Uan 6
6
Isus Nafayafun Limak Libuk Mangama
Mt 14:13-21; Mk 6:32-44; Lk 9:10-17
1Ay sanya ginan, Isus nadife wan tsiuy baliwa Lino Galilea, at ngayan yangay te, Lino Tiberias. 2Ay ngayuk taw at nanangalo anya aroro kanya fagayu nalag Isus at madulo fag ngay fakamulun nu gfafia at ke ngay fakasaitun. 3Isus naulul sa sik buksul gasfuan at ngay tagadal ay malunggung sanya. 4Ginanya, munakbang wan taw Udyu at fagmafulun sabaliwa Tagbarita nu Glangfe. 5Isus nabanawan, ay nu nalag sik ngay taw nu kadasug, ginto sas Felipe te, “Daginan ro nu namul tam ngay fakonun laman ro mafafayafun in fag ngay taw?” 6At fagnalongun katanya laman gfaskud Felipe, aroro Isus saful way at fakamulun ro.
7Ay Felipe glong te, “Kayu waluk magdanun sik taw at nagbulan em famul fakonun, nustua ya ro kasakan sa takayu nya fag ngay taw.”
8Ay at tagadal, Andres, Simun Pedru at faduksay, glong te, 9“Ste sik munama e buba limak tinapay ay duak albon mataman. Ay kurang yay ro kanya nu kayu wa ro nya fag ngay taw at nangon.”
10Isus nalong sat ngay tagadal te, “Falunggungi ngay taw.” Sanya gamakmakun, ay fagayu taw namalunggung, malgau ngay mangama at kayuan limak libu. 11Ay Isus nabul kafag ngay tinapay ay nu naseg Dius, gfon sa sangay taw. Ay gfon yangay albon sa sangay taw, kayu at fakaylatun.
12Ay fagayu taw nu napsug wan, Isus nalong sat ngay tagadal te, “Fafuli at ngay nagsawadan laman di kafangulan.” 13Ay katanya wan at fakamulun, ay at nagsawadan labi duak sabi mapnu siginan kafag limak tinapay ngay taw at naon.
14Ay kafag ngay taw nu nalag Isus at madulo fag fakamulun, nalong te, “Matuyan tuy wa ngaro fia at fatuyanan fag taglong takadasug ban ste swa daga.” 15Isus nasaful te, kafag ngay taw nanggamat anya ay namabulun anya laman ban at fun. Ay Isus gdog yay nalo gsesadian sas buksul.
Isus Nalo sas Tungud Lino
Mt 14:22-33; Mk 6:47-51
16Ay nu gakayabiun wan Isus at ngay tagadal nalo sas tigyangan lino, 17ay nasakay sa sik sakayan lino laman nangadife sas furuan Kapernaum. Anyabi wan ay Isus ya nanangalo anya. 18Dagat glugwak aroro maksvn nu gtagmara. 19Ay at ngay tagadal nu nafalao wan at sakayan lino, ay at kayayuan nu lima mannga unumk libuk sangbada, kanya fagayu nalag Isus nu glao sis tungud lino kakbang sat sakayan, ay kanya fagayu maksvn nu kalimu. 20Ay Isus nalong sa anya fagayu te, “Au way, lag am kalimu.” 21Ay at ngay tagadal guseganan gfasakay anya, ay arodi vtv at sakayan andasug sat fagnangadasugan.
Isus Tagfon Leleg fag Fakonun
22Ay balabag di, ngay taw tagsit dife nalag te, sadi way langk sakayan lino. Ay nasaful te, Isus wa nasakay magamut at ngay tagadal, aroro at ngay tagadal way lang at nasakay. 23Ay tibak sakayan lino siginans furuan Tiberias andasug munakbang sa kafag ngay taw at fagmafulan nu inda ngay taw nu kon tinapay gina tam Fun naseg Dius. 24Ay kafag ngay taw nu nalag te, Isus ay at ngay tagadal wa sanya, kanya fagayu nasakay sa sangay sakayan lino ay nasas furuan Kapernaum laman nanrvbvy anya.
