Lucas 22
22
In che jyon xjal tumel tza'n tten tu'n ttzyet Jesús
Matey 26.1-5,14-16; Marcos 14.1-2,10-11; Juan 11.45-53
1Ch'ixtok Xjan K'ij, atzun k'ij tu'n cywa'n xjal pan minti' t-samel tuj tu'n tjaw mal tc'u'j. 2Atzun cye nejenel cye pal cyxol xjal judiy cyuc'ix ke xnak'tzal ti'j ley in che jyontok tumel tza'n tten tu'n tcub byet Jesús; pero in che xobtok cywitz xjal.
3Ocxtzun Satanás tuj tanmi Judas Iscariote, jun cyxol keju cablaj t-xnak'tzben Jesús. 4Ex xi' Judas yolil cyuc'il nejenel cye pal cyxol xjal judiy ex cyuc'il ke nejenel cye polisiy tuj tja Dios, tza'n tten tu'n t-xi k'o'n Jesús tuj cyk'ab tu'n. 5Atzun cye e jaw tzalaj, ex bant ti'j cyu'n cyxolx tu'n t-xi cyk'o'n pwak te Judas. 6Ex xi ttziyan Judas cye, ex oc ten jyolte tumel tza'n tten tu'n t-xi k'o'n Jesús tu'n tuj cyk'ab pal, minti' che bin xjal ti'j.
O wa'n Jesús cyuc'il t-xnak'tzben tuj Xjan K'ij
Matey 26.17-29; Marcos 14.12-25; Juan 13.21-30; 1 Corint 11.23-26
7Ex o canun aju nink'ij tu'n cywa'n xjal pan minti' t-samel tuj tu'n tjaw mal tc'u'j, atzun k'ij lu ilxix ti'j tu'n tcub byet ju tal ẍne'l tu'n tic'set Xjan K'ij. 8Xitzun sama'n Pedro tuc'ix Juan tu'n Jesús, ex xi tma'n cye:
—Cyxi'ye, cybinchame wabj te Xjan K'ij tu'ntzun kwa'n ti'j.
9Atzun cye xi cykanin te:
—¿Jatumtzun tajbila tu'n tbaj kbincha'ne?
10Xi tma'n Jesús cye:
—Oc cyocxe tuj tnam, c'oquel cyc'ulban cyibe tuc'il jun xinak k'i'n jun ẍok' a' tu'n; che lpexe ti'j tu'n cypone tuj ja jatum c'oquex, 11ex cymanxe te tajaw ja: Chi xnak'tzal in tma'n teya cyja': ¿Alcye jun col ja jatum tu'n nwa'ne cyuc'il nxnak'tzbene tu'n tic'set Xjan K'ij? 12Ctzajeltzun tyec'un jun tcab colin ja ma'xix, banimaj tten; atzun cybinchame wabj.
13E je'xtzun ex cnet tcyakil cyu'n ic tza'n xi tma'n Jesús cye; ex baj cybincha'n wabj tu'n tic'set Xjan K'ij.
14Tej tpon or, cub ke' Jesús ti'j mes cyuc'ix ke apostl. 15Xitzun tma'n Jesús cye:
—Wajbilxixe tu'n nwa'ne cyuc'ile tu'n tic'set Xjan K'ij na'nxtok ncyime. 16Porque cxel nma'ne cyeye, mlay chin wa'ntle juntl maj ti'j wabj lu, maxitzun chin wa'le juntl maj junx cyuc'ile tuj tk'ijlalil oc tul tcawbil Dios.
17Ex jaw ttzyu'n ju vas, xi tk'o'n chjonte te Dios ex tma:
—Cytzyunxe jlu, ex cysipanxe cyxolxe; 18porque cxel nma'ne cyeye, mlay txi nc'a'ntle juntl maj ta'l twitz uva lu, maxitzun cxel nc'a'ne juntl maj oc tjapun tk'ijlalil oc tul tcawbil Dios.
