यहून्ना 6

पांज हजार लोका जो खाणा खुआणा

(मत्ती 14:13-21; मरकु. 6:30-44; लूक. 9:10-17)

1इन्हा गल्ला ले बाद यीसू गलील समुद्रा मतलब तिब्रियुस झीला रे दूजे बाढे गया। 2होर एक बडी भीड़ तेसरे पीछे हुई गयी क्यूंकि जो चिन्ह से ब्मार पर करहा था स्यों तिन्हा जो देख्हा ऐं थे। 3तेबे यीसू प्हाड़ा पर चढ़ी किन्हें तेथी आपणे चेले साउगी बैठेया। 4होर यहूदी लोका रा फसहा रा साजा नेडे था। 5तेबे यीसूए एक बौह्त बडी भीड़ आपणे वाले आऊंदे देखी। यीसूए फिलिप्पुसा ले पूछेया कि, “आस्से इन्हारे कठे खाणा केथी ले खरीदिये?” 6पर तिन्हें ये गल तेस जो परखणे रे कठे बोली, क्यूंकि से आपु जाणहां था कि तेस क्या करणा।

7फिलिप्पुसे यीसू जो जवाब दितेया कि, “दो सौ ध्याड़े री कमाई रे बराबर कीमत भी तिन्हारे खाणा खरीदणे रे कठे पूरी नी हूणीं कि, तिन्हा मन्झा ले हर एकी जो थोड़ी-थोड़ी मिली सके।” 8यीसू रे चेले मन्झा ले समौन पतरसा रे भाई अन्द्रियासे यीसू जो बोल्या, 9“एथी एक मह्ठा आ जेस वाले जऊआ री पांज रोटीया होर दो मछिया ई। पर इतने लोका रे कठे यों क्या ई।” 10यीसूए बोल्या कि, “लोका जो बठ्याली देआ।” तेस जगहा बौह्त घाह था। स्यों लोक जो पांज हज़ार मर्ध थे, सब लोक घाह गास बैठी गये। (पर तिन्हें ज्नानिया होर बच्चे नी गिणीरे थे) 11तेबे यीसूए रोटिया लिती होर परमेसरा धन्यावाद करी किन्हें बैठिरे लोका मन्झ बांडी दिती। होर तिंहां ईं मछिया मन्झा ले जितनी स्यों चाहें थे तिन्हा जो बांडी दिती। 12जेबे स्यों खाई किन्हें रजी गये ता यीसूए आपणे चेले किन्हें बोल्या कि, “बचीरे रोटिया कठे करहा, ताकि कुछ भी बरबाद नी हो।” 13तेबे तिन्हें बचीरी रोटिया कठी किती होर तिन्हारे बारा छड़ोल्लू भरे। होर जऊआ री पांज रोटिया जो खाणे वाले ले बची गईरे थे स्यों भी कठा किती। 14जेबे यीसूए चिन्हा रा काम करी किन्हें दसी दितेया ता स्यों लोक ये देखी किन्हें बोल्दे लगे कि, “से नबी जो संसारा मन्झ आऊणें वाल़ा था, पक्का येई आ।” 15यीसूए ये जाणी किन्हें कि स्यों मुंजो राजा बणाणे रे कठे पकड़ना चाहें, होर से तेथी ले निकली किन्हें कल्हा प्हाड़ा पर चली गया।

यीसू रा पाणी पर चलणा

(मत्ती 14:22-33; मरकु. 6:45-52)

16फेरी जेबे सांझ हुई, ता यीसू रे चेले समुद्रा रे बाढे गये। 17होर स्यों किस्तिया मन्झ सुआर हुई किन्हें समुद्रा ले हुई किन्हें कफरनहूम सैहरा जो जांदे लगे। तेस टैम न्हयारा हुई गईरा था, होर यीसू हली तक तिन्हा वाले नी आईरा था। 18होर आंधी री वजहा ले समुद्रा मन्झ लैहरा उठदी लगी। 19जेबे स्यों किस्ती च्लांदे-च्लांदे लगभग पांज छे किलोमीटर दूर निकली गये, तेबे तिन्हें यीसू जो समुद्रा पर चलदे, होर किस्ती रे नेडे आऊंदे देख्या, होर स्यों डरी गये। 20पर यीसूए तिन्हा किन्हें बोल्या, “हांऊँ यीसू आ; डरा मत।” 21तेबे जाई किन्हें तिन्हें यीसू जो किस्ती मन्झ चढ़णे दितेया: होर जल्दी ही किस्ती तेस जगहा पूजी गयी जेथी जे स्यों जाणां चाहें थे।

