1Mos. 41
41
Ipakolou si Josep katukolobat pangamutet rimata Misir
1Pasat ruanga ruru, pangamutnangan rimata Misir, ainia muririo ka bebet bagat oinan Nil. 2Sinulut bara pitungamuneng jaui simamomo' samba kulitnia simakirisau barania ka oinan nenda. Lepa taddaakenangan ikom parou kabebet oinan nenda. 3Lepa geti bara minca pitungamuneng jaui bagei; sangamberi tarimeu nenda makainang samba legeina le kulit sisabbuk tolat. Sangamberi jaui sikainang nenda murio kabe'bet sangamberi jaui simamo'mo' kabe'bet oinan nenda. 4Lepa geti jaui sikainang masikom jaui simamo'mo'. Lepa nenda suru rimata ka peremannia. 5Lepa geti lau'lau'nangannia samba pangamutnangan minca. Kabagat pangamutetnia itconangan pitungaotti gandum simabaga samba amaraan mututu kasara totoat. 6Lepa geti tu'tu leuet pitungambe gandum bagei, simakainang samba malajuan lulut rusa sikalaut. 7Iageti gandum sikainang nenda masikoilo si pitungambe sibara baga siboiki. Lepa nenda suru rimata samba againangan amangamutnannia. 8Simansepnia si rimata kele mareureu bagania, lulut nenda gugluakenangan masisogai sangamberi siagai tawa samba simaagai ka Misir. Lepa poiliatnangan pangamutetnia ka tubutdra, tapoi berisara sia amoi masikolouake katukolobatnia.
9Lepa geti kuanangan sipasikeli lo' katubut rimata, “Gogoi nene bui takupoiliat selekku. 10Siboiki amugolu si tuan katubut sipasikeli roti samba katubuku, lepa guruake kai ka tangsi, ka lalep utet sipasijago uma purimataat. 11Kasara soibo pangamutmaian ruamai, samba pangamutetmai nenda ta'makere katukolobatnia. 12Sara tailainge tai Heber ainia sedda pasamba mai. Nia sipasikeli utet sipasijago uma purimataat nenda. Poiliatmaian pangamutetmai katubunia, lepa kolouakenangan katukolobat pangamutet nenda. 13Sibulatnia sangamberinia bulat amuaili kele sikuania, iate: si tuan masitoiliake aku ka kudduatku siboiki, tapoi si pasikeli roti nenda tuukum matei le.”
14Iageti rimata masikoiniake rasogai si Josep, samba belaakerangannia simaruei ka tangsi. Lepa aipasikirit samba aisili bibiletnia si Josep, ailiakenangan rimata. 15Kuangangan si rimata katubunia, “Amangamutnan aku, samba beri leu sara sirimanua amoi masikolouake katukolobatnia. Ai sipasikukua katubuku, ekeu momoi masikolouake pangamutet.”
16Aleginangan si Josep, “Ta' aku, tuanku, tapoi Taikamanua le masiake katukolobat simakolou.”
17Lepa kuangangan rimata, “Amangamut aku, ai aku muririo ka be'bet oinan Nil. 18Lepa bara ka oinan nenda pitu jaui simamo'mo' samba kulit simakirisau, iageti taddaakenangan mukom parou ka be'bet oinan nenda. 19Lepa geti bara leuet pitu jaui bagei pakainang-kainang samba legeina le kulit sibolit tolat. Ta' pei akuitco jaui sikatai nenda ka sangalio Misir. 20Sangamberi jaui sikainang nenda sapru aikom pitu jaui simamo'mo' siboiki. 21Tapoi lepa nenda sangamberi jaui sikainang nenda mariuriu lei makainang. Lepa suru aku ka peremanku. 22Lepa geti laulaunangan aku samba pangamutkungan minca, itcokungan pitungambe' gandum sibara baga samba amaraan, mutu'tu' kasara totoat. 23Lepa tu'tu leu pitungambe' gandum sikainang samba amalajuan kalulut rusa sikalaut. 24Ngambet gandum sikainang nenda masikoilo ngambet simabaga siboiki. Akupoiliatnan ruania pangamutetku nenda ka siagai tawa, tapoi berisara sia amoi masipakolou katukolobatnia.”
25Lepa kuanangan si Josep kai rimata, “Karua pangamutet nenda makere katukolobatnia; Aipaagaian Taikamanua katubut tuanku apa galaiakenennia geti. 26Pitungamuneng jaui simamo'mo' nenda iate pitungaruru, samba pitungambe gandum sibara baga nenda iate pitungarura leuet; karuania makere katukolobatnia. 27Pitu jaui sikainang situoottou sikateitei, samba pitungambe gandum sikainang samba simalaju kalulut rusa sikalaut nenda iate puteterat pulajeat ujunia pitungarura. 28Kele sikuaku katubut tuanku, aipatoilaan Taikamanua kai tuanku apa galaiakenennia geti. 29Lepa geti babara te' pitungarura pukayoat kasalio laggai Misir. 30Lepa nenda babara te geti pitungarura pulajeat, iageti sangamberi pukayoat nenda ka Misir kalipogi, kalulut pulajeat nenda magebanangan laggai nene. 31Pasat nenda taan matotoila geti minca legei pukayoat ka laggai nene kalulut pulajeat nenda, aipoi bulat besi'nia pulajeat nenda. 32Pangamutet tuanku ruangamincaan aipuaili, nenda katukolobatnia, aiteuakean Taikamanua samba igagalaiake Taikamanua.