19Ex jaw ttzyu'n ju pan, xi tk'o'n chjonte te Dios, cub tpiẍc'u'n, xi tk'o'n cye, ex tma:
—Atzun nximlale jlu cjawil k'o'n twitz crus tu'n tten colbil cyeye; cybinchame jlu te nabl weye.
20Ax icx jaw ttzyu'n Jesús ju vas tbajlenxi wa'n, ex tma:
—Aju tcu'x tuj vas lu, atzun ac'aj yol ma cyaj bant ti'j tu'n Dios cyuc'ile, ex aju nchc'ele c'elel chitj te colbil cyeye, atzunju c'oquel te cyuwsabl teju yol lu. 21Pero aju xjal cxel k'onte weye tuj cyk'ab xjal, lu at wuc'ile ti'j mes. 22Ax toc chin xel k'o'ne tuj cyk'ab xjal ic tza'nx banimaj ti'j, akine sc'o'maj kine tu'n Dios tu'n ntene cyuc'il xjal; pero bec'bil twitz aju xjal cxel k'onte weye tuj cyk'ab xjal.
23Atzun cye t-xnak'tzben e oc ten kanilte cyxolx alcye jun cxel k'onte Jesús tuj cyk'ab xjal.
In che yolin xnak'tzben ti'j alcye mas at toclen cyxol
24Ex jaw jun yol cyxol xnak'tzben ti'j alcye jun tu'n tten mas toclen cyxol. 25Atzunte Jesús xi tma'n cye:
—Ke rey cye nasyon cyuw in che cawin cyibaj xjal; ex ke nejenel ate' cyuj nno'c k'o'n cybi mejor xjal ke. 26Atzun cyeye mlay che oque icju; aju mas at toclen cyxole, k'o'nc tib ic tza'n c'wa'lx ta'; ex aju nejenel cyxole, k'o'nc tib ic tza'n jun ajbel. 27Porque ¿alcye mas at toclen, apeju in cub ke' ti'j mes tu'n twa'n, ex ka aju toc te ajbel? ¿Myapelo aju in cub ke' ti'j mes? Pero akine atine cyxole ic tza'n jun ajbel.
28Atzun cyeye cucx ma che tene wuc'ile tuj yajbil weye. 29Cyja'tzun, cxel nk'o'ne cyoclene tu'n cycawine, ic tza'n weye ma tzaj k'o'n woclene tu'n Nmane tu'n ncawine, 30che wa'le ex che c'ale twi' nmese tuj ncawbile, ex che bel ke'ye tuj k'ukbil tu'n cycawine cyibaj cablaj c'loj cyiyjil aj Israel.
Chin bel tewana ox maj, chi Jesús te Pedro
Matey 26.31-35; Marcos 14.27-31; Juan 13.36-38
31Ax icx tma Kajaw:
—Simón, Simón, lu ma che kaninjtze tu'n Satanás tu'n cyoque tuj sarand ic tza'n triw; 32pero ma chin cubsane twitz Dios ti'ja tu'n mi'n tcub numja tuj tocslabla; octzun tjaw twaban tiba juntl maj, cyuwsama ke termaniya.
33Xi tma'n Simón te:
—Tat, lu kine lu tu'n nxi'ye tuc'ila ka tuj pres ex ka tu'n ncyime junx tuc'ila.
34Xi tma'n Jesús te:
—Cxel nma'ne teya Pedro, na'nxtok ttzaj ok' tzec' ja'lo, cbel tewana ox maj ka minti' ojtzki'n kine tu'na.
Ch'ix tul canun or tu'n tic'x tu'n Jesús
35Ex xi tkanin Jesús cye t-xnak'tzben:
—Tej cyxi nsama'ne minti' cych'u'ẍe, ex minti' cypaye, ex minti' cyxajbiye, ¿atpe jun minti' o canun cyeye? Atzun cye xi cytzak'we'n:
—Tcyakil o canun, che chi.
