Marko 4
4
Ikataniso lya mwandi mbeu
(Matayo 13:1-9; Luka 8:4-8)
1Nao Jesu kadyowa kuchila sena mbalimbali ya bahari ya Galilaya. Na ikoghano ibwaa lya wandu lyikamkoghanila, hata kangila kele ishua na kukala kitembo, na wandu wakakala mbalimbali ya bahari. 2Naye kawafundisa malagho mengi kwa makataniso, naye kele mafundiso ghake kawauza, 3“Sikizileni! Mwandi oghendile kuwanda mbeu. 4Nao ilyi eluo kewanda mbeu, zimoju zikapotoka ngileni, zikaduwo ni nyonyi. 5Mbeu zimoju zikapotoka kele mawe andu sikowesi msanga ghuketi. Mbeu zikafuma shoshowa, kwa kukala msanga sighongilile mweni. 6Nao ijua lyifuma na kubia, lyikaziisha, na kwa kukala miriginga siingilile mweni, zikanyala. 7Zimoju zikapotoka mieni, na miya ikazeguanya nazo na kuzisira, nazo sizivele mavalo ghengi. 8Zimoju zikapotoka kele msanga ghwaloli, zikafuma na kuzegua na kuvala mavalo: zimoju ndembe mirongo mitatu, zimoju ndembe mirongo mitandatu, na zimoju ndembe ighana.” 9Nao Jesu kaghora, “Uyu ewo na masikilo ghesikila, asikile.”
Chausa cha makataniso
(Matayo 13:10-17; Luka 8:9-10)
10Nao ilyi Jesu eluo keng'weri, walye wekezanye, na wairimi ikumi na waili wakamkotela kutambula kwa ikataniso ilyi. 11Naye kawauza, “Inyo mwahawo kumanya ngasu za uzuri ghwa Mlungu, ela kwa walye wa shighati, kila kindu ni kwa makataniso. 12Eri,
‘Hata wakanalole
siwaone;
na hata wakanasikile
siwatambule;
eri siwaghaluke kwa Mlungu
na kufwilo waya.’”
Jesu kutambula ikataniso lya mwandi mbeu
(Matayo 13:18-23; Luka 8:11-15)
13Nao Jesu kawauza, “Ado simtambukilo ni ikataniso ilyi? Ndamu m'dimagha ije kutambukilo ni makataniso ghose? 14Mwandi wawanda ilagho lya Mlungu. 15Na wandu wamoju ni sa mbeu ziwandilo kele ngila; awa wasikila ilagho, na shwa ng'weri Shetani weja na kulyifunya ilagho lyiwandilo amweni kwawe. 16Na wandu wazima ni sa mbeu ziwandilo kele mawe; awa wasikila ilagho na kulyihokera kwa kuboelo; 17ela siwawesi miriginga ingi amweni kwawe. Warumaghia kachache na ngelo ya kusirimiso ango kugusoguso ilyi yeja kwa undu ghwa ilagho, wasigha idumusi. 18Na wandu wamoju ni sa mbeu ziwandilo kele miya; wo wasikila ilagho, 19ela maemboembo gha urumengu na maboelo gha mali na beha ya vilambo, vangilila lyilya ilagho hata silyidimile kuvala matunda ghengi. 20Ela walye wandu wawandilo kele msanga ghwaloli, ni awa wasikila ilagho na kulyiwata. Nawo wavala matunda: wamoju mirongo mitatu, wamoju mirongo mitandatu, na wamoju ighana.”
Taa mwenimweni ya pishi
(Luka 8:16-18)
21Nao Jesu kawauza, “Ado taa yanaletogho iiko mwenimweni ya pishi ango mwenimweni ya ulili, na si kele andu kwa ighulu? 22Sikwesi kindu chingi chivisilo sicheonekagha, hata sikwesi undu ghungi ghuvisike sighofunyo mlangazini. 23Uyu ewo na masikilo ghesikila, asikile.”
24Sena kawauza, “Kulindeni na agha msikilagha; kipimo icho mpimilagha nacho wambenyu, nicho chenyi Mlungu empimila nacho, sena mjejuzilo. 25Kwani uyu ewo na vingi ujejuzilo, na uyu sewesi, hata ichi ewo nacho usokogho.”
Ikataniso lya mbeu izeguwagha
26Nao Jesu kaghora, “Uzuri ghwa Mlungu ni sa mundu awandile mbeu mbweni. 27Naye watungura na kiro na kuuka na msenya, nazo mbeu zafuma, zazeguwa, iye semanyagha selyi zizeguwagha. 28Kwani msanga ghwenyi ghwadea mbeu izeguwe na ivale! Hambiri mghuchu ghwafuma, ima changa, nao kudua changa chajula ndembe. 29Nao ilyi viro vairwa, wausa ndaghala apase viro, kwani ngelo yekwasha mvono yafika.”
Ikataniso lya ndembe ya haradali
(Matayo 13:31-32,34; Luka 13:18-19)
30Naye Jesu kaghora, “Uzuri ghwa Mlungu ghufwananiso na kimuni, ango nini chikatanisogho nagho? 31Ghwafwanana na ndembe ya Haradali iwo njache kuisa ndembe zose ngelo iwandogho; 32ela ilyi yawando, yazegua na kukala mwiti mubwaa kuchumba miti yose, na kele mbashe zake mbwaa, nyonyi zeja zawaghala vichunguri vawe.”
33Na kwa makataniso sa agha Jesu kachila ilagho, kuirimana na kumanya kwawe. 34Hata sadimile kughora nawo sikwewo na makataniso, ela wairimi wake kawaghorera mwazi kila kindu ngelo weo wenyi.
Jesu kunyamaza mbeo mbwaa
(Matayo 8:23-27; Luka 8:22-25)
35Nao nahafukeni lyilya ijua lyenyi, Jesu kawauza wairimi wake, “Ndokoni tiwambuke chambuko chilya.” 36Nawo wairimi wakawasigha wandu, wakaghenda andu lyilya ishua lyeluo, wakaghendanya. Na koluo mashua zimoju ziirimane nayo. 37Nao mbeo mbwaa ikakwita na kulyisindika ishua, na meji ghakadyowa kungila. 38Naye Jesu oluo nanyuma atungure kele muto; nao wakamnula wekemuza, “Mwalimu, ado sumanyagha kamba tendehaita?”
39Nao Jesu kauka, kaikemela mbeo na kuiuza bahari, “Nyamala chwi!” Nao mbeo ikanyamala chwi. 40Nao kawauza, “Kudani mwadea wogha? Ado simwesi idumusi?” 41Nao wakangilo ni kiture, wakauzana wenyi, “Ni mundu muni uyu? Hata esikilogho ni mbeo na bahari!”
Àwon tá yàn lọ́wọ́lọ́wọ́ báyìí:
Marko 4: SAGALLANT
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
(C) The Bible Society of Kenya, 1993
