यहून्ना 8

व्यभिचारा मन्झ पकड़ी गईरी जन्नाने जो माफी मिलणा

1पर यीसू होर तेसरे चेले जैतूना रे प्हाड़ा पर गया। 2दूजे ध्याड़े भ्यागा ई दबारा मन्दरा जो आया, होर बौह्त लोक यीसू वाले आये। होर यीसू बैठी किन्हें तिन्हा जो उपदेस देंदा लग्या। 3तेबे व्यवस्था स्खाणे वाल़े होर फरीसी लोक एक ज्नाने जो ल्याहूंआं ऐं, जो व्यभिचारा मन्झ पकड़ी गईरी थी। होर तेस्सा जो बीच मन्झ खड़ा करी किन्हें यीसू किन्हें बोल्या, 4“हे गुरु, ये ज्नाने व्यभिचार करदे पकड़ी गईरी। 5मूसा री व्यवस्था मन्झ मूसे आस्सा जो ये हुक्म दितिरा कि एह्ड़ी ज्नानिया जो पथराव करणा; होर तू एस्सा ज्नाने रे बारे मन्झ क्या बोल्हा?” 6तिन्हें यीसू जो परखणे रे कठे ये गल बोली ताकि तेस पर दोस लगाणे रे कठे कोई गलती मिली सके। पर यीसू झुकी किन्हें आपणी गुठीया किन्हें जमीना पर कुछ लिख्दा लग्या। 7जेबे स्यों तेस ले पुछदे रहे, ता तिन्हें गास उठी किन्हें तिन्हा जो बोल्या कि, “तुस्सा मन्झा ले जो पापी नी हो, से ही तेस्सा जो पैहले पात्थर मारे।” 8होर यीसू दबारा झुकी किन्हें जमीना पर लिख्दा लग्या। 9पर स्यों ये सुणी किन्हें बडे ले लई किन्हें छोटे तक एक-एक करी किन्हें चली गये, क्यूंकि स्यों जाणहां ऐं थे कि स्यों पापी ऐं। तेबे तेथी यीसू कल्हा रही गया, होर ज्नाने तेथी बीचा मन्झ खड़ी रही गयी। 10यीसूए गास उठी किन्हें तेस्सा किन्हें बोल्या, “हे ज्नाने, स्यों केथी गये? क्या केसिए तुजो दंडा रा हुक्म नी दितेया।” 11तेस्से बोल्या, “हे प्रभु, केसिए नी दितेया।” यीसूए बोल्या, “हांऊँ भी तुजो दंडा रा हुक्म नी देंदा, जा होर दबारा पाप देख्या करदी।”

यीसू संसारा री ज्योति

12तेबे यीसूए दबारा लोका किन्हें बोल्या, “संसारा रा प्रयासा हांऊँ आं, जो मेरे पीछे आहुंघा, तेस नह्यारे मन्झ नी चलणा, पर अनंत जिन्दगी देणे वाल़ा प्रयासा पाणा।” 13फरीसी लोके तेस किन्हें बोल्या, “तू आपणी गुआही आपु देहां, तेरी गुआही सच्ची नी ई।” 14यीसूए तिन्हा जो जवाब दितेया कि, “अगर हांऊँ आपणी गुआही आपु देहां, तेबे बी मेरी गुआही सच्ची ई। क्यूंकि हांऊँ जाणहां कि, हांऊँ केथी ले आईरा, होर केथी जाहाँ? पर तुस्से नी जाणदे कि हांऊँ केथी ले आहूँआं या केथीयो जाहाँ। 15मुंह देखी किन्हें फैसला नी करा, पर ठीक-ठीक न्याय करा। 16होर जे हांऊँ न्याय करूं भी, ता मेरा न्याय सच्चा आ, क्यूंकि हांऊँ कल्हा नी आ, पर हांऊँ होर मेरा बापू जिन्हें जे हांऊँ भेजिरा। 17होर तुस्सा री मूसा री व्यवस्था मन्झ लिखिरा कि, दो आदमिया री गुआही मिली किन्हें सच्ची हुंहाँ ईं। 18हांऊँ आपणी गुआही आपु देहां, होर जिन्हें बापू हांऊँ भेजिरा से भी मेरी गुआही देहां।” 19तिन्हें यीसू किन्हें बोल्या, “तेरा बापू केथी आ?” यीसूए जवाब दितेया कि, “जे तुस्से मुंजो जाणदे ता मेरे बापू जो बी जाणदे।” 20ये गल्ला तिन्हें मन्दरा मन्झ उपदेस देंदे हुए भण्डार घरा मन्झ बोली, होर केसिए से नी पकड़ेया; क्यूंकि हल्ली तक तेसरा दुःख सहन करी किन्हें मरणे रा सही टैम नी आईरा था।

