लूका 22

यीसू जो मारने री योजना

(मत्ती 26:1-5; मरकु. 14:1,2; यहू. 11:45-53)

1अस्जेह्ड़ी रोटी रा साजा जेस जो फसहा रा साजा भी बोल्हा ऐं, आऊणें वाल़ा था। 2होर मुख्य याजके होर व्यवस्था स्खाणे वाल़े एस गल्ला री ताका मन्झ थे कि यीसू जो किहाँ मारिये, पर स्यों लोका ले डरहा ऐं थे।

यहूदे री धोखे बाजी

(मत्ती 26:14-16; मरकु. 14:10,11)

3होर सैतान यहूदा इस्करयोति मन्झ समाया, होर से तिन्हा बारा चेले मन्झा ले एक था। 4यहूदे जाई किन्हें मुख्य याजके होर मुखिया साउगी गलबात किती कि, से तिन्हारे हाथा मन्झ किहाँ पकड़वाणा? 5स्यों खुस हुई गये, होर तेस जो ढब्बे देणे रा वादा कितेया। 6तिन्हें मनी लया, होर मौका तोप्दा लग्या कि, जेबे भीड़ नी हो तेस जो तिन्हारे हाथा मन्झ पकड़वाई दे।

चेले साउगी फसहा रा आखरी खाणा

(मत्ती 26:17-25; मरकु. 14:12-21; यहू. 13:21-30)

7तेबे अस्जेह्ड़ी रोटी रे फसहा रे साजे रा ध्याड़ा आया, जेस मन्झ फसहा रा छेलू बलि करणा जरूरी आ 8होर यीसूए पतरसा होर यहून्ना जो ये बोली किन्हें भेज्या कि, “जाई किन्हें आस्सा रे खाणे रे कठे फसहा रे साजे रा खाणा त्यार करा।” 9तिन्हें यीसू ले पूछेया, “आस्से फसहा रे साजे रा खाणा केथी त्यार करहे?” 10यीसूए तिन्हा किन्हें बोल्या, “गांऊँआं मन्झ जांदे ई एक माह्णुं जिन्हें जे पाणी रा घड़ा चक्किरा हूंणां तुस्सा जो मिलणा, जेस घरा मन्झ से जाए; तुस्से तेसरे पीछे चली जाया। 11होर तेस घरा रे माल्का किन्हें बोला कि, ‘गुरु तुध किन्हें बोल्हा कि, प्रौह्णे रा कमरा जेथी जे मां आपणे चेलेया साउगी फसहा रे साजे रा खाणा, से केथी आ?’ 12तेस तुस्सा जो एक सजा सजाईरा कमरा दसणा, तेथी ई त्यारी करणा।” 13तिन्हें जाई किन्हें, जेह्ड़ा यीसूए तिन्हा किन्हें बोल्या था, तेह्ड़ा ई पाया, होर तिन्हें फसहा रे साजे रे खाणे री त्यारी किती।

प्रभु-भोज

(मत्ती 26:26-30; मरकु. 14:22-26; 1 कुरि. 11:23-25)

14जेबे टैम आई गया, ता यीसू आपणे चुणिरे चेलेया साउगी खाणा खांदे बैठी गया। 15होर तिन्हें तिन्हा किन्हें बोल्या, “मेरी बडी इच्छा थी कि, दुःख भोगी किन्हें मरणे रे ले पैहले ये फसहा रे साजे रा खाणा तुस्सा साउगी खाऊं। 16क्यूंकि हांऊँ तुस्सा किन्हें सच्च बोल्हा आ, मां ये साजे रा खाणा दबारा नी खाणा जेबे तक से परमेसरा रे राजा मन्झ पूरा नी हुई जाए।” 17तेबे यीसूए अंगूरा रे रसा रा डोंगा लई किन्हें परमेसरा रा धन्यावाद कितेया, होर बोल्या, “एता जो लई लऊआ होर आपु मन्झ बांडी लऊआ। 18क्यूंकि हांऊँ तुस्सा किन्हें बोल्हा कि, जेबे तक परमेसरा रा राज नी आये तेबे तक मां अंगूरा रा रस ऐबे ले कधी नी पीणा।”

