1Mos. 39
39
Si Josep samba sinanalep Potifar
1Si Josep aruambitnannia tai Ismael nenda ka Misir, samba tusakiake kai Potifar, sara ulet saladdu raja siukkaake utet sipasijajago uma purimataat. 2#Pugap. 7:9 Si Tuhan masiropmake si Josep pat eddet igalaiake sangamberi galajetnia. Kudduatnia ka lalep tuannia, tai Misiri nenda. 3Si tuannia masiitco, si Tuhan masirop si Josep samba lulut nenda tueddet simakolou igalaiake sangamberi galajetnia si Josep. 4Maangka bagat Potifar katubut Josep samba rioakenangannia ibailiu sipasikelinia; lepa uddetnakenangan si Josep masipasikeli lalepnia samba sangamberi bakkatnia. 5Kateteret nenda, kalulut si Josep, sukatnakenangan lalepda tai Misir nenda si Tuhan samba sangamberi apa bakkatietnia, ka lalep samba leu ka mone. 6Sangamberi bakkatnia si Potifar katoneminangannia kai Josep. Kabagat nene pasikelat ka lalepnia si Potifar ta'an makarat bagania, kecuali komennia.
Si Josep putubuatnia malainge samba maeru. 7Piganga gogoi pa' tusabau, sinanalep Potifar taddaakenangan imaale bagania kai Josep, lepa nananangannia merep simakere. 8Si Josep ta'ioba samba kuanangan katubunia, “Bojoi, ina, si tuan Potifar aikatonemingan bakkatnia katubuku. Ta'an aipaatu apa pa' bagei ka lalep nene. 9Sene gegeku makere le beunan gegenia. Ta'anai beri sara taaikatonemi katubuku, sarat ekeu le, aipoi ekeu sinanalepnia. Kaipa iooi kugalaiake pukakatai nenda samba mujo ka Taikamanua?” 10Kenanen senen gogoi sinanalep Potifar nenda ina'na' si Josep, si Josep ta'ioba masiarep pana'na'katnia nenda samba merep pasambania.
11Ka sara gogoi kele ai tuguru si Josep kabagat lalep masigalaiake galajetnia, berisara sirimanua sedda. 12Sinanalep Potifar nenda tiktiknangan si Josep pasamba jubania samba kuanangan, “Konan taperep simakere.” Oppunangan tubunia si Josep tuobanangan, lepa tuitunia ka uja', tapoi jubania aikalipogi kakabei sinanalep nenda. 13Kele aiitco sinanalep Potifar si Josep amutuituiannia samba jubania kalipogi, 14sogainangan sapaguguletnia samba kuanangan, “Itco pei! Tai Heber siambit simanteuku ka lalep nene, masipaloloi sita. Guru'nia ka biliku samba ioba masielet aku, tapoi mugerei le aku simaron. 15Kateteret aiarep kupugerei, tuituinia ka uja' samba kalipoginangan jubahnia.”
16Lepa koiriakenangan jubah nenda sinanalep Potifar pat toili simanteunia. 17Kele aitoili simanteunia, poiliatnangan nenda katubunia, kuanangan, “Tai Heber siambitnu sene nenda, gurunia kabagat bili' masipaloloi aku. 18Tapoi kele akupugerei, tuituinia ka uja' samba kalipoginangan jubahnia.”
19Si Potifar bailiu bulat magolunia. 20Samba parentaakenangan bule si Josep tulaba' samba guruakenia ka tangsi, ka kudduat rimata silaba tugeliake. 21Tapoi si Tuhan masiropmake si Josep samba mariuriu le ipununtukiNia baga, pat siutet tangsi obanangannia. 22Siuteake tangsi nenda masikatonemi bule sangaiberi situukum bagei ipasikeli sia si Josep samba kai Josep le aikau puukuket ka sangamberi galaiet galaiakenen kabagat tangsi nenda. 23Siuteake tangsi nenda ta'an ai jago sangamberi sikaunia kai Josep, kalulut si Tuhan poi masiropmakenia pat tueddetnangan kasangamberi galajetnia.
Àwon tá yàn lọ́wọ́lọ́wọ́ báyìí:
1Mos. 39: MWV
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
@LAI 2015