Matáyɔ 14
14
Ɛlɔ́dɛ ankusisi Yoáni-Mɓatisi
(Ɔna phɔtɔ Mkɔ 6.14-29; Lók 9.7-9)
1Ka matú ndɔ, Ɛlɔ́dɛ moamɛ á ka Galiláya, ɗáɔ́ki nyɔngɔ á Yéso. 2Ɛlɔ́dɛ áǒngoɗea ɓabɛɗanigi nɛkɛ te: «Ande Yoáni-Mɓatisi aámbé ajujúki ka kukuwa. Kaɓondɔ unge, ana ɓukpɛkpɛ á gea ketangaɔ.» 3Cɔ, Ɛlɔ́dɛ ɗándungisi Yoáni, ɓáomɓóaga na makea akɛ ka mekakɔ. Ɗátú ka nyɔngɔ á Ɛlɔdía, nka muna-amakɛ Philípɔ#Ɔna Mkɔ 6.17. 4Ka nyɔngɔ nde, Yoáni-Mɓatisi ɗánimisíí Ɛlɔ́dɛ te: «Kákeni ómukɛ#Ɔna Ɓlw 18.16; 20.21 Ɛlɔdía.» 5Ɓî Ɛlɔ́dɛ ɗáɔgea ánkusisɛ Yóani katɔtɔkɛanɛ gǎkɛ ka nyɔngɔ á ɓánga Ɓayúda nga, ɓɔbu ɗáɓámbɛɗi Yoáni ɓea mɔtu-nyɔngɔ ndea Mokonga.
6Cɔ, Ɗátú ka jaí á kanisia esa á ɓɔkɔtɛana á Ɛlɔ́dɛ, nseka ndea Ɛlɔdía áoɓina mosá á ɓundɔ Ɛlɔ́dɛ ɗáɛɓɔphani. Mɓina ndɔ áɔmɓɔngɛa Ɛlɔ́dɛ phɛɛ. 7Ɛlɔ́dɛ áɔɔpha gea amophande nseka ndɔ kema bui nde amɛmande. 8Amakɛ áɔmphɛa gea, ángoɗeɛ Ɛlɔ́dɛ te: «Bisa mɔ̌ á Yoáni-Mɓatisi k'ɔphɛphɛ nde kádúumani óbikɛ kani ně.» 9Ɛlɔ́dɛ áǒngongonisa, â gǎkɛ ososea gea ɓátenɛ mɔ̌ á Yoáni-Mɓatisi ɓámɔphɛ, ka nyɔngɔ nde ɗágɔɓi n'aɔphí mosá á ɓakpa. 10Áonteka nkpa ka gǎ tena mɔ̌ á Yoáni-Mɓatisi suɓi á mekakɔ. 11Mpɔ ɓáobika ně k'ɔphɛphɛ, ɓáɔmbɛɗɛkisa nseka ndɔɔ. Nseka ndɔ áoga omopha amakɛ. 12Ɓagoigi ndea Yoáni ɓáobika ɔbɛɗa mǒnda akɛ, ɓáoga oúmba ú. Mpɔ ɓáoga ongoɗea Yéso nyɔngɔ ndɔ ɗágeani.
Yéso aǒisa ɓakpa ɛlɛphu ɓɔku (5000)
(Ɔna phɔtɔ Mkɔ 6.30-44; Lók 9.10-17; Yoá 6.1-14)
13Mbenɔ nde Yéso ɗáɔ́ki mbino á kukuwa á Yoáni-Mɓatisi, áokambea ka koko, áoga oika sisakɛ ka nkanda. Usɛsɛ á ɓakpa ɓáɔɔ́ka, ɓáotóka ka ntanga-nji nde a bîbíbí ɓáomɓea Yéso, na ɓáotamba k'ɔɓɛɛ á iɓo. 14Ɓî Yéso atóki ka koko, áɔɔna usɛsɛ á ɓakpa, áǒkuia ngomi phɛɛ. Áǒamisa ɓunde ɗáɓáosamba ka ɔlɔ aɓɔ.
