Matayo 18

Nani mubwaa?

(Marko 9:33-37; Luka 9:46-48)

1Nao ilya ngelo wairimi wakamjila Jesu wekeghora, “Nani ewo mubwaa kuchumba kele uzuri ghwa Mlungu?” 2Jesu kampang'a mwanake mchache kamwika ghati yawe, 3Kawauza, “Fulo namuza ngera simoghalukagha na kukala sa wanake wachache, na lyingi simungilagha kele Uzuri ghwa Mlungu. 4Uyo wose ekuselezagha mwenyi sa mwanake, niye ewo mubwaa kuchumba kele Uzuri ghwa mlunguni. 5Uwo wose emuhokeragha mumoju wa mwanake mchache sa uyu kwa izina lyangu wanihokera imi.

Kutimo kudea kaung'a

(Marko 9:42-48; Luka 17:1-2)

6“Mundu uyo wose emushekereragha mumoju wa awa wachache wanidumusa kugwa kele idumusi, ikalagha ni baha afungo singo na lwala lubwaa lwesha na akumbo baharini amalike. 7Ni bugha kwa urumengu kwa kushekerera wandu kugwa kele idumusi; kwani ni suti vishekerero vije, ela ni bugha kwake uyu mundu eletagha vishekerero!

8“Ngera mkonu ghwako ango kighulu chako chakushekerera kugwa kele idumusi, chipase na uchikumbe noko! Ni baha kwako kungila kele umana uwo na mkonu ghumojori ango kighulu kimojori kuchumba kukala na mikonu mili ango maghulu maili na kukumbo kele moto ghwa kale na kale. 9Na ngera iziso lyako lyakushekerera kugwa kele idumusi, lyikule na ulyitaghe noko. Ni baha kwako kungila kele umana uwo na iziso imojori kuchumba kukala na meso maili na kukumbo kele moto ghwa jehanamu.

Ikataniso lya ng'onzi ilaghaye

(Luka 15:3-7)

10“Kulindeni simwamumenye ungi wa awa wachache, kwani namuza kamba, wana malaika wawe weo wekeona ushu ghwa Aba ewo mlunguni. [ 11Kwani Mwana wa Mdamu wanajile kukiza ichi chilaghaye.] 12Mririkanyagha ije? Ngera mundu ewo na ng'onzi ighana kalaghayo ni mojori, sesighagha zilya mirongo kenda na kenda mghondini aghende ahade ilya mojori ilaghaye? 13Na ilyi aiona; fulo namuza, uboelogho ighulu yake kuchumba kwa zilya mirongo kenda na kenda sizelaghaye. 14Kwa hung'u si mashayo gha Tatio ewo mlunguni mumoju wa awa wachache ahaite.

Kufunyana makosa

15“Ngera wakwenyu akukosa, mghendele umughorere makosa ghake uwe mwenyi naye. Ilyi akusikila wamupata wakwenyu. 16Ela ngera sekusikile, twala mundu mumojori ango waili ngila mojori newe, eri kila ilagho lyimanyikane kwa ushuhuda ghwa wandu waili ango watatu. 17Na ilyi alegha kuwasikila, ghorera ikanisa. Na ilyi alegha kusikila ikanisa, msighe akale sa mundu semweni Mlungu na mfunyi Kodi.

Kufunga na kufungula

18“Fulo kwenyi namuza icho chose muchifungilagha urumenguni chijefungilo mlunguni, na icho chose muchifungulagha urumenguni chijefungulo mlunguni 19Sena ndemuza, ngera wandu waili aha urumenguni wapatana kulomba kindu chingi, icho wejedeilo ni Aba ewo mlunguni. 20Kwani andu waili ango watatu wakoghana kwa izina lyangu namose nio anyalye ghati yawe.”

Ikataniso lya mtumishi sefwilagha waya

21Nao Petro kamujila Jesu na kumuza, “Wakwetu unikosagha mandu malinga nikemfwila waya? Hata mandu mfungate ba?” 22Jesu kamuza, “Sikuuzagha mandu mfungate, ela mirongo mfungate mandu mfungate. 23Kwa hung'u uzuri ghwa Mlungu ghufwananisogho na mzuri eshaile kumanya masabu gha mali yake kwa watumishi wake. 24Naye aghenda adyowa kughazighana kaletelo mundu mumoju eluo na deni ya pesa ziitogho talanta elfu ikumi. 25Na kwa kukala ulya mundu sewesi chelipa, bwana wake oghorire atagho, ngila mojori na mkwake na wana wake na vose eluo navo, eri deni ilipo. 26Nao ulya mtumishi kadyaya ngokoro, kamlomba, ‘Bwana nilaile mbolembole, nemi nikulipagha vose.’ 27Nao kwa mbazi yake ulya bwana kamfungula ulya mtumishi na kumufwila waya ilya deni. 28Ela ulya mtumishi aghenda afuma kamdoka mtumishi mumbawe eluo na deni yake ya pesa ziitogho dinari ighana, naye kamwata marangi kamuza, ‘Lipa deni yako.’ 29Nao ulya mtumishi mumbawe kagwa msangeni na kumlomba, ‘Nilaile mbolembole, nemi nikulipagha.’ 30Ela iye kalegha, kamungiza kifungoni mpaka alipe ilya deni. 31Nao watumishi wambawe waghenda waona ghalye ghadeike, wakawasilo, wakaghenda wakamghorera bwana wawe ghose ghadeike. 32Nao bwana wa ulya mtumishi kampang'a na kumuza, ‘Uwe mtumishi awase! Nanakufwilile waya deni ilya yose ughenda unilalama. 33Na uwe siyekufweni umufwile waya mtumishi mumbenyu selyi nikufwilile waya?’ 34Nao mzuri kawasilo na ndighi, kamungiza ulya mtumishi kifungoni hata alipe ilya deni yose.

35“Niko kwenyi Aba ewo mlunguni emudeagha kila mumoju wenyu, ilyi somufwilagha waya wakwenyu kwa ngolo yose.”

Àwon tá yàn lọ́wọ́lọ́wọ́ báyìí:

Matayo 18: SAGALLANT

Ìsàmì-sí

Pín

Daako