आपणे बारे मन्झ यीसू रा कैहणा

21यीसूए दबारा तिन्हा किन्हें बोल्या, “हांऊँ चल्हा, होर तुस्सा हांऊँ तोपणा होर आपणे पापा मन्झ मरी जाणां। जेथी हांऊँ जाहाँ तेथी तुस्से नी आई सक्दे?” 22एता पर यहूदी अगुवे बोल्या, “क्या ऐस आपणे आपा जो मारी देणा, जो बोल्हा कि, ‘जेथी हांऊँ जाहाँ, तेथी तुस्से नी आई सक्दे।’” 23यीसूए तिन्हा किन्हें बोल्या, “तुस्से धरती रे ऐं, पर हांऊँ स्वर्गा ले आईरा। तुस्से संसारा रे ऐं, हांऊँ संसारा नी आ। 24इधी कठे मैं तुस्सा किन्हें बोल्या कि, तुस्सा आपणे पापा मन्झ मरणा; क्यूंकि अगर तुस्से विस्वास नी करघे कि हांऊँ सेई आ, ता आपणे पापा मन्झ मरणा।”

25यहूदी अगुवे यीसू ले पुछेया, “तू कुणहां?” यीसूए तिन्हा किन्हें बोल्या, “हांऊँ सेई आ, जो पैहले ले तुस्सा जो बोल्दा आया।” 26“तुस्सा रे बारे मन्झ मुंजो बौह्त कुछ बोलना आ, होर न्याय करणा आ। फेरी भी मेरा भेजणे वाल़ा सच्चा आ; होर जो मैं तेस ले सुणेया से ही हांऊँ संसारा रे लोका किन्हें बोल्हा।” 27स्यों नी समझे कि यीसू तिन्हा किन्हें बापू परमेसरे रे बारे मन्झ बोल्हा। 28तेबे यीसूए बोल्या कि, “जेबे तुस्सा हांऊँ माह्णुं रा मह्ठा उचे पर चढ़ाणा, तेबे तुस्सा जाणना कि हांऊँ सेई आ, होर हांऊँ आपणे आप कुछ नी करदा। पर जिहां बापूए हांऊँ सखाईरा, तिहां ईं हांऊँ यूं गल्ला बोल्हा। 29होर मेरा भेजणे वाल़ा मेरे साउगी आ, तिन्हें हांऊँ कल्हा नी छाडीरा; क्यूंकि हांऊँ हमेसा तेह्ड़ा ई काम करहा जेस ले से खुस हुंहा।” 30जिहां ईं यीसू ये गल्ला बोल्या करहा था कि, कई लोके तेस पर विस्वास कितेया।

सच्चाईया तुस्से अजाद करणे

31तेबे यीसूए तिन्हा यहूदी लोका किन्हें जिन्हे जे तेस पर विस्वास कितिरा था बोल्या, “अगर तुस्से आपणी जिन्दगी मेरे बचना रे मताबक जिन्घे ता तेभे तुस्सा मेरे सच्चे चेले बणना। 32होर तुस्सा सच्चाई जाणनी, होर सच्चाईया तुस्से अजाद करी देणे।” 33तिन्हें तेस जो जवाब दितेया कि, “आस्से ता अब्राहमा रे बंसा ले ऐं होर कधी केसी रे गुलाम नी बणे; फेरी तू कि बोल्हा कि, तुस्सा अजाद हुई जाणा।” 34यीसूए तिन्हा जो जवाब दितेया, “हांऊँ तुस्सा किन्हें सच्च -सच्च बोल्हा कि जो कोई पाप करहा, से पापा रा गुलाम आ। 35होर गुलाम हमेसा घरा मन्झ नी रैहन्दा, पर मह्ठा हमेसा रैंहयां। 36एता कठे अगर मह्ठा तुस्से अजाद करणे, ता सच्चे तुस्सा अजाद हुई जाणा। 37हांऊँ जाणहां कि तुस्से अब्राहमा रे बंसा ले ऐं; तेबे बी मेरा बचन तुस्सा रे दिला मन्झ जगहा नी पांदा, इधी कठे तुस्से मुंजो मारी देणा चाहें। 38जेबे हांऊँ आपणे बापू वाले था जेह्ड़ी गल्ला मैं देखी से ही हांऊँ तुस्सा जो दसा दे, होर तुस्से बी तेह्ड़ा ई करहा ऐं जो तुस्से आपणे बापू ले सुणहां ऐं।”

39तिन्हें यीसू जो जवाब दितेया कि, “आस्सा रा बापदादा ता अब्राहम आ।” यीसूए तिन्हा किन्हें बोल्या, “अगर तुस्से अब्राहमा री बच्चे हुंदे, ता अब्राहमा साहीं काम करदे। 40पर ऐबे तुस्से मुंजो मारी देणा चाहें, क्यूंकि मैं तुस्सा जो सच्चा बचन दसेया जेह्ड़ा मैं परमेसरा ले सुणेयां। एह्ड़ा ता अब्राहमे नी कितेया था। 41तुस्से आपणे बापू साहीं काम करहा ऐं।”

