यहून्ना 7

यीसू होर तेसरे भाई

1इन्हा गल्ला ले बाद यीसू गलील जिल्ले मन्झा फिरदा रैहया, होर से यहूदिया ईलाके मन्झ जाणा नी चाहन्दा था। क्यूंकि तेथी यहूदी अगुवे यीसू जो मारणे रे कठे कोसिस करेया करहा ऐं थे। 2होर यहूदी लोका रे तम्बूआ रा साजा#7:2 स्यों से साजा आपणे बापदादे री यादा मन्झ बणाहें थे कि तिन्हारे बापदादे चाली साल तक बियाबान जगहा रहे। ये फसहा रे साजे बाद छे महीने बाद बणाहें थे होर आठ ध्याड़े तक चल्हा था नेडे था। 3इधी कठे यीसू रे छोटे भाईये तेस जो बोल्या, “एथी मत रुक होर यहूदिया ईलाके मन्झ साजे रे कठे चली जा, क्यूंकि जो चमत्कार तू करहा तिन्हा जो तेरे चेले भी देखी सके। 4क्यूंकि जो कोई मसहूर हूंणां चाहां होर ल्हुखी किन्हें काम नी करदा। क्यूंकि तू ये काम करहा, ता संसारा रे लोक तुजो देखी सके।” 5क्यूंकि तेसरे भाई भी तेस पर विस्वास नी करदे थे। 6तेबे यीसूए तिन्हें किन्हें बोल्या, “हल्ली तक मेरे जाणे रे कठे सही टैम नी आईरा, पर तुस्से कधी भी जाई सक्हा ऐं। 7संसारा रे लोक तुस्सा किन्हें नफरत नी करी सक्दा। पर से मेरे किन्हें बैर करहा, क्यूंकि हांऊँ तिन्हो दसा कि स्यों बुरे काम करहा ऐं। 8तुस्से साजे मन्झ जाउआ, मां हल्ली एस साजे मन्झ नी जाणा; क्यूंकि हल्ली तक मेरे जाणे रे कठे सही टैम नी आईरा।” 9से यूं गल्ला करी किन्हें गलील जिल्ले मन्झ ई रही गया।

झोपड़ी रे साजे मन्झ यीसू

10पर जेबे यीसू रे छोटे भाई झोपड़ी रे साजे मन्झ चली गये, ता यीसू सभी रे साम्हणें नी गया पर चुपके जे गया। 11साजे मन्झ यहूदी अगुवे तेस जो तोप्दे लगे होर लोका ले पुछदे लगे कि, “क्या यीसू आईरा?” 12होर लोका मन्झ यीसू रे बारे मन्झ चुपे-चुपे बौह्त गल्ला हुई: कुछ बोल्हा ऐं थे कि, “यीसू भला माह्णुंआं।” होर कुछ बोल्हा ऐं थे कि “नंईं, यीसू लोका जो भरमाहां।” 13तेबे बी यहूदी अगुवे रे डरा रे मारे कोई आदमी यीसू रे बारे मन्झ खुल्ही किन्हें खरी गल्ला नी बोल्दे थे।

साजे मन्झ यीसू रा उपदेस

14होर साजे रे ध्याड़े रे बीचा मन्झ यीसू मन्दरा मन्झ जाई किन्हें उपदेस देंदा लग्या। 15तेबे यहूदी अगुवे हरान हुई किन्हें बोल्दे लगे कि, “एस जो बगैर पढ़े ये पवित्र सास्त्रा रा ज्ञान केथी ले आया?” 16यीसूए तिन्हा जो जवाब दितेया कि, “मेरा उपदेस मेरा नी आ, पर परमेसरा री जिन्हें हांऊँ भेजीरा आ। 17अगर कोई परमेसरा री इच्छा पर चलणा चाहां, ता से एस उपदेस रे बारे मन्झ जाणी लेया कि से परमेसरा री तरफा ले आ, या हांऊँ आपणी तरफा ले बोल्हा। 18जो आपणी तरफा ले कुछ बोल्हा, से आपणी ई बड़ाई चाहां, पर जो आपणे भेजणे वाले री बड़ाई चाहां सेई सच्चा आ, होर तेस मन्झ पाप नी आ। 19मूसे तुस्सा जो व्यवस्था दितीरी, तेबे बी तुस्सा मन्झा ले कोई व्यवस्था जो नी मनदा। एता रे बजाय तुस्से मुंजो मारणा चाहें?”