19फेरी यीसूए रोटी लई होर परमेसरा रा धन्यावाद करी किन्हें रोटी तोड़ी, होर तिन्हा जो ये बोल्दे हुए रोटी दिती कि, “ये मेरा सरीर आ, जो तुस्सा रे कठे दितेया जाहाँ: मेरी यादगारा रे कठे एह्ड़ा ई करदे रैहया।” 20इंहां ईं तिन्हें खाने रे बाद अंगूरा रे रसा रा डोंगा लितेया होर ये बोली किन्हें दितेया कि, “ये डोंगा मेरे तेस खूना मन्झ नौंईं वाचा ई, जेस जो तुस्सा रे कठे बहाया जाहाँ। 21पर मेरे पकड़वाणे वाल़े रा हाथ मेरे साउगी मेजा पर आ। 22क्यूंकि हांऊँ माह्णुं रे मह्ठे रा मरणा ता पक्का आ, पर लानत ई तेस पर जेस हांऊँ पकड़वाणा, होर तेसरे कठे ये कितना ड्राऊणा हुणा!” 23तेबे स्यों आपु मन्झ पूछ ताछ करदे लगे कि, आस्सा मन्झा ले कुणहां, जेस जे ये काम करणा?

बडा कुणहां?

24चेले मन्झ ये बैहस भी हुई; कि आस्सा मन्झा ले सभी ले बडा कुण समझी जाहाँ? 25यीसूए तिन्हा किन्हें बोल्या, “अन्यजाति लोका रे राजा तिन्हा पर राज करहा ऐं; होर जो तिन्हा पर हक रखणे वाले आपणे आपा जो तिन्हारे भलाई करणे वाल़ा बोल्हा ऐं। 26पर तुस्सा मन्झ एह्ड़ा नी हो; एता रे बजाय जो तुस्सा मन्झ बडा हो, से छोटे साहीं होर जो मुखिया हो, से सेऊआदारा साहीं बणे। 27क्यूंकि बडा कुणहां, से जो खाणा खांदे बैठिरा या से जे सेऊआ करहा? क्या से नी आ जेह्ड़ा खाणा खांदे बैठीरा? पर हांऊँ तुस्सा मन्झ सेऊआदारा साहीं आ। 28पर तुस्से स्यों ऐं, जो मेरी परखणी मन्झ लगातार मेरे साउगी रहे। 29होर हांऊँ तुस्सा जो तिहां ईं एक राज देआ करहा जिहां मेरे बापू जिए मुंजो दितिरा था, तिहां ईं हांऊँ भी तुस्सा रे कठे देहां। 30ताकि तुस्से मेरे राजा मन्झ मेरी मेजा पर खाऊआ पिऊआ; बल्कि राजगद्दी पर बैठी किन्हें इस्राएल देसा रे बारा गोत्रा रा न्याय करा।”

पतरसा रे इनकारा रे बारे मन्झ भविस्यवाणी

(मत्ती 26:31-35; मरकु. 14:27-31; यहू. 13:36-38)

31“समौन, हे समौन, सुण, सैताने परमेसरा ले तुस्से लोक मांगी लईरे कि तुस्सा जो कणका साहीं भूहा ले लग करी सके। 32पर मैं तेरे कठे प्रार्थना कितिरी कि, तेरा विस्वास चली नी जाए, होर जेबे तू पाप करना छाडी दे, ता आपणे भाईया जो मजबूत करेया कि स्यों मेरे पर विस्वास करहे।” 33तिन्हें तेस किन्हें बोल्या, “हे प्रभु, हांऊँ तेरे साउगी जेल्हा जाणे, बल्कि मरणे रे कठे भी त्यार आ।” 34यीसूए बोल्या, “हे पतरस हांऊँ तेरे किन्हें बोल्हा कि, आज कुकड़ा रे बांग देणे ले पैहले, तुध त्राय बारी मुखरी जाणा कि, तू मुंजो नी जाणदा।”

