Matáyɔ 15
15
Asii á ɓatatɛ
(Ɔna phɔtɔ Mkɔ 7.1-13)
1Cɔ, Ɓaphaisáyɔ na ɓaɗundu-ɛɔphi ɓáombikia Yéso na ɓátóki na Yɛusalɛ́ma, ɓáongea: 2«Ka nyɔngɔ sina nde ɓagoigi nɛkɔ ɓákáoɓea asii ndea ɓatatasu? Nga, ɓákáosokosa njaga ɓíndɔ akeni mosá á eaga#Ɔna Lók 11.38.» 3Mpɔ Yéso áǒsikisia te: «Ka nyɔngɔ sina nde ɓenu ɓo gǎkɛ otingiaga ɛɔphi ndea Mokonga, ka nyɔngɔ á ɓeá asii nɛnu? 4Nga, Mokonga agi te: ‹Nɗokomisa abakɔ n'amakɔ.› Â goto ɔyɔnga: ‹Mmbé aɔmphɔ́ta abakɛ, kaɓɛ amakɛ ɓámmowɛ, ákuwɛ#Ɔna Jua 20.12; Tɔl 5.16; Jua 21.17; Ɓlw 20.9.› 5Cɔ, ɓenu ɓogi gǎkɛ, nkpa nde aongea abakɛ n'amakɛ: ‹Nkumba nde netúogea nénophɛ ka enga anu, nebisi ú k'ɛkɔmi ka Mokonga.› 6Nkpa ndɔ nnaonɗokomisa abakɛ n'amakɛ. Kaɓondɔ, ɓɔɔɓɛnjiaga nyɔngɔ ndea Mokonga ka ɓeá asii nɛnu. 7Ɓato á maibe nde ca! Isáya mɔtu-nyɔngɔ ndea Mokonga ɗáɔtu tɔ ɗoni ka phɔa anu gea:
8‹Mokonga ayɔngi ɓe: Ɓakpa nde ɓá tɔ omoɗokomisa k'aphenɔkɔ,
měma aɓɔ a gǎkɛ ɗanga n'eme.
9Nga obebɔ nɛɓɔ mosá ani nna na kantíti,
nga, nyɔngɔ nde ɓáogoisaga a tɔ á kokpa#Ɔna Isa 29.13.›»
Kema nde aɔnjɔɔkisa nkpa
(Ɔna phɔtɔ Mkɔ 7.14-23)
10Mbusa, Yéso áɔɔphana usɛsɛ á ɓakpa, áǒngoɗea te: «Ɔ́kani na ɓóúbɛ ánjá nyɔngɔ ndee: 11Nna kema nde aongia k'aphenɔkɔ á nkpa, aunge aɔnjɔɔkisa. Nnde aotóka k'aphenɔkɔ, a ndiu unge aɔnjɔɔkisa nkpa.» 12Mpɔ ɓagoigi ɓáɔnsɛkɛɗɛa Yéso, ɓáongea: «Ooúba gea, měma á Ɓaphaisáyɔ agú ka ɔ́ka á nyɔngɔ ndɔ ɔtɔ́yɔngi?» 13Yéso áǒsikisia te: «Me bubui nde Abɛ mmbɔ á na koba kákoni, ɓáúphande.» 14«Óɗeketani: ɓánde ɓakeíme-íme, ɓáɔ̌sɔndɔɛa ɓadaɓɔ ɓakeíme-íme. Aoɓá keíme-íme n'aɔnsɔndɔɛa dakɛ keíme-íme, ɓɔbu ɓaɓɛ ɓáguiande k'écia.»
15Mpɔ Pɛ́tɛɛ áongoɗea Yéso te: «Ósongoɗea phɔ́ kantíti á mɛní ndee.» 16Yéso áɔyɔnga: «Cɔ, ɓaya, ɓenu phɔtɔ ɓókóoúbapha? 17Ɓókóoengekisa gea, kema bui nde aongia k'aphenɔkɔ, áoga ka sɔphɔ, mbusa áoga ojuana ka ntɔɓɔ? 18Kema nde a gǎkɛ otóka ka měma á nkpa, aunge aojuana k'aphenɔkɔ akɛ, na kema ndɔ unge aɔnjɔɔkisa nkpa. 19Nga, suɓi á měma á nkpa, aunge aotóka: kanisia ájeɗe, mowanaga á ɓakpa, gúa n'etoa, mambɔ, kuɓa, gamá á nkpa ka nyɔngɔ á mbɛa, mbóma. 20Nndɔ unge aɔnjɔɔkisa nkpa. Cɔ, eaga kángá á sokosa á njaga, nndɔ nna gǎkɛ ɔnjɔɔkisa nkpa.»