25Ay kafag ngay taw nu ndasug sanya, nu nalag Isus, ginto te, “Takamoyung, ginain nu kadasug o?”
26Isus gbalus te, “Matuyan nu glong au ayu te, ay fagrvbvyun angku, bunwa ay nalag ku nafakamulun at madulo, nu bunway aroro siginan ay napsugan. 27Ay fagugatanun gfakamulun dangay sa takadan fag fakonun, nu bunway sa tua at yud kadan fag fakonun tagfon leleg at yud e fakatabuan. Au, Taw at Baguama, gfon au sa ayu takatanya fag fakonun, aroro Dius nafalag sa sangay taw te, ‘Matuyan ku Baguama at fakamulun.’ ”
28Nu katanya, kafag ngay taw ginto sas Isus te, “Tain em fakamulun at masine laman mafakamulun ami Dius at fakaylatun?”
29Isus gbalus anya te, “Katatuy Dius at fafakamulun sa ayu, afanudi sat nasugu.”
30Ay kanya fagayu ginto Isus te, “Nataw fag fakamulun at madulo am fagfalagun emi laman gafanud ami sa emu? Tain ro am fakamulun? 31Em ngay mangaguyang naon fakonun at ngayan te, mana, gina sis talun at yud e taw, gfaning at rirukan te, ‘Kanya nafon anya fakonun siginans banwa.’#6:31 Nu Galin 16:4; Alubad 78:24, 25. ”
32Isus glong te, “Matuyan nu glong au ayu te, bunwa Muisis at nafon ayu tagsiginans banwa fag fakonun, nu bunway ku Mama tua. Kanya tua tagfon ayu at matuyan fag fakonun tagsiginans banwa. 33Aroro Dius at fon fag fakonun kanya wan at kindaga siginans banwa tagfon leleg sas fagayu taw.”
34Ay kanya fagayu glong te, “Em Fun, foni tua gugat emi takatanya fag fakonun.”
35Ay Isus glong sa anya fagayu te, “Au wan tagfon leleg fag fakonun. Nusnga sinu takakbang sa angku di ban kalunus ay nusnga sinu tagafanud sa angku di ban kadanum kabavn. 36Dewa katanya, nafoyung kwa ayu te, dewa am nalag angku, yam gafanud. 37Ku Mama at nafon angku fag ngay taw nangakbang sa angku. Ay nusnga sinu takakbang sa angku kdi gaiyan. 38Aroro ku fagindagaun siginans banwa kwa namakamulun ku sadili fakaylatun nu bunway at nasugu tua angku at fakaylatun. 39Katatuy at nasugu angku at fakaylatun, lag au gfabayan gfalyam nusdi sadi at nafon sa angku. Nu bunway at fakaylatun, namadog kban namaleleg anya fagayu sa taguyan fag menit. 40Aroro ku Mama at fakaylatun, fagayu at nalag at Baguama ay tagafanud sa anya e leleg tua ban at yud e fakatabuan kabavn, ay namadog kban namaleleg sa taguyan fag menit.”
41Ay kafag ngay taw Udyu ginasan aroro Isus nalong te, “Au wan at kindaga siginans banwa fag fakonun.” 42Ay kanya fag ngay taw glong te, “O nunda kanya bunwa Use at baguama? Toglag way tam at mama ay at mina. Wain at fagmalongun te, ‘Andaga au siginans banwa’?”
43Ay Isus glong te, “Lag am ginasan. 44We taw manangakbang sa angku, ku Mama at nasugu angku nu dway nataban anya sa angku. Ay nusnga sinu at kinkakbang sa angku gfadog kyay ban gfaleleg anya sa taguyan fag menit. 45Katatuy Dius at ngay taglong at rirukan:
‘Dius namoyung ban sa anya fagayu.’#6:45 Isayas 54:13.