बटुआ, झोला होर तलवार

35होर यीसूए चेले ले पूछेया कि, “जेबे मैं तुस्से बगैर बटुऐ, होर बगैर झोले, होर बगैर जूते खुसी री खबर प्रचार करदे भेजे थे, ता क्या तुस्सा जो केसी चीजा री कमी हुई थी?” तिन्हें बोल्या, “केसी चीजा री कमी नी हुई।” 36तिन्हें तिन्हा किन्हें बोल्या, “पर ऐबे लोक आस्सा रे बरखलाप हुई गईरे, जेस वाले जे बटुआ आ से लई ले; होर तिहां ईं झोला भी लई ले, होर जेस वाले तलवार नी हो से आपणे चोगा बेची किन्हें तेता जो खरीदी ले। 37क्यूंकि हांऊँ तुस्सा किन्हें बोल्हा कि, पवित्र सास्त्रा मन्झ मेरे बारे जो लिखिरा से पूरा हो। तेता मन्झ लिखिरा कि, ‘से एक पापी समझ्या गया।’ हां मेरे बारे मन्झ लिखी गईरी ये गल पूरी हूंणे वाली ई।”

38तिन्हें बोल्या, “हे प्रभु, देख एथी दो तलवारा ई,” तिन्हें तिन्हा किन्हें बोल्या, “बस बौह्त ई।”

जैतूना रे प्हाड़ा पर यीसू री प्रार्थना

(मत्ती 26:36-46; मरकु. 14:32-42)

39तेबे यीसू बाहर निकली किन्हें आपणे रूआजा रे मताबक जैतूना रे प्हाड़ा पर गया, होर चेले तेसरे साउगी चली गये। 40तेस जगहा पुज्ही किन्हें यीसूए तिन्हा किन्हें बोल्या, “प्रार्थना करा, ताकि तुस्से परखणी मन्झ नी पई जाए।” 41होर जिहां कोई दूरा तक पात्थर डयाई सक्हा, से तिन्हा ले लगभग तीह मीटर दूर चली गया होर घुटने टेकी किन्हें प्रार्थना करदा लग्या। 42“हे मेरे बापू, तेरे ले सभ कुछ हुई सक्हा; एस दुःखा रा डोंगें जो मेरे वाले ले हट्टाई दे, तेबे भी जेह्ड़ा हांऊँ चाहां तेह्ड़ा नी, पर जो तू चाहां तेह्ड़ा ई हो।” 43तेबे स्वर्गा ले एक स्वर्गदूत तेस जो सुझ्या जो तेस जो सामर्थ देहां था। 44होर से बौह्त बेचैन हुई किन्हें होर भी ज्यादा प्रार्थना करदा लग्या; होर तेसरा पसीना खूना रे टेपे बणी किन्हें थाले जमीना पर पया करहा था। 45तेबे से प्रार्थना ले उठेया होर आपणे चेले वाले आया ता तिन्हें स्यों दुआसी रे मारे सूती रे देखे? 46होर यीसूए चेले किन्हें बोल्या, “तुस्से किधियो सया करहा ऐं? उठा, प्रार्थना करा, ताकि परखणी मन्झ नी पई सको।”

यीसू धोखे किन्हें पकड़वाया गया

(मत्ती 26:47-56; मरकु. 14:43-50; यहू. 18:3-12)

47यीसू एह्ड़ा बोल्या ई करहा था कि, एक भीड़ आई, यहूदा इस्करयोति, जो बारा चेले मन्झा ले एक था, से तिन्हारे अगे-अगे आया करहा था, से यीसू वाले आया, ताकि से तेस जो गले लगाई सको। 48यीसूए तिन्हा किन्हें बोल्या, “हे यहूदा इस्करयोति, क्या तू गले लगाई किन्हें माह्णुं रे मह्ठे जो पकड़वाहां?” 49तेसरे साथिये जेबे देख्या कि क्या हूंणे वाल़ा आ, ता तिन्हें बोल्या, “हे प्रभु, क्या आस्से तलवार च्लाईए?” 50होर तिन्हा मन्झा ले एकिये तलवार काढी होर बडे याजका रे नौकरा पर चलाई, होर तेसरा कान टुकी दितेया। 51एता पर यीसूए बोल्या, “ऐबे बस करा।” होर तिन्हें तेसरा कान छुही किन्हें से ठीक करी दितेया। 52तेबे यीसूए मुख्य याजके होर मन्दरा रे मुखिये होर यहूदी मुखिये जो तेसरे व्रोधी बणी किन्हें आईरे थे, तिन्हा बोल्या कि, “क्या तुस्से डाकू समझी किन्हें मुंजो पकड़णे रे कठे तलवारा होर डंडे लई किन्हें निकली रे? 53जेबे हांऊँ मन्दरा मन्झ हर ध्याड़े तुस्सा साउगी था, ता तुस्से मेरे पर हाथ नी पाया; पर ये तुस्सा री घड़ी ई, होर न्यहारे रे राज आ।”

