यहून्ना 20
20
खाली डुआर
(मत्ती 28:1-8; मरकु. 16:1-8; लूक. 24:1-12)
1तुआरा रे ध्याड़े भ्यागा-भ्यागा ई हल्ली न्हयारा ई था, मगदल गांऊँआं री मरियम डुआरा वाले आई। होर डुआरा रे दुराजे वाले ले से पात्थर हट्टीरा देख्या। 2तेबे स्यों दौड़ी होर समौन पतरसा होर दूजे चेले किन्हें जेस किन्हें जे यीसू प्यार करहा था आई किन्हें बोल्या, “स्यों प्रभु री ल्हासा जो डुआरा वाले ले काढी किन्हें लई गईरे, होर आस्से नी जाणदी कि, तिन्हें से केथी रखिरा।”
3तेबे पतरस होर दूजा चेला बाहर निकली किन्हें डुआरा बखा जो दौड़े। 4होर स्यों दुहें साउगी-साउगी दौड़ेया करहा ऐं थे, पर दूजा चेला पतरसा ले अगे बढ़ी किन्हें डुआरा वाले पैहले पूजी गया। 5होर तिन्हें झुकी किन्हें देख्या कि तेथी कफना रे कपड़े पईरे, तेबे भी से अंदर नी गया। 6तेबे समौन पतरस भी तेसरे पीछे-पीछे पुज्हेया होर से डुआरा रे अंदर गया होर तिन्हें भी तेथी कफना रे कपड़े पईरे देखे। 7होर से कपड़ा जेस किन्हें जे तेसरा मुंह ढखिरा था, से कपड़ा कफना रे कपड़े साउगी नी पईरा था पर लग जे एक जगहा तैह लगिरा देख्या। 8तेबे दूजा चेला भी जो डुआरा पर पैहले पुज्हेया था, से अंदर गया होर तिन्हें देखी किन्हें विस्वास कितेया कि यीसू मरिरे मन्झ ले जिउंदा हुई गईरा। 9क्यूंकि ऐबे तक तिन्हें पवित्र सास्त्रा री ये गल नी समझीरी थी कि, यीसू मरिरे मन्झा ले जिउंदे हूंणां पक्का आ। 10तेबे स्यों चेले आपणे घरा जो वापस चली गये।
मगदल गांऊँआं री मरियमा रा यीसू जो देखणा
(मत्ती 28:9,10; मरकु. 16:9-11)
11पर मगदल गांऊँआं री मरियम रोंदी बिलख्दी डुआरा वाले ले बाहर ई खड़ी रही गई। होर से रोंदे-रोंदे डुआरा मन्झ देखणे रे कठे झुकी। 12जेथी जे यीसू री ल्हास रखिरी थी तेथी तेस्से दो स्वर्गदूत देखे जिन्हें चिट्टे कपड़े पैहनीरे थे एकी जो सरहाणे होर दूजे जो पैंदे बैठिरे देख्या। 13तिन्हें तेस्सा ज्नाने किन्हें बोल्या, “हे ज्नाने तू किधियो रोंहां ईं?” तेस्से तिन्हा किन्हें बोल्या, “स्यों मेरे प्रभु री ल्हासा जो लई गये होर हांऊँ नी जाणदी कि तिन्हें से केथी रखिरा।” 14जेबे तेस्से एह्ड़ा बोल्या से पीछे फीरी होर तेस्से तेथी यीसू खड़ीरा देख्या होर तेस्से से नी पछ्याणया कि ये यीसू आ। 15यीसूए तेस्सा किन्हें बोल्या, “हे ज्नाने तू किधियो रोंहां ईं? तू केस जो तोप्हा ई?” तेस्से यीसू जो माली समझी किन्हें तेस किन्हें बोल्या, “हे माहराज, अगर तू तेसरी ल्हासा जो लई गईरा ता मुंजो दसी दे कि तैं से केथी रखिरा, होर मां से ल्हास लई जाणी।” 16यीसूए तेस्सा किन्हें बोल्या, “मगदल गांऊँआं री मरियम!” से पीछे मुड़ी होर तेस्से आपणी भासा मन्झ बोल्या, “हे गुरु।” 17यीसूए तेस्सा किन्हें बोल्या, “मेरे पैरा किन्हें लिपटी किन्हें मुंजो मत रोक, क्यूंकि हांऊँ हल्ली बापू वाले नी गईरा। पर पैहले मेरे भाईया वाले जाई किन्हें तिन्हा जो बोली दे कि, ‘हांऊँ आपणे बापू होर परमेसर होर जो तुस्सा रा भी बापू होर परमेसरा वाले जाया करहा।’” 18मगदल गांऊँआं री मरियमे जाई किन्हें चेलेया जो दसेया कि, “मैं प्रभु देख्या।” होर यीसूए ही ये गल्ला तेस्सा किन्हें किती।
