SAN MATEO 13
13
Jun techel tiꞌj jun awal
(Mr. 4:1-9; Lc. 8:4-8)
1Tujx jkꞌij lu, etztzen Jesús tuj jaaꞌwa, bix e cub ke ttziiꞌ tnijabel aꞌ. 2Bix e pon cychmon cyiib nimxsen xjal tiꞌjxin. Juꞌ tzunj, ocxxin tuj jun barc bix e cub kexin tuj tuꞌn t-xnakꞌtzan cye xjal. Yaltzen cye xjal, e cyaj weꞌke ttziiꞌ aꞌ. 3Bix akꞌ Jesús xnakꞌtzalcye. Nim xnakꞌtzbil e xiꞌ tkꞌoꞌnxin cyexin, pero tuya nim ttxolen yol. E cub tkꞌoꞌnxin ja techel lu cyexin:
—Attzen junxin xjal e xiꞌxin te awal triwa. 4Tejtzen takꞌxin tz̈itlxte iyaj, at tiyajxin e cub tzꞌak tuj be. Bix ul noj ke chꞌit tiꞌj bix e jaw cywaaꞌnjil. 5Cabtl twitz iyaj e cub tzꞌak twitz pcꞌat txꞌotxꞌ. Yaaꞌn nimxix txꞌotxꞌ, bix juꞌ tzunj, tuj jun rato e jaw pokꞌchke, cuma mintiiꞌ t-xeeꞌ txꞌotxꞌ. 6Pero tuꞌn tcykal kꞌij, bix oc wochꞌpaj tejxe ttzkij, cuma yaaꞌn nim tlocꞌ otk txiꞌ tuj txꞌotxꞌ. 7At cabtl twitz iyaj e cyaj tzꞌak tuj tikꞌch chꞌiꞌxel. Pero nuk e jaw ẍcyꞌilpaj tjakꞌ chꞌiꞌx, tejxe tetz cyim. 8Pero at cabtl twitz iyaj e cyaj tzꞌak tuj tbanel txꞌotxꞌ, bix e takꞌ nim twitz. At juun tken e takꞌ syent twitz, at cabtl e takꞌ oxcꞌal twitz, bix at cabtl e takꞌ winaklaaj twitz. 9Ka cyaja tzꞌel cyniꞌya tiꞌj ja techel lu, cyjkom cyẍquina bix cybisenx tiꞌj―tz̈i Jesús.
Alcye cyxiꞌlen kej techel
(Mr. 4:10-12; Lc. 8:9-10)
10Bix ul lkꞌe ke t-xnakꞌatzxin tiꞌjxin, bix e xiꞌ cykanenxin texin:
—¿Tuꞌn tikentzen nyolena cye xjal tuj yaaꞌn tzinen yol?
11Bix aj ttzakꞌbeꞌnxin cyexin:
—Te cyey, ejeeꞌy nxnakꞌatza, ma txiꞌ tkꞌoꞌn Dios cyey tuꞌn tel cyniꞌya tiꞌj ti tten tcawbil Dios min e yecꞌj nejl. Pero te cyej niyꞌtl xjal, min o kꞌoj cye. 12Jxjal n-oc tipen tuꞌn tnimante nyola, cxeꞌl kꞌoꞌn tuꞌn tel tniyꞌ tiꞌj mastl, bix ctemel nim te. Pero jxjal min tzꞌoc tipen tuꞌn tnimante nyola, qꞌuelel kꞌiꞌn alcyej chꞌin otk bint tuꞌn. 13Juꞌ tzunj, yaaꞌn chicꞌaj jnxiꞌ nyolena cye xjal, cuma amale n-oquet cycyeꞌyen bix amale n-oquet cybiꞌn, pero min tzꞌel cyniyꞌ tiꞌj. 14Ejeeꞌ tzunja tisen e tkba Dios tuꞌnj tyolel Isaías tuj tyol Dios