Toango 5
5
Bana ba Adama lima Sete elaka nko Noa
(1 Bes 1.1-4)
1Bonkanda wa biotswelo biki Adama bokʼone. Aki Nzakomba emaka bonto, emakʼende ndʼekoya ea Nzakomba. 2Aemakʼiyo jende lʼomoto. Ko aolasakela bokako wa swa, ko aolaila lina BONTO akʼiyo emamaka. 3Aki Adama okitaka mbula bonkama la ntukʼisato, aotaki bona owa jende ndʼekoza ekae, ko aoloila lina Sete. 4Ko mbula ya Adama ndʼafeka bʼeotswelo ea Sete iki benkama mwambi; ko aotaki bana bʼaende la bʼamato. 5Elengʼeko, mbula iuma iki Adama wae benkama ibwa la ntuku isato, nkako aowa.
6Sete aokita mbula bonkama lʼitano, ko aotaki Enosa. 7Ko Sete aoika ndʼafeka bʼeotswelo ea Enosa mbula benkama mwambi lʼitano; ko aotaki banʼamo bʼaende la bʼamato. 8Ko mbula iuma ya Sete yokita benkama ibwa la jom lʼife, nkako aowa.
9Aki Enosa okitaka mbula ntukʼibwa aotaki Kenana. 10Ko Enosa aikaki ndʼafeka bʼeotswelo ea Kenana mbula benkama mwambi la jom lʼitano; ko aotaki bana bʼaende la bʼamato. 11Elengʼeko mbula iuma iki Enosa yokita benkama ibwa lʼitano. Ko aowa.
12Ko Kenana aokita mbula ntuku nsambo, ko aotaki Maalaleele. 13Ko Kenana aikaki ndʼafeka ba eotswelo ea Maalaleele mbula benkama mwambi la ntukʼinei; ko aotaki bana bʼaende la bʼamato. 14Mbula iuma ya Kenana yokita benkamʼibwa la jom, ko aowa.
15Ko Maalaleele aokita mbula ntukʼotoa lʼitano, ko aotaki Yelede. 16Ko Maalaleele aikaki ndʼafeka bʼeotswelo ea Yelede mbula benkama mwambi la ntukʼisato, ko aotaki bana bʼaende la bʼamato. 17Mbula iuma ya Maalaleele yokita benkama mwambi la ntukʼibwa lʼitano: nkako aowa.
18Ko Yelede aokita mbula bonkama la ntukʼotoa lʼife, ko aotaki Anoka. 19Ko Yelede aikaki ndʼafeka bʼeotswelo ea Anoka mbula benkama mwambi, ko aotaki bana bʼaende la bʼamato. 20Ko mbula iuma iki Yelede iki benkamʼibwa la ntukʼotoa lʼife: ko aowa.
21Ko Anoka aokita mbula ntukʼotoa lʼitano, ko aotaki Metusela. 22Ko Anoka aolesana la Nzakomba mbula benkama besato ndʼafeka bʼeotswelo ea Metusela, ko aotaki bana bʼaende la bʼamato. 23Mbula iuma ya Anoka yokita benkama besato la ntukʼotoa lʼitano. 24Ko Anoka aolesana la Nzakomba; ko ende ntenya lenkina, eki Nzakomba okolakʼende.
25Ko Metusela aokita mbula bonkama la ntuku mwambi la nsambo, ko aotaki Lemeke. 26Ko Metusela aikaki ndʼafeka bʼeotswelo ea Lemeke mbula benkama nsambo la ntuku mwambi lʼife, ko aotaki bana bʼaende la bʼamato. 27Ko mbula iuma ya Metusela yokita benkama ibwa la ntukʼotoa lʼibwa: nkako ende aowa.
28Ko Lemeke aokita mbula bonkama la ntuku mwambi lʼife, ko aotaki bona owa jende; 29ko aoloila lina Noa, aokela, “One ifotosalanganya ndʼosala bokiso la ndʼolemo wʼakatʼakiso, o lima wambo wa tu boki Yawe oambaka bamoci.” 30Ko Lemeke aikaki ndʼafeka bʼeotswelo ea Noa mbula benkamʼetano la ntukʼibwa lʼitano, ko aotaki bana bʼaende la bʼamato. 31Elengʼeko mbula iuma ya Lemeke yokita benkama nsambo la ntuku nsambo la nsambo; nkako aowa. 32Ko Noa aokita mbula benkama betano: ko Noa aotaki Seme la Ama ko la Yefete.
Àwon tá yàn lọ́wọ́lọ́wọ́ báyìí:
Toango 5: LOL87
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
La Bible en Lomongo © Societe Biblique de la R.D. Congo 1987