SAN MATEO 14
14
Tej tcyim Juan Bautista
(Mr. 6:14-29; Lc. 9:7-9)
1Cyujtzen ja kꞌij lu, e tbi jxin gobernador Herodes tpocbal jnbint tuꞌn Jesús. 2Bix e xiꞌ tkbaꞌnxin cye xjal ajben texin:
—Ja te Juan Bautista ja xjal lu. Ma jatz itzꞌj juntl maj cyxol cyimne, bix juꞌ tzunj at nim tipemal tuꞌn tbint cykilcaj lu tuꞌn―tz̈i gobernador.
3Tz̈itzen Herodes juꞌwa cuma nejl otk cub cytzyuꞌn tsoldadoxin ja Juan bix otk cub cyẍpoꞌnxin bix otk tzꞌocx cykꞌoꞌnxin tuj tzeeꞌ. E bint tuꞌn Herodes juꞌwa cuma otk tzꞌel tikenxin t-xuꞌl titzꞌenxin Felipe, Herodías tbixuj. 4Nuk tuꞌnj otk txiꞌ tkbaꞌn Juan texin: “Yaaꞌn tumel tuꞌn toc t-xulena t-xuꞌl titzꞌena.” 5Otk tajbexin tuꞌn tcub byet Juan, pero min e xiꞌ tkbaꞌnxin cye tsoldadoxin tuꞌn tcub byet, cuma tcyꞌixin tuꞌn tjaw cykꞌoj xjal tiꞌjxin. Tuj cywitz xjal, jun tyolel Dios ja Juan.
6Pero mancꞌbiltzen, otk cub byet Juan tuꞌn tlaj t-xuꞌl Herodes. Tjapantzen bajxin tuꞌn tiyꞌ tkꞌijxin, bix ocx jtxin tal Herodías bixel twitzxin bix cywitz xjal ttxlajxin. Baꞌnxsen eꞌla bixentxin tuj twitzxin. 7Juꞌ tzunj, e xaꞌ tkbaꞌnxin tetxin: “Alcyexja ctzaal tkanena weya, jacꞌa txiꞌ nkꞌoꞌna. Tzkinn Dios,” tz̈ixin. 8Nejl, e xiꞌtxin kanlte te ttxutxin ti taj ttxutxin tuꞌn t-xiꞌ tkanentxin texin. Tej tul meltzꞌaj twitz Herodes, e xiꞌ tkbaꞌntxin texin: “Waja tuꞌn ttzaj tkꞌoꞌna twiꞌ Juan Bautista weya tuj jun lak,” tz̈i tzuntxin. 9Otk tzꞌel kaꞌ tkanbiltxin twitzxin, pero cuma ya otk cyaj tkꞌoꞌnxin tyolxin tuya jun jurament bix cuma ya mix e cwaꞌ tchꞌixbeꞌnxin tyolxin cywitz ttxocanxin, e tcuyaxin tuꞌn tkꞌoj twiꞌ Juan tetxin, 10bix e xiꞌ tchkꞌoꞌnxin junxin tsoldadoxin te kꞌilbel twiꞌ Juan. Bix el ttxꞌomanxin twiꞌ Juan, 11bix e pon tiiꞌnxin tuj jun lak. Bix e xiꞌ tkꞌoꞌnxin tetxin, bix e xiꞌ tkꞌoꞌntltxin te ttxutxin.
12Bix otk pon cab xjal lepchec tiꞌj Juan kꞌilbetz t-xumlal Juan bix e cuꞌx cymakuꞌn, bix e xiꞌ kbalte tpocbal tcyimlen Juan te Jesús.
Tej cywaaꞌn jweꞌ mil xjal tuꞌn Jesús
(Mr. 6:30-44; Lc. 9:10-17; Jn. 6:1-14)
13Tejtzen toc tbiꞌn Jesús otk cub byet Juan, el lkꞌexin cyuya t-xnakꞌatzxin bix e xiꞌkexin tuj jun barc jaaꞌ min-al xjal najl. Pero oc cybiꞌn xjal jaaꞌ e xaꞌ Jesús, bix txolen etz ke xjal tuj cytanem tuꞌn cypon tiꞌjxin. 14Tej tetzxin tuj barc, e tilxin nimxsen xjal, bix oc kꞌaꞌben tcꞌuꞌjxin cyiꞌ xjal, bix akꞌxin kꞌanl kej yaab cyxol. 15Tejtzen chꞌitk tex kꞌij, oc lkꞌe ke t-xnakꞌatzxin tuyaxin, bix e xiꞌ cykbaꞌnxin texin:
—Taat, tzalu mintiiꞌxse waabj baꞌn tcnet bix ya kalatltzen. Kꞌumenx cye xjal tuꞌn cyxiꞌ lokꞌol cywa tuj kej cocꞌ tnoma―tz̈ikexin.
16Pero e xiꞌ tkbaꞌn Jesús cyexin:
—Yaaꞌn il tiꞌj tuꞌn cyxiꞌ xjal. Ejeeꞌx cyey cykꞌonx cywa xjal.
17Bix e xiꞌ cykbaꞌnxin texin:
—Nuk jweꞌ mukan tuya caꞌba quis̈ at kuyena―tz̈ikexin.
18—Cyiiꞌntza nwitza―tz̈ixin.