cyiꞌj xjal min e cybi Dios. E tkba Dios tuꞌn Isaías cyjulu: “Amale cꞌoquelet cybiꞌn bix amale cꞌoquelet cycyeꞌyen, pero miꞌn tzꞌel cyniyꞌ tiꞌj. 15Cyiwxsen cyanem jxjala, bix cycyꞌix tzꞌoc cybiꞌn nyola. Cwel cymutzꞌbaꞌn cywitz tiꞌj jaxxix yol, cuma cycyꞌi tzꞌel cyniyꞌ tiꞌj. Cyiw cyten, cuma cycyꞌi chi meltzꞌaj wuyena, tuꞌntzen cyclet wuꞌna,” tz̈i Dios jatxe ootxa. 16Pero cyey, jun nintzaj xtalbil o kꞌoj cyey, cuma eteꞌy tuyaj xjal Smaꞌn tuꞌn Dios, bix nxiꞌ cybiꞌna nyola. 17Cxeꞌl nkbaꞌna cyey, nim tyolel Dios bix nim xjal jiquen te ootxa e cyajbe tuꞌn toc cycyeꞌyen jxjal Scyꞌoꞌn tuꞌn Dios, tisenj cyey n-oc cycyeꞌyen jaꞌlewe, pero mix oca cycyeꞌyen. Bix e cyajbe tuꞌn toc cybiꞌn kej tyol jxjal Scyꞌoꞌn tuꞌn Dios, tisenj cyey n-oc cybiꞌn jaꞌlewe, pero mix oca cybiꞌn.
Tej t-xiꞌ ttxꞌolbaꞌn Jesús jtechel tiꞌj awal
(Mr. 4:13-20; Lc. 8:11-15)
18Jaꞌlewe cxeꞌl ntxꞌolbaꞌna jtechel tiꞌj awal. 19Oj nxiꞌ tbiꞌn jun xjal yol tiꞌj tcawbil Dios, pero min tzꞌel tniyꞌ tiꞌj, n-ultzen taaw il tuꞌn tjatz tiiꞌn ja yol lu otk cuꞌx awaꞌn tuj tanem. J-iyaj e cub tzꞌak tuj be, juꞌtzen japenina tisenj xjal lu min e cyaj tyol Dios tuj tanem. 20J-iyaj e cub tzꞌak tibaj pcꞌat txꞌotxꞌ, juꞌtzen japenina tisenj xjal n-oc tbiꞌn tyol Dios tuya cykil tcꞌuꞌj tuj tneel. 21Pero min cywix tuj tanem. Nuk caꞌba kꞌij ncyaj ten, cuma oj n-oc jun qꞌuixcꞌaj bix ka jun pena tiꞌj tuꞌn tlaj tyol Dios, ncub bajtl tcꞌuꞌj tiꞌ tyol Dios. 22Ja tzunj iyaj e cub tzꞌak cyxol twitz chꞌiꞌx bix e cyim tjakꞌ chꞌiꞌx, juꞌtzen japenina tisenj xjal n-oc tbiꞌn tyol Dios, pero nuk oꞌcx kꞌinemal bix tuꞌn titzꞌj taj, bix tuꞌn tzunj lu ncaman te xitbil tyol Dios tuj tanem. Tchunkꞌlal tisen jun tken triwa mintiiꞌ twitz. 23Pero j-iyaj e cub tzꞌak tuj tbanel txꞌotxꞌ, juꞌtzen japenina tisenj xjal n-oc tbiꞌn tyol Dios bix n-el tniyꞌ tiꞌj. Tchunkꞌlal cyisen tken triwa tzin cykꞌoꞌn twitz. At juun nchi kꞌon syent twitz. At cabtl nchi kꞌon oxcꞌal twitz. Bix at cabtl tken nchi kꞌon winaklaaj twitz―tz̈i Jesús cye t-xnakꞌatz.
