Toango 4
4
Kaina la Abele
1Ko Adama aala Ewe, waji okae, ko aofoswa jemi, ko aoota Kaina; aokela, “Njoata bonto lʼekambyelo ea Yawe.” 2Lenkina aoota Abele, bokune okae. Abele aki wesanyi owa mpate, lolonde Kaina aki bosali owʼamoci. 3Ndʼafeka bʼelingi fele, Kaina aoyela bamuka bʼokili ngole mbeka ele Yawe. 4Ko Abele aoyela nsomi ya botonga bokae ko la bauta bʼiko. Ko Yawe aosima Abele la mbeka ekande, 5lolo ntasima Kaina la mbeka ekande. Ko Kaina aoloka nkele mongo, ko aominyʼelongi. 6Ko Yawe aokela Kaina, “Oloka nkele lae? Ko ominyʼelongi lae? 7Nga okelʼolotsi, ofaosimama losimo nde? Ko ngʼofokelʼolotsi, bobe boosama nda wiso; ko mposa eʼoko ele nkʼele we, lolo we yalema nkolo eʼoko.” 8Ko Kaina akela Abele, bokune okae, “Kela tokende nda lisala.” Ko akʼiyo nda lisala Kaina aolemaela Abele bokune okae, ko aolooma. 9Nkako Yawe aokela Kaina, “Abele, bokune oke, ale nko?” Ende aolamba, “Mpea; kamba emi nde bofongi owʼokune okami?” 10Ko Yawe aolokela, “Joi liki wʼokelaka na? Lofoso jʼalongo ba bokune oke lombeleza limʼamoci. 11Ko aeyoko olambema la wambo wa tu limʼamoci bako baumbolaki bomwa wae bambe balongo bʼokune oke lima likata like. 12Asala we bamoci, bafaokofuleza toma; ko wifoyala nkangʼoloci lʼontʼondesesa ndʼokili,” 13Ko Kaina aokela Yawe, “Nsisoza ekami eondekola, mpokuseya eko. 14Bala, ondite mbilʼene lima bokiliʼone; ko njifisama lima elongi eke; njifoyalema nkangʼoloci lʼontʼondesesa ndʼokili; ko bonto nko loswele anyangʼontana ifomboma.” 15Ko Yawe aolokela, “Ndʼewelʼeko, osʼooma Kaina, ende ifitama la witako o biitako nsambo.” Ko Yawe aolila lotaza ele Kaina, nyango bontʼotanʼende, afolooma. 16Ko Kaina aokenda limʼa joso ja Yawe. Ko aofetsa nda Noda, wiji wa est ea Edene.
Bana baki Kaina
17Kaina aoala waji okae ko aofoswa jemi, ko aoota Anoka. Kaina aotonga bonanga, ko aotangʼonangʼoko Anoka, lima lina jʼona okae. 18Ko Anoka aoota Ilada; ko Ilada aoota Meuyaele; ko Meuyaele aoota Metusela; ko Metusela aoota Lemeke. 19Ko Lemeke aokola baaji bafe; lina jʼomo liki Ada; ko lina jʼonkina liki Sila. 20Ada aotaki Yabala. Ende aki ise ea banto bafetsa nda tolombe ta bito, ko baongola nyama ya mbongola. 21Lina ja bokune okae liki Yubala. Ende aki ise ea bantʼauma bafoma bongele la nkombi. 22Ko Sila aotaki Tubala-Kaina. Ende aki botuli owa bifeko biuma bia konga la loolo. Ko nkana ea Tubala-Kaina aki Naama. 23Ko Lemeke aokela baaji bakae:
“Ada la Sila, lokoza lolaka lokami;
Inyʼaaji ba Lemeke lokoza baoyi batefelʼemi.
Njoomʼonto ekiʼndʼonkotaka mpota,
Ko njoomʼosekota
ekiʼndʼonsakolaka.
24Nga bonto ifitama la witako biitako
nsambo ndʼeloko ea Kaina,
Nsosolo ifitama witako biitako ntuku
nsambo la nsambo ndʼeloko ea Lemeke.”
25Ko Adama aoala lenkina waji okae, ko aoota bona, ko aoloila lina Sete, elʼende aokela, “Nzakomba aonkaya bona omo ndʼefosa eki Abele, oki Kaina oomaka.” 26Ko bona aootswa ele Sete ngoko, ko aoloila lina Enosa. Ndʼekekʼeko banto baangaki jeta lina ja Yawe ndʼoondo.
Àwon tá yàn lọ́wọ́lọ́wọ́ báyìí:
Toango 4: LOL87
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
La Bible en Lomongo © Societe Biblique de la R.D. Congo 1987