लूका 21

गरीब विधवा रा दान

(मरकु. 12:41-44)

1यीसूए आपणी नजर घुमाई होर देख्या कि अमीर आपणा-आपणा दान मन्दरा रे दान पात्रा मन्झ पाया करहा ऐं थे। 2होर यीसूए एक गरीब विधवा भी ताम्बे रे दो छोटे सिक्के पांदे देखी। 3होर यीसूए आपणे चेले किन्हें बोल्या, हांऊँ तुस्सा किन्हें सच्च -सच्च बोल्हा कि, “एस्से गरीब विधवे इन्हा सभी अमीर लोका ले ज्यादा दान दितेया: 4क्यूंकि तिन्हें सभीए आपणी बौह्त कमाई मन्झा ले दान दितेया पर तेस्से ज्नाने, आपणी कमी घटी मन्झा ले आपणी सारी कमाई देई दिती।”

मन्दरा रे विनासा रे बारे मन्झ भविस्यावाणी

(मत्ती 24:1,2; मरकु. 13:1,2)

5जेबे तेसरे चेले मन्झा ले कुछ लोक मन्दरा रे बारे मन्झ गल्ला करेया करहा ऐं थे कि, से मन्दर बांके-बांके पात्थरा होर परमेसरा जो चढ़ाईरी चीजा किन्हें बधिया सजाईरा। यीसूए बोलेया, 6“स्यों ध्याड़े आऊणें, जिन्हा मन्झ ये सभ कुछ जो तुस्से देख्हा ऐं, तिन्हा मन्झा ले एता मन्झ एक पात्थर भी नी बचणा: क्यूंकि एक-एक पात्थर ढाली दितेया जाणा होर सभ कुछ नास हुई जाणा।”

यीसू रे दबारा वापस आऊणें रा चिन्ह

(मत्ती 24:3-14; मरकु. 13:3-13)

7तिन्हें यीसू ले पूछेया कि, “हे गुरु, ये सभ केभे हूणीं? होर जेबे ये गल्ला पूरी हूणीं तेस टैमा रा क्या चिन्ह हूंणां?” 8यीसूए बोल्या, “चतन्न रैहया कि, कोई तुस्सा जो ना भरमाए, क्यूंकि बौह्त लोका मेरे हका मन्झ आऊंणा, होर तिन्हा बोलणा कि, ‘हांऊँ मसीह आ,’ होर ये भी कि टैम आई गईरा, ता तुस्से तिन्हारे पीछे देख्या चली जांदे। 9होर जेबे तुस्से लड़ाईया होर दंगे फसादा री गल्ला सुणघे, ता डरदे देख्या, क्यूंकि इन्हारा पैहले हूंणां जरूरी आ, पर तेस टैम झटपट अंत नी हूंणां।”

10तेबे यीसूए तिन्हा किन्हें बोल्या कि, “एक राज्या दूजे राज्या रे बरखलाफ लड़ाई करणी। 11होर बडे-बडे हिलण हूंणे, होर जगहा-जगहा अकाल होर माहमारिया हूणीं, होर आसमाना मन्झ डराऊणी चीजा हूणीं होर बडे चिन्ह जाहिर हूंणे। 12पर इन्हा सभ गल्ला ले पैहले तिन्हा मेरे चेले हूंणे री वजहा ले तुस्से पकड़ने, होर दुःख देणे, होर यहूदी सभा मन्झ सौंपणे, होर जेल्हा मन्झ पाणे, होर राजे होर हाकमा रे साम्हणें लई जाणे। 13पर तुस्सा जो मौका मिली जाणा कि तुस्से मेरे बारे मन्झ गुआही देई सको। 14इधी कठे आपणे-आपणे मना जो त्यार रखा कि आस्सा पैहले ले जवाब देणे री फिकर नी करणी। 15क्यूंकि मां तुस्सा जो एह्ड़ी बोली होर बुद्धि देणी कि, तुस्सा रे सारे व्रोधिया तुस्सा रे खिलाफ बोलणे होर तुस्सा जो झूठे साबित करणे रे लायक नी रैंह्णां। 16होर तुस्सा रे माऊ बापू, होर भाईया बैहणा, होर टब्बरा, होर दोस्ता भी तुस्से पकड़वाणे; एथी तक कि तुस्सा मन्झा ले कितने मुकाई देणे। 17होर तुस्से मेरे पर विस्वास रख्हा ऐं इधी कठे सभी लोका तुस्सा किन्हें बैर करणा। 18पर तुस्सा रे मूंडा रा एक बाल भी बांका नी हूंणां। 19आपणे धीरज रखणे ले ही तुस्से आपणी जान बचाई सक्हा ऐं।”

यरुस्लेम सैहरा रे विनासा री भविस्यवाणी

(मत्ती 24:15-21; मरकु. 13:14-19)