तिन्हें तेस किन्हें बोल्या, “आस्से व्यभिचारा ले नी जम्मिरे; परमेसर आप्हुए आस्सा रा सच्चा बापू आ।” 42यीसूए तिन्हा किन्हें बोल्या, “अगर परमेसर तुस्सा रा बापू हुन्दा, ता तुस्से मेरे किन्हें प्यार रखदे; क्यूंकि हांऊँ परमेसरा री तरफा ले आईरा; हांऊँ आपणी तरफा नी आईरा, पर बापूए ही हांऊँ भेजिरा। 43तुस्से मेरी गल कि नी समझ्दे? क्यूंकि तुस्से मेरा गल्ला जो मनी नी सकदे। 44तुस्से आपणे बापू सैताना ले ऐं, होर आपणे बापू री इच्छा पूरी करणा चाहें। से ता सूरहू ले ई खूनी आ, होर सच्चाई पर खड़ा नी रैंहयां, क्यूंकि सच्चाई ता तेस अंदर हाई नी। जेबे से झूठ बोल्हा, ता से आपणी आदता री वजहा ले बोल्हा, क्यूंकि से झूठा आ, बल्कि झूठा रा बापू आ। 45पर हांऊँ जो सच्च बोल्हा, इधी कठे तुस्से मेरा विस्वास नी करदे। 46तुस्सा मन्झा ले कुण मुंजो पापी हूंणे रा दोस ल्गाहां? होर अगर मैं सच्च बोल्हा, ता तुस्से मेरा विस्वास कि नी करदे? 47जो कोई परमेसरा रा हुंहाँ से परमेसरा री गल्ला सुणहां, होर तुस्से इधी कठे नी सुणदे क्यूंकि तुस्से परमेसरा री तरफा ले नी ये।”

यीसू होर अब्राहम

48ये सुणी किन्हें यहूदी अगुवे यीसू किन्हें बोल्या, “आस्से ठीक बोल्हा ऐं कि तू सामरिया ईलाके रा लोक आ, होर तेरे मन्झ दुस्टात्मा ई?” 49यीसूए जवाब दितेया कि, “मेरे मन्झ दुस्टात्मा नी ई; पर हांऊँ आपणे बापू रा आदर करहा, होर तुस्से मेरा बेज्जती करहा ऐं। 50पर हांऊँ आपणी बड़ाई नी चाहन्दा, हां, पर एक एह्ड़ा जो चाहां मेरी बड़ाई हो, होर से ही न्याय करहा। 51हांऊँ तुस्सा किन्हें सच्च -सच्च बोल्हा कि, अगर कोई माह्णुं मेरे बचना पर चल्घा ता तेस कधी नी मरणा।” 52यहूदी अगुवे तिन्हा किन्हें बोल्या कि, “ऐबे आस्से जाणी लया कि तेरे मन्झ दुस्टात्मा ई। अब्राहम मरी गया, होर नबी बी मरी गये होर तू बोल्हा कि अगर कोई तेरे बचना पर चल्घा ता तेस कधी नी मरणा? 53आस्सा रा बापू अब्राहम ता मरी गया, क्या तू तेस ले बडा आ? होर नबी भी मरी गये, तू आपणे आपा जो क्या मन्हां।” 54यीसूए जवाब दितेया, “अगर हांऊँ आप्हुए आपणी बड़ाई करूं, ता मेरी बड़ाई कुछ नी ई; पर मेरी बड़ाई करणे वाल़ा मेरा बापू आ। जेसरे बारे मन्झ तुस्से बोल्हा ऐं कि, से तुस्सा रा परमेसर आ। 55होर तुस्से तेस जो जाणी नी पाए। पर हांऊँ तेस जो जाणहां, होर अगर हांऊँ बोलूं कि मैं तेस जो नी जाणदा, ता मां तुस्सा साहीं झूठे बणना। पर हांऊँ तेस जो जाणहां, होर तेसरे बचना पर चल्हा। 56तुस्सा रा बापू अब्राहम मेरा ध्याड़ा देखणे री उम्मीदा रे कठे बौह्त खुस था; होर तिन्हें देख्या, होर खुसी मनाई।” 57यहूदी अगुवे तेस किन्हें बोल्या, “हल्ली तक तू पंज्याह साला रा नी आ; फेरी भी तैं अब्राहम देखी लया!” 58यीसूए तिन्हा किन्हें बोल्या, “हांऊँ तुस्सा किन्हें सच्च -सच्च बोल्हा; एता ले पैहले कि अब्राहम जम्मेया, तेसरे जमणे ले पैहले हांऊँ ई आ।” 59तेबे तिन्हें यीसू जो मारणे रे कठे पात्थर चके, पर यीसू तिन्हारी नजरा ले बची किन्हें मन्दरा ले निकली गया।

Àwon tá yàn lọ́wọ́lọ́wọ́ báyìí:

यहून्ना 8: MJLNT

Ìsàmì-sí

Pín

Daako