Uan 5
5
Isus Nafafia Sik Taw Yud Malo
1Sanya ginan, Isus nalo sas Erusalem aroro ngay taw Udyu e fagmafulun. 2Ay sis Erusalem e sik fagigusan munakbang sis sakbawan tupa. Sas Ebreu fag fangaringang kafag fagigusan at ngayan Betesda, ay sanya e limak fagsarirungan. 3Ay ngayuk taw e fakasaitun gtaygilidan sanya. Tibak taw at fakasaitun; wa glag, ay tiba wa malo, ay tiba wa malelegan. Ay kanya fagayu gfanya lino nu guigan. 4Aroro tam Fun at tagbarita e buknga nanguig kafag lino. Ay gina kafag mamam guigan, nusnga sinu taguna nansurung kafia nusnga setaw at fakasaitun. 5Ay sanya sik mangama tulu wak safulu e waluk banwa nu e fakasaitun. 6Ay Isus nalag anya ay nasaful te, ngaduge wan kafag mangama nu e fakasaitun. Ay Isus ginto anya te, “O kaylat o kafia?”
7Ay at yud malo gbalus te, “Fagtainan, we gbuba angku, ay mamam nu nauigan, gina kyay galoun sanya e naguna wa angku.”
8Isus glong sa anya te, “Alindugi, bangkadi am igyan ay loi wan.”
9Ay arodi vtv, kafag mangama nfia wan ay nabangkad at igyan ay nalo wan. Ginanya Famiangalay fag Menit.
10Taw Udyu at ngay tagfangguna glong sanya fag mangama at kinfia te, “Katsi Famiangalay way fag Menit. Wa masine nu gbuba o am igyan.”
11Ay kanya gbalus te, “At nafafia angku nalong te, ‘Bangkadi am igyan ay loi wan.’ ”
12Ay kafag ngay taw ginto anya te, “Sinu at nalong emu te, ‘Bangkadi am igyan ay loi wan’?”
13Ay kafag mangama wa nasaful te, sinu at nafafia anya, aroro Isus nalo wan siginan sad fagngayuan taw. 14Sanya ginan Isus nalag anya sis Dius at bale ay glong te, “Katsi anfia wo. Lag o gasalanan ya, mandasug sa emu gtungud yay aro taw am fakasaitun.”
15Kafag mangama nalo wan ay glong sa sangay taw Udyu at ngay tagfangguna te, “Isus at nafafia angku.”
16Aroro katanya, ngay tagfangguna gfasigad gfauri Isus, aroro nafafia sis Famiangalay fag Menit. 17Ay Isus gbalus anya fagayu te, “Ku Mama gfataglayun gfakamulun ay anggan au gfakamulun kyangay.”
18Nu katanya, kanya fagayu nkugat nu gyafabulun Isus, aroro wa nafaning faugali sabaliwas Famiangalay fag Menit, ay at nalongan ya te, Dius ku Mama, nu katanya nafasudan at sadili sas Dius.
At Baguama at Fagmabalyananun
19Nu katanya, Isus nalong sanya fag ngay taw te, “Matuyan nu glong au ayu te, au, Taw at Baguama, kwa mafakamulun nung way lang ku sadili. Ku fagfakamulunun ku nalag tua ku Mama at nafakamulun. Ku Mama at nafakamulun, katanya yangay anggan angku, at Baguama, ku fagfakamulunun. 20Aroro ku Mama kesug angku, at Baguama, ay gfasaful sa angku fagayu at fakamulun. Ay gtungud yay ban kanya at fagnamasafulun sa angku, ku fagnamakamulunun, laman kaugat yay nu kadulo am. 21Nusnga setaw ku Mama nu gfaleleg ngay kinbul, katanya yangay au, at Baguama, gfaleleg kyangay ban nusnga sinu ku fakaylatun gfaleleg. 22Bunwa ku Mama taginsaful taw at asalanan. Ku Mama nafon angku fagdaul at fagmabalyananun ginsaful taw at asalanan, 23laman fagayu taw gseg angku, at Baguama, kata nu gseg ku Mama. Nusnga sinu at yud gseg angku, at Baguama, wa yangay gseg ku Mama, at nasugu angku.
