1Mos. 42
42
Sakebbut Josep mei ka Misir masisaki gandum
1Kateteret aiarep si Jakob, ka Misir ai gandum, kuanangan katatogania, “Angoi nupuagai kam tubumui? 2#Pugap. 7:12 Akuarepman, ka Misir ai gandum; kenan kam sedda samba saki kam gandum bule bui' tamatei lulut laje.” 3Lepa ei sipulu sakebbut Josep nenda masisaki gandum ka Misir. 4Tapoi si Jakob ta'aiobaake si Benjamin, bagit Josep, mei pasamba sia, kalulut malotonia babara lepageti katogania nenda.
5Kalulut pulajeat ka laggai Kanaan, tatogat Jakob pasamba migi sirimanua sabagei moi masisaki gandum ka Misir. 6Sipasisakiake gandum ka sirimanua sibara kasangalio polak iate si Josep, sibailiu simakayo ka Misir. Lulut nenda oi sakebbut Josep samba murapo' kamatania. 7Kele aiitco sakebbunia si Josep, iagai sia, tapoi igalai le kele taiagai sia. Sialeigolo' rerenangan sia, “Kasei kam?”
Alegirangannia, “Kai tai Kanaan. Akuoikai masisaki komen.”
8Kenanen iagai sakebbunia si Josep, tapoi sia taraagainia. 9Lepa repdepnangan pangamutetnia pagalaiat sia. Samba kuanangan, “Kam nene sipananaiko; anuoi kam sene masigaba kaipa gulainia laggaimai.”
10Alegirangan, “Taa, tuanku. Kai, sapagugulet tuan moi sarat masisaki komen le. 11Kai nene sipusasaraina le, tuanku. Kai nene sirimanua simaroipo le, ta'sipananaiko.” 12Kuanangan si Josep katubudra, “Bokoi! Anuoi kam sene addeat masitaiko kaipa gulainia laggai nene le.”
13Alegirangan, “Kai nene pulurua sipusasarainan, tuanku, kai toga sibara sisara ukkui ka laggai Kanaan. Sara katalagamai amateian samba sisule kineneiget ainia pasamba ukkuimai.”
14“Aisesengan kele sikuaku,” ngangan Josep, “kam nene sipananaiko. 15Kuoba kusibo kam: Musuppa aku ka onin rimata, ta'nukakaddiuake kam laggai nene ke'bagimui sisule ta'moinia sene. 16Sara katalagamui buita toili masiala bagimui nenda. Sabagei geti tuukum le teret imatoila sikuamui. Ke'taa, kaonin rimata, kam nene sibulatnia sipananaiko saggak!” 17Lepa geti guruakenangan sia kabagat tangsi telungagogoi ujunia.
18Ka gogoi sikatelunia kuanangan si Josep kamatadra, “Aku sirimanua simaloto samba simareddet ka Taikamanua. Kam geti kuarauake le pasamba sara enunggan. 19Addeat masipakoinong kam nene simaroipo, sara katalagamui tuukum kabagat tangsi; sabagei momoi toili samba masiambit gandum sinakimui addeat muntogatmui sipasiorik laje. 20Lepat nenda taroakemuian bagimui sisule katubuku. Nenda te patoilaketnia lepa geti, tiboietmui nenda maroipo, samba kam taan kuukum matei.”
Sia raoba seteuakenen simakayo nenda. 21Lepa patiborangan kapasambadra, “Oto, sita kineneiget tuukum kalulut seletta katubut bagitta siburu; itiddou paroman, tapoi ta'atapuletsei, kenanen ataitcoan, pangoringannia. Iate lulunia kineneiget taenungi kam pangoringan nene.”
22Kuanangan si Ruben, “Ta' pa' akukuangan siboiki peile katubumui, bule bui nugalai kam jo katubut toga nene. Tapoi ta'anuarepi kam. Kineneiget kamateiatnia isiliake katubutta.” 23Si Josep iagai le ngangandra, tapoi sia ta'raagai pagalaiat nenda, kalulut rapatibo kai Josep pasamba sara sirimanua siagai masingangaake nganga le. 24Iageti kaddiuakenangan sia si Josep, lepa pusounangan. Kele amoian ipatibo minca, toilinia minca katubudra, lepa alanangan Simeon, samba koiniakenangan rakabenia kamatat sangamberi sasarainania.
25Parentaakenangan si Josep bule sangamberi goni siambitra sakebbunia tukau kabagania gandum, samba bulagatdra senendra tuguruake kabagat goninda nenda. Samba bule tukau leu kan addeat panarengandra ka enungan. Parentania nenda tugalaiake. 26Lepat nenda sakebbut Josep sanekirangan kalideira pasamba gandum sinakitra nenda, lepa toili sia baradra sedda. 27Kakudduat pugogoiatra, sara katalagatra bukanangan gonin gandumnia ikau kan kalideinia. Sesenangan bulagat kauddut gandum nenda. 28“Bulagatku itoiliake,” ngangnia kasasarainania. “Itco, ai kabagat goningku!” Paatuatra ibailiu maleu, samba kabagat loto panonorangan kapasambagatra, “Apa igagalai Taikamanua katubutta?”
29Kateteret arasege ka Kanaan poiliatrangan katubut ukkuira sangamberi sienungienda. Kuarangan, 30“Simakayo Misir makela le ipanibo katubumai samba masisuksuk kai masitaiko laggainia. 31Alegimaian, ‘Kai sirimanua simatopit, ta'sipananaiko, kai sirimanua simaroipo le. 32Kai sangamberimai sipusasaraina aikai pulurua, toga kasara ukkui, samba sara atataannia, beringan sisulemai ainia pasamba ukkuimai ka Kanaan.’ 33Kuanangan simakayo nenda, ‘Kuoba kusibo kam addeat masiagai, apa kam nene sirimanua simaroipo: Sara katalagamui buitamukuddu; sabagei momoi toili masiambit gandum kakeluargamui sipangongorik laje. 34Lepat nutoili kam masiambit bagimui sisule, agaikungan geti kam nene ta'sipananaiko, tapoi sirimanua simaroipo le. Iageti sasarainamui siukumku nenda kutotoiliake le geti katubumui samba momoi nukuddu kam ka laggai nene samba tuobaake pasaki.’ ”
35Lepa geti, kateteret ararugutnake gandum ka goninda, seserangan kudduat bulagatra senesena ai kabagania bulagat; lepa makopenangan lotora, kisedda leuet ukkuira. 36Lepa kuanangan ukkuira, “Kam nene masikau aku imapepe sangamberi tatogakku. Si Josep ta'ananai; Simeon ta'ananai; samba kineiget alamuian leu geti si Benjamin. Bulat makope pangoringanku!”
37Lepa kuanangan si Ruben ka ukkuinia, “Obaake le si Benjamin kaku, ukkui; lepa geti ambitkungannia minca, ke'taa, mateiakenungan karua tatogaku simanteu.”
38Tapoi kuanangan si Jakob, “Taa! Si Benjamin tamomoi nuambit kamnia; kebbunia amateian samba kineiget niangan le amulegei. Babara sitaipasesese katubunia ka puenunganan nenda. Amabajaan aku, samba pureureugat baga siakemui katubukku nenda masibaraake kamateiatku le.”
Àwon tá yàn lọ́wọ́lọ́wọ́ báyìí:
1Mos. 42: MWV
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
@LAI 2015