Techel tiꞌj triwa bixj kaꞌ cꞌul
24Bix e xiꞌ tkꞌoꞌn Jesús juntl techel cye xjal:
—Oj ttz̈ꞌiy tcawbil Dios twitz txꞌotxꞌ, tisenj ti nbaj oj ncuꞌx tawaꞌn jun xjal iyaj tuj tcojbil. At junxin xjal e cuꞌx tawaꞌn iyaj baꞌn tuj txꞌotxꞌ. 25Pero at jun koniyan ul t-enemiwa, bix tej cywutan cykil xjal, tuj ewjel e cuꞌx tawaꞌnxin kaꞌ cꞌul t-xol triwa, bix ajxin. 26Lwewa, tej tjaw pokꞌch triwa bix e takꞌ twitz, jax juꞌx e jaw pokꞌch kaꞌ cꞌul tuj. 27Tej tjaw pokꞌch triwa tuyax kaꞌ cꞌul, ul ke t-akꞌanal jxin taaw cojbil twitzxin, bix e xiꞌ cykbaꞌnxin texin: “Taat, ¿yaaꞌmpa nuk iyaj baꞌn e cuꞌx tawaꞌna tuj tcojbila? ¿Ti tten ma jaw pokꞌch nim kaꞌ cꞌul t-xol triwa?” tz̈ikexin. 28Bix aj ttzakꞌbeꞌnxin cyexin: “Tuꞌn jun xjal at tkꞌoj wiꞌja ma bint jlu,” tz̈ixin. Bix e xiꞌ cykanen t-akꞌanalxin texin: “¿Tajpey tuꞌn kxiꞌya tuꞌn tjatz kbakoꞌna kaꞌ cꞌul?” tz̈ikexin. 29Pero aj ttzakꞌbeꞌnxin: “Min, cuma ka ma jatz cybakoꞌna kaꞌ cꞌul, tuyax triwa cjawetz bakl cyuꞌna. 30E ttz̈ꞌiy kaꞌ cꞌul junx tuya triwa ojxe tpon tumel tuꞌn tjtxꞌet. Ojtzen tpon tumel tuꞌn tjaw chmet triwa, cxeꞌl nkbaꞌna cye chmol awal: ‘Tneelxix, cjawetz cychmoꞌna kaꞌ cꞌul bix cwel cymanoja tuꞌn tocx tuj kꞌakꞌ. Jatzente triwa, cychmoꞌncx tuꞌn tocx tuj ntxꞌutxꞌa,’ ntz̈iya,” tz̈i taaw cojbil―tz̈i Jesús.
Jun techel tiꞌj iyaj te mostaza
(Mr. 4:30-32; Lc. 13:18-19)
31Bix e xiꞌ tkꞌoꞌn Jesús juntl techel cye xjal:
—Oj ttz̈ꞌiy tcawbil Dios, ctz̈ꞌiyel tisen tten oj ncuꞌx tawaꞌn jun xjal iyaj te mostaza tuj ttxꞌotxꞌxin. 32Ja tzunj twitz mostaza, jatzen jun iyaj mas xmutzꞌ twitz cykilca twitz tiyꞌjil itzaaj. Pero oj toc te tzeeꞌ, mas tweꞌ cywitz cykilcatl itzaaj tuj tcojbil, bix najben tuꞌn cyajlan ke chꞌit tuj tkꞌab―tz̈ixin.
Techel tiꞌj levadura
(Lc. 13:20-21)
33Bix e xiꞌ tkꞌoꞌnxin juntl techel cye xjal:
—Tcawbil Dios ctz̈ꞌiyel tisen tten oj ntz̈ꞌiy kꞌotj tuꞌn levadura. Ocx tkꞌoꞌn jun xuuj levadura tuj kꞌotj te pan, bix e xiꞌ tkꞌoꞌnxuj oxe malbil kꞌotj tuj jun tcublel. Bix e jaw tz̈ꞌiy kꞌotj te pan tuꞌn levadura hasta tejxe tjaw punntzꞌaj―tz̈i Jesús.
Tej tkbante Jesús nimcꞌa techel tuꞌn t-xiꞌ tyeecꞌaxin cye xjal
(Mr. 4:33-34)
34Cykilcaj lu e tkbaxin cye xjal. Minxix e ttxꞌolbaxin, sino tuya techel yol tyolxin. 35Tej t-xiꞌ tkꞌoꞌnxin techel cye xjal juꞌwa, el jaxxix j-e tkba jun tyolel Dios jatxe ootxa. Tz̈i cyjulu: “‘Chin yolela tuya techel. Cxeꞌl nkꞌumena j-eꞌwen taꞌ jatxe tej mitknaꞌx tbint twitx txꞌotxꞌ,’ tz̈i Dios,” tz̈i jun tyolel Dios.