20लोके जवाब दितेया, “तेरे मन्झ दुस्टात्मा ई! कुण तुजो मारणा चाहां?” 21यीसूए तिन्हा जो जवाब दितेया कि, “मैं एक काम कितिरा, होर तुस्से हरान हुंहाँ ऐं। 22एता कठे मूसे तुस्सा जो खतने रा हुक्म दितेया (ये मूसा री तरफा ले नी आ, पर बापदादे ले आ) होर तुस्से अरामा रे ध्याड़े माह्णुंआं रा खतना करहा ऐं। 23जेबे अरामा रे ध्याड़े माह्णुंआं रा खतना कितेया जाहाँ ताकि मूसा री व्यवस्था रा हुक्म टली ना जाए। तुस्से मेरे प्रयाल्हे किधियो गुस्सा करहा ऐं कि, मैं अरामा रे ध्याड़े एक आदमी जो पूरी तरहा ले ठीक कितेया? 24मुंह देखी किन्हें फैसला नी करा, पर ठीक-ठीक न्याय करा।”

क्या यीसू ई मसीह आ?

25तेबे कितने यरुस्लेम सैहरा मन्झ रैहणे वाले लोक बोल्दे लगे, “क्या ये यीसू नी आ, जेस जो मारणे रे कठे कोसिस करेया करहा ऐं। 26पर देखा, यीसू ता बिना डरे गल्ला करहा होर अधिकारी तेस जो कुछ नी बोल्दा! केते एह्ड़ा ता नी आ कि तिन्हो पता लगी गया कि, येई मसीह आ। 27ये मसीहा किहाँ हुई सकां? क्यूंकि आस्से जाणहां ऐं कि ये केथीरा आ। पर जेबे मसीहा आऊंणा, ता केसी जो पता नी चलणा कि से केथी ले आऊंणा।” 28तेबे यीसूए मन्दरा मन्झ उपदेस देंदे हुए जोरा किन्हें बोल्या, “तुस्से मुंजो जाणहां ऐं होर ये भी जाणहां ऐं कि हांऊँ केथीरा आ। हांऊँ आपणे आपा ले नी आईरा पर मेरा भेजणे वाल़ा सच्चा आ, तेस जो तुस्से नी जाणदे। 29पर हांऊँ तेस जो जाणहां, क्यूंकि मैं तेसरी तरफा ले आ, होर तिन्हें ही हांऊँ भेजिरा।”

30तेबे यहूदी अगुवे यीसू जो गिरफ्तार करणा चाहेया तेबे भी केसिए तेस जो हाथ नी ल्गाया, क्यूंकि तेसरा मरणे रा सही टैम हल्ली तक नी आईरा था। 31होर भीड़ा मन्झा ले कई लोके तेस पर विस्वास कितेया, होर बोल्दे लगे कि, “मसीहा जेबे आऊंणा, ता क्या एता ले ज्यादा तेस चिन्ह दसणे जो इन्हें दसे?”

यीसू जो पकड़ने री कोसिस

32फरीसी लोके भीड़ा रे लोका जो यीसू रे बारे मन्झ चुपे-चुपे ये गल्ला करदे सुणेया, होर मुख्य याजके होर फरीसी लोके यीसू जो पकड़ने रे कठे स्पाही भेजे। 33एता पर यीसूए बोल्या, “हांऊँ थोह्ड़ी देरा तक तुस्सा साउगी आ, तेबे मां आपणे भेजणे वाल़े, वापस वाले चली जाणा। 34तुस्सा हांऊँ तोपणा पर नी मिलणा होर जेथी हांऊँ आ, तेथी तुस्से नी आई सक्दे।” 35यहूदी अगुवे एक दूजे मन्झ बोलदे लगे, “एस केथी जाणा कि, आस्सा जो ये नी मिलणा? क्या एस यहूदी लोका वाले जाणा, जो यूनान देसा रे सैहरा मन्झ तितर बीतर हुई किन्हें रैहें, होर तिन्हो जो भी स्खाणा चाहां? 36एसरा क्या मतलब आ जो गल इन्हें बोली कि, ‘तुस्सा हांऊँ तोपणा, पर नी मिलणा; होर जेथी हांऊँ आ, तेथी तुस्से नी आई सक्दे?’”