20“जेबे तुस्से यरुस्लेम सैहरा जो सेना किन्हें घिर्ही रा देखो, ता जाणी लया कि तेसरा उजड़ी जाणा नेडे आ। 21तेबे जो यहूदिया ईलाके मन्झ हो स्यों प्हाड़ा पर भगी जाए, होर जो यरुस्लेम सैहरा रे अंदर हो स्यों बाहर निकली जाए; होर जो गांऊँआं मन्झ हो स्यों तेस गांऊँआं मन्झ नी जाए। 22क्यूंकि ये बदला लेणे या सजा पाणे रे एह्ड़े ध्याड़े हूंणे, ताकि जो गल्ला लिखी गईरी स्यों सभ पूरी हुई जाए। 23तिन्हा ध्याड़े जो गर्भवती होर दूध प्याणे वाली ज्नानिया हूणीं, तिन्हारे कठे मुंजो बौह्त दुःख हुएआ करहा, क्यूंकि देसा मन्झ बडा क्लेस होर इन्हा लोका पर बड़ी विपत्ति आऊणीं। 24स्यों तलवारा किन्हें मारी दिते जाणे, होर कई दूजे देसा रे लोका मन्झ बंदी बणाए जाई किन्हें पूजाए जाणे, होर जेबे तक अन्यजाति लोका रा टैम पूरा नी हुई जाए, तेबे तक यरुस्लेम सैहर अन्यजाति लोका रे पैरा हेठ रौंदया जाणा।”

माह्णुं रे मह्ठे दबारा आऊंणा

(मत्ती 24:29-31; मरकु. 13:24-27)

25“होर सूरज होर चांद होर तारे मन्झ चिन्ह सुझणे, होर धरती पर, सारी जाति रे लोका जो संकट हूंणां। क्यूंकि तिन्हा समुद्रा री बड़ी भारी अवाज होर लैहरा रा हाल्ला सुणी किन्हें डरी जाणा। 26एस डरा री वजहा ले होर संसारा पर आऊणें वाली घटना रा इंतजार करदे-करदे लोका रे मन्झ जी नी रैंह्णां, क्यूंकि आसमाना री सक्तिया हिल्लाई जाणी। 27तेबे तिन्हा हांऊँ माह्णुं रा मह्ठा सामर्थ होर बड़ी महिमा साउगी बादला पर आऊंदे देखणा। 28जेबे ये गल्ला हुन्दी लगे, ता सीधे हुई किन्हें आपणा मूंड गास चक्या; क्यूंकि तुस्सा रा छुटकारा नेडे आ।”

अंजीरा रे डाला रा उदाहरण

(मत्ती 24:32-35; मरकु. 13:28-31)

29यीसूए तिन्हा किन्हें एक उदाहरण बोल्या कि, “अंजीरा रे डाला होर सभ डाला जो देखा। 30जिहां ई तिन्हारे टीऊऐ फट्हा ऐं, ता तुस्से देखी किन्हें जाणी लैहां ऐं कि, गर्मी रा मौसम नेडे आ। 31इंहां ईं जेबे तुस्से इन्हा गल्ला जो हुंदे देखो, तेबे जाणी लया कि परमेसरा रा राज नेडे आ। 32हांऊँ तुस्सा किन्हें सच्च बोल्हा कि, जेबे तक ये सभ गल्ला नी हुई जाए, तेबे तक एस्सा पीढ़ी रा अंत नी हूंणां। 33आसमान होर धरती टली जाणे, पर जो मैं बोली दितेया, से पूरा हुई किन्हें रैहणा।”

जागदे रैहया

(मत्ती 24:36-44; मरकु. 13:32-37)

34“इधी कठे चतन्न रैहया, एह्ड़ा नी हो कि तुस्सा रे मन खुमार होर पी किन्हें मुतालणा, होर एस जिन्दगी री चिंता किन्हें सुस्त हुई जाए, होर से ध्याड़ा तुस्सा पर फंदे साहीं एकदम आई जाए होर जिहां एक जानवर फंदे मन्झ अचानक फसी जाहें। 35क्यूंकि तेस सारी धरती रे सभ रैहणे वाल़े पर इंहां ईं आई जाणा। 36इधी कठे त्यार रैहया होर हर टैम प्रार्थना करदे रैहया ताकि तुस्से इन्हा सभी आऊणें वाली घटना ले बचणे, होर हांऊँ माह्णुं रे मह्ठे रे साम्हणें खड़ने रे लायक बणी सको।” 37होर से ध्याड़िया मन्दरा मन्झ उपदेस देहां था; होर राती बाहर जाई किन्हें जैतूना रे प्हाड़ा पर रैंहयां था। 38होर भ्यागा तड़के कई लोक उठी किन्हें तेस वाले मन्दरा मन्झ सुणने रे कठे जाया करहा ऐं थे।

Àwon tá yàn lọ́wọ́lọ́wọ́ báyìí:

लूका 21: MJLNT

Ìsàmì-sí

Pín

Daako