Matayo 19
19
Jesu kufundisa ighulu ya kuleghana
(Marko 10:1-12)
1Nao Jesu aghenda amalila kughora agha, kafuma Galilaya kaghenda Judea chambuko cha Jordani. 2Na makoghano mabwaa ghakamwirima na anyalye kawaboesa.
3Nao Wafarisayo wamoju wakamjila wekemtima kwa kumkotela, “Ni karakara na Sheria mundu kumulegha mkwake kwa chausa icho chose?” 4Jesu kawatumbulila, “Ado simushomile kamba kufuma kudyowa uyu aumbile wanaumbile mlume na muke? 5Na Mlungu kaghora, ‘Kwa hung'u mundu umusighagha tatie na mee na kuwatana na mkwake na awa waili wejekala muli ghumojori.’ 6Na kwa hung'u siwekalagha waili sena, ela muli ghumojori. Kwa hung'u ichi chiwataniso ni Mlungu, mdamu sachitaghanye.” 7Wafarisayo wakamkotela, “Kudani ndamu Musa aghorire mundu amuhawe muke wake barua ya kumlegha, ima amuleghe?” 8Jesu kawauza, “Kwa kukala ngolo zenyu zanakulile niko Musa kamudumusila kulegha wake wenyu. Ela kufuma kudyowa sikoluo hung'u. 9Nemi namuza uyo wose emuleghagha mkwake na kulola mzima sala kwa kuzinga wamalila kuzinga.”
10Wairimi wake wakamuza, “Ikakala ni hung'u kwa mundu na mkwake, siifweni kulola.” 11Ela Jesu katumbulila “Si walume wose wedimagha kuwata ifundiso ilyi sala walye wasaghulo ni Mlungu. 12Kwani kuwo wandu wavelo siwedimagha kulola, na wadeilo ni wandu siwalole, na walye siwelolagha kwa undu ghwa Uzuri ghwa mlunguni. Uyu edimagha kuwata agha awate.”
Jesu kuwabariki wanake wachache
(Marko 10:13-16; Luka 18:15-17)
13Nao wandu wamoju wakamuletela Jesu wanake kamba awaikilile mikonu na kuwalombela, ela wairimi wakawakemela. 14Ela Jesu kaghora, “Sigheni wanake weje kwangu simwawaime, kwani Uzuri ghwa Mlungu ni ghwa wandu sa awa.” 15Naye kawaikilila mikonu nao kaghenda ngila zake.
Mzuri eluo mundu wa irika
(Marko 10:17-31; Luka 18:18-30)
16Nao ijua imoju, mundu mumoju kamjila Jesu keghamba, “Mwalimu, ni ghore muni zaloli nideagha eri nipate umana ghwa kale na kale?” 17Jesu kamuza, “Kudani unikotelagha ighulu ya uloli? Kuwo na mumojori waloli. Ilyi washaya kungila kele umana wata milomu.” 18Ulya mundu kamuza, “Milomu muni?” Jesu kamuza, “Swaulaghe, Swazinge, Swaiwe, Swamzighirire mumbenyu kwa ndimi. 19Mhawe ishima tatio na meo na umshaye mumbenyu sa uwe mwenyi.” 20Ulya mundu wa irika kamtumbulila, “Agha ghose naghawata kufuma unake ghwangu, ndamu nini nasowa?” 21Jesu kamuza, “Ilyi washaya kukala kirani kamare, ghenda utaghe vose uwo navo, uwahawe wakiwa, newe ujekala na mali mlunguni, nao ima uje uniirime.” 22Nao ulya mundu wa irika aghenda asikila agha kaghenda ngila zake afuruse, kwani oluo na mali nyingi.
23Nao Jesu kawauza wairimi wake, “Fulo namuza lyanakulile kwa mundu wa mali kungila kele Uzuri ghwa mlunguni. 24Sena nendeghora, Kwanawanguwe kwa ngamila kungila kele ilanga lya sinzano kuchumba kwa mzuri kungila kele Uzuri ghwa Mlungu.” 25Nao wairimi wasikila hung'u wakashinika na ndighi wakaghora, “Ndamu nani edimagha kukila?” 26Ela Jesu kawazighana na kawauza, “Kwa mdamu agha sighedimikagha, ela kwa Mlungu agha ghose ghadimika.”
27Nao Petro katumbulila, “Zighana tanasighile vindu vose na tikakuirima. Ndamu nini tipatagha?” 28Jesu kawauza, “Fulo namuza, kele urumengu mwishi ngelo Mwana wa Mdamu ekalilagha kifumbi chake cha nguma, inyo mwoluo mkeirimana nemi, nanyose mjekala kele vifumbi ikumi na vili va uzuri, mtaghanye mbari ikumi na mbili za Israeli. 29Na uwo wose asighile nyumba ango wana wakwawe wa walume ango wana wakwawe wa wake ango tatie ango mee ango wana ango mbuwa kwa undu ghwangu, ujepata mandu ighana na angile kele umana ghwa kale na kale. 30Ela wengi weo wa hambiri wejekala wa nyuma, na wa nyuma wejekala wa hambiri.
Àwon tá yàn lọ́wọ́lọ́wọ́ báyìí:
Matayo 19: SAGALLANT
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
(C) The Bible Society of Kenya, 1993