Ay nusnga sinu ban tagdungugan ay at kinfoyung sa baliwa ku Mama, kanya kakbang tua sa angku. 46We taw batang glag ku Mama; au way lang tagsiginans Dius. 47Matuyan nu glong au ayu te, tagafanud sa angku e leleg tua at yud e fakatabuan kabavn. 48Au wan tagfon leleg fag fakonun. 49Ay ngay mangaguyang naon mana fag fakonun, gina sis talun at yud e taw, ay dewa katanya, kanya fagayu anbul way. 50Dewa katanya, nusnga sinu at naon tagsiginans banwa fag fakonun, di ban kabul kabavn. 51Au wan tagsiginans banwa fag fakonun tagfon leleg. Nusnga sinu tua ban at naon kanya fag fakonun gleleg tua ban kabavn. Ku fagnamonun fag fakonun ku bilug wan, laman namon au leleg at yud e fakatabuan sas fagayu taw ste swa daga.”
52Ay kafag ngay taw Udyu gbadbaboan glong te, “Tain ro tuy fag taw nu mafon antam at bilug laman ro kon tam?”
53Ay Isus glong te, “Matuyan nu glong au ayu te, nu dway am naon Taw at Baguama at bilug ay nainum at taguk, wa ban am mafabul leleg. 54Ay nusnga sinu ban takon ku bilug ay taginum ku taguk e leleg tua ban at yud e fakatabuan, ay gdog kyay ban gfaleleg anya sa taguyan fag menit. 55Aroro ku bilug wan at matuyan fag fakonun, ay ku taguk at matuyan fag fanginum. 56Ay nusnga sinu takon ku bilug ay taginum ku taguk kanya masadi tua si angku, ay si ktua anya. 57Ku Mama at nasugu angku tagfon leleg, ay gleleg kyangay aroro sa anya. Ay katanya yangay ban nusnga sinu takon ku bilug e leleg tua ban aroro sa angku. 58Au wan at tagsiginans banwa fag fakonun. Ay nusnga sinu takon tuy fag fakonun gleleg tua kabavn. Kafag fakonun di kata ay ngay mangaguyang at naon gina sis talun at yud e taw. Aroro kanya fagayu dewa naon, anbul way.”
59Isus nafoyung takatanya gina sis bale fakafulan sis furuan Kapernaum.
Tibak Tagadal Gubun Isus
60Ay Isus at ngay tagadal nu nadungug kafag foyungan, nalong te, “Maidap mandi at longan. Sinu at mafafaning kaidap nya?”
61Isus nasaful wan at ngay tagadal at ibugan sabaliwa at foyungan, ay glong te, “O siginan ay nadungug ku foyungan kamomuy wan ay fagafanudun sa angku? 62Nu katanya, tain ban ay amatanganan nu nalag am angku, Taw at Baguama, nu kafoli kwan sa ku fagbanwanan? 63At Masine fag Falad tagfon leleg, ay we taw mafafakamulun takatanya. Ku ngay foyungan ayu siginan at Masine fag Falad, ay kanya wan tagfon leleg. 64Dewa katanya am tiba, wam gafanud sa angku.”
Isus nalong katanya aroro siginan ngay ebi nasaful wan at yud gafanud, ay at namoyung ban anya sat mauri fag ngay taw. 65Isus nalong yangay te, “Kanya wan ku fagnalongun ayu te, we taw manangakbang sa angku nu bunway ku Mama at fakaylatun.”
66Sanya ginan ngay, tangayu at ngay tagadal naubun ay wa galo ya anya. 67Ay Isus ginto sat labi dua te, “O kaylat yangay am gubun angku?”
68Ay Simun Pedru gbalus te, “Em Fun, dada ban em fagnangakbangan? Ay si wa emu ngay longan tagfon leleg yud e fakatabuan. 69Katsi gafanud ami, ay natuyan ami te, o wan Dius at nasugu at Yud e Malong.”
70Ay Isus nalong te, “Nafili au ayu labi dua, dewa katanya, at sadi si ayu sik mauri way fag falad.” 71At fagfatungulan fia Udas Iskariute, Simun at baguama. Udas, Isus at tagadal at sadi, ay kanya ban at namoyung Isus sat mauri fag ngay taw.
Àwon tá yàn lọ́wọ́lọ́wọ́ báyìí:
Uan 6: OCCT
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Copyright © 2021 by OMF International, Philippines