24“Matuyan nu glong au ayu te, nusnga sinu tagdungugan ku longan ay tagafanud sat nasugu angku, e leleg tua at yud e fakatabuan. Ay kanya di ban gafaurianan nu bunway anlangfe siginans fakabulun ay mul leleg at yud e fakatabuan. 25Matuyan nu glong au ayu te, kadasug ban tibak buknga, ay katsi wan, at ngay kinbul dumungug Dius at Baguama at aringang ay at dumungug lumeleg ban. 26Ku Mama tagfon leleg, ay nafon fagmabalyananun sa angku, at Baguama, laman gfon kyangay leleg. 27Ay nafon yangay sa angku, at Baguama, fagmabalyananun ginsaful taw at asalanan, aroro au wan Taw at Baguama. 28Lag am kadulo, aroro kadasug ban tibak menit, fagayu ban at kinbul dumungug ku aringang. 29Ay kanya ban fagayu mesa gduksun siginan at fagmafolianan. Fagayu at nafakamulun at masine gdog yay ban kafulo ay e leleg at yud e fakatabuan kabavn. Ay fagayu at nafakamulun mauri gdog yangay ban kafulo ay gafaurianan.
Ngay Tagfatuyan sabaliwas Isus
30“Kwe fagmafakamulunun sa ku sadili. Gfaning au ku Mama nu ginsaful au taw at asalanan, ay matuyan ku fakamulun nu ginsaful au taw at asalanan, aroro bundi ku sadili lang fakaylatun ku fagfaningun nu bunway at nasugu tua angku at fakaylatun. 31Nu au way lang tagfatuyan sabaliwa angku, we masuad. 32Ay dewa katanya e gfatuyan tua sabaliwa angku, ay saful au te, matuyan at longan. 33E nasugu am sik ngay taw sas Uan ay kanya nafoyung sa ayu at matuyan. 34Dewa katanya, at foyungan sabaliwa angku bundi siginans taw. Ku fagnalongun katanya laman umlangfe am. 35Uan kata sik salung gigang gyamag, ay guseganan am sat buba fag fagmayamagun. 36Ay dewa katanya e tagfatuyan sabaliwa angku, gtungud yay Uan. Ku Mama nafafakamulun sa angku fag fakamulun, kanya way ku fakamulun, ay kanya wan tagfatuyan te, ku Mama at nasugu angku. 37Ay ku Mama at nasugu angku, kanya tagfatuyan yangay sabaliwa angku. Kabavn yam batang gdungug at aringang ay yam batang glag anya, 38ay at longan wa gbanwan si ay amatanganan, aroro wam kaylat gafanud sat nasugu. 39Gadal am Dius at Longan aroro sanya ginan gamatangan am te, siginan takatanya magbilug am leleg at yud e fakatabuan kabavn. Ay kanya fag ngay Longan tagfatuyan sabaliwa angku. 40Dewa katanya, wam kaylat nangakbang sa angku laman mul am leleg at yud e fakatabuan kabavn.
41“Bundi ngay taw at famauseganan ku fagrvbvyun 42aroro toglag kway ayu. Saful kway te, Dius at fakesugun wa si ay amatanganan. 43Siginan ku Mama at fagmabalyananun andasug au ste sdaga, dewa katanya, wam kaylat angku. Ay tiba ro ktaw nu ndasug ay gfoyung sat sadili fagmabalyananun, kanya way ay fagnamaningun. 44Ay famauseganan nu sa way lang ay iba, tain ro nu gafanud am, wayam grvbvy famauseganan tagsiginan at matuyan fag sadik Dius? 45Lag am gamatangan te, au ban at namauri ayu sa ku Mama at daga salubangan. At namauri ban ayu we tiba nu bunway Muisis, ay fagsegun sabaliwas fakalangfean. 46Nu gafanud tuam sas Muisis, gafanud yangay am nangus sa angku, aroro kanya at rirukan sabaliwa angku. 47Ay nu dway am gafanud Muisis at rirukan, tain ro nu gafanud am ku longan?”
Àwon tá yàn lọ́wọ́lọ́wọ́ báyìí:
Uan 5: OCCT
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Copyright © 2021 by OMF International, Philippines