36Xitzun tma'n Jesús cye:
—Ja'lotzun alcye at tch'u'ẍ, ba'n tu'n t-xi ti'n tuc'ix tpa; ex alcye minti' t-spad, c'ayinx tchicyet ex lak'ontz jun t-spad. 37Porque cxel nma'ne cyeye, ilxix ti'j tu'n tjapun wi'je aju tz'ibamaj tuj Tu'jil, in tma'n cyja': Cyxol ke mya ba'n oc te tajlal, chi tuj Tu'jil. Porque tcyakilju tz'ibamaj wi'je il ti'j tu'n tjapun.
38Atzun cye cyma:
—Tat, at cabe spad lu.
Ex tma Jesús cye:
—Acux jlu.
Jesús in na'n Dios tuj lugar twi' witz Olivos
Matey 26.36-46; Marcos 14.32-42
39Etztzun Jesús, ex xi' twi witz Olivos ic tza'nx tmod; ax icx ke t-xnak'tzben e je'x lpe' ti'j. 40Tejtzun tcanun ma chixin, xi tma'n cye:
—Che na'ne Dios tu'n mi'n cyoque tuj joybil cyi'je.
41Ex el lak'e' Jesús cytxlaj balo te cab ox ech; ex cub ẍmeje', oc ten na'l Dios, 42ex tma:
—Tat, ka tajbila chin tcloma tu'n mi'n tic'x ju c'ixc'oj lu wu'ne; pero cuchiwt mi'n bant aju weye wajbil, o'cx aju teya tajbila, chi Jesús.
43[Cubtzun tyec'un tib jun anjel tzajni tuj cya'j ul k'olte tipun. 44Ex tej toctok Jesús tuj c'ixc'oj, mas o na'n Dios tu'n tcyakil tipun; ex tzaj a' ti'j ic que'yin ic tza'n nmak txutpin chic' e cub tz'ak twitz tx'otx'.]
45Jawtzun we' tbajlenxi na'n Dios, ul cyuc'il ke t-xnak'tzben, ex e cnet tu'n in che tan tu'n tlaj cybis. 46Xitzun tma'n cye:
—¿Tiku'n in che tane? Che we'ctze, ex che na'ne Dios tu'ntzun mi'n cyoque tuj joybil cyi'je, chi Jesús.
Tej t-xi k'i'n Jesús pres
Matey 26.47-56; Marcos 14.43-50; Juan 18.2-11
47Cucxtok tyolin Jesús tej cypon nim xjal; nejni Judas cywitz, jun cyxol keju cablaj xnak'tzben; ex pon lak'e' ttxlaj Jesús tu'n tel ttz'uban twitz. 48Xitzun tma'n Jesús te:
—Judas, ¿maj nok tu'nju nne'l ttz'ubana nwitze in chinx tk'o'na tuj cyk'ab xjal, akine sc'o'maj kine tu'n Dios tu'n ntene cyuc'il xjal?
49Ex atzun keju ate'tok tuc'il Jesús tej cylonte cyja'tok ttzyet, xi cyma'n te:
—Tat, ¿ocpe che oquel ktx'emine ke jlu tu'n spad?
50Ex at jun cyxol oc ttx'emin jun tmajen ju nejenel cye pal, ex bi'x el t-ẍcyin tuj tbank'ab. 51Tmatzun Jesús cye:
—Cucx ttenju.
Octzun tmaco'n Jesús t-ẍcyin majen, ex banix tu'n. 52Ex xi tma'n Jesús te nejenel cye pal cyxol judiy ex cye nejenel cye polisiy tuj tja Dios ex cye cytijil xjal akeju otok che ul tzyul te:
—¿Maj ma che tzaje tzyul weye k'i'n spad cyu'ne tuc'ix tze', mer ic tza'n elek' kine tuj cywitze? 53Tej atintoke cyuc'ile tcyakil k'ij tuj tja Dios, minti' in tzaj cytzyu'ne; pero atzun or jlu tu'n cybinchanteye cyajbile, ex atzun or tu'n tcawin tipumal klolj.