लोक यीसू जो तोप्हा ऐं

22दूजे ध्याड़े जेह्ड़े लोक समुद्रा रे पार रही गईरे थे, ता तिन्हें ये देख्या कि, तेथी सिर्फ एक ई छोटी किस्ती थी, होर यीसू आपणे चेले साउगी तेस किस्ती पर नी चढ़ेया, पर सिर्फ तेसरे चेले ही गईरे थे। 23तेबे भी होर छोटी किस्तिया तिबिरियुस सैहरा ले तेस जगहा आई जेथी तिन्हें प्रभु रा धन्यावाद करणे ले बाद रोटी खाध्ही थी। 24एता कठे जेबे भीड़े देख्या कि, एथी ना यीसू आ, होर ना तेसरे चेले ऐं, स्यों भी छोटी-छोटी किस्तिया मन्झ सुआर हुई किन्हें यीसू जो टोल्दे-टोल्दे कफरनहूम सैहरा जाई पूजे।

यीसू जिन्दगी देणे वाली रोटी

25होर तिन्हें समुद्रा ले पार यीसू साउगी मिली किन्हें बोल्या, “हे गुरु तू एथी केभे आया?” 26यीसूए तिन्हा जो जवाब दितेया कि, “हांऊँ तुस्सा किन्हें सच्च -सच्च बोल्हा, तुस्से मुंजो एता कठे नी टोल्दे कि तुस्से चिन्ह देखे, पर एता कठे टोल्हा ऐं कि तुस्से रोटिया खाई किन्हें रजी गये। 27सड़ने वाल़े खाणे रे कठे मैहनत नी करा, पर तेस खाणे रे कठे मैहनत करा जो अनंत जिन्दगी देहां, जेह्ड़ी हांऊँ माह्णुं रे मह्ठे तुस्सा जो देणी। ये काम करणे रे कठे बापू परमेसरे मेरे पर हका री छाप लगाई दितिरी।” 28तिन्हें तेस किन्हें बोल्या, “परमेसरा रा काम करणे रे कठे आस्सा जो क्या करणा चहिए?” 29यीसूए तिन्हा जो जवाब दितेया, “परमेसरा रा काम ये आ कि, तुस्से मेरे पर विस्वास करा जिन्हें जे हांऊँ भेजिरा।” 30तेबे तिन्हें तेस किन्हें बोल्या, “तेबे तू होर केह्ड़ा जे चिन्ह आस्सा जो दसणे वाले आ ताकि आस्से तेस चिन्हा जो देखी किन्हें तेरे पर विस्वास करिए? एह्ड़ा क्या जो तू आस्सा जो दसणे वाले आ? 31आस्सा रे बापदादे जंगला मन्झ से स्वर्गीय खाणा खाध्या जेस जो मन्ना बोल्हा ऐं, क्यूंकि पवित्र सास्त्रा मन्झ लिखिरा आ कि, तिन्हें तिन्हा जो खाणे रे कठे स्वर्गा ले रोटी दिती।”

