Marko 5
5
Jesu kuboesa mundu wa pepo
(Matayo 8:28-34; Luka 8:26-39)
1Nao Jesu na wairimi wake wakafika chambuko cha bahari ya Galilaya kele isanga lya Wageraseno. 2Jesu aghenda afuma kele ishua, kakoghana na mundu eluo na pepo kefuma kele makaburi. 3Uyu mundu oluo kekala makaburini kwa kukala sikowesi mndungi edimile kumfunga hata kwa minyororo; 4kwani kengi ofungilo na vigogo na minyororo, ela kaipasapasa minyororo na vigogo kavivunjavunja, na sikwesi mndungi eluo kemdima. 5Kiro na msenya oluo makaburini na mghondini, naye oluo kekema na kukushuhashuha na mawe.
6Naye aghenda amwona Jesu kamkimbilila na kumtasa. 7Kakema na lwaka lubwaa keghamba, “Wanashaile kimuni kwangu Jesu Mwana wa Mlungu ewo Ighulu? Nakuvoya kwa izina lya Mlungu swanitirire.” 8(Kwa kukala oiuzile, “Pepo iwase, mfume uyu mundu.”)
9Nao Jesu kamkotela, “Wanaitogho ani?” Naye katumbulila, “Izina lyangu ni Legioni, kwa kukala te wengi.” 10Naye kamlalama sazifunye pepo shighati ya isanga lyilya.
11Nao koluo na uranu ghwa nguluwe ghukeliso mghondini. 12Nao pepo zikamvoya Jesu, “Tighenze kele nguluwe, eri tizingile zo.” 13Naye Jesu kazidumusila. Nao zikamfuma ulya mundu na kungila kele nguluwe, na uranu ghose ghwa nguluwe elfu mbili zikakimbila na kudoromoka, na kungila baharini na kumalika.
14Walisa wa nguluwe wakakimbila, wakaghenda wakawaghorera wandu wa muzi na isanga lyilya uvoro ughu. Nao wandu wekeja kuona agha ghadeike. 15Nawo wekeja kwa Jesu na kumwona ulya mundu eluo na pepo ya legioni, kitembo, arwara nguo na akili zake zio karakara; wakangilo ni wogha. 16Nawo awa waonile agha wakaeresa uvoro ghwa agha waonile ighulu ya mundu wa pepo na nguluwe. 17Nawo wandu walye wakamvoya Jesu afume kele isanga lyawe.
18Nao ilyi Jesu eluo kengila kele ishua, ulya mundu eluo na pepo kamvoya waghendanye. 19Ela Jesu kalegha, kemuza, “Gala kwa wandu wako na uwaghorere selyi Bwana akudeila malagho mabwaa, na selyi akuonela mbazi.” 20Nao ulya mundu kaghenda ngila zake na kudyowa kueresa uvoro ghwa ghaloli adeililo ni Jesu kele isanga lyose lya Dekapoli, na wandu wose wakashinika.
Mchana wa Jairo na muke awatile nguo ya Jesu
(Matayo 9:18-26; Luka 8:40-56)
21Nao Jesu aghenda awambuka na ishua chambuko, wandu wengi wakamtindirira, naye oluo mbalimbali ya bahari. 22Nao mubwaa mumoju wa sinagogi aitogho Jairo kamjila, naye amwona Jesu, kamgwila maghuluni, 23kamvoya, kemuza, “Mwana wangu ni mkongo kavui na kufwa. Njuu umwikilile mikonu, eri aboe na akale moyo.” 24Nao Jesu kaghendanya naye na wandu wakamwirima na kumtindirira.
25Nao koluo na muke mumoju eluo na ukongo ghofunya bighati miaka ikumi na mili. 26Naye osirime kwa kurighito ni waghanga wengi na kulipa mali yake yose; hata sani sadimile kuboa kungi, ela ukongo ghwake ghukajuzilika. 27Naye aghenda asikila uvoro ghwa Jesu, keja nanyuma yake kele makoghano na kuwata nguo yake. 28Kwani oririkanye ngoloni kwake, “Nikawata tu nguo yake, nibowagha.”
29Nao iyo ngelo yenyi, bighati yake ikaoma, naye kasikila mulini kwake kamba waboa. 30Naye Jesu kamanya iyo ngelo yenyi, andu ndighi zamfuma; kwa hung'u kawaghalukila makoghano, kakotela, “Nani aniwata nguo yangu?” 31Nao wairimi wake wakamuza, “Ado suonagha selyi makoghano wakutindirira, nawe ughoragha, ‘Nani aniwata?’”
32Naye Jesu kalola gasi zose aone nani amwata. 33Ela ulya muke, kemanya mwenyi agha ghadeike kwake, keja na wogha na kugaganika, kagwa hambiri yake, kamghorera fulo yose. 34Nao Jesu kamuza, “Mwanwangu, idumusi lyako lyakuboesa, ghenda na sere, ubowe ukongo ghwako.” 35Nao ilyi Jesu eluo keghora hung'u, keja mundu kufuma nyumba kwa Jairo na kamuza, “Mwana wako wafwa; ndamu nini sena umsirimisiragha Mwalimu?” 36Ela Jesu satalile ghalye ghaghoriro kungi, kamuza mubwaa wa sinagogi, “Swadee wogha; uwe dumusa tu.” 37Naye Jesu sadumusile mndungi airimane naye, sala Petro, na Jakobo na Johana wakwawe Jakobo.
38Naye Jesu aghenda afika nyumba kwa Jairo, kadoka wandu wekekema na kulila na kushighira. 39Aghenda angila nyumba, kawauza, “Kudani mkemagha na kulila, mwanake safwile anduangi, ela ondetungura.” 40Nawo wakamseka. Ela iye kawafunya wandu wose shighati; naye kangila alye andu mwanake eluo ngila mojori na tatie na mee, na walye wairimi ekezanye nawo. 41Kamwata mkonu keghamba, “Talitha kumi!” (Kutambula kwake, “Mchana, nakuza uuke!”) 42Nao shwa ng'ori ulya mchana kauka, kaghenda, kwa kukala oluo na miaka ikumi na mili. Na wose weluo alye wakashinika. 43Ela Jesu kawauza siwamghorere mndungi malagho agho. Kafunya mlomu ahawo kindu chelya.
Àwon tá yàn lọ́wọ́lọ́wọ́ báyìí:
Marko 5: SAGALLANT
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
(C) The Bible Society of Kenya, 1993