15Ka gɔgɔmana á esa, ɓagoigi ndea Yéso ɓáɔsɛkɛɗa ka mpɛphɛ akɛ, ɓáongoɗea te: «Esa age! Ɓe ka nkanda. Óteka ɓakpa ɓágɛ na nji ka somba ka ɓɔ eea.» 16Yéso áǒsikisia te: «Kákeni ɓakpa nde ɓájɛ, óɓophani eea ɓenu sasanu.» 17Ɓâ gǎkɛ onsikisia Yéso te: «Wani, ɓe tɔ na mokati ɓɔku na ɓasú ɓaɓɛ.» 18Yéso áǒngoɗea te: «Bikisani koni.» 19Yéso áǒikisa usɛsɛ á ɓakpa ka ɔphɔ, áobɛɗa mokati ɓɔku na ɓasú ɓaɓɛ ndɔ áoenga na koba, áonsega Mokonga. Áoɓúnaga mokati, áǒɓopha ɓagoigi nɛkɛ, ɓɔ phɔtɔ ɓáǒgabea usɛsɛ á ɓakpa. 20Ɓakpa ɓɔbu ɓáoeaga, ɓáokuta. Ɓagoigi nɛkɛ ɓáɔkɔngɔa due#Ɔna 2 Ɓam 4.42-44 á eea ndɔ, ɓáotúmisa jɔ nkama na iɓɛ (12). 21Ɓakpa nde ɗáɓáigi, ɗáɓátú ɓǒko ɓea ɛlɛphu ɓɔku (5.000), kángá á tanga ɓake na ɓaniki.
Yéso aotamba gǔ á iɓo
(Ɔna phɔtɔ Mkɔ 6.45-52; Yoá 6.15-21)
22Mbusa índɔ, Yéso áǒsosea ɓagoigi nɛkɛ gea ɓákambeɛ ka koko, ɓájabɛ mosá akɛ kubi á iɓo mbenɔ nde aɔɔkɔana na ɓakpa. 23Mbusa á jisa á ɓakpa ndɔ, áoɗapha gǔ á mamba k'aphe á mɛma á Mokonga. Ɗátú tɔ wa, sisakɛ ka gɔgɔmana á esa. 24Koko ángbó ɗátú ye tɔ ɗanga n'ɔɓɛɛ, kɛtɛmbɔɛ áɔɓɛtaga mosá á koko nga maiphianɔ ɗátú ǒjisa mbusa.
25Ka ɔsa á kɔkɔ á k'ama mosá-mosá, Yéso áǒɓea ɓagoigi nɛkɛ n'aotamba gǔ á iɓo. 26Mbenɔ nde ɓagoigi nɛkɛ ɓámɔni n'aotamba gǔ á iɓo, ɓáoɓánga phɛɛ, ɓáogea te: «Ande oketi, ɓáokpanga koga ka nyɔngɔ á kɔɓɔɓɔkɔ.» 27Kɛ̌kɛndɔ, Yéso â gǎkɛ ǒngoɗea te: «Bisani měma anu! Eme aámbɔ, ɓókoɓángɛmbɛ!»
28Pɛ́tɛɛ áonsikisia te: «Mɔkɔta, aoɓá n'ande oɓɛ ɗoni, ómososea phɔ́ nébikɛ bíbí akɔ na n'aotamba gǔ á iɓo.» 29Yéso áonsikisia te: «Bika!» Pɛ́tɛɛ áokia ka koko, áoga n'aotamba gǔ á iɓo ku ɓî Yéso aɔ. 30Mbenɔ nde aɔni gǎkɛ sinda á sumbu, áoɓánga. Áokpanga tɔta ka iɓo, áokoga gea: «Mɔkɔta, ómoamisa!» 31Mɔngɔ ímoci, Yéso áonanoa njaga, áondunga, áongoɗea te: «Oɓɛ nto á ɓeekea ábɔa nde ca! Ona ngǎka ka nyɔngɔ á kema sina?» 32Ɓî Yéso na Pɛ́tɛɛ ɓákǎmbi ye ka koko, maiphianɔ áɔphɔnga mɔngɔ ímoci. 33Cɔ, ɓagoigi nɛkɛ ndɔ ɗáɓátú suɓi á koko, ɓáogbuka muanku aɓɔ mosá á Yéso, ɓáongoɗea te: «Onde Muna-Mokonga ɗoni!»
Yéso aeamisi ɓasambi ka Gɛnɛsalɛ́ti
(Ɔna phɔtɔ Mkɔ 6.53-56)
34Mbusa á Yéso na ɓagoigi nɛkɛ gɔɓa á jaba á iɓo, ɓáojúa ka Gɛnɛsalɛ́ti#Ɔna Mkɔ 6.53. 35Ɓî ɓato á ka kekanga ndɔ ɗáɓámúbi ye Yéso, ɓáɔɛmbisa mbino á kiɗia akɛ ka nji nde abîbíbí. Ɓáombikia na ɓasambi ɓɔbu. 36Ɓáonɗengemisaga Yéso gea te, ɓádungɛ ye phɔ́ ɛɔkɔ á bɔngɔ nɛkɛ. Ɓundɔ ɗáɓádungi kau, ɓáoama ɓɔbu.
Àwon tá yàn lọ́wọ́lọ́wọ́ báyìí:
Matáyɔ 14: KMW
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2021, Wycliffe Bible Translators, Inc.