19Bix e xiꞌ tkbaꞌnxin tuꞌn cycub ke ke xjal tuj polen tuj chkꞌajlaj. Bix e xiꞌ ttzyuꞌnxin jjweꞌ pan tuyaj caꞌba quis̈, bix e jaw tcyeꞌyenxin twitz cyaꞌj, bix e xiꞌ tkꞌoꞌnxin chjonte te Dios tiꞌ waabj. Bix e cub tpiẍen pan bix e xiꞌ tkꞌoꞌnxin cye t-xnakꞌatzxin, tuꞌntzen t-xiꞌ cypaꞌnxin cyxol xjal. 20Bix cykilca xjal e waaꞌnke tejxe tnoj cycꞌuꞌj. Tej cybaj waaꞌn xjal, bixsen e jaw chmet ttxꞌakan waabj otk cyaj, bix e noj cablaaj chiꞌl. 21Atle jweꞌ mil xinak e waaꞌn, bix yaaꞌn cyuyax ke xuuj bix cyuyax ke cwalbaj oc te tajlal.
Tej tbet Jesús tibaj tnijabel aꞌ
(Mr. 6:45-52; Jn. 6:15-21)
22Tejtzen tbaj juꞌwa, bix e xiꞌ tkbaꞌn Jesús cye t-xnakꞌatz tuꞌn cycuꞌxxin tuj barc tuꞌn cyiyꞌx nejlxin twitzxin jlajxitl tnijabel aꞌ. Jatzen te Jesús, e cyaj tenxin kbalte cye xjal tuꞌn cyaj cyja. 23Tej tzunj tpon baj tyolxin cyuya xjal, bix e jaxxin tjunal twiꞌ witz te yolel tuya Dios. Tcubtzen klolj, bix e tenxin tjunalxin. 24Pero ke t-xnakꞌatzxin, eteꞌcxin tuj barc tmij tnijabel aꞌ nakch ttziiꞌ aꞌ. Bix cyiw tkitj barc tuj aꞌ, cuma nimxsen oc punntzꞌaj aꞌ tuꞌn jun nintzaj cykꞌiꞌk. 25Te chꞌitk cyskixxin, bix e xiꞌ bet-xin tibaj aꞌ tuꞌn tponxin cyiꞌjxin. 26Tej cylontexin nbet-xin tibaj aꞌ, e jawxsen seyꞌpajkexin, bix e xiꞌ cykbaꞌnxin:
—Jun t-xneqꞌuetzꞌil biman nbet tibaj aꞌ―tz̈ikexin, bix akꞌkexin s̈-il tuꞌn ttz̈i cyiꞌj.
27Pero lwewa naj e xiꞌ tkbaꞌn Jesús cyexin:
—Cynimsam cycꞌuꞌja. Inayen weja. Miꞌn tzaj ntz̈iya cyiꞌja―tz̈ixin.
28Aj ttzakꞌbeꞌn Pedro texin:
—Taat, ka jaxxix ka jay, kbantza weya tuꞌn nxiꞌya tuyey tibaj aꞌ.
29Bix e xiꞌ tkbaꞌnxin te Pedro:
—Cu ttzaja.
Juꞌ tzunj, e cuꞌtz Pedro tuj barc bix akꞌ betel tibaj aꞌ tuꞌn tpon tuya Jesús. 30Pero tej tnaꞌnte Pedro tipemal cykꞌiꞌk, e tzaj ttz̈i tiꞌjxin, bix n-akꞌ xeꞌl bajtlxin tjakꞌ aꞌ, bix e jaw s̈-in:
—Taat, ¡chin tclaꞌy!
31Bix e xiꞌ tnukpiꞌn naj Jesús tkꞌab te tzyulte te Pedro, bix e xiꞌ tkbaꞌnxin:
—Yaaꞌn nimxix ma tzꞌoc ke tcꞌuꞌja wiꞌja. ¿Tiken xbaj tcꞌuꞌja wiꞌja?―tz̈ixin.
32Tej tjaxxin tuj barc tuya Pedro, nweꞌtl cykꞌiꞌk. 33Ejeeꞌj t-xnakꞌatzxin e ten tuj barc, e cub majekexin t-xeeꞌ tkenxin te nimsalte texin. Bix e xiꞌ cykbaꞌnxin:
—Tzinen taꞌ Tcwal Diostey.
Tej tul cynaabl ke yaab tuꞌn Jesús tuj Genesaret
(Mr. 6:53-56)
34Tejtzen cyiyꞌxin jlajxe aꞌ, e ponkexin tuj ttxꞌotxꞌ Genesaret. 35Tej tel cyniyꞌ xjal aj Genesaret ka ja Jesús otk pon, e xiꞌ cysmaꞌn cysanjel kbalte tuj tnom bix cyuj cocꞌ tnom. Bix e xiꞌ cyiiꞌn xjal ke yaab twitzxin. 36Bix oc cycubsaꞌn xjal cywitz texin tuꞌn tcuyanxin tuꞌn toc cymocoꞌn yaab amatle nuk tiꞌ ttxaꞌn t-xbalenxin. Bix aljxe xjal oc moconte texin, ul cynaabl.
Àwon tá yàn lọ́wọ́lọ́wọ́ báyìí:
SAN MATEO 14: mamTS
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2000, Wycliffe Bible Translators, Inc. All rights reserved.
