Salmos 9
9
1¡Idú ládxaʼa riguʼa Liʼ yöl-laʼ ba, Xan!
¡Usiyöndaʼ bönachi ca naca yúguʼtë yöl-laʼ huáca nunuʼ!
2¡Udzéjadaʼ, en uziʼa xibóʼ!
¡Gul-laʼ yöl-laʼ ba que Loʼ, tuʼ nayë́pisëtëruʼ!
3¡Taʼzxunnaj nupa taʼdáʼbagaʼ nedaʼ!
¡Taʼdzö́ʼö, en tuʼniti loʼ Liʼ,
4tuʼ nubéajuʼ tsahuiʼ le naca dxiʼa runaʼ!
¡Röʼu ga rinná bëʼu, en ruchiʼa rusörö́uʼ queë́tuʼ ca naca le naca tsahuiʼ!
5Bulidza ziʼu yuguʼ yödzö, en busunítiuʼ nupa tuáʼ döʼ.
Tsaz busuluʼ lu guichi quiuʼ gapa gulaʼzúaj láguequi.
6Chigulaʼniti nupa gulaʼdáʼbagaʼ Liʼ.
Tsaz naguínnajgaca gapa gulaʼcuáʼ.
Busunítiuʼ yuguʼ yödzö gapa naʼ gulaʼcuáʼ,
ateʼ cuntu nu zoa röjné yuguʼ yödzö naʼ.
7Zóaticaʼsëʼ Xanruʼ Dios.
Naguixjëʼ tsaz lataj ga röʼë rinná bëʼë en ruchiʼa rusörö́ëʼ quégaca bönachi.
8Uchiʼa usörö́ëʼ quégaca bönachi yödzölió lu le naca tsahuiʼ.
Uchiʼa usörö́ëʼ quégaca yuguʼ yödzö lu le nácatë.
9Gun chiʼë Xanruʼ Dios nupa nácagaca yechiʼ.
Gácalenëʼ léguequi cateʼ nu gun léguequi ziʼ.
10Uluʼzxöni ladxiʼ Liʼ nupa núnbëʼgaca Loʼ.
Caní gaca, Xan, tuʼ cabí nusán ládxuʼu nupa tuʼguilaj Liʼ.
11Guliʼgul-la yöl-laʼ ba queëʼ Xanruʼ, zoëʼ ga naʼ nazíʼi le Sión.
Buliʼsiyö́n bönachi yuguʼ yödzö ca naca yuguʼ le nunëʼ.
12Bitiʼ ral-la ládxëʼë nupa taʼguíʼi taʼzacaʼ cateʼ tuʼlidza Lëʼ,
tuʼ röjné léguequi Nu naʼ ruzíʼ lëbi nu ruti bönachi.
13Buéchiʼ ladxiʼ nedaʼ, Xan.
Buyú ca tun nedaʼ ziʼ nupa tuʼdíʼi nedaʼ.
Ruchisuʼ Liʼ nedaʼ cateʼ chirequi gátiaʼ
14para gaca usiyöndaʼ bönachi yöl-laʼ ba quiuʼ Liʼ.
Ga naca ga nu tsaza yödzö quiuʼ nazíʼi le Sión,
udzéjadaʼ tuʼ nusölóʼ nedaʼ.
15Yöjbíxigaca bönachi yuguʼ yödzö lu yeru gulaʼchö́ʼöna ga tsöjbíxigaca luzë́ʼeguequi.
Bilaʼröli niʼaguequi lu yöxaj buluʼcachiʼ para ilaʼzö́n léguequi.
16Chinunëʼ Xanruʼ Dios ga núnbëʼgaca bönachi Lëʼ tuʼ buchiʼa busörö́ëʼ quéguequi.
Lu lë naʼ nun nu ruáʼ döʼ zön laʼ cuinsi.
17Ilaʼyaza lataj chul-la nupa tuáʼ döʼ,
yúguʼtë nupa naʼ nal-la ládxiʼgaca Dios.
18Calëga tsaz uluʼgáʼana cáʼasö nupa taʼyadzaj taʼyudxi,
en bitiʼ initi tsaz yöl-laʼ run löza quégaca nupa nácagaca yechiʼ.
19Guyasa, Xan.
Bitiʼ guʼu lataj tsë́pisë nu naca bönáchisö.
Buchiʼa busörö́ quégaca bönachi yuguʼ yödzö.
20Buxö́s léguequi, Xan.
Ben ga uluʼúnbëʼ le nácgaca, tuʼ nácagacasö bönachi.
Àwon tá yàn lọ́wọ́lọ́wọ́ báyìí:
Salmos 9: zar
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2009, Wycliffe Bible Translators, Inc. All rights reserved.