Tej t-xiꞌ ttxꞌolbaꞌn Jesús tiꞌ elpenina jtechel tiꞌj kaꞌ cꞌul
36E cyajtzen tcyeꞌyen Jesús ke nimxsen xjal, bix ocxxin tuj jun jaaꞌ. Bix ul lkꞌe ke t-xnakꞌatzxin tiꞌjxin, bix e xiꞌ cykbaꞌnxin:
—Najsama, txꞌolbantz keya ti elpenina jtechel tiꞌj kaꞌ cꞌul tuj cojbil―tz̈ikexin.
37Bix aj ttzakꞌbeꞌnxin:
—Jxjal e cuꞌx tawaꞌn j-iyaj baꞌn, jatzen xjalja Smaꞌn tuꞌn Dios tuꞌn tten cyuya xjal. 38Jcojbil, jatzen cykilca twitz txꞌotxꞌ. Yaltzen kej iyaj baꞌn, juꞌtzen japenina tisen kej xjal cyaj tcawbil Dios. Kej iyaj kaꞌ cꞌul, juꞌtzen japenina tisen kej xjal ncheꞌx lpe tiꞌj taaw il. 39Jxjal enemiwa e cuꞌx tawaꞌn kaꞌ cꞌul, jatzen japenina tisen taaw il. Bix jaatxꞌen, jatzen japenina tisen mancꞌbil kꞌij twitz txꞌotxꞌ. Kej chmol awal, ejeeꞌtzen kej tsanjel Dios tuj cyaꞌj. 40Tisenj njaw chmet kaꞌ cꞌul bix cxeꞌl tuj kꞌakꞌ, juꞌtzen pjel tuj mancꞌbil kꞌij. 41Cweletz nsmaꞌna ke n-ángela, bix qꞌuelex cyiiꞌn tuj ncawbila cykilca kej xjal n-oc cyipen tiꞌj tuꞌn cybinchantl niyꞌtl xjal il, bix xsunj cykilca kej xjal cycyꞌi tley Dios. 42Cxeꞌl nxooꞌna tuj kꞌakꞌ te junx maj, jatztzen chi ookꞌel bix cjawel kitxꞌitxꞌin t-xeeꞌ twitz cye. 43Jatzen kej xjal jiquen, chi koptzꞌajel tuj tcawbil Cyman Dios tisen tken kꞌij.
Cyjkom cyẍquina tuꞌn tel cyniꞌya tiꞌj nyola, bix cybisenx tiꞌj―tz̈i Jesús cye t-xnakꞌatzxin.
Jun techel tiꞌj kꞌinemabl eꞌwen
44Bix e xiꞌ tkbaꞌntl Jesús:
—Jtajbil jun xjal tiꞌj tcawbil Dios tisenj tajbil jun xjal tiꞌj jun jawnex kꞌinemal. Ka ma cnet tuꞌnj xjal akꞌanal jun kꞌinemal makuꞌn taꞌ tuj jun cojbil cwelex teꞌwenxin juntl maj, bix tuya cykil tcꞌuꞌj cxeꞌl tqꞌueyen cykilca at texin, tuꞌntzen tlokꞌonte ja cojbil lu tuya kꞌinemal otk tilxin tuj.
Jun techel tiꞌj perla wiꞌyelxsen
45Jax jtajbil jun xjal tiꞌj tcawbil Dios tisenj tajbil jun qꞌueyel cyiꞌj perla. 46Ka ma cnet jun perla wiꞌyelxsen tuꞌn, cxeꞌl tqꞌueyen cykilca at texin, tuꞌntzen tlokꞌontexin ja perla lu.