33Kalulut nenda, maerupei le nusausau sara sirimanua simaagai samba simasuku paatuat samba tukau katubunia gege ipasikeli laggai nene. 34Maeru leuet tuanku Parao masigalaiake kele nene, iate masiuddetnake sipasikikinere laggai nene samba kabagat pitungarura pukayoat nenda masiruruake seperlima sibara kabuat polak laggai Misir. 35Buita raruruake sangamberi gandum kabagat senen rura simaeru sibabara nene, samba kageget tuanku Parao, masilabbu gandum ka senen laggai sibailiu bahan komen samba masikoiriakenia. 36Kise te sangamberi gandum nenda ibailiu panarengan ka laggai nene kabagat pitungarura pulajeat sibabara ka laggai Misir, bule laggai nene ta'masubu kalulut pulajeat nenda.”
Si Josep tusausau ibailiu simakayo ka Misir
37Rimata samba taipegawainia masisilo pinaatut Josep nenda. 38Lepa kuanangan rimata katubudra, “Taan babara tasesese sirimanua sabagei simateu bele pei si Josep, aipoi nia sipaalei Ketsat Taikamanua le.” 39Iageti kuanangan rimata katubut Josep, “Taikamanua aipaagaian sangamberinia nene kekeu, oto makolouan ekeu pei le maagai samba masiku paatuat kasirimanua sabagei. 40#Pugap. 7:10 Ekeu kurioake ibaiiu simakayo, samba sangamberi taikauamangku rareddet le geti parentam. Sarat aku le simagege katubum.” 41Lepat nenda goloknangan rimata kakabeinia sipsip siputularat purimataat, lepa junungakenangannia ka simongai Josep kaunangan, “Pasamba nene kurioake ekeu ibailiu simakayo ka sangalio Misir.” 42Lepa geti leppeiakenangan katubut Josep sara juba lenan simaramo, samba ngalouakenangan kalolokatnia sara inu mas. 43Lepa kaunangan kai Josep kereta purimataat sikarua addeat puenungnia, samba sipasijago abeuakenen rimata muenung kamatat kereta nenda pasamba masisogaake, “Pasikeli kam! Kau enungan! Kau enungan!” Kise' te' aiturioake si Josep ibailiu simakayo ka sangalio Misir. 44Kuanangan rimata katubunia, “Aku te rimata samba aku masisegeake, ta'anai berisara sirimanua ka sangalio Misir moi masigalai apa pa' keta'nuobaake.” 45Lepa kaunangan rimata sara onin Misir katubut Josep, iate Zafnat-Paaneah. Kaunangan leuet sara sinanalep sipuoni Asnat, togat Potifera sipasiukka Imam ka laggai Heliopolis.
46Si Josep ainia telupulungarura kateteret aipugalai kai rimata Misir. Iageti tuitui si Josep ka uma purimataat rimata samba einia masigoilik sangalio laggai nenda.
47Kabagat pitungarura pukayoat nene, polak masibaraake moneiet simalilimat. 48Gandum nenda iruruake si Josep, lepa koiriakenangannia ka senen laggai. Ka senen laggai koiriakenangan gandum buat mone kabebet laggai nenda. 49Gandum siruruakenennia nenda bulat maigi le pat ariakenangan si Josep masitekong, kalulut iginia kele ngai kabebet koat.
50Kepei iaili teteret pulajeat nenda, si Asnat sinanalep Josep masitu'tu'ake mata rua tatoga simantau. 51Kuanangan si Josep, “Ai galaian aku Taikamanua masikalipogi sangamberi pangoringanku samba katubut muntogat ukkuiku.” Kalulut nenda ioniake togania sikebbukat “Manasye”. 52Kuanangan leuet, “Aiakean Taikamanua tatoga katubuku kateteret pugejaat bagaku,” lepa ioniake togania sikarua “Efraim”.
53Pitungaruru teteret pukayoat sisilora ka laggai Misir nenda atukapplungan. 54#Pugap. 7:11 Iageti oi leu pitungarura teteret pulajeat, siripot kele sikuat Josep. Kasangalio polak muaili pulajeat, tapoi kasangamberi laggai Misir ai panarengan komen. 55Kateteret aitadda araorik pulajeat tai Misir, tiddourangan kan katubut rimata. Lepa koiniakenangan sia rimata raei kai Josep samba masireddet sangamberi apa iparentaake geti si Josep katubudda. 56Kateteret pulajeat nenda memei makokope samba makakra kasangamberi laggai, iageti belaakenangan si Josep sangamberi gandum samba masisakiake gandum katubudra tai Misir. 57Sibara kasangalio polak sangamberi sirimanua moi ka Misir addeat masisaki gandum kai Josep, kalulut pulajeat nenda bulat maron ka sangalio polak.
Àwon tá yàn lọ́wọ́lọ́wọ́ báyìí:
1Mos. 41: MWV
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
@LAI 2015