पतरसा रा इनकार

(मत्ती 26:57,58,69-75; मरकु. 14:53,54,66-72; यहू. 18:12-18,25-27)

54फेरी स्यों यीसू जो पकड़ी किन्हें लई चले, होर कैफा बडे याजका रे घरा मन्झ ल्याए होर पतरस दूरा-दूरा ले ई तेसरे पीछे-पीछे चल्या करहा था। 55होर जेबे स्यों आंघणा मन्झ आग भ्खाई किन्हें कठे बैठिरे थे, ता पतरस भी तिन्हारे मन्झ भरा बैठी गया। 56होर नौकराणिया मन्झा ले एक तेथी आई होर तेस जो आग तफदे देख्या होर तेस जो ध्याना किन्हें देखी के बोलदी लगी, “ये भी ता तेस साउगी था।” 57पर पतरस मुखरी गया कि, “ओ जनानिये, हांऊँ तेस जो नी जाणदा।” 58थोह्ड़ी देरा बाद केसी होरिये तेस जो देखी किन्हें बोल्या, “तू भी ता तिन्हा मन्झा ले एक आ।” पतरसे बोल्या, “ओ जनाब, से हांऊँ नी आं।” 59कोई घंटे भरा ले बाद एक होर आई किन्हें बोल्दा लग्या, “पक्का ये भी ता तेस साउगी था; क्यूंकि ये गलील जिल्ले रा आ।” 60पतरसे बोल्या, “ओ जनाब, हांऊँ नी जाणदा कि तू क्या बोल्हा?” से बोल्या ई करहा था कि झटपट कुकड़े बांग दिती। 61होर तेबे प्रभुए घूमी किन्हें पतरसा वखा देख्या, होर पतरसा जो प्रभु री से गल याद आई जो तिन्हें बोलिरी थी कि, “आज कुकड़ा रे बांग देणे ले पैहले, तुध त्राय बारी मेरी नांह करणी।” 62होर से बाहर निकली किन्हें बड़ा भारी रोंदा लग्या।

यीसू रा मजाक डूआणा

(मत्ती 26:67,68; मरकु. 14:65)

63जिन्हें माह्णुंऐ जे यीसू पकड़िरा था, तिन्हें तेसरा मजाक डूआया होर तेस जो मारदे पीटदे लगे। 64होर तिन्हें यीसू री हाखिया पर पट्टी बान्ही दिती होर तेस ले पूछेया, “भविस्यवाणी करी किन्हें दस कि तू कुने मारेया?” 65होर तिन्हें बौह्त सारी निंदा री गल्ला तेसरे बरखलाफ किती।

माहसभा रे साम्हणें यीसू

(मत्ती 26:59-66; मरकु. 14:55-64; यहू. 18:19-24)

66जेबे ध्याड़ा सुर्हू हुएया ता लोका रे यहूदी मुखिये होर मुख्य याजके होर व्यवस्था स्खाणे वाल़े कठे हुए, होर फेरी स्यों लोक तेस जो आपणी माहसभा मन्झ लई गये। होर पूछेया, 67“अगर तू मसीह आ, ता आस्सा किन्हें बोली दे!” यीसूए तिन्हा किन्हें बोल्या, “अगर हांऊँ तुस्सा किन्हें बोलू ता तुस्सा विस्वास नी करणा। 68होर अगर हांऊँ पूछूं, ता तुस्सा जवाब नी देणा। 69पर ऐबे ले मां माह्णुं रे मह्ठे सर्वसक्तिमान परमेसरा री सीधी वखा जो बैठी रेहणा।” 70एता पर सभिए बोल्या, “ता क्या तू परमेसरा रा मह्ठा आ?” यीसूए तिन्हा किन्हें बोल्या, “तुस्से आपु ई बोल्हा ऐं कि, हांऊँ आं।” 71तेबे तिन्हें बोल्या, “ऐबे आस्सा जो होर गुआहा रा क्या काम आ? क्यूंकि आस्से आप्हुए तेसरे मुंहा ले सुणी लया।”

Àwon tá yàn lọ́wọ́lọ́wọ́ báyìí:

लूका 22: MJLNT

Ìsàmì-sí

Pín

Daako