Jun xiyꞌpa
47Jax juꞌx, jnbaj oj tul tcawbil Dios tisenj nbaj oj nxiꞌ cyxooꞌn tzyul quis̈ cyxiyꞌpa tuj tnijabel aꞌ. Cykilca wik quis̈ ntzyet cyuꞌn. 48Ojtzen tnoj cyxiyꞌpa, cjawetz cyiiꞌn cyxiyꞌpa tuj aꞌ bix cxeꞌl kꞌiꞌn cyuꞌn ttziiꞌ aꞌ. Chi cwel ke bix cjawetz cyscyꞌoꞌn quis̈ baꞌn tuꞌn tcub cykꞌoꞌn cyuj chiꞌl. Pero kej quis̈ yaaꞌn baꞌn, qꞌuelex cyxooꞌn. 49Juꞌtzen pjel cyuj mancꞌbil kꞌij. Chi tzaal tsanjel Dios tuj cyaꞌj, bix qꞌuelel cypaꞌn kej xjal kaꞌ cyiꞌj xjal jiquen. 50Bix chi xeꞌl cyxooꞌn kej kaꞌ tuj kꞌakꞌ junx maj, jatztzen chi ookꞌel bix cjawel kitxꞌitxꞌin t-xeeꞌ twitz cye tuꞌn takꞌ.
Jxnakꞌtzbil acꞌaj bix j-ootxa
51¿Mapa tzꞌel cyniꞌya tiꞌj cykilca kej yol lu?―tz̈i Jesús cye t-xnakꞌatz.
—Ma tzꞌel kniꞌya tiꞌj, Taat―tz̈ikexin.
52Bix e xiꞌ tkbaꞌnxin cyexin:
—Ka juꞌ ma tzꞌel cyniꞌya tiꞌj nxnakꞌtzbila tiꞌj tcawbil Dios, matzen chi oca te xnakꞌtzal. Ejeeꞌy tisen jun taaw jaaꞌ baꞌn tuꞌn t-xiꞌ tkꞌoꞌn cykilca baꞌn cye ke te tja. Baꞌn t-xiꞌ cyxnakꞌtzaꞌna jaxxix yol te ootxa, bix baꞌn tuꞌn t-xiꞌ cyxnakꞌtzaꞌna kej jaxxix yol acꞌaj yaaꞌn telniyꞌ nejl―tz̈i Jesús.
Tej tpon Jesús tuj tnom Nazaret
(Mr. 6:1-6; Lc. 4:16-30)
53Tejtzen tbaj tkbaꞌn Jesús kej techel lu, iyꞌtzen tuj ja tnom lu, 54bix ulxin tuj ttanemxin. Bix tej tocxxin tuj camon jaaꞌ te xnakꞌtzbil tyol Dios, akꞌxin xnakꞌtzal cye xjal. Bix e jaw kleeꞌ kej xjal te ttanemxin tiꞌjxin, bix e xiꞌ cykbaꞌnxin:
—¿Jaaꞌtzen ma tzaaꞌ tcnoꞌn jxjal lu nimxsen tnaabl? ¿Bix jaaꞌtzen ma tzaaꞌ tipemal te kꞌanl xjal? 55¿Yaaꞌmpatzen nuk tcwal carpintero? ¿Yaaꞌmpatzen ja María ttxuxin, bix yaaꞌmpatzen Jacobo bix José bix Simón bix Judas ke titzꞌenxin? 56¿Bix yaaꞌmpa najl cykilca ke tanebxin kxol tzalu? Juꞌ tzunj, ¿jaaꞌtzen ma tzaaꞌ tcnoꞌn jxjal lu jtipemal?―tz̈i ke xjal. 57Juꞌ tzunj, min ocxix cybiꞌn xjal aj Nazaret tyolxin.
Juꞌ tzunj, e xiꞌ tkbaꞌn Jesús cyexin:
—Jun tyolel Dios jaaꞌxja tumel n-oc ocslette. Ja tzunj tuj ttanem bix tuj tja min tzꞌoc ocslet―tz̈ixin.
58Cuma min e cyyocsla ke aj ttanemxin tiꞌjxin, juꞌ tzunj yaaꞌn nimxix e tyeecꞌaxin tipemalxin cyxolxin.
Àwon tá yàn lọ́wọ́lọ́wọ́ báyìí:
SAN MATEO 13: mamTS
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2000, Wycliffe Bible Translators, Inc. All rights reserved.