32यीसूए तिन्हा किन्हें बोल्या, “हांऊँ तुस्सा किन्हें सच्च -सच्च बोल्हा कि मूसे तुस्सा जो से रोटी स्वर्गा ले नी दिती, पर मेरा बापू तुस्सा जो स्वर्गा ले सच्ची रोटी देहां। 33क्यूंकि से रोटी जो परमेसर देहां, ये से रोटी जेह्ड़ी स्वर्गा ले उतरी किन्हें संसारा रे लोका जो जिन्दगी देहां ईं।” 34तेबे तिन्हें यीसू किन्हें बोल्या, “हे प्रभु, ये रोटी आस्सा जो हमेसा देआ कर।” 35यीसूए तिन्हा किन्हें बोल्या, “जिन्दगी देणे वाली रोटी हांऊँ ईं! जेस जे मेरे वाले आऊंणा तेस कधी भी भूखे नी रैंह्णां होर जो माह पर विस्वास करघा, तेस जो कधी सोख नी लगणी। 36हांऊँ तुस्सा किन्हें पैहले भी बोलिरा था कि, तुस्से हांऊँ देखी भी लईरा, तेबे भी विस्वास नी करदे। 37जितने भी लोक बापू मुंजो देहां स्यों से मेरे वाले आहूँआं ऐं, होर जो मेरे वाले आहूँआं ऐं, मां पक्का स्यों अपनाणे। 38क्यूंकि हांऊँ आपणी इच्छा नी, पर आपणे भेजणे वाले बापू री इच्छा पूरी करणे रे कठे स्वर्गा ले आईरा। 39होर मेरे भेजणे वाले बापू री इच्छा येई कि जितने लोक तुस्से मुंजो दितरे, तिन्हा मन्झा ले हांऊँ केसी जो भी नी गुआऊं पर हांऊँ तिन्हा जो आखरी ध्याड़े दबारा मरिरे मन्झा ले जिउंदे करी देऊँ। 40क्यूंकि मेरे बापू री इच्छा येई कि, जो कोई मह्ठे जो मनी किन्हें तेस पर विस्वास करहे, तेस अनंत जिन्दगी पाणी। होर मां स्यों आखरी ध्याड़े दबारा मरिरे मन्झा ले जिउंदे करी देणे।”

41तेबे यहूदी लोक यीसू रे बारे मन्झ गलांण करदे लगे एता कठे कि तिन्हें बोल्या था कि, “जो रोटी स्वर्गा ले उतरी, से हांऊँ ईं।” 42होर तिन्हें बोल्या, “कि ये युसुफा रा मह्ठा यीसू आ, जेसरे माऊ बापू जो आस्से जाणहां ऐं। तेबे से किधियो बोल्हा कि हांऊँ स्वर्गा ले आईरा?” 43यीसूए तिन्हा जो जवाब दितेया कि, “आपु मन्झ नी गलांण मत करहा। 44कोई भी मेरे वाले नी आई सक्दा, जेबे तक बापू, जिन्हें जे हांऊँ भेजिरा, से तेस जो मेरे वाले नी लई आये। होर मां से आखरी ध्याड़े दबारा मरिरे मन्झा ले जिउंदे करी देणा। 45केसी नबिये पवित्र सास्त्रा मन्झा ये लिखिरा आ कि, स्यों सब परमेसरा री तरफा ले सिखाई रे हुंगे। जेस केसिए बापू ले सुणेया होर सिखेया, से मेरे वाले आहूँआं।#6:45 यसा. 54:13 46एसरा मतलब ये नी आ कि केसिए बापू देख्या, पर जो परमेसरा री तरफा ले आ, सिर्फ तिन्हें ई बापू देख्या। 47हांऊँ तुस्सा किन्हें सच्च -सच्च बोल्हा कि, जो कोई विस्वास करहा, अनंत जिन्दगी तेसरी ई। 48हांऊँ जीवन देणे वाली रोटी ई। 49तुस्सा रे बापदादे जंगला मन्झ मन्ना खाध्या होर मरी गये। 50ये से रोटी ई जो स्वर्गा ले उत्रहा ई ताकि माह्णुं तेता मन्झा ले खाई सके होर नी मरे। 51जीवन देणे वाली रोटी जो स्वर्गा ले उतरीरी, से हांऊँ आ। अगर कोई एस्सा रोटिया मन्झा ले खाये, ता हमेसा जिउंदा रैंह्णां होर जो रोटी मां संसारा रे लोका रे कठे देणी, से मेरा मास आ।”