जिन्दगी देणे वाली पाणीया री दराऊआ

37साजे रे आखरी ध्याड़े बौह्त खास ध्याड़ा हुंहाँ था। तेस ध्याड़े यीसू खड़ा हुई किन्हें होर जोरा किन्हें बोल्या, “अगर कोई सोखा हो ता मेरे वाले आई किन्हें पीये। 38जेस मेरे पर विस्वास करणा, जिहां पवित्र सास्त्रा मन्झ बोलिरा, ‘तेसरे दिला मन्झा ले जिन्दगी देणे वाली पाणीया रा दराऊ बैह्णा।’” 39पर यीसूए ये गल्ला तेस पवित्र आत्मा रे बारे मन्झ बोल्या, जेस जो तेस पर विस्वास करणे वाले, पाणे वाले थे। क्यूंकि पवित्र आत्मा हल्ली तक उतरीरा नी था; क्यूंकि यीसू हल्ली तक आपणी महिमा जो नी पुज्ही रा था। 40तेबे भीड़ा मन्झा ले केसी केसिए ये गल्ला सुणी किन्हें बोल्या, “सच्चे ये माह्णुं ही से नबिया कि जेसरे आऊणें रा आस रखिरी।” 41होरिये बोल्या, “ये मसीह आ,” पर केसिए बोल्या, “क्या मसीहा गलील जिल्ले ले आऊंणा? 42पवित्र सास्त्रा मन्झ लिखिरा कि, मसीह राजा दाऊदा रे बंसा ले होर बैतलैहम गांऊँआं ले आऊंणा, जेथी दाऊद रैंहयां था।” 43इन्हा गल्ला री बजहा ले लोका मन्झ फूट पई गई। 44तिन्हा मन्झा ले कितने तेस जो पकड़ना चाहें थे, “पर केसिए तेस जो हाथ नी लगाया।”

यहूदी अगुवा रा विस्वास नी करणा

45तेबे स्पाही मुख्य याजक होर फरीसी लोका वाले वापस आये, होर तिन्हें स्पाहीया किन्हें बोल्या, तुस्से यीसू गिरफ्तार करी किन्हें कि नी ल्यान्देया? 46स्पाहिये जवाब दितेया कि, “केसी माह्णुंऐ कधी भी एह्ड़ी नौखी गल नी किती।” 47फरीसी लोके तिन्हा जो जवाब दितेया, “क्या तुस्से भी भरमाई जाई चुकिरे? 48क्या यहूदी मुखिये या फरीसी लोका मन्झा ले केसिए भी यीसू पर विस्वास कितेया? 49पर ये लोक जो मूसा री व्यवस्था नी जाणदे, स्यों ही यीसू पर विस्वास करहा ऐं। परमेसरा रा स्राप इन्हा लोका पर आ।” 50नीकुदेमुसे जो फरीसी अगुवे मन्झा ले एक था, से पैहले ई राती आई किन्हें यीसू किन्हें मिली चुकिरा था, तिन्हें तिन्हा किन्हें बोल्या, 51“क्या आस्सा री यहूदी व्यवस्था केसी आदमी जो जेबे तक कि पैहले तेसरी सुणी किन्हें जाणी नी ले कि, से क्या करहा, सजा देहां?” 52तिन्हें तेस जो जवाब दितेया, “क्या तू भी गलील जिल्ले रा आ? पवित्र सास्त्रा मन्झ तोप तेबे तुजो पता लगणा कि गलील जिल्ले ले कोई नबी जाहिर नी हूंणां।” 53तेबे सभ कोई आपणे-आपणे घरा जो चली गये।

Àwon tá yàn lọ́wọ́lọ́wọ́ báyìí:

यहून्ना 7: MJLNT

Ìsàmì-sí

Pín

Daako