Oseas 9
9
Oseazen bdixjwere kan sakzi yell ke Israelen
1Bi yawero Israel,
bi xito yawero kan llun be'nn yell ka' yela,
le ba beno kaꞌ nor ree kaꞌ
kan bsanlallo Dios ko'on.
Latj gan llyin ake' trigon,
llawero siw raxhjo dan ba beno kaꞌ nor ree.
2Bi gat trigo ni zu ke uva raw yell Israelen,
bi sue zu ke uva ke aken, dan ze benchaw akten.
3Efraín'na wayaje'e Egipton,
na Asiria'na gawe'e yelwao dan bi noe Diozen latj gawe'e.
Bill gak su ake' yell ke Xanllon.
4Bi yej ake' zu ke uvan keten gun xhen ake' Xanllon,
leska bill gut ake' bayix kaꞌ gana', nench'na werao ake' nada'.
Na pan dan gaw aken gaken ka pan da llaw ake' ga llna' ake' yer ke be'nn wat,
na be'nn kaꞌ gaw len'na, bi gak ake' yall.
Le aken gaw ake' ke pan'na,
na bi gak gox aken lo yoda'o ke Xanllon.
5¿Bixha ke sake gunle keten gal lnin,
lla lni' xhen ke Xanllon?
6Le aken ba bxhonj akre dan dlleyin.
Egipto na wazi le ake',
na gan nzi Menfis wkoach ake' le ake' lo yu.
Na gan sjalla ya plat ke ake' ka' dan ngochaw aken, chan yix ray,
na gan guk lo yo' rill aken wallate chan yay yiech.
7Ba bllin llan sakzire.
Ba bllin llan chixhjre ketk dan ba benlen.
Israelen nezre ke ba bllin llan.
Re' nere: be'nnen llayixjwen nake be'nn bi llajnie.
Be'nnen llayixjwen, bizo wen lo yichjen.
Na re' nere kaꞌ, le llebrazen yore da maren,
le llebrazen yore dan llwieren.
8Diozen ba bzoe'e be'nnen llayixjwe xtillen nench'na llape'e Efraín'na,
na raw xnezen llzuare to ga lldole'e.
rente kaze lo yoda'o ke Diozen llwierere le'e.
9Dokenak ake' ba blleyi,
kan ben be'nn Guibeá ka' kan batna.
Axha Xanllon llajdinlalle da mar ke ake' kaꞌ,
na wsakzie le ake' ni ke daxhinj ke ake' kaꞌ.
Israelen walleyrawe'e xtole daxhinj ke'e ka'
10Ki ne Xanllon:
Bawera kwis kan ballelra Israelen,
bena ka be'nnen llawe katen llallelre daxhixh dan nzi uvas raw yu yechen.
Beꞌnn xustaw re' ka' brera le ake'
ke higos da ka' llbia danelle.
Axha kan bllin ake' gan nzi Baal-peor
beraw ake' loe lsak ka',
na bayak ake' be'nn sral,
ka loe lsak kaꞌ lloeraw aken.
11Dan llze ke Efraín'na, wazun, kan llazu to ba zu xire.
Bill garj bida'o ake',
nullno nor gak wa bdao
bill garj xhi'nn ake'.
12Na lakse cha gak wasgur ake' xhi'nn ake' kaꞌ,
nadaꞌ waka bida'o kaꞌ, ni to akbe bi wakuana.
Niachraz ke beꞌnn kaꞌ ket nada' wsanlalla le ake'.
13Llwia kan llun Efraín'na konen xhi'nne ka'
kakse badao kaꞌ llzen ake':
llune le akbe rallna be'nn kaꞌ nench'na gut ake' le akbe.
14Be ake', Xana, dan lleyal si aken.
Be xhor ake' be'nn will, na xhill aken bi chullen nill.
Guklla Xanllon konen Efraín'na
15Ne Xanllon:
Gan nzi Guilgalen ben ake' yoyte da mar,
ganan bzorawa llwie akre.
Xtole daxhinj ka' ba ben aken
wabaj ake' lo yo rillan,
bill nawlla llie'e akre,
le yoyte be'nn ka' llnebia le aken nak ake' be'nn wednay.
16Efraín'na nake we,
nake'e ka to yay da ba biech rue
da bill llbia daxhixh.
Lakse cha sute xhi'nn ake',
nadaꞌ wlleyia le akbe.
17Yell ni bine yen' akre
gun ake' kan ba bne Dios kian.
kelen'na Dios kian walliye'e le ake' kale,
na llajsu ake' chullwej gateze raw latj yellriw ka' yela.
Àwon tá yàn lọ́wọ́lọ́wọ́ báyìí:
Oseas 9: ZPUPAT
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