52एता पर यहूदी लोके ये बोली किन्हें आपु मन्झ झगड़दे लगे कि, “यीसू किहाँ आपणा मास खाणे जो देई सक्हा?” 53यीसूए तिन्हा किन्हें बोल्या, “हांऊँ तुस्सा किन्हें सच्च -सच्च बोल्हा जेबे तक तुस्से हांऊँ माह्णुं रे मह्ठे रा मास नी खान्घे, होर मेरा खून नी पिंघे, तेबे तक तुस्सा मन्झ जिन्दगी नी ई। 54जो मेरा मास खांहां होर मेरा खून पींहां, अनंत जिन्दगी तेसरी ई, होर आखरी ध्याड़े से मां दबारा मरिरे मन्झा ले जिउंदे करी देणा। 55क्यूंकि मेरा मास सच्चे खाणे री चीज ई, होर मेरा खून सच्चे पीणे री चीज ई। 56जो मेरा मास खांहां होर मेरा खून पीहां, से मेरे अंदर होर हांऊँ तेस अंदर बणी किन्हें रैंहयां 57जिहां जिउंदे परमेसर बापूए हांऊँ भेजिरा होर हांऊँ बापू री बजहा ले जिउंदा आ तिहां ई तेस भी जो मुंजो खांहगा तेस मेरी बजहा ले जिउंदे रैंह्णां। 58जो रोटी स्वर्गा ले उतरीरी से तेस मनणे साहीं नी कि से बापदादे खाधी, होर मरी गये। पर जेस केसी ये रोटी खाणी तेस हमेसा जिउंदे रैंह्णां।” 59यूं गल्ला तिन्हें कफरनहूम सैहरा रे एक यहूदी सभा मन्झ उपदेसा रे टैमा बोली।

अनंत जिन्दगी रे बचन

60एता कठे तेसरे साउगी चलने वाले मन्झा ले कई लोके ये सुणी किन्हें बोल्या कि, “ये गल्ला समझणे मन्झ बड़ी कठण ई; इन्हा जो कुण सुणी सक्हा?” 61यीसूए आपणे मना मन्झ ये जाणी किन्हें कि मेरे चेले आपु मन्झ एस गल्ला री बजहा ले गलांण करदे लगे, तिन्हा ले पूछेया, “क्या ये गल्ला तुस्सा जो मेरे पर विस्वास करणे ले रोक्हा ई? 62होर अगर तुस्से हांऊँ माह्णुं रा मह्ठा स्वर्ग जांदे देखणा, जेथी हांऊँ पैहले था ता क्या हूंणा? 63परमेसरा री आत्मा ता जिन्दगी देणे वाली ई, माह्णुं री सक्ति कुछ नी करी सकदी। जो गल्ला मैं तुस्सा किन्हें बोलिरी स्यों आत्मा री वखा ले आहूँईं होर जिन्दगी देणे वाली ई। 64पर तुस्सा मन्झा ले कितने एह्ड़े ऐं जो विस्वास नी करदे।” क्यूंकि यीसू ता पैहले ले जाणहां था कि जो विस्वास नी करदे, स्यों कुणहें? होर केस हांऊँ पकड़वाणा। 65होर तिन्हें बोल्या, “इधी कठे मैं तुस्सा किन्हें बोल्या था कि जेबे तक केसी जो बापू नी भेज्दा तेबे तक से मेरे वाले नी आई सकदा।”

पतरसा रा विस्वास

66तेस टैमा ले बाद, तेबे यीसू साउगी चलने वाले कई सारे लोक तेसरे बौह्त बरखलाफ हुई गये होर फेरी स्यों तेस साउगी नी रहे। 67तेबे यीसूए तिन्हा बारा चेलेया किन्हें बोल्या, “क्या तुस्से भी जाणा चाहें?” 68समौन पतरसे तेस जो जवाब दितेया कि, “हे प्रभु आस्से केस वाले जाईये? अनंत जिन्दगी री गल्ला ता तेरे ही वाले ई। 69होर आस्से तेरे पर विस्वास कितेया, होर जाणी गये कि, परमेसरा रा तरफा ले आईरा पवित्र मसीहा आ।” 70यीसूए तिन्हा जो जवाब दितेया, “मैं तुस्से बारा चेले चुणिरे, पर तुस्सा मन्झा ले एक सैतान रे बसा मन्झ आ।” 71ये यीसूए समौन इस्करयोति रे मह्ठे यहूदा इस्करयोति रे बारे मन्झ बोल्या, क्यूंकि तिन्हा बारा चेले मन्झा ले एक आ, होर सेई यीसू जो पकड़वाणे वाल़ा था।

Àwon tá yàn lọ́wọ́lọ́wọ́ báyìí:

यहून्ना 6: MJLNT

Ìsàmì-sí

Pín

Daako