Lucas 21

Aju oyaj tu'n jun meba xu'j tal yajxix

Marcos 12.41-44

1Ex o til Jesús ke k'inun in cu'x cyk'o'n cyoyaj tuj c'ubl pwak tuj tja Dios. 2Ax icx o til Jesús jun meba xu'j tal yajxix cu'x tk'o'n cabe tal sentav. 3Ex tma Jesús:

—Ax toc cxel nma'ne cyeye, ate meba xu'j lu tal yajxix, mas ma cu'x tk'o'n cywitz cycyakil. 4Porque cycyakil ke jlu, aju in cyaj sobryin cye, atzunju ma cu'x cyk'o'n te cyoyaj twitz Dios; atzunte xu'j lu, masque tal yajxix, pero ma cu'x tk'o'n tcyakilju at tajbenil twi twa.

O tma Jesús ka tu'n tcub xitj tja Dios

Matey 24.1-2; Marcos 13.1-2

5In che yolintok junjun xjal ti'j tja Dios bincha'nxix wen tu'n abj tbanilxix ex tu'n oyaj otok pon cyi'n xjal. Xitzun tma'n Jesús cye:

6—Tcyakil jlu aju nno'c cyque'yine, tzul k'ij mlay cyaj ten abj tibaj juntl abj, tcyakil cbel tilj.

Ke señ na'nxtok tjapun mancbil tk'ijlalil

Matey 24.3-28; Marcos 13.3-23

7Xitzun cykanin te:

—Xnak'tzal, ¿jtojtzun ban tjapun jlu? ex ¿alcye señ tzul ch'ixtok tjapun jlu? Che chi.

8Tmatzun Jesús:

—Ten cycwente cyi'je tu'n mi'n cycub sbu'ne; porque che ul nimcu xjal ex c'oquel cyk'on cyib ic tza'n weye, ex oc cyma': Akine ju Crist at woclene tu'n Dios, ex ch'ix tul lak'e' tk'ijlalil, che chilo; pero mi'n che oc lpe'ye cyi'j. 9Ex oc cybinteye oc toc k'oj ex oc cyjaw tilj xjal k'ojlel, mi'n che jaw sec'paje; porque tnejel ilxix ti'j tu'n tjapun tcyakil jlu; pero myatzun mancbil tk'ijlalil jlu tu'n tjapun baj tcyakil.

10Che k'ojlel ke nasyon cyi'j mastl nasyon, ex che k'ojlel ke tnam cyi'j mastl tnam. 11Ex ctzajel cyaknajnab cyuwxix ex we'yaj ex tx'u'j yabil nok jachak; ex tzul sec'publ ex che tzajel señ ma'xix twitz cya'j.

12Pero na'nxtok tjapun tcyakil jlu, che tzyetele cyu'n xjal, ex che yajlanjtzele cyu'n. Che xel k'i'ne tuj ja te c'ulbil tu'n cyoque tuj xjel ex che oquex k'o'ne tuj pres, ex che xel k'i'ne cyu'n cywitz rey ex cywitz gobernador, nok tu'n tlaj ocslal keye wi'je. 13C'ajbel jlu cyeye tu'n cyoque te testiw wi'je. 14Mi'n che ximan naje ti'j alcye yol cxel cyma'ne te colbil cyeye; 15porque akine chin k'olte yol tuj cytzi'ye tuc'ix cynable, tu'ntzunju mlay cub ti'j cyyole cyu'n cycyakil aj k'oj cyi'je, ex mlay maket cyyole cyu'n. 16Che xel k'i'ne twitz cawil cyu'nx cymane ex cyu'n cyermaniye ex cyu'n keju at cyxilen cyuc'ile ex cyu'n cyamiwoye; ex at junjun cyxole che bel byo'n cyu'n; 17ex che elel ic'une cyu'n cycyakil xjal tu'n tlaj ocslal keye wi'je. 18Pero mi jun ttzmal cywi'ye mlay naj. 19Ka ma tzic'x cyu'ne, oc cycamba'ye cychwinklale axix toc.