Cub tewan Pedro ka minti' ojtzki'n Jesús tu'n
Matey 26.57-58,69-75; Marcos 14.53-54,66-72; Juan 18.12-18,25-27
54Tzyettzun Jesús cyu'n, xi cyi'n tja nejenel cye pal cyxol judiy. Atzunte Pedro najchak xi lpe'. 55Ex cub cyk'o'n k'ak' tmijil ttxa'n pe'n, ex e cub ke' ti'j k'ak'; ax icx te Pedro cub ke' cyxol. 56Octzun tque'yin jun txin criad k'ukltok Pedro ti'j k'ak', ax oc baj twitz ti'j, ex tma:
—Ax ajun te jlu o ten tuc'il Jesús.
57Pero cub tewan Pedro ex tma:
—Txin, minti' ojtzki'n twitz xjal lu wu'ne.
58Matok ch'in tuj, o ilwaj Pedro tu'n juntl xjal, ex tma:
—Ax ajun teya cyxol ke jlu.
Xi ttzak'we'n Pedro:
—Xinak, mya ajun we kin.
59Ex tbajlenxi jun or tcyuwsa juntl ex tma:
—Ax toc, icx te jlu o ten tuc'il Jesús porque aj Galiley.
60Xitzun tma'n Pedro te:
—Xinak, minti' ba'n wu'ne aju in tma'na.
Ex tzaj ok' naj tzec' matok in yolin Pedro. 61Ajtztzun meltz'aj twitz Kajaw, ex tzaj tque'yin twitz Pedro; ex ul ti'j tc'u'j Pedro ti'j ju tyol Kajaw otok txi tma'n te: Na'nxtok ttzaj ok' tzec' ja'lo, cbel tewana ox maj ka minti' ojtzki'n kine tu'na. 62Etztzun lak'e' Pedro ti'jtze, ex jaw ok'xix wen.
In che xmayin xjal ti'j Jesús
Matey 26.67-68; Marcos 14.65
63Atzun cye xinak tzyu'ntok Jesús cyu'n, in che xmayintok ti'j ex oc cybju'n. 64Oc cymaksi'n twitz, [ex oc cytz'ajan twitz,] ex xi cykanin te:
—K'mantza, ¿alcye ma tz'oc bjun teya? Che chi.
65Ex in cyma'n nimcu yol te xmaybil te.
Pon k'i'n Jesús cywitz Aj Sanjelal
Matey 26.59-66; Marcos 14.55-64; Juan 18.19-24
66Ex tej kskix, baj cychmon cyib ke cytijil xjal judiy cyuc'ix ke nejenel cye pal cyxol xjal judiy ex ke xnak'tzal ti'j ley, tzaj cyi'n Jesús cywitz Aj Sanjelal cye xjal judiy, ex xi cykanin te:
67—K'mantza keye, ¿apeya ju Crist aju at toclen tu'n Dios? Che chi.
Xi ttzak'we'n Jesús cye:
—Ka ma txi nma'ne cyeye, mlay txi cyocsla'ne. 68Ax icx ka ma txi nkanine cyeye, mlay tzaj cytzak'we'ne, [ex mlay chin tzaj cytzokpi'ne.] 69Pero texju ja'lo, chin bel ke'ye tuj bank'abaj ttxlaj Dios nim tipumal, akine sc'o'maj kine tu'n Dios tu'n ntene cyuc'il xjal.
70Xitzun cykanin cycyakil te:
—¿Entons aya tc'wa'l Dios?
Xi tma'n Jesús cye:
—Akine, ic tza'n ma cymaye.
71Atzun cye cyma:
—¿Ti til mastl testiw ke? Porque ax ko' ma ko binte tyol.
Àwon tá yàn lọ́wọ́lọ́wọ́ báyìí:
Lucas 22: MAMH
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Mam del Norte © Sociedades Bíblicas Unidas 1993