चेले पर जाहिर हूंणां
(मत्ती 28:16-20; मरकु. 16:14-18; लूक. 24:36-49)
19तेस तुआरा रे सांझ्के टैमा जो हफ्ते रा पैहला ध्याड़ा था, चेले यहूदी अगुवे रे डरा रे मारे दुराजे बंद करी किन्हें बैठीरे थे, तेबे यीसू आया होर तिन्हारे बीचा मन्झ खड़ी किन्हें तिन्हा किन्हें बोल्दा लग्या, “तुस्सा जो सांति मिलो।” 20होर ये बोली किन्हें तिन्हें आपणा हाथ होर आपणी पसली रे जख्म तिन्हा जो दसे, तेबे चेले प्रभु जो देखी किन्हें खुस हुए। 21यीसूए फेरी तिन्हा किन्हें बोल्या, “तुस्सा जो सांति मिलो! जिहां बापूए हांऊँ भेजिरा, तिहां ईं हांऊँ भी तुस्सा जो भेज्हा।” 22ये बोली किन्हें तिन्हें तिन्हा पर फुकर मारी होर तिन्हा किन्हें बोल्या, “पवित्र आत्मा लऊआ। 23जिन्हारे पाप तुस्से माफ करघे तिन्हारे कठे पाप माफ हुई जाणे होर जिन्हारे पाप तुस्से माफ नी करघे, स्यों माफ नी हूणे।”
थोमा पर जाहिर हूंणां
24पर बारा चेले मन्झा ले एक चेला थोमा जेस जो दिदुमुस भी बोल्हा ऐं, जेबे यीसू आया ता से बाकी चेलेया साउगी नी था। 25जेबे होर चेले तेस किन्हें बोल्दे लगे कि, “आस्से प्रभु देखी लईरा,” तेबे तिन्हें तिन्हा किन्हें बोल्या, “जेबे तक हांऊँ तेसरे हाथा मन्झ मेखा रे सुराख नी देखी लैंघा, होर मेखा रे सुराखा मन्झ आपणी गुठी नी पाई लैंघा, होर तेसरी पसली मन्झ जेथी भाले री मारिरा था तेथी हाथ पाई किन्हें नी देखी लू, तेबे तक मां विस्वास नी करणा कि यीसू मरिरे मन्झा ले जिउंदा हुई गईरा।” 26आठ ध्याड़े ले बाद यीसू रे चेले दबारा घरा रे अंदर थे। होर थोमा तिन्हा साउगी था, होर दुराजे बंद थे, तेबे यीसूए आई किन्हें तिन्हारे बीचा मन्झ खड़ा हुई किन्हें बोल्या, “तुस्सा जो सांति मिलो।” 27तेबे यीसूए थोमा किन्हें बोल्या, “आपणी हाथ एथी ल्याई किन्हें मेरी पसली मन्झ पा होर सक नी कर पर विस्वास कर की हांऊँ जिउंदा हुई गईरा।” 28ये सुणी किन्हें थोमे जवाब दितेया, “हे मेरे प्रभु, हे मेरे परमेसर!” 29यीसूए तेस किन्हें बोल्या, “तैं ता मुंजो देखी किन्हें विस्वास कितेया। पर धन्य ऐं स्यों जिन्हें जे हांऊँ नी देख्या पर बगैर देखे विस्वास कितेया।”
एस कताबा जो लिखणे रा मकसद
30यीसूए होर भी बौह्त सारे चिन्ह चेले रे साम्हणें दसे, जो एस कताबा मन्झ नी लिखिरे। 31पर ये चिन्ह इधी कठे लिखे गईरे, ताकि तुस्से विस्वास करी सको कि, यीसू ई परमेसरा रा मह्ठा मसीह आ, होर तेस पर विस्वास करी किन्हें अनंत जिन्दगी पाई सको।
Àwon tá yàn lọ́wọ́lọ́wọ́ báyìí:
यहून्ना 20: MJLNT
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
This work is licensed under Creative Commons Attribution-ShareAlike 4.0 License.