Nke amɓeeki Yéso
(Ɔna phɔtɔ Mkɔ 7.24-30)
21Yéso áotóka wa, áoga ka ntanga-nji á Tílɔ na Sidɔ́na. 22Kó, nke moci nto á ka Kanána ɗátú wa, áombikia Yéso n'aɔyɔnga n'ɛsɔ akpɛ gea: «Mɔkɔta, Mosuko á Daúdi, ómokuia phɔ́ ngomi! Nseka nɛmɔ aotambaga phɛɛ na kukuwa á ɓansombo.» 23Yéso ɗákánsikisíí tanda nyɔngɔ moci. Ɓagoigi ɓáombikia Yéso, ɓáongea: «Mɓeaga nke ndee nga, a tɔ osoɓea n'eongo nɛkɛ.»
24Yéso áǒsikisia te: «Mokonga ɗámoteki tɔ ka Ɓaisilaɛ́li ɓunde ɓá ɓea ɓamɔgɔgɔ na ɓáɓúngigi.» 25Nke ndɔ â gǎkɛ obika ógbuka muanku mosá akɛ, áongea: «Mɔkɔta, ómoenga!» 26Yéso áonsikisia gea: «Nna ánjá bɛɗa á eea ndea ɓaniki, na émakea ɓaniki á mbwa.» 27Nke ndɔ áɔyɔnga te: «Eya Mɔkɔta, ɓaniki á mbwa ɓá tɔ oea phúnju-phúnju nde aoguwaga ka toka ka mɛja ndea mokô aɓɔ.»
28Mpɔ Yéso áonsikisia nke ndɔ gea: «Hoo, ɓeekea nɛkɔ aángbó phɛɛ! Kema nde okondi, átɔtɔkɛanɛ.» Kɛ̌kɛndɔ tɔ, nseka nɛkɛ áoama.
Yéso aóamisa ɓasambi ɓásii
29Mbusa, Yéso áotóka wa, áoga k'ɔɓɛɛ á etǔ á ka Galiláya. Áotáia gǔ á mamba, áoika kó. 30Usɛsɛ ángbó á ɓakpa ɓáombikia na ɓaɗɔti, ɓakeíme-íme, ɓaketǔmbe na ɓakauma, na ɓasambi ɓuangbo ɓásii, ɓáǒbisa mosá á Yéso, áǒamisa. 31Usɛsɛ á ɓakpa ɓáoyayama phɛɛ, ɓî ɓɛ́ɓɔni ɓakauma na ɓáɔyɔnga, ɓaɗɔti na ɓáami, ɓaketǔmbe na ɓáotamba, ɓakeíme-íme na ɓáɔɔnapha. Kaɓondɔ, ɓáombeba Mokonga ndea Ɓaisilaɛ́li.
Yéso aéisi ɓakpa ɛlɛphu gena (4.000)
(Ɔna phɔtɔ Mkɔ 8.1-10)
32Cɔ, Yéso áɔ̌ɓɔphana ɓagoigi nɛkɛ, áǒngoɗea: «Neókuia usɛsɛ á ɓakpa nde ngomi phɛɛ nga, neiki na ɓɔ wani esa isaɔ. Kɛ̌kɛnde, ɓáná ye gǎkɛ n'eea. Kékondi gǎkɛ ɓásikianɛgɛ mɔtɛ-aɓɔ kángá á eaga. Nga, ɓásiande na nja k'aphe.» 33Ɓagoigi nɛkɛ ɓáomúsia: «Ɓɛtɔande mokati ásii ka nkanda nde ka kutisa usɛsɛ á ɓakpa nde ɓɔbu wani?» 34Yéso áǒɓúsia: «Ɓona mokati ángaáni?»
Ɓáonsikisia: «Ngianjaga iɓɛ (7) na ɓaniki á ɓasú ɓábɔa.» 35Cɔ, Yéso áǒsosea gea, ɓakpa ɓáikɛ ka oɗo. 36Áɔbɛɗa mokati ngianjaga iɓɛ (7) na ɓaniki á ɓasú ndɔ, áonsega Mokonga k'ɛmɛmi, áoɓúnaga ú, áǒɓopha ɓagoigi nɛkɛ, ɓáǒgabea ɓakpa. 37Ɓáoea ɓɔbu, ɓáokuta. Mbusa, ɓagoigi ɓáɔkɔngɔa due í, ɓáotúmisa jɔ ngianjaga iɓɛ (7). 38Ɓundɔ ɗáɓáí, ɗáɓátú ɓǒko ɛlɛphu gena (4.000), kángá á tanga ɓake na ɓaniki. 39Mbusa á jisa á usɛsɛ á ɓakpa, Yéso áokambea ka koko, áoga ka ntanga-nji Magadáni.
Àwon tá yàn lọ́wọ́lọ́wọ́ báyìí:
Matáyɔ 15: KMW
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2021, Wycliffe Bible Translators, Inc.
