitzun k'i'n Jesús cyu'n, ex tzaj cytzyu'n jun xjal aj Sirén, Simón tbi, tzajni tuj cojbil, ex xi cyk'o'n crus te tu'n t-xi tikan ex lepchix tu'n t-xi' ti'j Jesús.

27Ex nim xjal e je'x lpe' ti'j Jesús, cyuc'ix nimcu xu'j in che ok' ti'j ex in che wu'yin. 28Ajtztzun tque'yin Jesús cywitz ex xi tma'n cye:

—Akeye xu'j aj Jerusalén, mi'n che ok'e wi'je, o'cx che ok'e cyi'jxe ex cyi'j ke cyale. 29Porque tzul k'ij oc cyma' xjal: Mas ba'n cye xu'j miban che alin, ex mas ba'n cye xu'j minti' tzaj cyal ex minti' o ch'u'n cyal cyi'j. 30Octzun cxel cyma'n xjal cye witz: Cytzaj tz'ake kibaje; ex cxel cyma'n cye tal witz: Ko cyewan cube, che chilo. 31Porque ka in cybincha'n jlu tuj tk'ijlalil cha'x tze', ¿yajtzun tuj tk'ijlalil tzkij tze', titzun cbajel? Chi Jesús.

32Ax icx xi cyi'n cabetl xjal binchal mya ba'n ke tu'n cycub byo'n junx tuc'il Jesús. 33Tejtzun cycanun tuj lugar Tbakil Wibaj tbi, atzun jaw k'o'n Jesús twitz crus, ex cyuc'ix keju xjal binchal mya ba'n e jaw k'o'n twitz crus, jun tuj tbank'ab Jesús, ex juntl tuj tnayaj. 34Tejtzun tjaw k'o'n Jesús twitz crus o na'n Dios ex tma:

—Tat, najsama cyil xjal lu, porque minti' nne'l cynic' ti'j ju in cybincha'n.

Ex jaw cyi'n soldad swert ti'j t-xbalun Jesús alcye tu'n t-xi ti'n junjun, ex baj cysipan cyxolx. 35Ex ke xjal in che que'yintok, cyuc'ix ke aj sanjelal, in che xmayintok ti'j ex in cyma'n:

—Ke txkantl xjal e clet tu'n; clomtzun tib ja'lo ka ax toc ate ju Crist aju sc'o'maj tu'n Dios.

36Ax icx ke soldad in che xmayintok ti'j, e je'x lak'e' ttxlaj ex oc cyo'yin vinagre te, 37ex xi cyma'n te:

—Ka aya rey cye xjal judiy, clom tiba.

38Ax at jun yol tz'iban [tuj yol grieg ex tuj latín ex tuj hebrey,] jax cyk'o'n twitz crus, in tma'n: Ate jlu Rey cye xjal judiy.

39Ex at jun binchal mya ba'n, aju yobintok twitz crus, oc ten xmayil ti'j Jesús chi cyja':

—Ka aya ju Crist aju at toclen tu'n Dios, clom tiba, ax icx keye ko tcloma, chi xjal.

40Atzunte juntl xjal oc tilin tuc'il, ex xi tma'n te:

—¿Maj minti' in xoba twitz Dios, ex ax tcastiwoya tcub tuc'il ju xjal lu? 41Ax toc, ke in ko yajlanjtz tuj tumelxix, porque ma kc'am kcastiw tu'n tlaj kbinchben; atzunte xjal lu minti' jun mya ba'n o tbincha, chi xjal.

42Ex xi tma'n te Jesús:

—Jesús, bi'x chin ule ti'j tc'u'ja oc tula tu'n tcawina.

43Atzunte Jesús xi tma'n te:

—Ax toc cxel nma'ne teya: Bi'x ja'lo ctela wuc'ile tuj lugar te nim tzalajbil Paraíso tbi.

Tej tcyim Jesús

Matey 27.45-56; Marcos 15.33-41; Juan 19.28-30

44Ch'ixtok tpon chilcuk'ij cub kloljix tcyakil twitz tx'otx', texi las tres te kale tel spic'e'. 45Oc yupj twitz k'ij, ex aju nintz xbalun tcub te makbil tuj tmij tja Dios bi'x cub sbit'j tuj tmijil. 46Jawtzun tk'ajk'ajel twi' Jesús cyuwxix ex tma:

—Nman, tuj tk'aba cxel wokxenane wanmiye, chi Jesús.

Ex tej tbaj tma'n jlu, cyimtzun.

47Tejtzun tque'yinte capitán tej tbaj jlu, jaw tnimsa'n tbi Dios, ex tma:

—Axix toc, ate xjal lu tz'aklxix.

48Ex tej cyque'yinte cycyakil xjal jlu, akeju otok baj cychmon cyib, e ajtz meltz'aj, oc cyk'ajtza'n ttzi cyxu'c tu'n cybis. 49Pero cycyakil keju ojtzki'ntok Jesús cyu'n, cyuc'ix ke xu'j otok che oc lpe' ti'j Jesús tzajnix tuj Galiley, e cyaj ten najchak in che que'yin ti'j tcyakil jlu.

Tej tcu'x maku'n Jesús

Matey 27.57-61; Marcos 15.42-47; Juan 19.38-42

50At jun xinak José tbi, aj Arimatey; atzun ta' tnam lu tuj tx'otx' Judey; ate xjal lu ajun cyxol Aj Sanjelal cye xjal judiy. Ba'n te xjal lu ex tz'aklxix. 51Ate José mya mojl tyol cyuc'il Aj Sanjelal ti'j ju baj cynac'u'n ti'j ex ti'j ju cybincha, porque in ayontok ti'j tcawbil Dios. 52Ultzun José tuc'il Pilat, ex xi tkanin t-ximlal Jesús. 53Tcu'tzlenxi ti'n twitz crus, ocx tbalk'i'n tuj jun sak xbalun, ex ocx tk'o'n tuj jun pic lacu'maj ic tza'n pantyón, na'nxtok tocx k'o'n jun cyimni tuj jul lu. 54Ex atzun k'ij tu'n tbant cyten xjal tu'n cyojlan tuj k'ij te ojlabl, aju ch'ixtok t-xe't.

55Ex akeju xu'j otok che tzaj tuc'il Jesús tuj Galiley e je'x lpe' ti'j José, ex o cyil aju pantyón ex tza'n tten ocx k'o'n t-ximlal Jesús tuj. 56Tejtzun cyul meltz'aj cyja, baj cybincha'n perjum ex tc'oc'jal t-sem tib; ex e ojlan tuj k'ij te ojlabl ic tza'nx in tma'n mandamyent.

Àwon tá yàn lọ́wọ́lọ́wọ́ báyìí:

Lucas 23: MAMH

Ìsàmì-sí

Pín

Daako