20Oc cylonteye oc t-xi cytxolban cyib soldad ti'jele tnam Jerusalén, tz'elxtzun cynic'e ti'j ya ma pon k'ij tu'n tcub xitj tnam. 21Atzun keju ate' tuj tx'otx' Judey, ba'n tu'n cyel ok tu'n cyxi' twi witz; ex keju ate' tuj tnam Jerusalén, ba'n tu'n cyetz ok; ex keju ate' tuj cojbil, mi'n che ocx tuj tnam. 22Porque oc tul canun ju k'ij lu, atzun k'ij tu'n ttzaj castiw cyibaj xjal, tu'ntzun tjapun tcyakilju in tma'n tuj Tu'jil. 23Pero bec'bil cywitz ke xu'j ch'ixtok tul itz'j cyal oc tul canun ju k'ij lu, ex bec'bil cywitz ke xu'j cucx tch'u'n cyal. Porque tzul nim yajbil twitz tx'otx', ex tzul jun castiw ma'xix cyi'j ke xjal lu. 24At junjun che bel byo'n tu'n spad, ex at junjun che xel k'i'n pres, ex che bajel sputj cyuj cycyakil nasyon; ex cbajel waban tnam Jerusalén cyu'n ke nasyon mya judiy ke, maxitzun cwebel ocxi tjapun baj tk'ijlalil tu'n cycawin ke nasyon mya judiy ke.

Tza'n tten tzul Jesucrist juntl maj

Matey 24.29-35,42-44; Marcos 13.24-37

25Tzultzun señ ti'j k'ij ex ti'j xjaw ex cyi'j che'w; ax icx twitz tx'otx' bi'x cnajel cynabl xjal cyuj cycyakil nasyon, che jawil sec'paj tu'n tk'ajk'ajel twi' mar in xtulk'in. 26Ke xjal ctzajel yumin tuj cywitz tu'n xobajil ex tu'nju in che ximan ti'j ti cbajel twitz tx'otx'; porque che tzajel lu'lun tipumal cya'j. 27Ex octzun cyila' xjal oc ntzaje tuj muj, akine sc'o'maj kine tu'n Dios tu'n ntene cyuc'il xjal, ex oc cyila' nim wipumale ex in chin koptz'aje wen. 28Octzun t-xe't tcyakil jlu, ke' cyc'u'je, ex cyque'yinctze jawni, porque aju colpibl cyeye in lak'ex ttzaj.

29Ex xi tma'n Jesús jun techal cye:

—Cyque'yinxe tkan higo ex ka juntl tze'. 30Octzun cylonteye oc ttzaj t-xul, ax keye nne'l cynic'e ti'j in lak'ex ttzaj ttzi jbalil. 31Icxtzun tten oc cylonteye oc tjapun tcyakil jlu, tz'elx cynic'e ti'j in lak'ex ttzaj tcawbil Dios.

32Ax toc cxel nma'ne cyeye, tcyakil jlu cjapunel na'nxtok cycyim ke xjal ate' tuj tk'ijlalil ja'lo. 33Ate cya'j cnajel tuc'ix tx'otx', atzun we nyol mlay naj.

34Ten cycwente cyi'je tu'n mi'n tel tzpet cynable tu'n achbil te twitz tx'otx' ex tu'n c'aj k'e'n ex tu'nju tichak in baj cyc'u'je ti'j, mya yajcu in canuncu tk'ijlalil jlu cyibaje. 35Porque ic tten jlu ic tza'n jun c'obil; cycyakil xjal najl tuj tcyakil twitz tx'otx' che tzyetel tu'n. 36Cyja'tzun che xk'ukine ex che na'ne Dios tcyakil k'ij, tu'ntzun cycolpaje te tcyakilju tzul, ex tu'n cycub we'ye nwitze, akine sc'o'maj kine tu'n Dios tu'n ntene cyuc'il xjal.

37O'cx k'ijl in tk'o'ntok Jesús xnak'tzbil cye xjal tuj tja Dios, atzun konic'an nne'tz ex in xi' twi witz Olivos tbi, ex ax in cyaj ten. 38Ex cycyakil xjal in che ultok tuc'il te prim bilte tyol tuj tja Dios.

Àwon tá yàn lọ́wọ́lọ́wọ́ báyìí:

Lucas 21: MAMH

Ìsàmì-sí

Pín

Daako